دنيا المونولوج ( متجدد ) [الأرشيف] - منتدى سماعي للطرب العربي الأصيل

hany57

08/10/2014, 23h26

السلام عليكم ورحمة الله وبركاته
الإخوة الكرام
مما لا شك في أن فن المونولوج قد أوشك على الإندثار
حتى فى العشرين سنة الماضية اقتصر دور المونولوجست
على إلقاء النكات وتقليد الفنانين والفنانات
أما عن أسباب اندثار هذا اللون من الغناء ( فى رأيى الشخصى
وبعيدا عن أى دراسات نقدية ) فهى كالتالى :
1 - كسل كتاب الأغانى عن كتابة المونولوج لقلة العائد المادى
2 - ينطبق هذا السبب على الملحنين أيضا
3 - قلة الحفلات العامة المشتركة ( أى مطرب دلوقتى بياخد الليلة لحسابه )
4 - تقلص دور الإذاعة
5 - إحجام القنوات العامة والخاصة عن تشجيع أصحاب ذلك الفن واللهث وراء
الكليبات المصورة ( والخليعة بالأكثر )
6 - عدم وجود جهة ( حكومية أو غير حكومية ) مؤمنة بهذا الفن وعلى استعداد
لإعادة إحيائه حتى ولو خسرت ماديا

الأسباب كثيرة إذن
ولكن عن نفسى سأحاول الكتابة فمحاولاتى لن تتعدى ذلك
ولا أظن أن هذه الكتابات سترى النور فى يوم ما تلحينا أو إلقاء
ولكن هذا ما أستطيع عمله
وبالتأكيد ( إن شاء الله ) سيأتى من يشاركنى هذا اللون من الكتابة
واحد أو اثنين أعرفهما ( ستعرفونهما فور حضورهما ) وربما وجد غيرهما
ننتظر ونرى
ونبدأ على بركة الله

hany57

08/10/2014, 23h45

1 - الحما
-------------

ياللى تلوم لوم إنما .. خايف عليك يوم ربما
يصيبك اللى صابنى يوم .. ويرزقك ربى بحما
م العمر بلغت أرذله .. ولسانها لسه ما أرذله
ودعوتى فى نهار وليل .. رفعتها لرب السما
ياللى تلوم لوم إنما

تلومنى ليه على كحتى .. وعاللى راح من صحتى
كنت لحماتى مرمطون .. واسأل طريقى وسكتى
عربيتى وانا فاضيين له .. ودا لاجل خاطر بنتها
كات أرض بور وزرعتها .. لا طلع لى زرع ولا نما
ياللى تلوم لوم إنما

ضهرى خلاص منى انحنى .. ولا كنت ابطل يوم غنى
الله يجازى اللى كان .. واللى عليا فى يوم جنى
أقول لها أحلى الكلام .. ما سمعت منها غير الملام
يا حماتى والله حرام .. خافى فى يوم رب السما
ياللى تلوم لوم إنما

تلوم على انى فقير .. وياما كنت غنى زمان
ومرض حماتى كان خطير .. قلت العلاج دا عليا كان
وليها خمسة من الرجال .. ما حد قب فى يوم بمال
ودا حرام وللا حلال .. ووشوش ولادها مفيش دما
ياللى تلوم لوم إنما

وتغير كمان من بنتها .. لو جبت يوم حاجة لها
تبص ع الحاجة وتقول .. لازم تجيب لى زيها
صابر وراضى بقسمتى .. واللى حصل لى فى دنيتى
يارب اقبل دعوتى .. وجازينى على ظلم الحما
ياللى تلوم لوم إنما

اوعاك تلومنى انى صابر .. عليهم انا ما رديت فى يوم
طبعا لسانى ع الرد قادر .. يقول لى أدبى ملوش لزوم
أصل الصابر عمره ما خاب .. وكمان عرفنا من الكتاب
يوفا أجره بدون حساب .. ربك بيعطى كيفما
ياللى تلوم لوم إنما

---------------------

هانئ الجمل

حمدى شبانة

09/10/2014, 15h23

حمدى شبانة

09/10/2014, 15h45

( المنولوج الثانى )

فين الطرب والمطربين
ــــــــــــــــــــــــــــــــ

آه م الطرب والمطربين
القلب منهم صار حزين
لحن وكلام
مبقاش تمام
جرالكو إيه ؟ يافنانين
آه م الطرب والمطربين

كان الكلام زمان جميل
يوصف ف حب وليل ونيل
وقالوا عن خد الجميل
عن الورود
عن القدود
عن النخيل
لمَّا يميل ساعة الأصيل
راح الكلام الحلو فين ؟
جرالكو إيه ؟ يافنَّانين
آه م الطرب والمطربين ؟

بقينا فى عصر الكِلِب
واحد على المسرح يِدِب
حواليه بتتقصَّـع بنات
اللى بنصحى عليه نبات
ف كل وقت وكل حين
جرالكو إيه يافنَّانين ؟
آه م الطرب والمطربين

نفسى تعود ألحان زمان
نِسمع قانون .. عود .. كمان
نعيش مشـاعِـر
قالها شاعِـر
حس بينا مُلحنين
حبِّينا بيها المُطربين
جرالكو إيه ؟ يافنَّانين
فين الطرب والمُطربين ؟
ــــــــــــــــــــــــــــــــ

حـمـدى شـبـانـة

hany57

09/10/2014, 22h33

الصديق الغالى دكتور هانى الجمل

ربنا يسعد قلبك يافنان لأنك أسعدتنى بموضوع المنولوج
تسألنى ليه ؟ أقولك لأنك بتحاول إحياء أحد فنون الكتابة
التى إندثرت وماتت ... وهى محاولة تستحق كل تشجيع
وطبعاً أقل واجب منى هو أن أحاول مجاراتك
فى كتابة بعض المنولوجات فى موضوع ( دنيا المنولوج )
لأرد لك الدين الذى فى عنقى بمشاركاتك الرائعة فى الأدباتى

وكل أملى أن ينال موضوع ( دنيا المنولوج ) مايستحقه
من متابعة ... ويبدو أننا سنتخصص فى إحياء بعض فنون
الكتابة التى ماتت بالفعل ... والله المستعان

أكرر شكرى لك يادكتور هانى
وإنتظرنى بمنولوج فى المشاركة التالية

أخى وصديقى
الأستاذ حمدى شبانة
بالتأكيد
كنت أعلم أنك ستأتى سريعا
فهذا ما عهدته فيك
بالإضافة للصداقة وأخلاقك النبيلة
مش علشان كدا بس
إنما علشان انت فى الأصل فناااااااااااااااان
وفنان كبير كمان
أستأذنك
أروح الأدباتى أعمل مشاركة عن فهد بلان
وراجع لك تانى الليلادى ( إن شاء الله ) بمونولوج
ايتنانى

hany57

09/10/2014, 23h06

3 - شجع
----------------
شجع شجع أيه هيهمك .. شجع شجع واحنا معاك
بس اوعا يوم تحرق دمك .. عايز الفوز دايما وياك
منتاش وحدك .. تلعب وحدك
الفوز عادته .. بييجى هنا مرة ومرة هناك
شجع شجع واحنا معاك

انت يا صاحبى ليه تتعصب .. وتعصبنا يفيدنا بأيه
إلا عداوة سببها غباوة .. لو نتخانق نكسب أيه ؟
تعمل مجدع .. ولا بيهمك
والنار تولع .. ولا بيهمك
وعداوة نورثها ولادنا .. شجع صح انا باترجاك
شجع شجع واحنا معاك

كل واحد لفريقه يشجع .. أى فريق محتاج تشجيع
صورتك داخلة جوا بيوتنا .. صوتك جاى مع صوت لمذيع
شجع شجع .. أيه هيهمك
بلفظ مؤدب .. اوعا يهمك
تعرف ان اللفظ الجارح .. يدخل بيت تأثيره فتاك
شجع شجع واحنا معاك

ياللا اتعلم بقا م الكورة .. شوية هنا وشوية هناك
ممكن يخلص ماتش بحاله .. ما تلقا الكورة تهز شباك
يبقا تعادل .. اوعا يهمك
ومفيش فايز .. اوعا يهمك
هيا كدا الكورة وعمايلها .. شوية معانا شوية معاك
شجع شجع واحنا معاك

------------------------

هانئ الجمل

سعدالشرقاوى

09/10/2014, 23h19

(4)

ريّح نفسك....

ريّح نفسك عمري ما ح أقدر
أقتل أخويا وصاحبي وجاري
ولا يوم ح أسمح إن عدوّي
يلعب بيّه ويسكن داري
أنا قرّرت أصالح بلدي
بيعها براحتك أصل أنا شاري
لازم أمسح دمعة وطني
وأغسل من أفعالك عاري
,,,
يا اللي بتكره جيشها ونيلها
وكاره كل جمال فى خدودها
يا اللى ساكنها وواكل خيرها
وجاحد ما يهمّكش حدودها
نفسك تهدم كل كيانها
وداير تقطف كل ورودها
سمعت شافت كل عمايلك
عرفت إنك مش ح تفيدها
والارهاب بيبهدل فيها
وانت تقول له اتجدعن خدها
,,,
ليه بتولـّع رمز بلادك
يا اللى بتحرق علم الدولة
عامل وطنى وروحك فيها
ورجلك تلعب تحت الطاولة
لو حبيتها وخوفت عليها
كنت حافظت عليهم أولى
عشـْت العمر تراعى فريقك
وأمّا وصلت خسرت الجولة
مرّة معانا ومرّة علينا
لمّا شبعنا يا روحي مزاولة
,,,
كنت أتمنى أشوفك جنبي
وايد على إيد الناس تبنيها
نرمي الطوق علشان إنقاذها
وناس ع البر تشد إيديها
لكن شايفك دورك سلبي
ورامى الحمل بحاله عليها
مركب جوّه الموج بتعافر
وانت مصمّم تخرم فيها
آسف لمّا أغمّض عنـّك
يبقى الكل ح يغرق بيها

حمدى شبانة

10/10/2014, 16h30

( 5 )

ياللى عاوزين العيال
ــــــــــــــــــــــــــــــــ

ياللى ماشية بالتمام
الولادة ف كُل عام
صحِتك ضاعت هَدَر
:cool:
جوزها بيقول العيال
كُترُهم عزوة ياخال
ينفعوا عـند الكَبَـر
:mdr:
تلتقيه ف الهم بات
عنده خمسة م البنات
بس نِفسُه فى دَكَـر
:crazy:
بُكرة أنا شايفه أمامى
اللى عاطل أو حرامى
خدوا من غيركُم عِبَر

بكرة جايز يلغنوك
يعنى مش حينفعوك
أصل عِيشِتهم كّدَر

يامُثبِّت العقول
كل يوم حياكلو فول
ونتا منحول الوبّر
:mdr:
والمعيشة مش تمام
فى ملابس أو طعام
راجل البيت افتقر

يكفى بس عيلين
يطلعوا متعلمين
قيمة مابين البشر
:crazy:
ــــــــــــــــــــــــــــــــــــــــــ

حـمـدى شـبـانـة

حمدى شبانة

10/10/2014, 16h32

( 5 )

ياللى عاوزين العيال
ــــــــــــــــــــــــــــــــ

ياللى ماشية بالتمام
الولادة ف كُل عام
صحِتك ضاعت هَدَر
:cool:
جوزها بيقول العيال
كُترُهم عزوة ياخال
ينفعوا عـند الكَبَـر
:mdr:
تلتقيه ف الهم بات
عنده خمسة م البنات
بس نِفسُه فى دَكَـر
:crazy:
بُكرة أنا شايفه أمامى
اللى عاطل أو حرامى
خدوا من غيركُم عِبَر

بكرة جايز يلعـنوك
يعنى مش حينفعوك
أصل عِيشِتهم كّدَر

يامُثبِّت العقول
كل يوم حياكلو فول
ونتا منحول الوبّر
:mdr:
والمعيشة مش تمام
فى ملابس أو طعام
راجل البيت افتقر

يكفى بس عيلين
يطلعوا متعلمين
قيمة مابين البشر
:crazy:
ــــــــــــــــــــــــــــــــــــــــــ

حـمـدى شـبـانـة

hany57

10/10/2014, 23h36

hany57

13/10/2014, 22h54

( 6 )
ميكروفونات البياعين
------------------

ارحموا شوية يا عالم
ميزوا شوية يا هوه

كل يوم من الأدان
تخرموا منا الودان
صوت نشاز ووحش كمان
فى النشاز مفيش أخوه

ارحموا شوية يا عالم
ميزوا شوية يا هوه

صوت غليظ فى ميكوفون
جى بيشق السكون
طير النوم م العيون
دا حرام ليه تعملوه

ارحموا شوية يا عالم
ميزوا شوية يا هوه

ميكروفون على ربع نقل
وللا كارو وجره بغل
والمنادى مفيشى عقل
البصل والتوم أهوه

ارحموا شوية يا عالم
ميزوا شوية يا هوه

عندنا الكوسة طرية
والبطاطس للقلية
خضرة عندى الملوخية
طازة كله هتشوفوه

ارحموا شوية يا عالم
ميزوا شوية يا هوه

والجوافة واللمون
والبلح على كل لون
سعر جملة للزبون
ياللا حالا الحقوه

ارحموا شوية يا عالم
ميزوا شوية يا هوه

والطماطم والخيار
فلفلى أحمر ونار
الحقوا ياللا يا شطار
الزتون وخللوه

ارحموا شوية يا عالم
ميزوا شوية يا هوه

يبقا دا اسمه كلام يا عالم
لو واحد عيان ونايم
تزعجه وتبقا ظالم
ذنبه أيه يا خلق هوه

ارحموا شوية يا عالم
ميزوا شوية يا هوه

وللا طالب كان بذاكر
قضى وقته وليله ساهر
نفسه دايما يبقا شاطر
فى راحته ليه تيجوا تزعجوه

ارحموا شوية يا عالم
ميزوا شوية يا هوه

البياعة مش حرام
بس مش وقت المنام
والندا سماعه غرام
أيام زمان لو تسمعوه

ارحموا شوية يا عالم
ميزوا شوية يا هوه

كان بيجى الصوت حنين
يشرح الأوصاف يبين
والخضار كان سعره هين
زمن جميل لو تذكروه

ارحموا شوية يا عالم
ميزوا شوية يا هوه

------------------------------

هانئ الجمل

سعدالشرقاوى

14/10/2014, 05h42

(7)

مش ح أقتل أخويا ....

مُش ح اقتل اخويا ولا ف مرّة
تروح إيدى عليه
ولا ح اسمح أبدا بالمرّة
لواحد يأزيه
دى بلادنا وبنحافظوا عليها .. الله الله
وبنحمي حدودها وأراضيها .. الله الله
عايزين نسعدها ونرضيها
بتعاندوا ف إيه
,,,
مش ح اقتل اخويا إلعب غيرها
ياسعادة البيه
روح شوفلك واحد مش مصرى
عشان تلعب بيه
دا شـْريكي ف وطني وطول عمره .. الله الله
وأنا عامله كبيري وطوع أمره .. الله الله
والروح بتهون علشان خاطرُه
وعشان أحميه
,,,
مش ح اقتل اخويا عشان كرسي
ولا حبّة مال
قوم فـُضّها سيرة ابعد عنيّ
بلا لعب عيال
كان يوم ما عبرنا ايده ف ايدى .. الله الله
كان دمّه بيسْرح فى وريدى .. الله الله
لا انا عبدك ولا ح تكون سيدي
تكـْريني عليه
,,,
مش ح اقتل اخويا وانا وهوّ
ح نبني الاوطان
ويجينا الخير برّه وجوّه
والنور ح يبان
لو كنت شيطان ابعد عنيّ .. الله الله
أرجوك اوعه تقرّب منيّ .. الله الله
دا اخويا وفى العين والننيّ
والروح تفديه
,,,
مش ح اقتل أخويا عشان ريشة
بتـقوّي دراعي
ولا ح أقلع عينى بتهـْويشة
من طرف صباعي
وأجيبه منين لو يوم سابني.. الله الله
وأندم وضميري يأنبني .. الله الله
وأجاوب كيف لو يوم إبني
يسألني عليه

hany57

15/10/2014, 23h02

( 8 )
الشبكة مشغولة
-----------------
رنة ورنة وكمان رنة .. يا شاغل الشبكة استنا

ليه يا شباب شاغلين الشبكة .. فى كلام ( ألش ) ومعاكسات
قال أيه الواد دا طلع ( فاكس ) .. وملوش فى كلام ويا بنات
ما تبطلشى كلام لو شاحن .. أو بتشغل فى ( المسدات )
وتعيد فى كلام عمره ما فادك .. واحسن لاعب فى موسم فات
ياخوان للتليفون دا وظيفة .. ومهمة وقت الأزمات
لو عيان عايز الإسعاف .. وانتم شاغلين الشبكات
على بال متفضولنا الشبكة .. نلقا صاحبنا عملها ومات
وان قلنالكم خفوا الرنة .. تقولوا ياخوانا مالكو ومالنا
رنة ورنة وكمان رنة .. يا شاغل الشبكة استنا

وانتى يا ستى جارتك جنبك .. يفصل بينكم عرض الشارع
ماسكة التليفون مابتتهدى .. وبتسألى عن أيه بتابع
وقناة أيه بتعيد فى مسلسل .. طبيخك شاط بوتاجازك والع
وانتى بترغى ولا على بالك .. لو حتى سقف البيت واقع
طول الوقت شاغلة الشبكة .. وناس عطلانة وراها منافع
اتفرجوا واتبسطوا مفيشى .. فيه يوم أبدا عندنا مانع
بس سيبولنا الشبكة شوية .. روحى لجارتك عدى الشارع
لو فيه طارئ ما بيستنا .. وافهمى قصدى ما تزعلى منا
رنة ورنة وكمان رنة .. يا شاغل الشبكة استنا

وانت يا روميو يا وحيد عصرك .. يا شايل كيلو چل فى شعرك
تضرب ارقام غاوى معاكسة .. قال تسأل على واحد صاحبك
ترجع تانى تضرب فى النمرة .. لو الرد الأول عجبك
ما تكررشى النمرة أبدا .. لو رد عليك راجل شتمك
فوق يا أخينا يا تلقيحة .. عيب منك واختشى على دمك
نفرض ان شبكتك صادت .. بعدها قول لى بقا أيه غرضك ؟
فكر قبله ورد عليا .. وخليك فاكر أمك واختك
وسيب الشبكة وابعد عنا .. ربنا يغفر لنا ياخوانا
رنة ورنة وكمان رنة .. يا شاغل الشبكة استنا

----------------------------

هانئ الجمل

حمدى شبانة

18/10/2014, 18h08

9 ـ التدخين
ــــــــــــــــــــشوفوا ياناس اللى جرالى
من السيجارة والتدخين
من كام سنة كُنت مرَبْرَب
وصحت جامدة وتخين
وكُنت باكُل ف الطقة
الواحدة أكتر من رغيفين
لحد ماصاحبت شحاتة
وعبدُه ويَّا الأسطى حسين
قالولى : دَخَن متخافشى
مااحنا بصحتنا وجامدين

قالوا تمنها شيئ هايف
يعنى ياصاحبى حتبقا بكام
يوميها ولَّعت سيجارة
دلوقتى بشرب علبة تمام
الصحة وقتها ساعدتنى
لكن مع مرور الأيام
الكُحة مسكت حنجرتى
خلتنى صاحى الليل مابنام
رقدت ف البيت كام جُمعة
بين الدوا .. وبين البرشام

الصحة صبحت عدمانة
لاتسُر عدو ولا تِرضِى حبيب
وسنانى صفرة مصدِّية
ملخلخة وحخلعها قريب
جسمى بقا شبه الموميا
عملت أبونيه عند طبيب
دا غير كمان كتَّر خيركُم
جيبى أصبح أنضف جيب
آدى السيجارة وعمايلها
دى غلطة منِّى وأكبر عيب
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــ

حمدى شبانة

23/10/2014, 19h04

10 ـ الرحمة يادكتور
ـــــــــــــــــــــــــــــ

الرحمة حبَّة يادكتور
خلِّيك حنيِّن عالمرضى
أصل المريض دايماً معذور
راعى الضمير ربَّك يرضَى
خلِّيك حنيِّن عالمرضى

الكشف غالى مكانش قليل
وكتبلى لِسْـتَة م التحاليل
خلاَّنى اصدق انى عليل
معادش نوم ف نهار أو ليل
ونا اللى كنت زمان وردة
خلِّيك حنيِّن عالمرضى

الأدوية شيئ مش معقول
حُفن وأقراص مع كبسول
فوَّار كمان علشان البول
علاج عليه أمشى على طول
يعنى الخلاصة بقيت خُـردة
خلِّيك حنيِّن عالمرضى

hany57

06/11/2014, 22h41

( 11 )
قرعة وللا مزاد وللا .....
----------------------
حلمت مرة انى حاكم دولة .. ( مع احترامى للحكام )
وقلم ربنا مرفوع عنا .. اذا ما كنا يا خلق نيام
علشان كدا وبدون تلميح .. هقول كلامى بشكل صريح
وأنا الحاكم حر فى حكمى .. وماحدش له عندى كلام
مع احترامى للحكام

لقيتنى حاكم دولة فقرانة .. وكمان زايدة فى التعداد
من حالها الخلق طهقانة .. تكسب عيشها يدوب بالكاد
وكل خمسة يناموا فى أوضة .. وكأنها أصبحت الموضة
قلت هنبنى مبانى جديدة .. لجل الخلق ما تبقا سعيدة
لما أحب بقا أوزعها .. تبقا قرعة .. وللا مزاد ؟
لو قرعة راح تبقا بكام ؟ .. وللا مزاد ترسى على كام ؟
والغلبان راح يدفع كام .. مع احترامى للحكام

ولقيت أرض انا بستصلحها .. بعد ما كات محسوبة ع الصحرا
قلت الفلاح يتملكها .. بدل يوماتى شغل السخرة
وكمان خريج الكلية .. يبقا نصيبه فدادين خمسة
أحسن من قعدته فى القهوة .. وللا يروح القسم فى كبسة
تفتكروا لو جينا نوزع .. ندى لقديم وللا جديد ؟
والمتجوز هوا الأولى .. وللا العازب خالى الإيد ؟
وتبقا قرعة وللا مزاد ؟ .. ما تردوا عليا ياولاد
لو قرعة راح تبقا بكام ؟ .. وللا مزاد ترسى على كام ؟
والغلبان راح يدفع كام .. مع احترامى للحكام

ولقيت لو راجل وولاده .. دول يلزمهم بيت من بابه
نديله الأرض وهيبنى .. فرجه فى كعبه يسوى حسابه
سوا راح نبنى مدينة جديدة .. وأيامهم راح تبقا سعيدة
ودخل الفرد حتما يعلا .. شغل عايز إيد عاملة جديدة
وتبقا قرعة وللا مزاد ؟ .. ما تردوا عليا ياولاد
نسيت ساعتها انى الحاكم .. واسأل سعر المتر بكام ؟
لو بالقرعة انا عارف حظى .. نحسى راكبنى من أعوام
وللا مزاد دخلوا التجار .. والأسعار هتزيد بتمام
هتزيد تبقا نار النار .. وتزيد على مر الأيام
مع احترامى للحكام

-----------------------------------

هانئ الجمل

hany57

18/11/2014, 23h01

( 12 )
الضريبة العقارية
--------------------------

ياللا ياخويا انت وهيه .. من غير مناكفة ولا أذية
علشان متقعدوا فى بيوتكم .. هاتوا الضريبة العقارية

فى أى بيت راح تبقا فيه .. لازم هتدفع عليه ضريبة
لو حتى خن سكنت فيه .. وفرشتك فيه الزكيبة
أو حتى نمت ويا البهايم .. يبقا هتدفع ع الزريبة
أصل ياخويا انت وهيه .. مصر مزنوقة شوية
بالذوق بالعافية راح تدفع .. لنا الضريبة العقارية

وماعندناشى لجنة طعون .. ولا لايحة تلزمنا بها
لو حاسس انك كدا مغبون .. عندك محاكم روح لها
ولو المحامى شغله مضمون .. هتدفع أكتر منها
يبقا تهدى اللعب شوية .. سيبك بقا من رفع قضية
وتدفع اللى ربطته عليك .. من الضريبة العقارية

لو ما دفعتش انت حر .. الحجز راح يبقا إدارى
وبيتك انت حارس عليه .. دا غصب عنك اضطرارى
وييجى يوم نبيعه فى مزاد .. دمعك تشوفه ع الخد جارى
تاخد العيال ويا ولية .. ومش تاخدوا الزراعية
وتمد إيدك بالسؤال .. لجل الضريبة العقارية

فكرتونا بشغل الجباه .. وفلوس تروح الآستانة
والفقر مرسوم ع الجباه .. وعيالنا من كام يوم جعانة
والصبر دا له منتهاه ..والخلق ياخوانا تعبانة
متخلوا فى الوش شوية .. من الأحمر وبلا أذية
وترحموا الناس لو مرة .. والغوا الضريبة العقارية

-----------------------------------------------

هانئ الجمل

حمدى شبانة

19/11/2016, 11h33

شـارِعـنـا
------------

شـارعـنـا دا مـعــروف بـحـاجـات
ف كـل سـاعـة .... شـايـفـيـنـهــا
الـمـســـئـولـيـن لـو يـشــوفــوهــا
أكـــيـد .... حَــيـتـكِـسْــفـُـم مِـنـهــا
على باب شـارعـنـا ... حـيـقـابـلـو
بـلاعــة طـافـحــة عـلـى عـيـنـهــا
عــمَــلِـت لِـنـا بـحـــيــرة كــبـيــرة
فـعــمـلـنـا بـلاجــيـن مِـن طـيـنـهـا
---------------------
بــعـــد ( الـبـلاج ) .. أدخـــل جـوَّة
فى شـارعـنـا حـتـلاقـى ( هَـرَمين )
فـيــن الـسـيـاحــة تـيـجـى تـشـاهِـد
أهـرامـنـا فـى الـقـرن الـعـشــريـــن
( زبـالـة ) قــاعــــدة مــركــــونـــة
قـدامـنـا لـيـهــا شـهـــور وسـنـيــن
حـوالـيـهـــا فـيـه دبَّـان ونـامــوس
م الـفـجــر بـيـصَـحـِّـى الـنـايـمـيــن
----------------------
وبـرضـو ف شـارعــنـا تـلاقــو
نـهــضــة كــبـيــرة صـنـاعِـيَّــة
فـيــه الـوِرَش قـاعــدة تـدقــدَق
لِــحَـــد ســـاعــة الـفــجــــريَّــة
ورِش نِـجــارة .... جـنـبـيـهــا
إيــشــى سـمــكـرة وحـدايـدِيـَّــة
دكـاكـيــن ودايـمــاً مـفـتــوحـــة
مـن غــيــر مـيـعـــاد لـلـورْدِيَّــة
عـمـلِـت لِـنـا صـداع ف نـفـوخنا
غـيـر الـحـالات .. الـعـصـبـِـيَّــة
-------------------

دا غــيـر بـقــا فـضـلِــة خــيـركُــم
شـارعـنـا فـيـه حـديـقـة حـيــوان
كـلاب .. قـطــط .. رايـحـة جـاية
تـلـقـى سـحـالـى .. تـلـقـى فـيـران
شـوف الـزبـالـة سـاعــة الـحَــرق
لـونـهـا يـكــون لــون الـقـطــران
وعـامـلـة تـكـيـيـف ف شـارعـنـا
ف شهر ( طوبة ) تـكـون حـرَّان
ف وســط دا ( عــم شــحــاتــة )
واقـف يـبيع ( فِـشـَّة ومُـصران )
ــــــــــــــــــــــــــــــــــــــــــ
( حمدى شبانة )

hany57

07/08/2018, 13h12

اسمح لى أسرق حضرتك
------------------------------
اسمح لى أسرق حضرتك .. تشحن كمان دى غلطتك
أول ماتشحن يا جميل .. رسالتى توصل حضرتك
اشحن وماشى بالأصول .. تيجى رسالة على طول تقول :

( عزيزى العميل - يابو وش جميل - الحق جايزة بالملايين -
واتصل بعشرين عشرين - مش بكتير يابيه - بس بتلاته جنيه

أقول تلاتة مش مشكلة .. ومش هتعمل معضلة
وأتصل وبعدها .. تظهر معايا المشكلة
أتارى التلاتة دول يوماتى .. ومين هيقدر على كدا
ألغى اشتراكى سابون اهاتى .. طب ليه ياناس الظلم دا
وابعت رسلة ورا الرسالة .. علشان أصلح ما حصل
الرد ييجى فى كل مرة .. يقول رسالتك لم تصل
اشمعنا وقت الاشتراك .. رسالتى وصلت بالعجل
أما الرسالة اللى الغى فيها .. مفيشى لوصولها أمل
الشحن راح منى بلاش .. عنها وقلت مابدهاش
ع الشركة رأسا دخلت أجرى .. بطاقتى أهى قدمتها
وحكيت لهم اللى حصل .. من الرسالة وبعدها
ردوا قالوا لى مع ىالأسف .. بخدمة العملا اتصل
لقيتنى فى ساقية بدور .. رميت انا التليفون يومين
وشحنت علشان اتصل .. بصاحبى صابه ظرف حزين
وقبل ما اعمل الاتصال .. جات الرسالة دوغرى تقول :

(عميلنا اللوز - فرصتك للفوز - بتزيد يا زين .
.خصمنا كمان - ستة بتمام - ليومين سابقين )

فتحت انا التليفون بغل .. جبت الشريحة كسرتها
وجبت نمرة من شركة تانية .. قلت أكيد مش زيها
يومين بقا وسمعت نغمة .. قلت أشوف أنا جالى أيه
فتحت أنا ولقيت رسالة .. شوف بيقولوا لى أيه يا بيه :

(عميلنا الجديد - نهارك سعيد-
جوايزنا بالملايين - اتصل بخمسين خمسين )

جريت ماكملت الرسالة .. أروح لمين واشكى لمين
وماعادشى يلزمنى الموبايل .. هاشكى لرب العالمين
هاشكى لرب العالمين

---------------------------

هانئ الجمل

hany57

12/08/2018, 23h36

الموضة والصيف
-----------------
انتى يا لابسه الفيزون .. وتقولى دا بنطلون
بلون الجلد يحكى .. حاجة بتشد العيون
والعين تسأل سؤال .. دى قالعة وللا لابسة
لو قالعة مش معقول .. ومش معقولة لابسه
وادى كتير م النفوس .. ظنوا بيكى الظنون
انتى يا لابسه الفيزون .. وتفولى دا بنطلون

البنطلون مجسم .. كل حتة فيكى
وشباب وراكى يقسم .. ماشى يعاكس فيكى
مين فيكو راح ألوم .. والحق عند مين ؟
ومين ع اللبس وافقك .. وأهله قولوا لى فين؟
وفين شباب متربى .. كان للأخلاق يصون
انتى يا لابسه الفيزون .. وتقولى دا بنطلون

وعشان الموضة تكمل .. بلوزة كمان شيفون
واخرها ليه مخاصم .. كمر البنطلون
بينهم منطقة عازلة .. ما عليها حاجة عازلة
وعيون تقعد تبحلق .. وسهامها فيكى نازلة
يكونشى دا التحضر .. بس احنا غافلون
انتى يا لابسه الفيزون .. وتقولى دا بنطلون

يا بنت فيه موضات .. بالطبع تنفع لينا
وفيه يرضه موضات .. بتخالف طبع لينا
يبقا نختار م الموضة .. اللى راح ينفع منها
لا اللى يشف يناسبنا .. ولا اللى يجسم منها
نصيحة لو تسمعيها .. تخرسى ألسنة وعيون
انتى يا لابسة الفيزون .. وتقولى دا بنطلون

-----------------------

هانئ الجمل