كشك الكارته .......

[سعدالشرقاوى]

كشك الكارته

مين خد كارته ومين ما ياخدشى
ومين من غيرها ح يعرف يمشى
رسم محلىّ ف كلّ حياتنا
وبند قانونى ف كشك الكارته
,,,,,,,,,
لحف الغيط أو جسر الترعة
عنده ضرورى تهدّى السّرعة
وان خد نمرك تبقى غرامه
وتتعب ياما بسبب الكارته
,,,,,,,,,,
إيدك تطلع م الشبّاك
تلقى اتنين واقفين ويّاك
واحد يقبض واحد يقطع
ورقة عليها سعر الكارته
,,,,,,,,,
ممكن تدفع نصّ تمنها
وخلىّ ورقته وسيبك منها
واللى دفعته يروح على جيبه
واللى يجيبه ف شغل الكارته
,,,,,,,,,,
وهوّ يحصّل بالملايين
وفاكر كلّ الناس نايمين
ويقسم ع اللىّ عمل له قراره
وليله نهاره ف كشك الكارته
,,,,,,,,,
طبعا شغله قانونى وعال
ومافيش عنده شبهة مال
ولو يتحقق مرّه عليه
تشهد ليه أوراق الكارته
,,,,,,,,,,
واللى يفتش بعده حبيبه
يوماتى بيوصل منها نصيبه
فايق رايق ولا على باله
موصّى عياله بشغل الكارته
,,,,,,,,,
فى المستشفى إن عوزت زيارة
أو أتوبيس يمشى بصفّارة
كل ما تلقى الدفع مخفض
تبقى هديت لاصحابه الكارته
,,,,,,,,,
قيس على كلّ الورق البمبى
طول مانا جنبك وانت ف جنبى
لو ما أخدتش منّه الورقه
تبقى شريك لحرامى الكارته
,,,,,,,,,,
والغلطان فى الكل انا وانت
شوف ح نعيش فىالجهل لأمتى
إيه المانع ياخدوا تمنها
وناخد منهم ورق الكارته
,,,,,,,,,,,
بينا نعمّر كل حياتنا
بينا نحارب سلبيّاتنا
بينا نصلّح مصر بإيدنا
تزيد مواردنا بكشك الكارته
,,,,,,,,,,,,

[د أنس البن]

والغلطان فى الكل أنا وانته
شوف ح نعيش فى الجهل لأمته
ايه المانع ياخدوا تمنها
وناخد منهم ورق الكارته

تعرف اللى انت قلته ده يا حاج سيد
صح مائه فى المائه
واحنا فعلا السبب فيه إما عن جهل أو سلبيه أو استسهال
فى إحدى زياراتى لتونس وانا مع زمنطر فى سيارته بنعدى من إحدى بوابات الرسوم
اللى على الطرق السريعه
بعد ما أعطى زمنطر الرسوم للموظف فى الشباك وفتح الذراع اللى أمام السياره
لقيت زمنطر لايزال واقفا لم يتحرك
قلت له مستننى إيه انت دفعت والدراع اتفتح
قال لى مستنى التذكره , الأستاذ فى الشباك بيضيع وقت علشان امشى واسيب له التذكره
لكن لازم اخدها , قلت له حتى انتم كمان عندكم الحركات دى
قال لى التذكره ليس لها قيمه لكن لايجب أن أساعده على ذلك أو أسمح له
طبعا لو انا كان زمانى مشيت وقلت بسيطه الحكايه ماتستهالش
(وده اللى جايبنا ورا فعلا ـ السلبيه)
تسلم يا حاج سعد ويسلم قلمك

[علاء قدرى]

المشاركة الأصلية كتبت بواسطة سعدالشرقاوى

كشك ألكارته

مين خد كارته ومين ما ياخدشى
ومين من غيرها ح يعرف يمشى
رسم محلىّ ف كلّ حياتنا
وبند قانونى ف كشك ألكارته
,,,,,,,,,

اخى الحبيب الشاعر سعد الشرقاوى
نورت المنتدى
الرسم المحلى (حيلة شيطانية ) الفها واحد حكومى عبقرى ؛ وحرامى من العيار التقيل ؛ عشان يلهى بيها الحرامية الصغيرين ؛ يعنى نظام اطعم الفم تستحى العين ؛ فلا ينظروا له فى الهبر الكبيرة اللى بياكلها .....
افة اسمها كارتة ؛ ومرة رسوم؛ ومرة معونة ؛ ومرة تبرع بالاكراه؛
حاجة يقرفوا بيها الخلق و خلاص ؛ قال يعنى الناس ناقصة قرف
عموما لو بتدفع كارتة ......يبقى انت اكيد المصرى
نورت يا عم سعد ؛ ولازم تشوف لك حل فى النت بتاعك ده؛ موش حينفع الغياب ده كله
وحمدا لله على السلامة

[علاء طه ياسين]

شقيقي واخي
سعد الشرقاوي


كل الناس تعرف تصور بالكاميرا
لكن قليلين جدا جدا
اللي يعرفوا يلقطوا الصورة صح
ويظبطوا الإضاءة
والمسافات
انت كده
عينيك بتلقط الصورة صح
وتحمضها طبعا بالكلمات الممتعة
وانت بصراحة
أخطر مهاجم عرفته ملاعب نقد الفساد بالشعر
هنيالك يا عم
....
باتمني من ربنا يديم عليك العين الخبيرة
في التقاط الصور
وتحميضها
وطبعها
كل ده بتعبيراتك الشعرية الحلوة
علشان نشوفها احنا ونستمتع بيها
....
ربنا يحفظك ويحميك
....
علاء

[فريد شوقى]

استاذى ومعلمى واخى
سعـد الشرقاوى
وحياة محمد ومدحت....وحياة امـــال وامـــانى
لتعيش العمر تنـحت.... فى صخر شديد اسوانى
لاسمعك حد ولا هتلاقى رد
عارف ليه ياصاحبى بجــد
لأنك عايش فى زمن تانى

[رائد عبد السلام]

الخال الجميل سعد الشرقاوي

شمعة منيرة أخري تقف بجوار أخواتها
في شموع أزجالك الهادفة التي
تقترب من قاع المدينة لتنير خفاياه
وزواياه المظلمة

إنت مركـّــز أوي مع الناس
اللي تحت ياعم سعد

الله ينور

تسلم إيدك..ودام إبداعك

[سعدالشرقاوى]

المشاركة الأصلية كتبت بواسطة د أنس البن

تعرف اللى انت قلته ده يا حاج سيد
صح مائه فى المائه
واحنا فعلا السبب فيه إما عن جهل أو سلبيه أو استسهال
فى إحدى زياراتى لتونس وانا مع زمنطر فى سيارته بنعدى من إحدى بوابات الرسوم
اللى على الطرق السريعه
بعد ما أعطى زمنطر الرسوم للموظف فى الشباك وفتح الذراع اللى أمام السياره
لقيت زمنطر لايزال واقفا لم يتحرك
قلت له مستننى إيه انت دفعت والدراع اتفتح
قال لى مستنى التذكره , الأستاذ فى الشباك بيضيع وقت علشان امشى واسيب له التذكره
لكن لازم اخدها , قلت له حتى انتم كمان عندكم الحركات دى
قال لى التذكره ليس لها قيمه لكن لايجب أن أساعده على ذلك أو أسمح له
طبعا لو انا كان زمانى مشيت وقلت بسيطه الحكايه ماتستهالش
(وده اللى جايبنا ورا فعلا ـ السلبيه)
تسلم يا حاج سعد ويسلم قلمك

والدنا الفاضل د/انس
عندما ياخذ الموظف بعض الوقت فى تقطيع الورقة
من دفتره ساعتها يكون السائق على عجل واحيانا بالفمّ الواسع(خليهالك ياباشا)
ولو تم تجميعها فى ساعة واحدة على جميع الطرق ربما حلّت مشاكل
لاحصرلها (قريتنا مثلا 15 الف نسمه وطريقها ماذال ترابى لعدم وجود اعتماد مالى)
حتى اليوم وغيره الكثير وربنا يستر

[Tarek Elemary]

دكتورنا و حكيمنا و فصل الخطاب بين الأحباب

شكراً لك

نبقى نعلق وقت تانى يا عم سعد
الآن هذا هو التعليق الأهم

[سعدالشرقاوى]

المشاركة الأصلية كتبت بواسطة علاء قدرى

اخى الحبيب الشاعر سعد الشرقاوى
نورت المنتدى
الرسم المحلى (حيلة شيطانية ) الفها واحد حكومى عبقرى ؛ وحرامى من العيار التقيل ؛ عشان يلهى بيها الحرامية الصغيرين ؛ يعنى نظام اطعم الفم تستحى العين ؛ فلا ينظروا له فى الهبر الكبيرة اللى بياكلها .....
افة اسمها كارتة ؛ ومرة رسوم؛ ومرة معونة ؛ ومرة تبرع بالاكراه؛
حاجة يقرفوا بيها الخلق و خلاص ؛ قال يعنى الناس ناقصة قرف
عموما لو بتدفع كارتة ......يبقى انت اكيد المصرى
نورت يا عم سعد ؛ ولازم تشوف لك حل فى النت بتاعك ده؛ موش حينفع الغياب ده كله
وحمدا لله على السلامة

الاخ الاستاذ/علاء قدرى
الغريب ان دائما ردودك على اى مشاركة بالاقى رايى موافق لها تماما
يعنى تقريبا نفس الفكر
ولكن هذه المرّه ربما اختلف معك قليلا
فلن اعمم هذه الظاهره
فهناك من يقف على حقه ويحصل على الكارته
وهناك ايضا الشرفاء من العاملين فى هذا المجال
لكنها ظاهرة تستحق الالتفات اليها
دايما منورنا يااستاذ/علاء ومنور صفحاتنا

[سعدالشرقاوى]

المشاركة الأصلية كتبت بواسطة علاء طه ياسين

شقيقي واخي

سعد الشرقاوي


كل الناس تعرف تصور بالكاميرا
لكن قليلين جدا جدا
اللي يعرفوا يلقطوا الصورة صح
ويظبطوا الإضاءة
والمسافات
انت كده
عينيك بتلقط الصورة صح
وتحمضها طبعا بالكلمات الممتعة
وانت بصراحة
أخطر مهاجم عرفته ملاعب نقد الفساد بالشعر
هنيالك يا عم
....
باتمني من ربنا يديم عليك العين الخبيرة
في التقاط الصور
وتحميضها
وطبعها
كل ده بتعبيراتك الشعرية الحلوة
علشان نشوفها احنا ونستمتع بيها
....
ربنا يحفظك ويحميك
....

علاء

شقيق روحى/علاء ياسين
انت اللى راجل عسل
ودايما متجدد ياعلوه وبدات تجمّد قلبك الرقيق
وقلت لها مع السلامه
برافو عليك