(الحاج سلومه بيبنى حكومه)
مرّه انا قاعد تحت التوته
وانا بطلان والعضم مهدّد
جنبى سلومه معاه حدّوته
قول لامؤاخذه روحت ممدّد
,,,
بعد الشغل لقيتنى بعافيه
مانا هلكان فى الغيط صبّاحى
بقيت اسمع له وانا مش نايم
زىّ ماكون باحلم ونا صاحى
,,,
وفاجآه لقيتنى بعلو الحسّ
واقف انادى ياواد ياسلومه
عمّال ترغى من غير فايده
يالله انا وانت نبقوا حكومه
,,,
بص بدهشه عليّه وقال لى
وحيات رحمة ابوك تعافينى
قلت له يعنى تكسّر امرى
من اوّلها ياحبّة عينى؟
,,,
اصل انا لازم امسك ريّس
وانت وكيلى عشان تسندنى
تنسى ف لحظه العيش والملح
ومن اوّلها ياواد تعاندنى؟
,,,
انت ترشحّ احلى وزاره
وانا ح اختار اللى ح يعجبنى
وتملـّكنى الشعب بحاله
وروح فى نصيبه ساعتها وسيبنى
,,,
والله ماهم نافعين فى الشغله
بس ح نبقوا عزمنا عليهم
وان مسكولك قوى ع الذمّه
باىّ سبب تبقى تمشيّهم
,,,
وابن بهانه يكون ويّانا
ولو مش عايز يبقى وزير
هات له الزيرو التسعوميّه
ويلخمهم يعمل فوازير
,,,
وابن عطيّه يعالج ودنه
وان حكمت يعمل سمّاعه
يمكن اعوزه يغنىّ خصوصى
لسيادتى واعمل له ازاعه
,,,
عشان بطن الناس تعبانه
كلـّه يبطـّل يزرع غلـّه
ونزرع لب كتير وسودانى
وكل الناس تقعد تتسلـّه
,,,
امّا الزراعه عايزه وزير
واعى من الناس الجدعان
اوّل مرّه يروح الصحرا
يملـّكنى مليون فدّن
,,,
ويكون مخلص فاهم شغله
وشاطر ف كتابة البيانات
وعارف قيمة الارض ويقدر
يقتلها بحبّة مبيدات
,,,
وبدل الصحّه ماتعمل حمله
تحدّد نسل البنا ادمين
والتموين يستورد غلـّه
تموّت عزبه ف ظرف يومين
,,,
ولمّا الشعب يخفّ شويّه
يخف عليّه الحمل انا وانته
والدخل يكون مليون فى الميّه
امّال ح نعيش فى الفقر لامته
,,,
خللىّ بتوع الكوره قرايبك
وانزل العب لو طلبوك
واوعه تهوّب كاس العالم
لا بتوع البرازيل ياكلوك
,,,
لنقل البحر ولد متهوّر
جوّه الميّه مايعرف مينا
يقدر يهرب لمّا يعتـّق
فى الركـّاب والتـّعويض لينا
,,,
ونقل البرّ لازم يتطوّر
واللى يسير فى طريقه يسيبه
والمكتوب له العمر يعيش
واللىّ يموت ماهو برضه نصيبه
,,,
واللى يخاف عفريت يطلع له
واللى ف حظـّه كمين ح يجيبه
مش ح نقضـّى حياتنا تخلـّف
وعمر القطر ماينسى قضيبه
,,,
قال لى كفايا وبكره نكمّل
دا مهمّتنا ح تبقى تقيله
قلت له نام لك يالله شويّه
ح سيبك بس اجازه الليله
,,,
راح متـّاوب روحت مكوّع
وقلت دا كلـّه فعل مضارع
والزّاى بس النوم ح يجينى
ونص الشعب بايت فى الشارع
,,,
تلف الصّبح ضرورى عليهم
شوف طلباتهم عند سيادتىّ
ولمّا النص يقول متشكـّر
خللىّ الباقى يعوزوا سلامتى
,,,
الحاج سلومه بيبنى حكومه
رد: الحاج سلومه بيبنى حكومه
العرض العادي
