حبيبتي

[علاء طه ياسين]

حبيبتي زي القمر ... وحلوة الأوصاف
وشعرها المفرود ... ضلل كما الصفصاف
سارح علي ضهرها ... أسود سواد الليل
ومعطراه ياسمين ... ومسرحاه باحتراف
.................................................. .....

مش حاطة روج ع الشفايف ... ولاشيء من المكياج
ووشها ع الطبيعة ... لأنه مش محتاج
وبتتكسف بالأوي ... لو حد بص لها
وبتبقي ست البنات ... في غاية الإحراج

.................................................. .....

وصوتها دافي وحنون ... سببلي 100 أزمة
ونغزة وسط الخدود ... بتبان مع البسمة
تجري هنا وهناك ... طفلة بريئة وجميلة
لما تغيب عن عيوني ... بابقي مليش لزمة
.................................................. .....
مشيتها فيها دلع ... والضحكة غنواية
تزرع هنا وردة ... وترمي نجماية
وعيونها لما بتضحك ... تضيق وتتشهق
وتبقي مش عايزة تسكت ... وضحكها حكاية
.................................................. .....
يا بنت ياللي بتخجل ... وبتتكسف مني
وقلبها العطشان ... ع النهر مستني
املي الكفوف اشربي ... يابنت واسقيني
بلاش تسيبي الجروح ... توجع وتألمني
.................................................. .....
يابنت ياللي النجوم ... بتغنى حواليكى
وكمان عيون القمر ... بتبص ف عنيكى
مش قولت ما تكلميش ... مع حد ف غيابي
مبتسمعيش الكلام ... طب أعمل ايه فيكي ؟
.................................................. .....
يا بنت ياللي عليها ... كل العيون بتبص
أعرف أحبك كده ... ما اعرفشي نص ونص
لكن ما بيني وبينك ... ييجي 600 فجوة
وحجارة واصلة السما ... في كل يوم تترص
.................................................. .....
بيني وبينك بحور ... وأراضي مهجورة
وجبال كتيرة وصحاري ... واسعة يا عصفورة
وألف واحد حرس ... واقفين علي الناصية
واحنا ف دنيا البشر ... ما احناش ف أسطورة
.................................................. .....
هأقولك ايه يا حبيبتي ... مش لاقي شيء تاني
غير إني فعلا بأحبك ... وانتي اللي وخداني
منايا قلبك يحس ... بحبي .. ومشاعري
وتطبطبي ع الجروح ... وتعيشي علشاني

علاء

[NAHID 76]

بسم الله الرحمن الرحيم
الأستاذ علاء ياسين
صاحب شعر الأغانى وعجبانى
جميل جدا مشاعرك وتعبيراتك التى أختلط فيها الأمر ما بين ماهو شعر
وما هو أسترسال
أعتقد انه من فرط تفاعلك تخليت وعبرت عن ما كنيت
تحياتى واترك النقد لأهل النقد

[علاء طه ياسين]

سيدتي الفاضلة / مدام ناهد
صدقتِ يا سيدتي .. لقد ملكني الاسترسال .. وتداخلت الأشياء واختلطت .. وكان ما كان ..

وكأني مع الياسمين داير
أغزل لها العطر ضفاير
وأرجع لعيونها وانا طاير
وكأن عيونها دي أوطاني

وكأني كتبتها علي رمشي
وان شوفتها واقفة فمش بأمشي
و بأغمض عيني ومبنمشي
وباحسها واقفة ف شرياني

وكأني بحبها مسكون
من غيرها مش ممكن أكون
واخرج بره حدود الكون
مارجعشي خلاص دنيتي تاني


لقد خرجت إلي خارج حدود الكون العادي .. ونسيت من هي ومن انا .. ولكنني شعرت أن هواها سيعيش للأبد .. وكأن كل شيء صار ملكي .. إنها الأحلام والأمنيات التي لا تتحقق أبدا يا سيدتي الكريمة ,,,
علاء

[Tarek Elemary]

مين غير زعل .... طبعا من غير زعل
بصراحة و وضوح .... طبعا بصراحة و كل وضوح
الراجل أبو كم واسع نضح عليك و خدك لسكته
إفهمنى يا علاء ....
لك طعم و لون و نكهة و سكة و أدوات لا تفقدهم
و تطرق لكل المواضيع بنفس أدواتك
اللون ده بتاع الأسد الشرقاوى
مع إن أدهم بلدياتى من إيتاى البارود
و كل الناس فاهمه إنه شرقاوى لكن ما علينا
السبع الشرقاوى ده ملعبه ... خليك فى ثوب علاء يس
ده مجرد رأى قد يختلف معه كثيرون
و هذا لا يمنعنى من إبدائه
و الإختيار لك
و تحياتى

[علاء طه ياسين]

أخي الكبير / طارق العمري
الحمد لله اللي جعل ليا أخ زيك .. يرجعه للطريق بتاعه لو لقاه ابتعد عنه ..
كلامك صح ..
انا تعبت جدا في القصيدة دي .. وانت جبت السبب .. إنها مش أنا .. صدقت ..
وإنت عارف إني باقبل كل شيء منك .. لأنك دايما وابدا مش بتجامل في رأيك ..
فاكر أحمد شوقي قال قصيدة في حافظ إبراهيم فيها بيت شعر حلو أوي .. بيقول فيه
رتب الشجاعة في الرجال كثيرة .. وأجلهن شجاعة الآراء
شكرا جدا جدا ..
ربنا ميحرمنيش منك
علاء

[عفاف سليمان]

صباح الخير عليك اخى الاستاذ علاء\
كلمات جميله احس فيها محمد منير
مش عارفه ليه حاسه انه بيغنيها
بس يا اخى علاء
خلينا فى شعرك اللى عودتنا عليه
وبردوا مفيهاش حاجه يعنى من التغيير والتنوع
والتنوع دائما مطلوب
واكيد هتسعدنا بحاجات كتيره
وتحياتى لك ولكلماتك الجميله
وللجميع كل التحيه والتقدير
اختكم عفاف

[علاء طه ياسين]

الأخت الفاضلة / عفاف
علم وسينفذ يا افندم ..
وزي ما قولت للأستاذ طارق العمري الحمد لله إن فيه في المنتدي مشاعر من الأخوة الصادقة والنقد الهادف البناء .. لو لقيوك حودت عن طريقة يرجعوك للصواب .. شكرا جدا ليكي ..
وعلشان خاطرك .. أقول ..

أيوة يا أحلي بنات الحــور
جوه ف قلبي ناي مكسـور
وأنا بعدك رايح اسكت خالص
وأحرم قلبي الهوا والنـور

أنا من بعدك مش راح أغني
لكن هأفضل أحلم إنـــي
سايب حتة ف قلبك منــي
ذكري لحب بريء مهجـور

أنا من بعدك هأمشي مْغَمِّـي
حزن الدنيا بيجري ف دمي
هأحضن همك وأحضن همي
وافضل تايه وسط بحــور

أنا من بعدك دمعي ف عيني
كل حنين الدنيا مالينـــي
مهما وحشتك ووحشتينــي
بيني وبينك مليون ســور

أنا من بعدك هأحضن خوفي
وهأضفّر باليأس حروفـي
وهأشيلك وشم علي كفوفي
مهما بينا الأرض تـــدور

علاء ياسين

[عفاف سليمان]

خساره يا استاذ علاء
ان محدش شاف الكلام ده ويغنيه
فينك يا محمد يا منير والله كلام يليق على صوته
ربنا يسعد اوقاتك بالخير يارب واحنا هنا اخوات فى الله
واكيد نحب ان اللى يكون فى سماعى يجود لنا بكل ما عنده ولا يخل علينا وفى نفس الوقت
يكون فى القالب الخاص به وبردوا دا ميمنعش من التنوع لانى كما قلت لك التنوع مطلوب
وحلوه كلماتك الرقيقه دى
ويارب يديم علينا سماعى واسرة سماعى بالخير
تحياتى لك وللجميع
اختكم عفاف

[علاء طه ياسين]

الأخت الفاضلة / عفاف

شكرا شكرا .. محمد منير خبط لزق .. حتة واحدة .. الله يسترك ..
أما من ناحية الكتابة .. أنا بأكتب أحاسيس ومشاعر ..
ومش أعرف أكون غيري ..
معرفشي إلا أكتب الحب .. أو الردود الارتجالية في الأمور العامة ..
حاولت أكتب تاريخي فشلت ..
أكتب ديني أو صوفي غرقت في بحور التوهة ..
أكتب سياسي مليش في اللعبة دي .. دي ليها أربابها ..
صحيح التنوع مطلوب .. بس أعمل ايه ..
عموما ..
طول عمر قلبي بيحلم .. وبيصحي م الأحلام
تايه ف سكة ندم .. غرقان ف بحر آلام
والدنيا غابة كبيرة .. أشجارها طارحة الشوك
والحب دايما بيكسب .. بس ف الأفلام

علاء

[سعدالشرقاوى]

الاستاذ/علاء طه ياسين
واخيرا فتحت الصفحه
ولقيتنى دخلت 100صفحه
عمّال تضخ اغانى واشعار عظيمه
عينى عليك بارده
اقول ايه واللا اعمل زى واحد
علاء00علاء00يحيا علاء00
يا بنت ياللي بتخجل ... وبتتكسف مني
وقلبها العطشان ... ع النهر مستني
املي الكفوف اشربي ... يابنت واسقيني
بلاش تسيبي الجروح ... توجع وتألمني
.................................................. .....
يابنت ياللي النجوم ... بتغنى حواليكى
وكمان عيون القمر ... بتبص ف عنيكى
مش قولت ما تكلميش ... مع حد ف غيابي
مبتسمعيش الكلام ... طب أعمل ايه فيكي ؟
رياح جنوبيه
وعواصف عاطفيه
وحوارات وتوريه
واستعارات مكينيه
وتشبيهات بديهيه
وندوات ثقافيه
وشلا لات شعريه
واقول ايه
واللا ايه


استاذن شويه