رقم 3 عمى السباعى

**سعدالشرقاوى** · #1 05/06/2009, 12h15

حكايات(تحت التوته) رقم (3)

عمّى السباعى

مرّه ظــــــــــــلّ التوته ميّل

جاب معاه نسمة عصــــارى

عمّى الســـــباعى كان معايه

مش غريب ماهو برضه جارى

,,,,,

كان سباعى ايّام شـــبابه

يحب وســط الغيط يغنىّ

جت فى بالى لمّا جــانى

وشوفته قاعد جنب منىّ

,,,,,

قلت له سمّعنى صــــوتك

واحكى حال الفـــــلاحين

عشان تاريخهم كلهّ عندك

مانتا عايش من سنـــــين

,,,,,,

قال لى لو كان ع النـــــهار ده

مش ح اقول اصل انت عارف

كلّ جيلك فى حكايــــــــــاتهم

اللــــى سامـــع واللىّ شايف

,,,,,,

وبص ليّه بعـــــــين جريئه

وراح مقصّر فى الكــــــلام

وقال حاجيب لك من عرابى

لحدّ مؤ تمر الســـــــــــلام

,,,,,,

واللىّ فاضل من كلامى

حد غيرى ح يقـــولولك

لو ح تسآل فى سماعى

كلهّم ح يكـــــــــمّلولك

,,,,,,

قلت غنىّ بصوتك انت

واحكى ياعـمّ السباعى

واللىّ سامعينك حبايبك

كلّ اهلك من سماعـى

,,,,,,

قال من زمان عايز اغنىّ

للسواقى فى الغــــــيطان

غنوه فيها الشوق وفيها

نفـــض قلبى من زمان

,,,,,,

السواقى ف غيطنا كانت

صوتها صوت الفلاحين

صوره ناطقه عن حياتنا

لمّا كــــنّا شقـــــــيانــين

,,,,,

كنت باسمع صوتها وابكى

العليل يشـــــــــــكى لعليل

كان انينها بيحكى وضعى

وضــع كان مؤسف ذليل

,,,,,

والجاموسه تدور وعينها

زى عينى معــــصوبين

والقدم عـــريان وحافى

فيه شقـــوق مليانه طين

,,,,,

كنت اقوم من نومى واصحى

والفـــــــطار مش وسريس

والغدا رغيف عيش وبصله

كنت بين النــاس رخــيص

,,,,,

مرّه فاكر لمّا جــونى

ناس قالولى كلمتــين

لانتخاب البيه بتاعهم

والجنيه اخضر وزين

,,,,,

الجنيه كان حلـــــم عمرى

قلـــــــــــــت اهلا بالجنيه

وانشحنت ف لورى يومها

غصب عنىّ واعمل أيـــه

,,,,,

جارى كان فلسوف شويّه

مانتخـــــبش البيه يوميها

شخبطوله ف ضهره كلمه

خد له علقه كبيره فـــــيها

,,,,,

حتـــى هوّا برضه صمّم

واحنا نضحك من غباوته

كنّا قال فاكـــــرينه اهبل

كان بيضحك رغم حالته

,,,,,

قال يوميها البيه قصدنا

خطبه حلوه فى الصيوان

راح يجيب الديب وديله

راح يعيّــــشنا ف امان

,,,,,

بيته كان مفتوح لآ خره

فاتحه دايما للضـــيوف

لمّا خد اصواتنا روحنا

قلنا لمّا نروح نشـــوف

,,,,,

مالقيناش البيه فى بيته

مالقيناش غير الغفـــير

قال بان البيه مسافــــر

والسفر ح يكون طويل

,,,,,

والكلام الحـــــــــلو كلـّه

راح واصبح مستــحيل

واحنا احــــنا زى ماحنا

فى الطريق من غير دليل

,,,,,

روحت جنب الساقيه اغنّى

مالتقيــتش حدايا صــــوت

صوتى حشرج جوّه زورى

كل شئ فـــــى عنيّه موت

,,,,,

رحت ماسك نايى كاسره

اعمل ايه بالناى صحيــح

مش لاقــيلى نفــس اغنّى

قلبى كان محزون جريح

,,,,,

كان منايا وكــــلّ املى

انّى اشوف لى يوم سعيد

يوم اكون صاحب سياده

واكسّر القــــيد الحـــديد

,,,,,

قلت شئ لله ياســـــــــيدى

ندر منىّ لكل شـــــــــــيخ

لو حقوقى الضايعه رجعت

قبل ماكبر واللا اشــــــيخ

,,,,,

واستجاب اللــــــه دعايا

لمّا شوفت ف يوم جمال

قال لى قوم ارفع دماغك

راح خلاص عهد الضلال

,,,,,

يالله ازرع فى ارض ملكك

كل خـــــيرها يعود عليك

انت تزرع وانت تحــصد

ماتلاقـــيش ويّاك شـريك

,,,,,

والمدارس لابنى فاتحه

يستفـــيد منها الدروس

والتقيت مستشفى هايله

بتعالجنى بدون فلـوس

,,,,,

والمحال اصبح حقيقه

وعمّ نــــور الانتصار

والعــبور نوّر حياتنا

وخللا ايامنا عــــمار

,,,,,

والســـــلام رفرف جناحه

ع السواقى فىالغـــــيطان

والحق راجع بيت صحابه

بعد صبر وشـــوق زمان

,,,,,

روحت قاطع بوصه حلوه

ورحت عامل منها نـــاى

والآهات صارت غناوى

والغـــيطان غنّت معاى

,,,,,

والسـواقى كات بترقص

صوتها صوت الفلاحين

فلاحين النصر عاشــوا

فوق غيطانهم فرحانين

,,,,,

يالله هات الباقى منــهم

واكفياك وارحم سباعى

واللى ناقــص كله هاتو

من حبايبك فى سماعى

,,,,,

والسباعى راح مشوّح

من هنا قــــطع الكلام

وافتــكرت انّ اتفاقــنا

لحدّ مؤتمر الســـــلام

,,,,,

وهنا توقف السباعى عن الكلام وتذكرت انه

طلب الحصول على باقى حياة الفلاح من اهل سماعى

فيااهل الخير (حسنه قليله تمنع بلاوى كتيره)هل اجد من

يكمّل مابداه عمّى السباعى وله الاجر والثواب عندالله000

**Tarek Elemary** · #2 05/06/2009, 12h59

عايزأقولك إن حاله كان زمان أفضل كتير
كات مشاكلة باشا ظالم تحت أمره كام غفير
النهاردة فوق دماغة ألف باشا و 100 امير
كان زمان يشبع بلقمة و يرتوى من أى زير
النهاردة المية ساقعة طالعة من لفريجيدير
بس بالأمراض يا صاحبى و الوباء يارب جير
غموا عينا يا عم سعد و موِّتوا فينا الضمير
صورولنا زمان ده نار و النعيم جاى بالجِعِير
أونطجية ملِّكوا الفلاح و برضه صبح أجير
باعوا مستقبل ولادنا يا بلدنا وإنت فى النزع الأخير

سامحنى يا عم سعد
الموضوع أكبر منى ومنك
ده محتاج سنين كلام و دهور عمل
بس يبقى فينا دايما فجر جاى ويَّا الأمل

**علاء طه ياسين** · #3 05/06/2009, 13h35

توأم روحي .. سعد الشرقاوي
كتبت فأبدعت .. وكنت رائعا .. مش قولت لك قبل كده .. ده ملعبك لوحدك .. محدش يقدر ينزل قصادك فيه ..
مصر أغلي حاجة عندي ..
حتي لو كانت زبالة ..
مصر أبويا مصر أمي ..
مصر عمة .. مصر خالة ..
مصر هي بنت عمي ..
اللي بتقوللي تعالي ..
يعني م الآخر بجد ..
بعدنا عنها استحالة ..
احكي قول عنها يا سعد ..
عن شهامة .. عن أصالة ..
احكي وابعت للشباب
فى حكاياتك 100 رسالة ..
احكي والدنيا هتسمع ..
قول ولا تبطل قوالة ..

علاء

**محمد المراغى** · #4 05/06/2009, 15h37

عمى وحبيب القلب صاحب شجره التوت الاستاذ سعد الشرقاوى الفكره جاااااامده لكن

الكلام عن مصر عايز ...الف شاعر وأديب
والورق اطنان دفاتر بس من فين راح نجيب
والوليد يكتب معانا ... لحد ما يجيله المشيب
مين هيقدر بس قول لى والتاريخ جليل مهيب
لا يا عم انا مش معاكم انا لسه فى التدريب
مش فى حجم حد فيكم .. اللى شاعر واللبيب
بس يمكن راح اشرك مش راح اقطع مكاتيب

**NAHID 76** · #5 05/06/2009, 15h51

بسم الله الرحمن الرحيم
خالى سعد الشرقاوى
الى جلس فى هوديه الساقيه ولف بيها ونعس ونام هادئ البال
حيحس بالجمال
اكتب يا خال
عندى اقتراح كل كتابات تحت التوته تكون فى مكان واحد علشان متهش عنا أيه رأيك
تحياتى

**سعدالشرقاوى** · #6 05/06/2009, 21h05

استاذى/طارق العمرى
معك الحق
فهو الجزء الاكبر من تفاصيل حياتنا
بايجابياته وسلبياته ويطول فيه الحديث
وربما يحتمل اختلاف وجهات النظر
ورغم نهضة التنوير الا ان الاستخدام
العشوائى للتقنيات عاد بالسلب احيانا
بما كان له اكبر الاثر فى تدنى العادات
الاصيله والذي يفتقدها جزءا ليس بالقليل

**سعدالشرقاوى** · #7 05/06/2009, 21h07

اخى/علاء ياسين
المصرى الاصيل النابت
على ضفاف النيل الذائب
فى حب مصروالذى يختزن
اصالة الاجداد كما تختزن
ارض الصعيد اصالة التاريخ

**سعدالشرقاوى** · #8 05/06/2009, 21h09

الاخ/محمد المراغى
الانسان المحترم وما يزده
تواضعه الا رفعة وعلو قدر
والذى اراهن عليه انه يستطيع
ان يسلط شعاع قلمه المنير
فى كل الاتجاهات وعنده من
التلقائيه وسرعة البديهه مايميزه
عن الكثير
والاهم من هذا كله انه
ت و ء م ا ل ر وح

**سعدالشرقاوى** · #9 05/06/2009, 21h11

الاخت الاستاذه/ناهد
مجامله اعتز بها فلا ارى
اننا مؤهلين لذالك ولكنها
على راى اختنا/عفاف
مجرد خاطره تاتى من
حين لاخر ولاارى انها
اكثر من ذلك فنحن هواه
ولسنا محترفين ولانبغى
الا ان نكون شيئا من اساتذتنا
العمالقه فى هذا المنتدى
اشكر كلماتك ياست الكل
وعايزين تقرا لك تحفه
جديده

**سعدالشرقاوى** · #10 05/06/2009, 21h14

استاذنا/ابوصلاح
تاكد ياستاذى الفاضل
انك تحمل فى همساتك
الدافئه كل الاصاله التى
تمتع بها الفلاح القديم
واراك على خلق كريم
وتدفع المحتاجين برقة
ومشاعر الابوّه الحنونه
ولاخوّه الصادقه وتنتقى
مايلفظ منك وعلى فكره
دى حياتك خارج عالم
الشعر ايضا
اشكرك ابوصلاح