مش قادرة استني تاني

[علاء طه ياسين]

واقفة في البرد وحدي ....... واستنيتك ما جيتشي
ايدي بتمسح دموعي ....... اللي بتبل رمشي
مش قادرة استني تاني ..
مافاضلشي غير ثواني ..
القطر قصادي واقف ..... بيقوللي خلاص هنمشي
...
...
باتلفت قبل ما اركب ... ليه بس مجيتش ليه
مسافرة بدون ما اشوفك ... طب أقول لنفسي ايه
أقول خلاص نسيني ..
أقول يمكن يجيني ..
أقول دا كان وكان ... ولاّ أقول ماكانشي ..
علاء

[NAHID 76]

بسم الله الرحمن الرحيم
الرائع علاء ياسين
يا ريت كان فيه خط اكبر من كده وكنت كتبت بالبنط الأخير
وعجبى
تصورها أنت
الله الله فينك يا محمد يا رشدى ويا ماهر يا عطار ويا عزبى علشان كان قال فيها موال محصلش
يا سلام عليه فى الموال لما يقول
ولا أقول مكنشى
مع عجبى

[فؤاد]

أستاذ علاء
كلام حلو خالص
وتسلم علي أفكارك الجميله

[علاء طه ياسين]

المدهشة الطلة مدام ناهد .. صاحبة الكلام العذب ... والمرور العاطر ... والتعليقات التي تجعلني أقول .. "يا نهار أبيض محمد رشدي والعزبي مرة واحدة .. دا كتير عليا أوي .. الله يخليكي " ..
عاشق سهر الليالي .. عاشق عطر النخيل
وبنت بطرحة بيضا .. وعيون ملهاش مثيل
عطشت ورحت أشرب .. منعت مَيِّتْها عني
وقلبي فوق دروبها .. أصبح عابر سبيل
أشكرك أختي الغالية جزيل الشكر .. وأدعو لك بالصحة والسعادة .. والتوفيق في جميع أعمالك
علاء

[علاء طه ياسين]

أستاذ فؤاد
ياراجل مش احنا اصحاب .. برضو كده .. تشوفها واقفة حيرانة وبتتلفت ومش تعمل حاجة .. كنت اتصل بيا قول الحقها دي ماشية .. أو كنت قول لها استني هو جاي في السكة والمترو اتعطل بيه ... أو كنت شوفت سواق القطر وقولت له وقف يا أسطي فيه حالة حب هنا ..
علي فكرة تعليقك ظريف جدا ..
شكرا علي مرورك ... وتعليقك اللذيذ خفيف الدم (علي فكره غيرت التعليق ليه)
علاء

[مختار الحسانين]

اخى علاء

ياللى ف يوم حبيت وما طولتش

وحبيبك قالك good bye

أنسى الماضى بجرحه وفرفش

انسى ما تسألنيش ازاى

____________________

أخى

القطر ماشى بينا وكلنا ماشيين
من حزن الناس وخوفها أصبح كمان حزين
مصاحب عمى دقدق وعمى الشيخ امين
مجروح عمال بينزف تاعبينه السواقين

القطر ف مصر قصة منذ مئات السنين
تحكى عن شعب خايف ، مليان قلبه بأنين
ينام بالليل مقلق ويقول يارب عين
يشقى ويتعب ويركب فى التالتة ع اليمين

انا بهزر يا اخى والله ... وبفضفض باى شئ .....

أنا ليا ذكريات مريرة مع القطارات ، ، ، خصوصا مع عمى عنتر بتاع الجرايد ، اللى ركبنى معاه درجة أولى ، وقالى لو حد من الكمثرية قالك انت مين ، قولهم خالى عنتر ،،،،

وحاجات غيرها مقدرش احكيها على العام

[علاء طه ياسين]

لأْ هأسأل أنساها إزاي
أنا من غيرها بقا will die
أخدت وياها البراد
وكيلين السكر والشاي
ومزاجي بقا مش متظبط
مع إنه دايما كان high
صديقي وحبيبي مختار ... ربنا ميحرمنيش منك ومن طلتك الحلوة عليا ... والله العظيم بتوحشني لما تغيب ... وبأحب التواصل معاك دايما ...
أما في محطات السكك الحديد فياما فيه حكايات .. وياما في القطر المسافر حواديت .. ولأننا واحنا بنسافر الصعيد بنقطع مسافات طويلة فالمجال واسع للحكايات ... وياما سمعنا ..
القطر لما يمشي ... مفيش خلاص رجوع
بيلف علي الكفور ... ويصفر في النجوع
ويسيب في كل سكة ... أحفان من الدموع
ويسيب قلوب حَزَانَيَ ... وقلوب بالخوف ملانه
وحبيبة تمللي واقفة ...بالورد وبالشموع
ربنا يخليك يا صاحبي ...
علاء

[NAHID 76]

بسم الله الرحمن الرحيم
عمى مختار
ونبى تحكى كمان على ذكريات القطار
وعلى العام علشان الكل يستمتع بكلامك الجميل
وفضفضه حضرتك الرائعه الى اجمل من أى كلام
علشان خاطر خالك عنتر
تحياتى

[فؤاد]

المشاركة الأصلية كتبت بواسطة علاء طه ياسين

أستاذ فؤاد

ياراجل مش احنا اصحاب .. برضو كده .. تشوفها واقفة حيرانة وبتتلفت ومش تعمل حاجة .. كنت اتصل بيا قول الحقها دي ماشية .. أو كنت قول لها استني هو جاي في السكة والمترو اتعطل بيه ... أو كنت شوفت سواق القطر وقولت له وقف يا أسطي فيه حالة حب هنا ..
علي فكرة تعليقك ظريف جدا ..
شكرا علي مرورك ... وتعليقك اللذيذ خفيف الدم (علي فكره غيرت التعليق ليه)

علاء

أستاذي علاء
أنا غيرت التعليق من حزني الشديد عليها
لأنني شاهدتها وهي تتلفت عليه بلهفه وماأشد أن أشاهد أنسان متلهف زادني حزناً شديداً علي فراق حبيبها
الذي لم يصل في موعد السفر
ليتهُ أتي .......
وودعها

[سعدالشرقاوى]

صبرا ياعم علاء انت خليتهاخل
فاكر من يوم ماشفتك وقلت مالاكش حل
ياكبير وكل يوم بتكبر
ايه الحلاوه دى
دايما تنقلنى معاك للمشهد
انت فاهمنى
كل الناس بتقرا
وانا باشوف واحس وعيش لانى مترقب فيك
الاصاله والسهوله والتلقائيه
وانتظر المزيد