استاذ محمد الالاتى ما اسم هذا المقام ؟

[الألآتى]

أشكرك أستاذى سمير باشا ..

إضافتك أسعدتنى ..

كثيراً ماتصادفنا هذه الحيرة فى العديد من الأعمال الموسيقية ..

فى هذه الحالة .. ألجأ لأذنى وأدندن الجملة اللحنية .. فأجد نفسى إرتكزت على المقام المقصود ..

وفى هذه الأغنية بالذات .. عمد الملحن لإستعمال جنس الكرد كثيراً .. مما أربك حسابات الكثيرين ..

وهناك الكثير ممن لا يعرفون أن للنهاوند أشكال متعددة .. ويعتقدون أن النهاوند الطبيعى فى موسيقانا الشرقية .. هو نفسه الدو مينور فى الموسيقى الغربية ..

وفى الحقيقة أن النهاوند الشرقى هو النهاوند الحجازى .. وليس الكردى المعروف بالمينور ..

بدليل أن العجم هو نفسه الدو ميجور .. مع تغيير درجة الركوز للعشيران لدواعى التميز الشرقى ..

أشكرك أخى العزيز وأتمنى وجودك دائماً فى مثل هذه الإستفسارات ..

[سامى امين]

مستر محمد اغنية انا كل ما اقول التوبة بتاعت حليم مقامها حجاز ولا كرد ولا نهاوند وبجد بجد يا مستر محمد انا بحبك جدا وانت مشرفنى ومطول رقابتى اودام اصحابى اشباة محترفين ولما بتحدى بعض فى المقامات هما يطلعوا صح وانا غلط بحس انى عبيط القرية ولما بتاكد منك من المقام بيطلعوا هما البهاليل وانا الصح

[الألآتى]

المشاركة الأصلية كتبت بواسطة سامى امين

مستر محمد اغنية انا كل ما اقول التوبة بتاعت حليم مقامها حجاز ولا كرد ولا نهاوند وبجد بجد يا مستر محمد انا بحبك جدا وانت مشرفنى ومطول رقابتى اودام اصحابى اشباة محترفين ولما بتحدى بعض فى المقامات هما يطلعوا صح وانا غلط بحس انى عبيط القرية ولما بتاكد منك من المقام بيطلعوا هما البهاليل وانا الصح

أشكرك أخى العزيز على ثقتك الغالية فى شخصى المتواضع

فى الحقيقة ياصديقى .. إن الرد على سؤالك يحتاج لأكثر من مجرد رد ..

لأن العملية فيها لفة شوية ..

فعمنا بليغ حمدى إستعمل عدة مقامات فى الأغنية ..

وسنلاحظ مثلاً .. أن المقدمة وبالتحديد صولو الأكورديون فى البداية .. من مقام ( الشد عربان )

وهو من متشابهات الحجاز كار .. وبالبلدى كده .. بنقول عليه ( حجازين فى بعض )

أما الجملة التى تأتى بعد صولو الأكورديون .. فتكون من مقام ( الكرد )

أما فى الغناء .. فهو حجاز .. وينهى المذهب بالكرد .. شوفت اللفة ..

أما الكوبليه ( القلب الأخضرانى ) مثلاً .. فإنه يعود للشد عربان ..

وينهى الأغنية بالكرد ..

يعنى مانقدرش نقول الأغنية دى من مقام كذا .. وخلاص ..

لأن هناك مدرسة تقول أن العبرة بالمقام الذى يبدأ به الأغنية .. ومدرسة أخرى تقول العبرة تكون بالمقام الذى ينهى به الأغنية ..

وأنصحك ياصديقى .. بالتدريب على تمييز المقامات بأذنك .. لأنها لن تكذب ..

ملحوظة هامة ( معلومة ببلاش )

إذا كانت الأغنية على درجة اليكاه ( قرار الصول )

يكون المقام ( شد عربان )

إما إذا كانت على درجة الدوكاه ( الرى ) يصبح إسم المقام ( شاهيناز )

ولا داعى للحيرة .. فالمقامان من متشابهات الحجاز كار .. وبنفس الأبعاد .. الفارق فى الأسماء فقط .

[سامي بن منصور]

يا أستاذ أبو حسام شكرا على هذا التحليل لأغنية حليم مساهماتك بامتياز . سمير بن منصور . تونس

[سامى امين]

مستر محمد اغنية على اللى جرا بتاعت عليا التونسية صحابى الكفتجية اشباة محترفين بيقولوا كرد انا قلت دى نهاوند كردى مين فينا اللى كفتة انا ولا هما

[الألآتى]

المشاركة الأصلية كتبت بواسطة سامى امين

مستر محمد اغنية على اللى جرا بتاعت عليا التونسية صحابى الكفتجية اشباة محترفين بيقولوا كرد انا قلت دى نهاوند كردى مين فينا اللى كفتة انا ولا هما

والنبى يابنى .. حرام تقول عليهم محترفين أو شبه محترفين ..

وبعدين إنت مش محتاج تسأل ..

شوف ( عُليا ) أنهت المذهب على أى درجة .. وإنت تعرف المقام ..

وهى بتقول .. ع إللى جرى .. ع إللى جرااااااا .. وبعدين تدخل مزيكا أول كوبليه ..

حاتلاقيها بتقف على حرف الركوز بتاع النهاوند ..

وبعدين ده نهاوند صريح .. مافيهوش لبس أو حيرة .. نهاوند على أبوه يعنى ..

[سامى امين]

مستر محمد اغنية خى خى هى مقامها راست لكن من جوا الكوبليهات اخبارها اية فى انتظارتحليلات حضرتك العلمية الرائعة

[الألآتى]

المشاركة الأصلية كتبت بواسطة سامى امين

مستر محمد اغنية خى خى هى مقامها راست لكن من جوا الكوبليهات اخبارها اية فى انتظارتحليلات حضرتك العلمية الرائعة

الأغنية راست

والكوبليه الأول ( أمانه لو يسألك ) راست

والكوبليه الثانى ( يافايت قلبى على نار حبى ) بياتى

وهناك تحويلات داخل الكوبليهات .. مثل : ( الشوق خلانى أبعت لك ) كرد


فى هذا الرابط

http://www.sama3y.net/forum/forumdisplay.php?f=216

ستجد قسم دعوة موسيقية على أغنية

يمكنك كتابة موضوع تطلب فيه تحليل الأغنية .. وسأقوم بتحليلها بالتفصيل بمشيئة الله .