التناصح

[مصطفى أخرس]

الفاضل
علاء قدري
علا شأنك و سما قدرك
و تحية مني إليك
كلمات منك قليلة موجزة تلخص الموضوع
من ينصح من ؟ ؛ وكيف تكون النصيحة ؟
حرفة الادب لا يجوز فيها المجاملة ؛ ولا المواربة
و هذا مربط الفرس
فالموضوع خاص ينحصر في
النقد الأدبي الموضوعي
المتعلق بالناقد المترفع عن هوى النفس
و الذي لا يريد من نقده إلا السمو بالعمل الأدبي
و لا يتعرض بحال إلى الأديب
و المرتبط بالأديب المتقبل للنقد
و الذي يأخذه على أنه من محب ناصح يريد به الخير
إذ يرشده إلى أخطائه
لك مني تحيتي
و اعتذاري في تأخري بالرد

[ناصر دويدار]

الأخ العزيز مصطفى موضوع مهم ومحترم وجدير بالنقاش أولاً يا أخى العزيز لا يوجد فارق مابين النشر فى النت والجرائد والمجلات المتخصصة كلها روافد لنشر الإبداع بمعنى تصنيف الحكاية بالنسبة لبعض الأخوة أن نقد النص فى المنتدى مختلف عن غيره فى الصالونات الأدبية انا بمنتهى المحبة ضد هذا الرأى لأن النص نص على النت وفى الجرايد والمجلات ومتلقى النص واحد وصاحب النص واحد لكن هناك مشكلة نحلها أولاً ثم نتحدث .
المشكلة هناك لكل مدرسة ومنهج جماعة ولكل طريق جماعة وكل جماعة تدافع عن وجودها بأساليبها وكل إناء ينضح بما فيه فمثلاً هناك جماعة (عديمى الموهبة) هذه الجماعة صوتها عالى تطلب حق ليس من حقها وتحاول تشكيل رأى عام من خلال ما يكتبوه وهم ليس لديهم ما يخسروه فتكون حربهم عشوائية مثلاً عندما تنتقد نص لهم يقوموا بتشكيل عصابة للرد من عينة الحكومات المتسلطة عندما تلصق تهمة بأحد معارضيها زمان التهمة شيوعى حاليا اخوان مسلمين وهكذا وهؤلاء لهم مشجعين ولهم عالمهم معدومى الموهبة يحب بعضه البعض ويدافعوا عن بعضهم هنا مفيش مشكلة .
المشكلة عندما يشعر عديمى الموهبة من خلال حالة (نفخ) أنه ذات قيمة تبدأ المشكلة لأنهم بيصدقوا نفسهم وبالتالى عايزين يفرضوا وجهة نظر متخلفة فلازم يحصل الصدام بين الوهم والحقيقة وعلى فكرة
(الحقيقة دايماً صادمة لأن الحقيقة بتعرى) والنبى آدم اللى بيتعرى بتبقى مصيبة لأنه بيبان المستخبى اللى هو عارفه بس بيعمل (ميكانيزم دفاعى) الناس دى غلبانة غُلب مش حقولك فى واحد تانى بيقبل النصيحة لانه صادق مع نفسه لأنه عارف إن النص مهما وصل لحاله ابداع فهو ناقص هذا الشخص يقابل الحجة بالحجة ويتناقش ويتحاور للوصول إلى قيمة جمالية فى النص
هذا النوع من المبدعين والبنى آدميين نوع محترم .. شايف تجربته وشايف تجربة الأخر وعايز يعمل شئ لأنه يدرك معنى كلمة مبدع اما حكاية خدش الاحساس والتقليل من شأن المبدع هذه ليست حقيقة لان النص هو اللى بيفرض لغة الرد فنحن نتعامل مع نص لابد من خدشه لمعرفة الرقم السرى للدخول للنص والتقليل من النص او التهليل له ده شعور طبيعى وعادى وإنسانى ولابد ان يكون هناك اختلاف فى الذائقة لأن هذا ليس نص قرآنى ولا حديث شريف حاشا لله لكن نص صنعه بنى آدم مبدع لنا فيه رأى .
ويا أخى موضوعك عايز ندوات وخاصة وقوف المرء عند حدود علمه ده كلام خطير خطير وان يدلى بدلوه فيما يعلم وفيما لا يعلم أخطر لأننا سنكون كما قلت فى وادى والحق فى وادى أخر بل نسيئ إلى الحق من حيث لا ندرى
موضوعك راقى ورائع ومحترم ويحتاج كلام كتير لان المفاهيم غير واضحة لناس كتير ومعنى كلمة مبدع غير مفهومة لدى البعض وأديب وقصاص وشاعر عند التقييم لهم تقدير خاص وهناك أشياء وتعليقات منذ دخول المنتدى وانا أقرأها بعناية من عينة روعة وإيه الحلاوة دى وايه الجمال ده دى تعليقات فى حدود الوعى والفهم والادراك دى مقبولة ومفيهاش مشكلة لكن هناك تعليقات ليس لها علاقة بالنص ولكن لها علاقة بأشياء آخرى ولازم اللى اتجامل يجامل وفرح وعقبال عندكوا لو واحد دخل وخرج عن السياق الدرامى للتعليقات دى يبقى نهار اللى خلفه أسود لان كده حيقلق الوعى السايد وخد عندك بقى هجوم شرس من كل الاتجاهات ومن كل البلاد ومن كل الاسامى ليييه؟
انا قلت لك الحقيقة بتصدم عاملة زى الكهربا لما تمسك واحد على سهوة بتبوظ كيميا جسمه وأجمالاً .
1_من أمتك شجاعة كتابة نص ونشره لابد ان يمتلك أنسانية تلقى النقد والرد عليه .
2_النصيحة لها ناسها والحوار له ناسه وصدقنى يااخى العزيز (التكشيم) له ناسه وفى واحد لو كلمته بذوق مش حيفهم دى ثقافة يا أستاذ وفى واحد لو كلمته فى النص يكلمك فى أغنية لطفى بوشناق لامونى اللى غاروا منى وفى واحد عايزك طول الليل والنهار تقوله عبقرى _عظيم_إنسان_جميل_كروان_مالكشى حل .وهكذا
3_كل جماعة لها الحق أن تدافع عن معتقداتها فلماذا نهلل للمجاملة ونصدم من النقد اللاذع سبحان الله يا اخى انت حر وانا ليه مش حر ؟!
4_هناك فارق شاسع ما بين قارئ ومابين مبدع فارق شاسع ومابين محب للفنون وما بين معجون فيها ومابين متذوق وما بين طباخ
ومابين واحد هاوى فى اللذيذ وواحد الحكاية لعبته كل دى مفاهيم (بديهيات)
5_مستشار هتلر كان يقول عندما يستمع إلى كلمة ثقافة يتحسس مسدسه (اللى عايز يفهم يفهم بقى)
عايز أتكلم كتير لكن أشكرك يا أخى مصطفى جداً جداً على هذا الطرح لأن لسه الموضوع فيه كلام كتير شكراً مرة تانية ومع خالص تحياتى