سلام و احترام،
الفنان محمد المورالي مونولوجيست و فكاهي و ممثل كوميدي معروف
اشتهر في الستينات و السبعينات من القرن الماضي
و هو من جيل السملالي و الجراري و رضا الحجام
له أغاني تميزت بطابعها في النقد الاجتماعي نوعا ما
مثل (يا جماعة عندي طزينة - الدجال - دايا من هم الصبيان )
و (أقرا و احفظ) التي أقدمها لكم اليوم...
أقرا و احفظ
أقرا و احفظ ياللي تسمع
ما تكونش مغرور
كون كيفي أنا متعلم
راهو العلم نور
-----
في الادب نقلك أنا
التاريخ أنا عالم كبير
كيمياء و حساب و جغرافيا
نعرفهم م اللي أنا صغير
شعر و نثر معاهم زاده
نكتبهم من غير تفكير
علم الذرة أنا وضعتو
خملتو(1) في قاع البير
بالسوري(2) محصل شهادة
يسموها طبلو دونار(3)
-----
أنا في علم التاريخ
أول مؤرخ في زماني
حواء ماتت يوم خميس
ثمانية في ربيع الثاني
عنتر أبيض موش وصيف(4)
تاريخي ثابت أصلاني(5)
شمشون كان أقرع و ضعيف
في أصلو يرجع فزاني(6)
قيس و روميو راهو توامه
و ماتوا في أبه قصور(7)
-----
الجغرافيا يا رجالة
قاريها م اللي أنا صغير
تقلي طوكيو فين نلقاها
انقلك موجودة في خمير(8)
في فينا كيف تاخو(9) الدورة
تلقى حذاها بلفيدير(10)
باش تمشي للقطب الجنوبي
تتعدى على بو قرنين(11)
و إذا تحب تمشي لشيكاغو
من مطماطة(12) أبدأ دور
-----
معاني بعض الكلمات
(1) خملتو: خبأته
(2) السوري : مصطلح عامي تونسي يعني اللغة الفرنسية
(3) طابلو دو نار : مصطلح فرنسي (Tableau d'honneur) جائزة شرف
(4) وصيف : أسود
(5) أصلاني : حقيقي
(6) فزّاني : نسبة الى منطقة فزّان في ليبيا
(7) أبه قصور : مدينة في الشمال الغربي من تونس، اسمها اليوم الدهماني
(8) خمير : أو جبال خمير توجد في الشمال الغربي لتونس قرب الحدود الجزائرية
(9) تاخو : تأخذ بالعامية التونسية
(10) بلفيدير : حديقة و منتزه في شمال تونس العاصمة بالفرنسية (Belvédère)
(11) بو قرنين : جبل في الجنوب من تونس العاصمة قرب ضاحية حمام الانف
(12) مطماطة : مدينة في الجنوب التونسي فيها آثار قديمة