احبائى
اقدم لكم رائعة من روائع الفنانة فايزة احمد
ياما انت واحشنى
انا ايما الفرقة الماسية كنت بحب فايزة احمد بعكس الفرقة يعنى كانوا بيحبوا وردة اكتر ..وكانت كتيرتتخانق مع الفرقة وتروح فرقة تانية لكن اول ما تعمل لحن جديد لازم ترجع للفرقة الماسية تانى .. لن اللحن لما يكون اتذاع قبل كده ويتعزف فى حفلات على فرقة متوسطة ممكن لكن لما يكون لحد جديد لازم الناس تسمعه كما ينبغى ان يكون ..
اللحن ده فيه تميز عمره ماحصل فى تاريخ الغناء بتاع العمالقة .. وعشان تتمتع بيه لازم تسمع اللحن من تسجيل يكون عالى النقاء عشانت حس بالباص .. لأول مرة يشتغل معانا عازف بيز جيتار .. وكان متميز جدا جدا .. هو كان اسمه عصمت عباس وهو ابن عازف الكونترباص الشهير عباس فؤاد بتاع ام كلثوم .. وكان عصمت عازف كونترباص قدير وبالطبع لما عزف بيز جيتار عزف بنفس اللى بيعزفه على الكونترباص .. وآلة البيز جيتار دى كانت مظلومة جدا جدا ايامنا يعنى عمرى ما شفت عازف له قيمة يعنى كانوا كلعم بيهبشوا اى حاجة مالهاش معنى .. بلغة السوق تفعيص يعنى .. لذلك كان لما تسمع واحد بيعزف حلو بيبقى طبعا اعجوبة ( علما بأن فى اوروبا الآلة دى ليها مدارس ولها شغل يجنن واساسية جدا فى الفرق الحديثة ) لأن مشكلتها مش زى الجيتار الليد ( الجيتار العادى يعنى )
انت ممكن تجيب عازف جيتار متوسط ويقول صولو المفروض انه يكون متوسط بيطلع وخلاص .. لكن شغل الكونترباص فى الموسيقى العربية وبالذات مع العمالقة 90% بيبقى مهارة فائقة من العازف وذوق عالى .. لأنه مش بيعزف اللحن كله ولكن قدامه نوتة زى اللى قدامى .. هو بيعمل شغلتين الاساسية انو بيعزف الضلعين الرئيسيين فى المازورة يعنى المازورة 4/4 بيبقى اربع اضلاع هو بيعزف الحرف اللى على الضلع الاول والحرف اللى على الضلع الثالث ,, ولو اول المازورة سكتة بيعزف حرف بيمهد للحرف اللى جاى بعده .. وفى بعض الإيقاعات اللى زى المقسوم بيعمل حاجة ايقاعية بتبقى اساس المقام يعنى لو بياتى على الرى بيعزف نغمة رى بطريقة كونتر مع الإيقاع ... لكن حاجة مهمة جدا جدا جدا انو لازم الدوم الاولى فى المازورة بيعزفها مع الرق .. يعنى الرق مش بيعزف لوحده ولكن لازم الكونترباص معاه لذلك تلاقى عازف الرق وعازف الكونترباص مرتبطين ببعض ولازم يكونوا متفاهمين .. يعنى اما كلثوم لما كانت بتعدى حسن انور كان لازم ييجى معاه عبد الحكم عبد الرحمن ... انا نفسى انكم تتمتعوا بموسيقى محمد سلطان لأنه مدرسة فى التلحين يعنى بيمثل الجيل الرائع التانى بعد عمالقة القمة .. فى الحن ده اول مرة فايزة تغنيه حصلت مصيبة على المسرح اوكارثة عمرها ماحصلت .. كنا فى نادى ضباط الزمالك فى مناسبة وطنية وطان الحضر كلهم ضباط .. كان فى شهر رمضان .. والمشكلة ان كان فيه فقرات كتير قبل فايزة وطلعت متأخرة .. اللحن كان اول مرة يعنى فايزة لازم تديه حقه .. يعنى تعيد كتير عشانالمستمع يتسلطن اوى .. واخطر شىء فى الإعادة ان كل ما الجملة بتتعاد هى بتقول احلى والعازفين وبالذات الإيقاع بيطلع كل اللى عنده يعنى حسن انور كان لما يعزف الجملة 4 مرات بيبتدى ينطلق يعمل حاجات تجنن .. المهم ان الضباط كانوا مش سميعة اوى
وبعدين وقت السحور قرب وعايزين يقوموا يتسحروا قعدوا يشاوروا ان فايزة تخلص ..
وبالطبع الاشارات وصلت للمجموعة اللى على المسرح يعنى مدير المسرح واللى بيقفلوا الستارة يعنى حصل توتر .. وجت فايزة عند الجزء اللى فى الكوبليه الاخير ( فى صفحة عشرة تانى سطر حاجة شبه قفلة يعنى الموسيقى عزفت فا مى رى دو سى لا صول
المتخلفين اللى على المسرح حسوا ان الاغنية خلصت راحوا قفلوا الستارة
فايزة اتجننت وقعدت تصرخ افتح انا لسه ماخلصتش الغنوة ( وطبعا كان التليفزيون والاذاعة على الهواء ) وبعد شد وجذب فتحوا الستارة وكلفتت الحتة الناقصة ..
المشكلة ان الحفلة الاولى دى اهم حاجة بالنسبة لشركة الشرائط والاسطوانات لأنها هى اللى بيتعمل منها الشريط اللى بينزل السوق ولو تلفت بتبقى مصيبة
بس هى مشكلة فايزة انها لازم تتسمع وقت طويل يعنى بتقول جملة وتكررها 3 مرات واللى بعدها 3 مرات عشان تحس بحلاوتهم فيه مرجع كبير بيعيد المرجعين
اتمنى ان تستمعوا بالنوتة هى سهلة فى مواقع وصعبة شوية فى مواقع بس اكيد مش حاتبقى مشكلة
مع اطيب تحياتى
رجاء : فى الردود مفيش داعى لإقتباس كل اللى كتبته عشان ده بيزود عدد صفحات الموضوع على الفاضى
رد: طلبات نوتة أ / عادل صموئيل الجزء الثانى
"
..
العرض العادي
