إبداعات الشاعر طارق العمرى ، بدون تعليقات

[Tarek Elemary]

قلبي يهفهف .. يرفرف لما يشوف بنوته

و يبعت رسايل هوى كاش و عالنوتة

و لا يهمه الملامة و لا يهمة الناس

هوه هايموت موتة واحدة و لا 100موتة

أنا أحب أقول اللي حاسة و اللي شايفاه عنية
و عواطفي زي الهوي ظاهرة مش مستخبية
قالو الصراحة راحة و إنتي .. آه من عنيكي
شبكة و سنارة .. و أنا قلبي ياما إنشبك في الرايحة و الجاية

إنت اللي فيهم يا حلو لو حتي خبيت عيونك

و الصورة باهتة و غبية لو كات من دونك

يا زينة الصحبة يا معطر البساتين

خايف عليك من عيونهم لا يحسدونك

أحلي ما فيكي عيونك الناعسة

و السحر ما يتوصف .. خايف انا أنسي

أبيع سنيني أنا لأجل الجمال و الزوق

طمعان يدوبك أنا في همسة أو لمسة

من حقك يا واد تتعاجب

و تقول إن أنا مش عاجب

مع إني في هواك متبهدل

من سحر الرموش و الحاجب

هاتروح بلاد الواق واق .. وبرضة راح ترجع

أصل الهروب م المصير و الله ما بينفع

ومهما طال السفر لك عش يا طيري

ما بين ضلوعي سكن مشتاق لو ترجع

إسكندرية ماريا و إنتي زينتها

و مارية غنوة جميلة عنيكي غنتها

و الرملة رقصت عشانك و إتلهفت ليكي

سألوها إيه السبب قالت .. سحر خطوتها

حلو و جميل المحيا و العيون زرقة

و رموشه زي السيف حامية ياناس حارقة

لو عمري ضاع في الهوي من شان يادوب نظرة

أقول فداك يا قمر و حياتي مش فارقة

تتقل علي أنا ... و أنا الل علمتك

معني الكلام و الهوي و قلبي سلمتك

تصعب عليا صحيح بس مش زي قلبي

آسف يا قلبي أنا اللي جنيت عليك و بهدلتك

لغة العيون أسرار و بحر ماله قرار

و إنتي عيونك ليل من اللي ماله نهار

عملت فيها بطل و سهرت علي رمشك

رماني رمشك بقسوة بقيت غريب الدار

يا أهل الهوي يا مجروحين يا عاشقين قبلي

ما فيش طريقة اللي بيها أغير اللي إنكتبلي؟

أصل الحقيقة غريبة و مين فينا بيقبلها

لا خلو بالي هويته و لا إنشغال البال طابلي

[Tarek Elemary]

يا سيدى عاوز تطاع أمر بما يستطاع
وايش يعمل الديك ف غابة يا عم وسط السباع
يدَّن يقولوا داوِشنا .. ولا حَد عنه حايِّشنا
إلا بتوع البِتاع
هوه الأسد لو سامِعنا ... و شارِينا أو مِش بايِعنا
كان حَد فِينا جاع؟
أو حَد مات فى السفينة ... بعد ما زار المدينة
و ضاع مِعَاه اللى ضَاع
ضاعِت كرامة بلَدنا ... لما رَمينا ولادنا
فى البحر من غير شراع
زمان لما كانت بَلدنا ... و صوت الأدان جِوة مَدنة
ملازنا وسط الضياع
دلوقتى بيفِر منها ... شباب حقيقى يزينها
و اليأس حتى النخاع
مرة على شط قبرص ... و البرد ع البطن يقرص
بعد ما باع اللى باع
فايتك و مرغم يا غالية ... و منايا أوصل إيطاليا
هاربان ما قلت الوداع
و يبيعنى تاجر لتاجر ... يرمينى نصاب لفاجر
سلعة و بقينا مشاع


أكيد هاكملها بعدين منك لله يا عم محمود يا سعد نكشتنى ليه؟

[Tarek Elemary]

سجَّان بيسقينى مُرِّك ... كرباجه فوق ضهر حُرِّك

هايزول فى غضبة جياع

و أرجع لحضن السواقى ... ألِّم منى اللى باقى

يخِف منى الصداع

[Tarek Elemary]

سُوق العُرُوبة جَبِرْ لَملِّم يا وَاد شالَكْ
و ابْكِى يا حِلْم الجِدُودْ على قَبر أمثالَكْ
الشِعر هَجَر القوافى غَنَّى الغُراب فِ الدُّوُر
وضاع زَمَان العَرَب؟ ... فال الله ولا فَالَكْ
..........
غَنَّى السِلاح فى الكِفَاح رقََصْ الرُصَاصْ ع الدمّْ
شَدْ الرِجَال عَ الزِنَاد هَزَمُوا جِبال الهَمّْ
و اتلم زهر البلاد من النجوع و الكفور
لَضَمُوا عُقُود الفِدَا لَبُّوا النِّدَا أَخُويا وابنِ العَمّْ
...........
كتبوا مَلاحِِمْ شَجَنْ يِِشْهَدْ عَليهَا الزَمَنْ
هَدُّوا الجبلْ صَّحُّوا الأمَلْ داسْ القَدَمْ عَ المِحَنْ
والعَتْمَة لما انّْجَلَتْ رَقَصْ النَّهَارْ فِ الُّنوُرْ
عَادْ العَرَبْ لِلطَّرَبْ على لَحنْ كِلْمِةْ وَطَنْ
............
تِفْتَكرُوا دَا كان خَيَالْ ولَّلا الأملْ كان وَهْمْ؟
و المُشْكِلَة فى القُوسْ ولَّلا الوَتَرْ وِ السَهْمْ
ولَّلا اِلِّلى شَدْ الوَتَرْ فى الأصْلْ كان مَأْجُورْ
صَوِّبْ عَلَى جَمْعِنا صَابْ الوَطَنْ بِالغَمّْ

[Tarek Elemary]

تعليق على قناديل المبدع محمد السلامونى

يا عاشق حنجرة قنديل
كعشق الآهه فى المواويل
أنا وياك فى عشق الحلو لما يطل
زى البدر لما يزين نجوم الليل
.....
يا غاوى الحرف و الكلمة يا سلامونى
يا ناسج توب حرير بالشعر على مهلك
أخاف أوفيك عليه حقك يلومونى
و أى كلام جميل يتقال هنا ... مش بس تستاهله ... ده يستاهلك

[Tarek Elemary]

طارق العمرى:

يا سيد الكل على كيفك
حروفك حادة من سيفك
وسيفك بالمداد مليان
ويسعدنى أكون ضيفك

عمو سيد أبوذهدة:

يا عَمْ ، الفـَرح ، تَشريفك
يزيح ، الهم ، تلطيفك
إذا نسيتنا ، و مُش نـَسْيان
يا سِيدي ، ابعتلنا طيفك

طارق العمرى:

أنا من ردك إتلخبط
و بحر الحيرة مالهوش شط
و باعى مش طويل زيك
ومش شايف نهاية الخط

عمو سيد أبوذهدة:

لاقيت فِرْوِد ، و نازِل أَطـْ
و انا يا عم ما خـَطـَّطْْ
لـَمَحت ، يا دوب ، سنَى ضيَّك
و بس ، يا دوبَك اتشَعْبَطْ

طارق العمرى:

ردودى عليك دى يوم سعدى
معايا حضرتك تاخد كده و تدى!!!
و لا فى الحلم كان ممكن أنا افكر
ما بين دررك أنا احشر كلمة من عندى

[Tarek Elemary]

الغربة مش غربة جَسَدْ ...... و لا حدسافر من بَلَدْ

الغربة بين أهلك عذاب ...... و غربة الأفكارنَكَدْ
............
آه من عذابك يابنى لما تكون وحيدْ
تسمع صدى الصرخة لوحدك دهأكيدْ
ما يحس بيكإلا اللى زيك فى الهوى
قلبه إنكوى و عذابه بالأيام يزيدْ
................
صعبة قوى الغربة مابين أهلكوناسَكْ
وانت معزولبأفكارك لوحدك جوه راسَكْ
واللى أصعب من ده كله لما تبقى إنت صحْ
بس صحك كله بح والألم مَعْصُوربكاسَكْ
......................

الآخرين سِجْنَكْ و فِكرَكْ إنت سجَّانَكْ

طعم الكلام إخْتَلَفْ مَعْقُود على لسَانَكْ

يا خسارة مين يفهمك وانت الغريب بينهم

مستغرباك عينهم مع إنهم فى الأصل خِلَّانَكْ

......................

قال المثل م الأزَلْ للِّى يفوت دَارُهْ

مهما الحِلِيوَه عَمَلْ يِتْقَّلْ مِقْدَارُهْ

و أنا دارى لم فُتَّهَا و الأهْلْ حَوَّالَيَّا

و بيتى مفتُوحْلُهُمْ ما حَدْ يُومْ زارُهْ

......................

[Tarek Elemary]

يا سيدى عاوز تطاع أمر بما يستطاع

وايش يعمل الديك ف غابة يا عم وسط السباع

يِدَّن يقولوا داوِشنا .. ولا حَد عنه حايِّشنا

إلا بتوع البِتاع

هوه الأسد لو سامِعنا ... و شارِينا أو مِش بايِعنا

كان حَد فِينا جاع؟

أو حَد مات فى السفينة ... بعد ما زار المدينة

و ضاع مِعَاه اللى ضَاع

ضاعِت كرامة بلَدنا ... لما رَمينا ولادنا

فى البحر من غير شراع

زمان لما كانت بَلدنا ... و صوت الأدان جِوة مَدنة

ملازنا وسط الضياع

دلوقتى بيفِر منها ... شباب حقيقى يزينها

و اليأس حتى النخاع

مرة على شط قبرص ... و البرد ع البطن يقرص

بعد ما باع اللى باع

فايتك و مرغم يا غالية ... و منايا أوصل إيطاليا

هاربان ما قلت الوداع

و يبيعنى تاجر لتاجر ... يرمينى نصاب لفاجر

سلعة و بقينا مشاع

سجَّان بيسقينى مُرِّك ... كرباجه فوق ضهر حُرِّك

هايزول فى غضبة جياع

و أرجع لحضن السواقى ... ألِّم منى اللى باقى

يخِف منى الصداع

[Tarek Elemary]

ردا على تصريحات الشاعر سيد أبو زهدة بأسباب غضب جبل المقطم الأخير كما زعم صدر البيان الحكومى الرسمى التالى:
سكووووت

من شاشة طَلّْ الجَمِيلْ .... وَسِيم مُعَطَّر مُهَنْدَمْ
أعلَنْ بَيَانُه الطَوِّيل .... و اتْحَدَّى لوْ حَدْ يِفْهَمْ
قال الحِلِّيوَةْ النَبِيلْ .... من تَحْتْ جَبَلْ المُقَطَّم
.....................................
الِّلى حَصَلْ لَلجَبَل .... من بَعْدْ قَعْدِة فَرْفَشةْ
نَفَضِ سِنِينْ الكَسَلْ .... قام انْبَسَطْ و إنْتَشَى
قام حاصِلِ الِّلى حَصَلْ .... من غير كُسُوُف أَوّْ خِشَى
...................................
حَبِةْ حِجَارَة صَغِيِرَة .... زىّْ النيرانِ الصَدِيِقَةْ
ضَلُّوا طريقْهُمْ بِحِيرَةْ .... فوُقْ قَلبْ حَىّْ الدِوَّيقةْ
هَبِّتْ جُمُوعْنَا الغَفِيرةْ .... ذَوِّى القُلُوب الرَقِيقَةْ
دَاوُوُا جِرَاحِ العَشِيرةْ .... و طَفُّوا نَارِ الحَرِّيقة
.....................................
يا ابو زَهْدّة عَنْدَكْ دَلِيلْ؟ .... ولَّلا انتِ غَاوِى ذَمّْ
ولَّلا الكَلام مِنْ قَبِيل .... إنِّ المُعَارِضْ أَهَمّْ
وِانِّ المِوَالِى عَمِيلْ .... أَعْمَى وِ أَبْكَمْ أَصَمّْ
...................................
وأرجَعْ وأقُول يابُو زَهْدَةْ .... جِبْتِ الكَلامْ دَّه مِنَيْنْ؟
ولَّلا إنْتَ مافِيشْ فَايْدَةْ .... للحَبْسْ جِوَّاكْ حَنِّيْنْ؟؟ !!!!!!

[Tarek Elemary]

يِجْعَل كلامى خَفِيف عليك يا عم سَيِّد
شَعْب السماعى بِيكْ صَبَابَا مُغْرَمِيِنْ
مُتَيَّمِيِنْ ... مابَيْن مِوَالِى أوّْ مِأَيِّدْ
قالوا المُعَارضَةْ لِيِكْ حَرَامْ ... حَتَّى لَوّْ كان بِالكَلامْ
" مَمْنُوُع يا سَيِّدْ "
-------
عَمْ رائِد هَبْ ثَايِّر ... ع الكَلام قَلَبِ الْمَوَائِد
حُبُّه لِيْك خلاَّه يِلُومنَى ... حَتَّى خَلاَّه مِشْ مِحَايِّدْ
حَتَّى دُكتُورنا أَنَسْ أَبو الوَنَسْ ... اِلِّلى مافَىِ حَدْ بِيْهْ إلاَّ أَنَسْ
شَدْ بِإِدَيْه يَدْ رَائِدْ ... قَالُّهْ كَفَّكْ .. خَدْتْ صَفَّكْ
هِزْ قَلَمَكْ ... فَهِّمْ العاصى المِِنَاهِدْ!!
-------
كُلُّهُم لاَمُوا عَلَّيَّا ... لَمَّا قُلْتْ بَيَانْ حُكُومى
بَسْ رَبَّكْ رَبْ نِيَّه ... صَاحِى لَوّْ نَامِتْ نُجُومِى
عَالِمْ انَّكْ عَنْدِى غِيّْه ... وعَالِمْ انِّى بِيْكْ مُتَيَّمْ
وانْ مَعْرِفْتَكْ هِدِيَّة ... و الهَدَايَا لا تُقَيَّمْ
-------
وانِّى فَاهِمْ مَعْنَى جَبَلْ الأَوْلِيَّا
وانِّى مَاشِى وَرَاكْ فِى كُلْ الأَوْدِّيَة
بسْ بَاتْحَسِّسْ خُطَّايَا لاَجْلْ عيْنِ الأَشْقِيَّا
-------
قُلُّهُمْ يَا عَمْ سَيِّدْ ... اِلَّلى بينِى وِ بينْ كَلاَمَكْ يِبْقَى عِشْقْ
بَسْ أَنَا مِشْ هَاتْقِمِصْ يوُم مِنُّهُمْ ...
مَعذُوُرِيْنْ ... بَرْضُه إِنْتَ تِستَحِقْ