مشاركات خارج موضوع طلبات النوتة

[وائل]

سلام عليكم جميعا
اخي ارمندو انا ايضا بضم صوتي لحضرتك ان ياريت استاذ عادل ميستناش اذا كانت النوتة موجودة في المنتدى او لا وهذا لسببين مهمين وهما ان الي بيقدمو الاستاذ مختلف تماما عن الاخرين يعني الاستاذ بيقدم السهل الممتنع والاخرين الصعب والتعقيد الممتنع والسبب الثاني هو ان انتظار استاذ عادل ده في حد ذاته بيضيع وقت طويل لدرجة اننا بنخاف يكون نسي الطلب واحنا طبعا نفسنا استاذ عادل ينوت لنا كل الاعمال الجميلة من زمن الفن الجميل لكي يضاف هذا المجهود لصفحة اعماله ويظل اسمه خالدا كاول موسيقي يحمل على عاتقه توصيل الفن الجميل للعمالقة الى جميع طبقة الهواة العازفين وهذا عمل ليس سهلا ابدا ويشكر استاذ عادل على اية حال حتى لو كان قدم نوتة وحدة بس يعتبر مساهمة منه لان في زمننا هذا مستحيل تجد احد ينوت لك بدون مقابل لا تجد هذا العطاء الا في مملكة سماعي وبالاخص عند الرجل الطيب عادل صموئيل
وانا ايضا بحب اول همسة وقد طلبتها ايضا منه وللتذكير فقط هذه قائمة طلباتي من استاذ الكل
(الحب اللي كان- حكاية غرامي- ذكريات للسنباطي -كيلو بترا- الكرنك- ياطيور لاسمهان –اول همسة لفريد -مش عوايدك لبليغ- ( وانا عارف انهم كلهم طوال ومن العيار الثقيل بس انا عارف حضرتك دايما بتحب التحدي زي ماعملتمع دارت الايام وهي الاطول على الاطلاق كما قلت حضرتك

[armendo]

عزيزى واستاذنا الأستاذ عادل صباح الخير والسعادة
اشكرك كثيرا على النوتة الجميلة لأغنية البيض الأمارة لعبد الغنى السيد وأشكر الأستاذ نور الصباح على حسن اختيارة لها.ارجوك يا اخى عادل الا تعتذر عن الأطالة فحديثك ممتع وكونك كنت احد العاملين فى المطبخ الفنى يعطى لحديثك مصداقية وقيمة لدى المتلقى ولذلك فانا شخصيا استمتعت والتى لا تخلو من خفة الدم التى تتمتع بها وفيما يخص فريد وام كلثوم فأود ان اعرض عليك ما سمعتة بأذنى فى احدى البرامج فى الأذاعة اللبنانية والتى كانت تستضيف الفنان فريد الأطرش فى السبعينات وقبيل وفاتة واستعرضت معة مقدمة البرنامج حياتة الفنية منذ ان بدأ الى ان غادر مصر فى اواخر الستينات الى ان سألتة السؤال الذى جعلة ينفجر كالبركان وهو لماذا لم تغنى ام كلثوم من الحانك بالرغم من انها غنت لكل الملحنين الكبار الموجودين على الساحة فى ذلك الوقت وهنا انفجر كما قلت وقال بغضب شديد لااعرف السبب الذى يجعل ام كلثوم لا تغنى من الحانى بالرغم من اننى الملحن الوحيد الذى لم يسقط لة لحن بالرغم من انها تغنى لغيرى الحانا لا تليق بها اقرب الى الطقاطيق ولا تغنى من الحانى انا فريد الأطرش واعتقد واللة اعلم انة كان يقصد الشيخ سيد مكاوى الذى لحن لها فى تلك الفترة يمسهرنى وهذا للتاريخ اى ان ام كلثوم هى التى كانت ترفض الغناء من الحان فريد الأطرش وليس العكس.اما عن عبد الوهاب مع ام كلثوم فقد خدم نفسة اكثر مما خدم ام كلثوم واستطاع ان يحول اتجاهها 180 درجة بمكر شديد وفى راأيى ان احلى ما قدم عبد الوهاب مع ام كلثوم هى المقدمات الموسيقية الجميلة مثل مقدمات اغنيتى انت عمرى ودارت الأيام والتى لا اعلم كيف اقنع الست بها وهى التى تعودت على مقدمات اغانى قصيرة منذ ان بدأت الغناء مع العمالقة زكريا احمد والسنباطى ولكنى مع الأسف افتقدت ام كلثوم عندما غنت مع عبد الوهاب.اما الوحيد الذى استطاع ان يعيد الى ام كلثوم كما اعرفها فهو الرائع بليغ حمدى فى الأحدى عشر لحنا الذ لحنهم لها واعتقد ان السبب هو انة ومعظم الجيل الجديد فى ذلك الوقت كانوا جميعهم خارجين من عباءة العبقرى رياض السنباطى وارجو قبول اعتذارى عن الأطالة مع شكرى وتقديرى واحترامى. ارمندو

[جوليانا]

السلام عليكم ورحمه الله وبركاته

الاستاذ الفاضل /عادل
الساده اعضاء المنتدى الكرام
تحيه لكم جميعا
انا بشكر حضرتك اوى اوى على هذه الاسرار والذكريات الثمينه
ويا ريت حضرتك كل اسبوع تخلى يوم وتحكى لنا عن هذه الايام والبروفات او المحاضرات الدراسيه فى الاخلاق الفنيه والغيره الشريفه اللى خلت هذه الفتره من احلى فترات الطرب والغناء
بس يا ريت ما بكنش بتقل على حضرتك بهذا الطلب
على العموم انا ممكن اعمل خطه مع الاعضاء الكرام وكل شويه حد يسال حضرتك سؤال فطبعا حضرتك هترد علينا لانك دايما وابدا كبير وعظيم فى كل حاجه
انا قولت على الطلب
ويا ريت الاعضاء يشاركونى فى الخطه عشان نستفيد من استاذنالانه بحر العلم
وليه انا فهو موجهى الاول والاخير
وبشكرك على النوته الجديده ويا رب تظل مناره للفن الاصيل
وكالعاده بطول انا اسفه
وشكرااااااااااااااااا
اشكرك عزيتى جوليانا اقتراحك جميل يعنى انا احب اكتر الأسئلة لأن لها ردود سريعة غير لما افكر وافتكر

عادل صموئيل

[armendo]

عزيزى الأستاذ عادل صباح الخير والسعادة
خلصتها والحمد للة وقد كانت مشكلتى فقط فى الجزء الذى يقول بينى فى الحب وبينك ما لايقدر واش يفسدة الى اخرة فقد غناها عبد الوهاب باحساس عبقرى وقد اردت ان اترجم هذا الأحساس بالعود ولكنى مازلت غير راضى وسأحاول معها حتى اتقنها تماما ان شاء اللة. ارمندو
احبائى
كل ما واحد منكم بيتكلم انه انجز شىء كنت انا السبب فيه بحس انى فى منتهى السعادة انا عملت شىء عظيم واكرر ان مضناك دى من الأغانى اللى انا بسميها سد عالى ماحد يقدر يتجاوزه سواء غنا او عزف لأنه من الأغانى اللى عبد الوهاب عاملها لنفسه وانا اخترقت السد ده انى كتبتها وقمت بتبسيطها عنى اخدت منها اللحن الأساسى وللعلم اى لحن بيبقى لحن اساسى بعدين المطرب القدير بيعمل فيه زى ما بيعمل واقول لكم على سر ولا حظوا انى كل ما ارد على واحد منكم انا بخاطب الكل السر هو انى لما كنت اروح عند عبد الوهاب او السنباطى او اى حد من العمالقة عشان ادون له نوتة هو نفسه لو عايز النوتة تبقى مدونة 100% لازم بيغنى لى سادة واكرر سادة يعنى اللحن الأساسى بدون اى زخرفة او حليات او عُرب بعدين فى البروفة بالنسبة للفرقة هو بيمسك العود وبيعزف يعنى بيقول انا عايز النوتة اللى قدامكم دى احساسها كده وبالنسبة للغنا انا لما اكون كاتب اللحن الأساسى هو لما بيعمل كل اللى نفسه يعمله الفرقة بتقرا من النوتة اللحن الاساسى وودنهم معاه بيترجموا معاه الإضافات اللى بيعملها يعنى زى تورتة انا بحط حجمها الأساسى وهو بيزوقها بمعرفته وكالما انا حطيت الخطوط الأساسية ممكن الكل يمشى , وهنا استعيد المناقشة المهمة اللى حصلت من شهر مع الأخ علاء كما اعتقد اسمه هو اصر على ان النوتة تبقى متكوبة حرفيا بالحليات والإحساس واكرر للمرة المائة لو اتكتبت كده اولا مش حاتطلع لأن اول عيب حتكون صعبة جدا وخانقة لكل من يعزفها وانسى الهواة والمبتدئين حاتبقى طلاسم وهنا لما انت جيت عند الجزء بتاع بينى فى الحب وبينك هنا دراسة مهمة جدا يعنى انت بتلاقى انا كاتب اللحن الأساسى فى المازورة 4 نوارات يعنى اربع حروف لو دققت بودنك تلاقى عبد الوهاب العبقرى المتمكن بيحط داخل الأربع حروف دول ييجى عشرين حرف منهم الظاهر ومنهم الباطن ومنهم الخبيث وهنا مدرسة مهمة انك اولا تعزف النوتة زى ماهى وثانيا تسمع عبد الوهاب مليون مرة لحد ما تكتشف الحروف اللى مش ظاهرة اللى بيحشى بيها الحروف الاصلية ممكن تكون ايه ومرة فى مرة حاتلاقى نفسك بتقولها ودى لازم تنبع من احساسك انت يعنى حتى لو انت ساكن فى الشقة اللى قصادى وقعدت مهاك كل يوم مش حاعرف اخليك تعزفهم لأنك انت اللى لازم تحسهم
وهنا نيجى لدرس تانى وهو عبقرية موسيقانا الشرقية واللى بتتفوق على الغربية وبالذات فى الجزئية دى بالذات يعنى الموسيقا الغربية بيتكتب كل حاجة الملحن عايزها فى النوتة والعازف لازم يكون صاروخ فى قراءة النوتة وبيمشى على النوتة المحددة زى القطار ما بيمشى على القضبان , هنا لو انت حفظت المقطع ده 100% وتدندنه طول الوقت حاتلاقى اصابعك راحت ناحية الحروف الخفية دى لوحدها ولا حظوا حاجة مهمة اشمعنى ( اشدعوة عشان وائل ) فى اللحن ده بالذات انا نزلت التسجيل ؟
عشان بخبرتى انا عارف انك لازم تكون حافظ اللحن 200% واقول لكم على سر وتشهد عليه اختى العزيزة جوليانا انا لما بعمل مسابقات الموسيقى بتاعة وزارة التربية والتعليم النوتة اللى انا كاتبها لمضناك تناسب مستوى أولى اعدادى يعنى سهلة جدا بس ماتتقراش نوتة بس لازم ودنك تكون مع عزفك وهنا اتمنى تشغلوا السماعى شوية عشان الإبداع يعنى انت مثلا سمعت من عزفى حكاية غرامى اولا ايه رأيك فى عزفى ؟ انا عازفها سماعى لأن لو قدامى نوتة مش حاتطلع كده ابدا وعلى فكرة انتم طلعتم فى دماغى اعزف مضناك وان شاء الله قريبا حانزلها فى المنتدى وهنا حاتسمع انا كابها ازاى وبعزفها ازاى , وعلى فكرة ازف اليكم بشرى انا اتممت تدوين حكاية غرامى بس براجعها وبراجع على الرتوش الأخيرة وحاتستغربوا ازاى الإعجاز انى كتبتها فى يومين اما اكون مبسوط اوى او اكون قرفان اوى وعايز احط همى فى حاجة تشغلنى 24 ساعة متصلين وهنا كانت التانية وهنا درس ان الفنان اللى بجد ممكن مشاكله وهمومه بيفرغها يعمل منها فن مع اطيب تحياتى . عادل صموئيل

[ابوكارم]

الاستاذ/عادل انا من طلبت مضناك لانى كنت حاسس ان فيها سر من اسرار العملاق عبد الوهاب ملك النغم فطلبتها من العملاق ملك النوته الاستاذ/عادل صموئيل وشوف كم الشغل والفرحه وكم الشرح والاستفاده(كميه)وكام فتحت من مناقشات وقلتلنا كام سر لكن الاغنيه فيها اسرار اخرى لو خطرت على بالك ارجو ان تخبرنا بها والاغنيه مقامها حجاز لكن التحويلات الانتقالات لمقام ايه الاغنيه موسيقاها لها وقع غريب على فى نفسى لها تاثير رهيب لست ادرى لماذا ولك منا كل الشكر والاحترام ونشكرك مرة اخرى لحكايه غرامى ونتعشم ان تكون كامله.
اشكرك عزيزى ابو كارم وانت يرجع اليك فضل فى الموضوع كله
اول سر كنت عايز اتكلم فيه ان الاخ العزيز اللى نزل ملف كلمات الأغنية والشرح لو قارنت الكلمات تجد درس مهم وهو ان الأغنية هم اختاروا من القصيدة ككل مجموعة متناثرة مش مسلسلة من الأبيات وخرجت اغنية رائعة يعنى اعتقد ان 90% من المستمعين فاكرين القصيدة الحمد شوقى كتبها زى ما بيغنيها عبد الوهاب ولكن الصح انهم اختاروا منها مجموعة من اجمل المعانى فيها والغريب ان بعد ان اخذت تلك الابيات ان القصيدة لم تنهار يعنى القصيدة جميلة والأغنية اجمل ودى عبقرية لأن اى قصيدة بتكون عمارة متكاملة لو اخذت منها ابيات تضيع الفكرة والمضمون .
ومن ضمن اعجازات القصيدة ان عبد الوهاب احتفظ اطول فترة ممكنة بمقام الحجاز ماعدا الجزء الصغير عند جحدت عيناه
وهذا ايضا انا اعتبره اعجاز من عبد الوهاب لأن من مميزاته انه لايحب التكرار

مضناك جفاه مرقده **** وبكاه ورحم عوده

حيران القلب معذبه **** مقروح الجَفنِ مُسهده

يستهوى الوُرق تأوهه **** ويذيب الصخر تنهده

ويناجى النجم ويتعبه **** ويقيم الليل ويُقعده

الحسن حلفتُ بيوسُفه **** والسورةِ انك مفرده

وتمنت كلُ مُقطعة **** يدها لو تُبعث تَشهده

جَحدت عَيناك ذَكىَ دمى **** اكذلك خدُك يجحده

قد عز شهودى إذ رمتا **** فأشرتُ لخدَك أُشهده

بينى فى الحب وبينك ما لا **** يقدر واش يفسده

مازالُ العازلِ يفتح لى **** باب السُلوانِ وأوصده

ويقول تكاد تُجن به **** فاقول واوشك أعبده

مولاى وروحى فى يدهِ **** قد ضيعها سلمت يدُه

ناقوسُ القلبِ يدق له **** وحنايا الأضلع معبده

قسماً بثنايا لؤلؤها **** قسم الياقوتَ مُنضده

ماخنت هواكَ وما خطرَت **** سلوى بالقلبِ تُبرِدُه

ومن اعجازات هذه القصيدة انه كرر لحن المذهب
مضناك جفاه مرقده
ثم الحسن حلفت بيوسفه
ثم مولاى وروحى فى يده
ثم قسماً بثنايا
وهنا وانا كخبير فى عبد الوهاب وعملت معه عشرين عاما يعنى حفظت خفاياه تجد اروع عبقرية لعبد الوهاب انه عندما استعمل الجملة اللحنية 4 مرات لم ينقلها نقل مسطرة ولكن حتى لو الحروف اللحنية واحدة جود فى الداء وغير اللزمات الصغيرة كل مرة يعنى فى المذهب غنى الجملة بدون لزمات صغيرة وثانى مرة بلزمات ثالث مرة اختلفت اللزمات
واقول لك على سر اهم واخطر انا فى هذه اللحظة لو سمعت هذا اللحن حتكون المرة رقم مليون لأنى اسمعه واسمع غيره منذ خمسين سنة وكل مرة اسمع او اكتشف فيه شىء جديد فى الخلفية هذه هى عبقرية عبد الوهاب يعنى انا كخبير موسيقى عندما اسمع اى لحن اعرف اصله وفصله من اول او تانى مرة لكن عبد الوهاب لو سمعته مليون مرة اكيد ستجد شيئا غير ظاهر فى الخلفية يعنى باختصار الناس دول ماكنوش عباقرة من فراغ كل واحد منهم كان مثل هرم الجيزة مش حاتحصل ان واحد حايعرف او يوصل انه يجيب آخره مع تحياتى عادل صموئيل
اقول لك على سر خطير كمان
لو سمعت فى المقدمة فيه ابوا بتعزف صولو وملحوظ ان نصف الجملة الأول الابوا وقع فى الايقاع يعنى اسرع ودى ظاهرة طبعا عمرها ما بتحصل طيب ازاى سابوها كده لو دلوقتى كانوا وقفوا الشريط او عزفها كذا مرة لحد مايعزف احلى واحدة بعدين فى المونتاج يقصوا الباقى اول شىء العازف كان اجنبى لأن ماكنش فى مصر فى اول الأربعينيات عازف ابوا بهذا المستوى كيب غلط ليه ؟ ( مع ان عازفى آلات النفخ كل شغلهم نوتة اصلا يعنى بيقروا نوتة احسن منى ) لأنه اجنبى ومش متعود على السماعى لأن وقتها مكانش لسه التدوين دخل مصر وكانت الفرقة بتحفظ اللحن من الملحن على العود وعادى اما الأجنبى متعود على النوته وهو شاطر طبعا وحفظ لكن الإيقاع الشرقى تقريبا خضه خلاه اتسربع او استعجل حاتسألأ طيب ليه ماعادش الصولو وشالوا الوحش وخلوا الحلو اقول لك على السر ( اصل انا بفهم فى كل حاجة ) زمان كانوا بيسجلوا مش على شرائط كانوا بيسجلوا على قرص شمع ( وفى الآخر عشان الأسطوانات الحجارى ال 78 لفة ) وقرص الشمع ده بيتسجل مرة واحدة يعنى لو فيه غلطة يترمى ويحطوا واحد تانى وكان مستورد من فرنسا وكان غالى جدا جدا حتى لما تحطه على الماكينة لو حصل شىء وعايز تخلعه وتحط واحد تانى يلزم ساعة وقت مثلا
فهنا لازم الفرقة تكون حافظة عشان العملية مش قابلة للخطأ
عايز تعرف كمان سر ؟ ولا كفاية كده ؟
اقول لك عبد الوهاب فى التسجيل ده شرب 6 اكواب من الينسون الساخن وكان الكوب بقرش تعريفة يعنى صرف 3 قروش وقبض فى اللحن ده عشرين جنيه ثمن الغناء والتلحين
مع تحياتى عادل صموئيل ايضاً

[جوليانا]

السلام عليكم ورحمه الله وبركاته

الاستاذ العزيز/عادل
حضرتك مره قولت انا البروفه مع الاستاذ عبد الوهاب تعادل سنتين فى الكليه وانا بقول ان تعليق حضرتك العادى ده اللى هو كمان دردشه اللى بعيد عن الشرح ده جميع سنين التعليم
حضرتك انا مش لاقيه فعلا كلام عشان الواحد يعبر بيه
غير ان حضرتك عملاق وكبير واستاذ
فشكرا لك وارجوك ان لا تمل من الشكر لاننا لا نملك غيره لحضرتك فتقبل منى هذه الورود البسيطه

عزيزتى وتلميذتى جوليانا
اشكرك على كلماتك الجميلة واشكرك على الورود هى بسيطة فى شكلها ولكن كبيرة جدا فى معناها
وانا سعيد جدا انك بتحفظى كلام انا قلته من زمان وده من اهم صفات التعلم يعنى اقول لكم على سر انا كنت طول عمرى طالب شاطر جدا مع انى ماكنت بذاكر كتير ليبب كنت فى الحصة او المحاضرة بسمع كويس جدا وافهم 100% بعد كده لما اراجع فى الكتب خمس دقائق استوعب الموضوع وعندى ذاكرة تليفزيونية يعنى لما كنت اركز مع المدرس كنت احفظ اللى قاله حتى فى الإمتحان كنت لما اقرا السؤال كنت بفتكر المدرس لما شرح الدرس ده قال ايه وكان لابس ايه والذاكرة دى افادتنى كتير لما بقيت موسيقار يعنى كعازف مش بطال يعنى رأس مالى انى اكون حافظ 1500 اغنية على الأقل لأن لما بقعد مع حد سميع قيمتى ووزنى قدامه ان لو طلب اى اغنية اكون حاضر لأن لو قلت له مش حافظها وزنى ينزل عنده 80 درجة لأن بيبص لى على اساس انى عشت مع الفنانين دول يعنى طبعا غير اللى سمعوهم فى الراديو بس , والحاجة الأهم واللى انتم بتستفيدوا منها دلوقتى هى اثناء وجودى مع العمالقة دول كنت بدرسهم بحفظهم حفظت شكلهم الخارجى ومخهم يعنى فى اى سؤال لو حد سألنى حقول عبد الوهاب كان بيرد ازاى او السنباطى او بليغ لأن زى ما قلت كير الناس دى كانت فلتات يعنى اعاجيب من اعاجيب الخلق
كانوا مظهر متواضع جدا لكن جوهر ما اقدرش اوصفه فى سنين يعنى لو اتكلمت بحتار اقول ايه ولا ايه لكن لما انتى قلتى هنا فكرتك الجميلة انكم تسألوا وانا رديت ان اللى بيسأل بيشد خيط من ذكرياتى ولو تلاحظى ان كل سؤال بتكلم كتير جدا لدرجة ان بخاف انى اكون طولت وبقيت ممل .
وهنا من كلامك اقول لكم درس جميل جدا ليه انا بتكلم كلام حلو عارفين مثل : حامل المسك ونافخ الكير ؟
حامل المسك ده واحد شايل عطور جميلة يعنى اى واحد يفوت جنبه اكيد العطور الجميلة تيجى على ملابسه ويبقى رائحته جميلة طول اليوم اما نافخ الكير ده واحد كله فحم وهباب ورائحة شياط وحرق واللى يمر جنبه اكيد ملابسه حا تتهبب وممكن الشرر يحرق ملابسه يعنى شىء ردىء جداً والمثل ده على فكرة هو الفرق بين الفنانين بتوع الزمن الجميل وبتوع دلوقتى يعنى زمان كان غير الفن والطرب كانت الاغنية او القصيدة درس فى اللغة العربية والآداب والسلوك يعنى ام كلثوم فى سلوا قلبى قالت : وما نيل المطالب بالتمنى ولكن تؤخذ النيا غلاباً واقل معنى ليها ان الشاب يستقتل فى العلم والتعلم عشان يبنى مستقبله النهاردة الشباب لما بيسمعوا تامر دياب وعمرو حسنى وشعبولا
( الأسماء دى للتمويه عشان ماحدش يزعل ) تلاقى الشاب سطحى كل همه وتفكيره فى الكورة وازاى يغير الموبايل
اما بالنسبة لعزفى انا لما بعزف اغنية انا عزفتها امام عبد الوهاب ولو ما عجبه العزف كان نصحنى اروح اشتغل بتاع كبدة احسن ولحد اليوم انا لما بعزف اى اغنية للسنباطى بتخيله بيسمعنى وهو بيحب اعزفها ازاى يعنى النهاردة من ضمن الحاجات الخطيرة اللى بتحصل فى العزف الفزلكة يعنى تلاقى عازف كمنجة شاطر وعايز يبين انه شاطر
وهو بيعزف اغنية طرب يروح عامل سلمين اوكتافين سريع جدا مش عارف ليه او خمس حروف سريعة مش موجودة فى اللحن لو عبد الوهاب سمعه إما حاينزعج او حايقول له ده يا ابنى صوت عرسة وانا مش حاطط فى اللحن عرسة ده غير مئات الحاجت كانت بتحصل فى البروفات ( للعلم انا وانا بكتب الكلام ده دموعى نزلت ياخسارة ايام زمان وكنت اتمنى لو توفيت معاهم ) يعنى قلت كتير النوتة بتتحط امامنا وعبد الوهاب او السنباطى بيمسك العود عشان يدينا احساسه فيه حركة خطيرة كان بيعملها اسمها بيصلح العود يعنى الشائع عندكم او عند كل الناس انه بيضبط العود ولكن الخطير ان بعد ما بيظبط العود كان لو اللحن مثلا فى البياتى كان بيبتدى يسلطن لنفسه المقام
يعنى يداعب المقام لحد مايركزه ( طبعا هو قاعد امام الفرقة الماسية او فرقة ام كلثوم ) بعد مايداعب المقام ويركزه يروح عامل شوية تقاسيم ربع ساعة تطير العقل يعنى شىء مش فى الحلم ومرة عبد الوهاب قال جملة من دور قديم لسيد درويش ماحدش سمعه اعتقد اوله يلزم بقى نهنى الفؤاد ( هو كان عايز يعقدنا وانا عارف ) كلمة يلزم بس
كلمة واحدة يلزم عشر نغمات طالعين وعشر نغمات نازلين وانتى طالعة مقامين وانتى نازلة مقامين مختلفين المهم قالها بسرعة عشان ماحدش يلقطها وقال يالا نكمل كنا بنقول ايه , وبأختصار فى الكلية الطالبة لما تتخرج بطريقة تعليم الكلية بس المفروض تشتغل مدرسة تدبير منزلى مش مدرسة موسيقى ! لأن مدرسة الموسيقى الصح اللى اخدته فى الكلية كله عبارة عن عارفة البطاطس لما تشتريها من السوق ؟ مدرسة الموسيقى الشاطرة لازم تجتهد مع نفسها على الكلام البسيط اللى اخدته فى الكلية وهنا تبقى بتاخد البطاطس وتعمل منها صوانى .... صح ؟
مع اطيب تحياتى عادل صموئيل

[وائل]

استاذ عادل ربنا يديك الصحة
والف شكر على تنويت حكاية غرامي ورجاااااااااااااااء خاص ان تكون كاملة وتشمل المقدمة الرائعة للفرقة ثم لفريد عالعود ثم رد البيانو عليه ياريت تحتوي النوتة على هذا الجزء الخرافي يا استاذ عادل ولو عاوز التسجيل فقط اكتب في اليوتيوب حكاية غرامي جزء 1 واسمعها
وتحياتي لك
يا عزيزى وائل
انا دخلت زى ماقلت طلعت نافذة فاضية مش بتحمل حاجة
يعنى انا احب اللى عايز حاجة يديها لى على طول عشان ما اضيع الوقت ممكن انت تسجلها امبى ثرى صوت بس ؟
حتى التسجيل اللى نزلتوه هنا ع العود برضه بادى من مطرح ما انا عزفتها يعنى مقدمة جملة واحدة وفى الفيلم كده
عموما انا كتبها كده وهى خلصت ولو انت قدرت تدينى المقدمة انا حاكتبها فى صفحة منفصلة لأن فى برمج الكتابة اى ادليب ما اقدرش ازود قبله اسطر اكتب فيها لأن الأدليب انا فى كتابته انا بتحايل على البرنامج يعنى لو كاتب على ميزان ممكن اضيف اى عدد من الموازير قبله
لكن لو فى ادليب اى اضافة موزاير قبله بيلخبط الدنيا
انا حكاية غرامى جاهزة مش حانزلها منتظر ردك وبسرعة عشان انا متأكد فيه اخوة اول ما حايسمعوا انها جاهزة مش حايناموا الليلة دى عادل صموئيل
وعلى فكرة انا حاسس ان فيه ناس عفاريت فى اليوتيوب بس انا مش عارف ليه مش بعرف اسلك فيه دايما هو محتاج إشتراك او حاجة ؟

[armendo]

المشاركة الأصلية كتبت بواسطة عادل صموئيل

احبائى
واخيرا اقدم لكم نوتة حكاية غرامى
وهذه النوتة بالذاتلا استطيع ان اقدمها واخرج كأى نوتة ولكن اريد ان اتكلم معكم حتى تعم اكبر فائدة
ولأول مرة انا اقدم لكم اغنية حكاية غرامى من عزفى على الكمان لأن كثير منكم لم يدخل القسم الخاص بمعزوفاتى فى قسم المبدعون بالمنتدى وحرصت ان اقدمها من عزفى لأبلور الصورة اكثر يعنى انتم سمعتموها من فريد الطرش كغناء ولكن عندما تسمعوها ايضا كعزف تفيدكم فى طريقة تجويد العزف , بمعنى ان هذا اللحن بالذات لا يُعزف كقراءة حروف نوتة , ولكن به كمية رائعة من الطرب الشرقى يعنى عشان تعزفه لازم تكون اولا حافظ اللحن 100% وبتدندنه او تغنيه كلمات الاغنية ثم عندما تقرأ النوتة وانت بتعزف لابد ان يكون اللحن فى اذنك وحاضر معاك لأن اللحن 75% منه ادليب وادليب قوى جداً ( يعنى شغل المعلم فريد لنفسه ) ويعنى كل ابداعه وضعه لأنه هو الذى سيغنيه ولو كان اللحن لمطرب آخر لما صاغه بتلك الروعة لأن اى مطرب لن يؤدى كل مشاعر فريد الأطرش الصعبة وهنا اذكر ان هذا اللحن لابد ان يكون استغرق من فريد على الأقل سنة كاملة فى تلحينه علما بأن الحان فريد السهلة مثل إتقل إتقل مثلا لايستغرق معه اكثر من 4 أيام .
بالنسبة للمقدمة انا احترمت شعوركم ( وعشان تعرفوا غلاوتكم عندى ) وحسيت شوقكم كلكم الكبير ان تحصلوا عليها من ان عدد منكم صار يبحث عنها لأنها تقريبا غير متداولة واللحن المتداول من مطرح ما انا بدأت عزفى انا امس اول ما تكرمتم ونزلتوا المقدمة من أول وهلة احسست انها صعب جدا أو مستحيل تتكتب , لأن عشان تتكتب فى الحالات الطبيعية لازم تتكتب وتتوزع من اول وجديد لكن وعشان خاطر محبتكم سمعتها خمسين مرة كان اول ملحوظات اولا عزف فريد على العود تعرفون ان فريد حاصل على جائزة احسن عازف عود فى العالم يعنى لما يعمل لحن لنفسه ويعزف صولو عود اكيد حيكون صولو العود شىء اولا مش ممكن حد يقلده وبالتالى مش ممكن حد يكتبه وثانيا التوزيع كان عامله واحد خواجه اسمه بيبى المانزا وهنا تحدى فى منتهى الخطورة لما تسمعوا المقدمة تلاقوا المقدمة مافيهاش ربع تون ومش على ايقاع شرقى يعنى الملعب المفتوح عشان خيول الخواجه تنطلق وخدوا بالكم كام صوت فوق بعض وكلهم وتريات بالإشتراك مع البيانو اللى كان ايضا متوسط النغمات الخارجة منه على الأقل 8 نغمات فى نفس الوقت اقول لكم الصراحة حسيت انى نملة او شعور واحد ماشى فى حتة مظلمة وطلع له مش عفريت واحد ولكن مجموعة من العفاريت , وانا طول عمرى مناضل وبحب التحدى واختراق السدود كتبتها لكم قمت بتحدى عفاريت واشباح عمكم الخواجه العبقرى بيبى المانزا , ولما بقول عفاريت واشباح مش بضحك شوفوا الكوردات العبقرية اللى مش ممكن حد يقدر يحسب النغمات دى ايه وبالذات عشان كلها وتريات , يعنى الشبح من دول لو فى سيمفونية لبيتهوفن بيبقى مركب من وتريات على كذا صوت آلات نفخ مختلفة ممكن الخبراء يستخلصوهم بسهولة
هى اى نعم بتبقى متداخلة مع بعض زى المكرونة الأسباجيتى بس فيه خبراء ممكن بيبقوا عاملين زى اللى بيحضروا الأرواح او بيخرجوا العفاريت لكن لما يكون الأكور كله من وتريات بيبقى صعب جدا لأن الخلط او المزج هنا بيطلع نغمات يعنى تشتبه مثلا ان دى نغمة مى بيمول لكن مع المزج اكيد بتكون دومينن سفن بتاع حاجة تانية لو حطيتها مى بيمول تطلع نشاز وبالتالى يكون الأكور كله غلط معلش اتفزلكت عليكم شوية من نفسى , المهم انا طبعا لما بكتب بفكر مين اللى حايعزفه طبعا انتم يعنى عازف واحد مش فرقة ,
هنا انا استخلصت من كل اكور النغمة الأساسية اللى فيه
كمان فيه ملحوظة مهمة جدا فى المقدمة انا كاتب هنا صولو عود انا كتبت اللحن الاساسى وانتم وشطارتكم تقدروا تركزوا مع فريد وتحاولوا تطلعوا اللى تقدروا عليه هو اول حرف كان بيعمل اوكتاف يعنى مثلا نغمة صول بتبقى صول قرار بعدها صول جواب يعنى الحرف مكون من النغمتين ورا بعض
طبعا انا كتبت اللحن كله وهو خمس صفحات بعدين كتبت المقدمة قى صفحة منفصلة لأن زى ماقلت ان طالما فيه ادليب ما اقدرش اضيف موازير قبله , لكن بالنسبة لكم عادى يعنى تحطوا المقدمة فى الأول .
فيه شىء مهم جدا احب اقوله هو بيبتدى كرد وفى المذهب بيغنى بياتى , فيه سر فى البياتى هنا ان المى نص بيمول
خاسة شوية يعنى ممكن تشتبه انها بيمول يعنى خلوا بالكم .
حاجة تانية الشراك الخداعية عند فريد الأطرش بالذات يعنى لما بيعمل مثلا راست على النواة يعنى سى نصف بيمول وهو طالع ونازل وطالع ونازل على النغمة مرة وهو نازل يروح عاملها بيمول ودى حلية بتفرق فى ادائك للحن يعنى لو ما اخدتش بالك منها تضيع نكهة الجملة لذلك انا لما بتحصل انا با اؤكدها يعنى بكتب سى بيمول عشان تاخدوا بالكم .
آسف للإطالة عليكم وانا تحت امركم فى اى اسئلة

اخى وعزيزى بابا نويل اقصد عادل صمؤيل كل سنة وانت والأسرة باف خير بمناسبة اعياد الميلاد المجيدة طبعا انا لدى بعض الأسئلة ولكنى سأؤجلها لمشاركة اخرى ولكنى الآن اود ان اصف ما تخيلتة وانت تقدم لنا هديتك الجديدة الجميلة حكاية غرامى فقد تخيلتك وانت ترتدى زى بابا نويل الجميل محملا بالهدايا الجميلة للأطفال الصغار الذين ينتظرونك بشغف ولهفة وينتظرون ان توزع عليهم هداياك التى تبث الفرحة فى قلوبهم ليلة العيد وقد استمعت الى اجدى هداياك الليلة وهو عزفك الرائع لأغنية حكاية غرامى ولم استطع الأنتظار بالرغم من اننى اعانى من نزلة برد شديدة اوع تتعدى احساسك عالى جدا فى عزف الأغنية وهى مليئة بالأحاسيس .وكل عام وانت بخير مرة تانية راجيا من اللة ان يحقق لك كل ماتتمنى وفى مقدمتها الصحة والعافية والآن فالتسمح لى ان اذهب لأنام فقد بدأت اشعر بدروخة تصبح على خير . ارمندو

[وائل]

استاذي واخي وعزيزي عادل-- ايه اللي انت عامله ده يا راجل يا سكره!! ايه الشغل الحلو والمزاج العااااااااااااااااااالي اوي ده!!
مش عارف اقولك ايه مش عشان النوتة لكن عشان المجهود الي بتبذله عشان تلبي طلباتنا وترضينا ومش عارفين نردلك الهدايا دي كلها ازاي بس وبالذات ان راس السنة جاي وبقولك كل سنة وانت طيب يا راجل يا طيب انت والاهل بالف خير وسلام وسعادة وكل سنة واحنا متجمعين في مملكتنا الجميلة مملكة سماعي انا مش عارف اوصف التبسيط والحلاوة الموجودة في النوتة وقمة الابداع ان رغم التبسيط الموجود الا ان حضرتك لم تترك ولا همسة في النوتة و احتفظ اللحن بقوته وبكل احساس فيه وده طبعا هيحس بيه الي هيعزفها وهو حافظ اللحن في دماغه وحاسس بكل نغمة في قلبه قبل صوابعه ومش معتمد فقط على النوتة-- بالفعل استاذ عادل انا اتفق معاك ان اللي هيحفظ اللحن ده كويس هيطلع شغل ولا اروع وهيعرف ان حضرتك حطيت كل جهدك وذكائك الموسيقي في تبسيط هذه النوتة التحفة
واسمحلي انا كده هطمع واكرر طلبي السابق واستأذن من الاخوان في ان تكون النوتة القادمة هي (اول همسة ) مدام احنا دلوقتي عايشين في جو فريد -ودي بيعتبرها فريد شخصيا من اروع الحانه واحبها الى قلبه وده كلام فريد مش كلامي كان بيقول في بداية احد حفلاته ( ان الفنان قيمته بعمله والي بيقدمه لجمهوره والقيمة دي بتطلع بعدما يرحل الناس بتعرف قيمته وانا الان اقدم لكم اول همسة وانتو احكمو)- وفي كتاب عن حياته قرات له انه دائما كان يعتز ويتباهى ويتحدى كبار الملحنين ان يلحنو لحن مثل او همسة هي وحكاية غرامي- وسئل ذات مرة عن لحن القرن الذي سيبقى خالدا وتتذكره الاجيال القادمة دائما فقال بكل صراحة هو الربيع واول همسة والاطلال لام كلثوم
ودلوقتي مين هيصوت معايا على اول همسة؟؟ انا نفسي في اول همسة وتحياتي لك ولكل الاعضاء الجمال الذين ساهمو في اخراج هذه النوتة انا مؤمن ان كل واحد من الاعضاء الي طلبوها ساهم بشي ما في اخراجها
وتحياتي للجميع واسف جدا للاطالة معلش خذني الكلام

[عادل صموئيل]

احبائى اشكركم
اشكركم على كلامكم الجميل وهو اعلى اجر اتقاضاه عن مجهودى واحب ان انوه عن كلمة اخى العزيز وائل انى قمت بتبسيط النوتة الى اقصى درجة ممكنة دون ان ينتقص اللحن جرفاً واحداً ان دى المدرسة اللى انا عملتها واتمنى ان يتعلمها منى كل من يدون نوتة يعنى انا لو قمت بتبسيط اى لحن وحدث اى خلل فى النوتة لضاعت قيمة اللحن ولأصبح الذى افعله شىء لا قيمة له يعنى سيكون شىء مشوه وقيمة الذى افعله هنا قيمتان اولهم هذه النوتة اقدمها للهواة والمبتدئين وثانيهما لو اى مطرب ( وانا هنا فى مملكة سماعى اخاطب كل من فى الكرة الأرضية لأن المنتدى عالمى ) لو أى مطرب رأى فى نفسه انه يستطيع ان يغنيها لأخذ هذه النوتة التى دونتها وقدمها لأحسن فرقة وسنعزف معه احلى عزف لتمهد له ان يقدم اخلى غناء وسيسعدون بالنوتة ايما سعادة لأنها مبسطة بحيث تطلع معاهم فى ساعة بروفة بكفاءة 100% واما الصدق الذى كتبت به الادليب ( وهو من اصعب المدونات اطلاقاً ) يكفى للمطرب ان يكون حافظا للغناء جيدا والفرقة تسير معه وتحمله وتؤازره وتعضده لأنى قمت بتبسيط الحروف الإيقاية بالذات حتى يكون من السهل عليهم التخديم مع المطرب اما لو جعلتها مكلكعة ومعقدة كما يفعل البعض هنا فى العزف ايضا يعزفون عزفا مصاحبا يعرقل المطرب ويضيع السلطنة وهذا اللحن بالذات يحتاج لأعلى درجة من السلطنة .
وعن الكلام الجميل وانى اشبه بابا نويل وتكلمتم عن الأعياد ورأس السنة وطلبتم
اول همسة ماشى ياعم
اعدكم لو اطال الله فى عمرى ان اقدم لكم نوتة اول همسة ليلة رأس السنة مبسوطين ؟ وسابدأ الكتابة فيها من الآن
ودى بتعتبر بالنسبة لى احلى كتابة لأنى حافظها وعلى فكرة انا عزفتها فى قسم المبدعون فى المنتدى
مع اطيب تحياتى وكل عام وانتم بخير