كلنا نحب القمر - محمد عبد الوهاب - الصفحة 3

**guest** · #21 03/10/2012, 11h19

انا مش مصمم علي موضوع النزول انه يكون كرد !
انا كنت فاكر ملهاش اسم و ان فيه رأيين .. و انا من انصار لو فيه رأيين و الاتنين شغالين قول الاتنين و قول فيه ناس تحسبها كدة و فيه باحثين شايفين كدة .. مفيش تصميم علي رأي عندي
و كلامك صح القواعد مش للتقيد ..للاستدلال , لما بعمل موسيقي مش بقول انا هاطلع من هنا و ادخل من هنا , مش بحسبها و بسيب نفسي لاحساسي .. بحسبها بس بعد ما اخلص الميلودي عشان احط الهارموني و الكونتربيونت لو عاوز
في الميلودي لو انا عطلت و مش عارف اعمل ايه .. ساعتها ارجع للقواعد
يعني لو الحجاز كار و هو نازل او طالع جنس الفرع كرد
ما تعملش حاجة يا محمد بيك , سيبني عليهم
كدة بقي حجازعجمي .. صح كدة ؟
عجمي بقي ( بيطاش و لا هانوفيل عشان تعبتونا معاكم ! )
انا مش فاهم الكتب هي اللي مشمومة .. و لا اللي كاتبنها بيشموا , و لا انا اللي مش بعرف اقرا عربي ! و كتب كتير وحياتك
اجيب احسن من كتاب البشير ايه طيب ؟! و المؤتمر بتاع سنة 19 حاجة و تلاتين دا ! مش بقولك حاجة تغيظ
خلاص العجم عجم .. يعني دو ماجور , صح كدة ؟
و الماهور من فصيلة الراست .. جنس الاصل راست يعني التالتة مي كاربيمول , و جنس الفرع عجم يعني السي نازلة ناتورال حساس للدو تاني عشان لو هو جنس الفرع راست .. بقي راست مش ماهور
و الماهور , السي في جنس الجذع .... يييه ... قصدي جنس الفرع ممكن في النزول يبقي سي بيمول او سي ناتورال حساس .. من غير خناقات .. تبع رأي بعض الباحثين

تشكر يا محمد بيك .. دانا لسه هاوريك الشم كله , بس في مواضيع تانية .. ملحوقة

**guest** · #22 03/10/2012, 11h29

الدور

مذهب و غصن

طبقا ل تعريف الدور .. يكون فيه كورس
بس فيها اهات يا انور باشا .. دا عبد الوهاب هرانا حليات و اهات , مش كفاية الكروماتيك طالع نازل ؟
الاغنية مش خفيفة , ما ينفعش نقول عليها طقطوقة !

مش عارف
ممكن نقول دور ؟
و ممكن نقول
اغنية قديمة طربية و خلاص ؟ ... ورانا شغل كتير

خالص تحياتي

**guest** · #23 03/10/2012, 13h40

محمد بيك

قابل عندك كدة النوتة

و قوللي الكلام كدة سليم ؟

تحياتي و تقديري

**الألآتى** · #24 03/10/2012, 15h50

اقتباس:

المشاركة الأصلية كتبت بواسطة انور الحارث

-لايوجد لزم بالاغنية

-لاكورس-لااأهات

طرب وغناء واظهار العرب والحليات بالغنااء

والاغنية بالعشرينات تحت اى شكل من اشكال الغناء استطيع ان اصنفهااا؟

ام اغنية قديمة وخلص؟

لانهااا بصراحة عم توحى كانهاا دور

ياعم ماتوجعش قلبك .. سميها مونولوج وخلاص .. وهذا قالب معروف للأغانى الفردية .. وممكن يكون بدون كورس

**الألآتى** · #25 03/10/2012, 15h56

اقتباس:

المشاركة الأصلية كتبت بواسطة ehabalaaeldin

محمد بيك

قابل عندك كدة النوتة

و قوللي الكلام كدة سليم ؟

تحياتي و تقديري

مافيش مشكلة فى النوتة .. حتى إذا تغير جنس الفرع لنهاوند مع الماهور .. برضه مافيش مشكلة .. لأن العبرة بجنس الجذع .. طيب ماهى الحكاية دى بتحصل مع العجم .. مابنقولش ليه إن جنس الفرع إتغير لنهاوند عند الهبوط

وكذلك الحال بالنسبة للراست عند الهبوط ..

الكلام ده لما نلاقى إن المقام تحول لمقام تانى موجود فعلاً

وإذا بحثنا فى المقامات الشرقية مش حانخلص .. لابد من شئ من المرونة

**الألآتى** · #26 03/10/2012, 15h58

اقتباس:

المشاركة الأصلية كتبت بواسطة ehabalaaeldin

تشكر يا محمد بيك .. دانا لسه هاوريك الشم كله , بس في مواضيع تانية .. ملحوقة

تحت أمرك ياحبيب قلبى ..

**انور الحارث** · #27 03/10/2012, 18h20

بسم الله نبدأ فى تحليل أغنية ( كلنا نحب القمر )

كلمات : أحمد عبد المجيد

ألحان وغناء : محمد عبد الوهاب

بداية يجب أن نعرف أن العمل تم تلحينه فى العشرينات .. أى فى بدايات عبد الوهاب التلحينية

وكان التركيز على الطرب والغناء أكثر من التركيز على الموسيقى .. بدليل هذا الكم الكبير من العُرب والحليات بجميع أشكالها فى الغناء

إختار عمنا ( عب وهاب ) مقام الحجاز كار كرد ليصوغ منه لحنه .. ويكون هو المقام المسيطر الذى يبدأ منه ويعود إليه طوال العمل

ولمن لا يعرف الحجاز كار كرد .. هو الكرد نفسه لكن من درجة الدو .. وسبب تسميته أنه من نفس درجة الحجاز كار

والبعض يسميه ( كورديللى )

المهم .. مقدمة موسيقية قصيرة من نفس المقام وبألآت موسيقية قليلة جداً وبسيطة

والميزان الإيقاعى بسيط ( 4 / 4 ) .. ويغنى عبد الوهاب من نفس المقام ( كلنا نحب القمر .. والقمر بيحب مين )

ومن أولها نتعثر فى مصائب عبد الوهاب التلحينية .. الراجل بيقول ( كلنا نحب القمر ) من الكرد ..

ييييه .. الحجاز كار كرد ياسيدى .. ماتزعلش

المفروض فى مسار سلم الكرد .. أننا نستعمل الرى بيمول .. لكنه يأبى إلا أن يدهشنا من أول جملة

فيستعمل الرى بيكار ( البيضاء على البيانو ) أو كما نقول ( ناتوريل ) وهو يقول ( نحب القمر )

يعنى من تانى كلمه .. ماعندوش يامه إرحمينى

طيب وبعدين .. نكمل ..

هل إكتفى عبد الوهاب .. أو سابنا ناخد نفسنا .. حاشا ياباشا .. مش ممكن طبعاً ..

نجده يقفل الجملة الغنائية على درجة معلقة .. غير درجة ركوز المقام

نفسر الحكاية دى

معروف أن الجملة الموسيقية أو الغنائية عبارة عن سؤال وجواب

فنجده يقول ( كلنا نحب القمر ) هذا هو السؤال .. وبعدها يقول ( والقمر بيحب مين ) هذا هو الجواب

المفروض أن ينهى الجملة اللحنية على درجة ركوز المقام ( قرار أو جواب مايهمش )

لكنه كعادته ومن بدايات أعماله .. نجده يخرج عن المألوف .. فبدلاً من أن ينهى الجملة على درجة الدو ( درجة ركوز الكرد )

نجده أنهاها على درجة السى بيمول .. لييييه .. سنعرف بعدها ..

لأنه سيبدأ الجملة التالية من السى بيمول ( حظنا منه النظر ) ولأنها أيضاً تحويلة لمقام البياتى

ويعود للكرد مرة أخرى عند ( فيك أنينه يلومنى فيك ) ..

وأترككم قليلاً لتستمتعوا معى بـ ( عذبه ) فهو يصول ويجول فيها ( مطرب بقى ) من البياتى أيضاً

ويعود مرة أخرى للكرد مع ( أعيش بأمل إنك يوم تصفالى ) ويظل معه للنهاية

لكننا وحتى النهاية نسمع ونستمتع بكم رهيب من الحليات الغنائية من بداية ( ماتقوللى إزاى أنساك .. لا أنا طايل تعذيب فى هواك )

فنجده يكرر الجملة ثلاث مرات وكل مرة بشكل ..

إسمعوا معى ( يسلاك ) وصعوده لجواب النوا ( سهم )

ثم نسمع السلم الملون ( كروماتيك ) عند ( يسلاك ) أيضاً عند الإعادة

وينهى الأغنية عند درجة الدو ( ركوز المقام ) ليؤكد لنا أنه يعرف درجة ركوز المقام .. وماكانش تايه عنها

أرجو أن أكون وُفقت فى هذا التحليل المتواضع

اتوجه بالتقدير والشكر الى معاليكم ياباشاا
الحقيقة ابدعتم بالتحليل
استفدت كثيراا من اجوبة الاسئلة
التى قدمتهاا بدقة عاالية وتركيز شديد
الشكرالجزيل ايضاا للاخ العزيز ايهاب لم يقصر
والله يعطيكم الف عافية
انور الحاارث

**الألآتى** · #28 03/10/2012, 22h31

اقتباس:

المشاركة الأصلية كتبت بواسطة انور الحارث

اتوجه بالتقدير والشكر الى معاليكم ياباشاا
الحقيقة ابدعتم بالتحليل
استفدت كثيراا من اجوبة الاسئلة
التى قدمتهاا بدقة عاالية وتركيز شديد
الشكرالجزيل ايضاا للاخ العزيز ايهاب لم يقصر
والله يعطيكم الف عافية
انور الحاارث

العفو أخى العزيز أنور ..

وإلى اللقاء فى تحليلات أخرى

**انور الحارث** · #29 04/10/2012, 10h32

اقتباس:

العفو أخى العزيز أنور ..

وإلى اللقاء فى تحليلات أخرى

إن شاءالله ياباشاا

...........