ظلمنا الحب (رد لاغنيه ام كلثوم )

**محمد المراغى** · #1 20/03/2009, 10h29

ظلمنا الحب
كتبتها بعد ان استمعت لاول مره لاغنيه ام كلثوم

وقالولك كلام عنى ...
وصدقتى ان ده منى ...
ومع انى ..
ومهما فى يوم تعذبنى
انا صامت
وتظلمنى
ولا اشكى فى يوم ظلمك
وتسالنى
مين فينا اللى ظلمه الحب ؟
وسابه فى سكته وحده غريب الدرب ؟
ده انا وانت ظلمنا الحب
******
بخلنا عليه.. بنبضه قلب تجمعنا
ولا همسه
فى سكه حب .... تسمعنا
ولا ذكرى
من الماضى ...ترجعنا
وأول خطوة فى المشوار
كانت بنا ...
قادتنا لنار
وحتى الزهر فى طرقنا..
صبح صبار
وكل اغانى وحدتنا...
نسينا ناخدها فى المشوار
وردتنا أغانى الفرقه والحرمان
وسبنا الحب والنشوه
وسبنا العشق ..والاشجان
وسرنا فى طريق البعد والأحزان
وحتى طير اغانينا
صبح غربان
بتجمعنا على سكه عرفناها
وهى سكه النسيان
وتسألنى مين فينا..
اللى ظلمه الحب ؟
وسابه فى سكته وحده
غريب الدرب ؟
ده انا وانت ظلمنا الحب
******
صبح كل اللى كان ... بنا
سراب فى سراب
وحتى قصور بنيناها..
فى لحظه اتحولت ..لتراب
نسينا أننا كنا ..فى يوم أحباب
وان الحب جمعنا
وعشنا معاه فى أحلى عذاب
وتسألنى
مين فينا اللى ظلمه ..الحب ؟
وسابه فى سكته وحده
غريب الدرب ؟
ده انا وانت ظلمنا الحب

**محمد المراغى** · #2 23/03/2009, 13h06

اعتذار
عذرا يا حياتى.....والف عذر
فقد ضقت
من الحب ...... صدر
فعلم صديقى من عينى
خبايا ..... الأمر
فلا تبكِ
ولا تشكِ
فلا ..... مفر

**محمد المراغى** · #3 02/04/2009, 15h41

أيام تقال .... وايام خفاف بتمر
ندوق ساعات العسل
وساعات ........ ندوق المر
وساعات نقابل ناس
ونتوه .. فى سكتهم
وساعات نقابل ناس ننسى معها العمر
وعجبى

**محمد المراغى** · #4 06/04/2009, 08h56

زرعت ورد الهنا
وبعد .... ماطرح
لاقيت حصادى ضنا
بيبكى ما يفرح
وقولت زى ما قال
ناسنا اللى
كانوا ... زمان
رحت لسوق الهنا
مالاقيتش
فيه ..... مطرح
وعجبى

**محمد المراغى** · #5 14/04/2009, 12h07

فيه ناس ببان قلبها
مفتوحه ع البحرى
وناس ببان قلبها
مقفوله من بدرى
ياللى رماك الهوى
فى قلوب ماترحمشى
ليه السكوت ع الضنا
سيبهم قوام واجرى

**محمد المراغى** · #6 26/05/2009, 09h12

مغنواتى انا ... وغنايه حب وشوق
طاير بقلبى السما عديت نجومها فوق
فجأة رمانى الهوى ووقعت فى بحره
دورت وسط الموج مالاقيت معايا طوق
وعجبى

**NAHID 76** · #7 26/05/2009, 09h20

بسم الله الرحمن الرحيم
أخى الفاضل محمد المراغى
أجمل تحيه بك وبأعمالك
ورحت سوق الهنا ملقتش مطرح
وعجبى الجامد جدا على كل ما كتبت سلم قلمك وفكرك
مع عجبى من الى لم يقرأ ويعلق

**محمد المراغى** · #8 26/05/2009, 09h44

اقتباس:

المشاركة الأصلية كتبت بواسطة NAHID 76

بسم الله الرحمن الرحيم
أخى الفاضل محمد المراغى
أجمل تحيه بك وبأعمالك
ورحت سوق الهنا ملقتش مطرح
وعجبى الجامد جدا على كل ما كتبت سلم قلمك وفكرك
مع عجبى من الى لم يقرأ ويعلق

الاخت العزيزه NAHID
انها المره الاولى التى يهتم احد فى هذا المنتدى بالرد على مشاركاتى رغم ان عدد المشاهدات كما هو واضح كثير !!
ربما لو يروق لاحدهم قلمى فخرج من الموضوع حانق ولحسن ادبه لم يعلق
عموما
شكرا لمرورك الذى اسعدنى
وشكرا لردك وكلماتك الرقيقه
وتقبلى تحياتى

**علاء طه ياسين** · #9 26/05/2009, 10h03

أستاذ محمد المراغي
حلوة جدا رباعياتك .. وحلو جدا استلهامك لغنوة الست أم كلثوم ظلمنا الحب ..
وياسلام كأنك بتعبر عن اللي جوايا لما بتقول
مغنواتي أنا .. وغنايا حب وشوق ..
جميل جدا
علاء ياسين

**سعدالشرقاوى** · #10 26/05/2009, 10h09

اخى الاستاذ/محمدالمراغى
ياشاعر ياكبير
يا(0نباش القلوب)
تستطيع ان تغوص بقلمك النباش
داخل القلوب الولهانه
لترسم هذه الاعمال العظيمه
موفق باذن الله
وفى انتظار المزيد