يا تري

**Hisham Khala** · #1 07/05/2009, 17h04

"يا تري" أغنية لحنتها سنة 1980 ، غناء نصر أبو عطايا و كلمات د.محمد طارق حسني و العزف: الوتريات (الكمان و الفيولا و الشيللو و الكونترباص) من أوركسترا الكونسرفاتور.
الأغنية عبارة عن قصة طفل و طفلة رأهم الراوي في الصباح الباكر و بدأ يوصف الأحداث و المشاعرالتي بين الطفلين إلي حبيبته ويقارن ما كان بينهما من حب عندما كانا طفلين بما شاهده في هذا الصباح و في نهاية الأغنية يتساءل الراوي هل حال الطفلين ها يبقي زي حال الراوي و حبيبته؟ أم الأيام هاتبطل صدود؟
في وقتها مؤلف الكلمات كان شايف أن الأيام مش هاتبطل صدود و في وقتها أنا كملحن كنت شايف أن الدنيا هاتضحك لهم و لكني وضعت التساؤلات و الشك في الموسيقي من بداية الأغنية و تيقنت بعد سنين أن رأي مؤلف الكلمات هو الصحيح و أن الأيام مش هاتبطل صدود.
الكانون فورم Canon Form واضح في المقدمة الموسيقية و بأعبر به عن طلوع الشمس في الصبح بدري و عن التساؤلات ، و هو عبارة أن أنصاف العبارات الموسيقية بتتكرر بس متأخرة عن الأولي بنصف مازورة (بمعني آخر: أن اللحن بيعزفه آلتين و لكن آلة تسبق الآلة الأخري بمقدار نصف مازورة)زي طلقات المدفع الرشاش الطلقة الثانية تم إطلاقها قبل وصول الطلقة الأولي للهدف.
نهاية الأغنية فيها الإمتداد Expansion و هو تكرار اللحن بصورة تصاعدية أو هبوطاً ليعطي الأحساس بالقفلة و يعبر عن التساؤل هل الأيام ها تبطل صدود؟
هذه الأغنية فازت في مهرجان الأغنية الشبابية و كانت لجنة التحكيم تضم الأستاذة: المرحوم مدحت عاصم و المايسترو يوسف السيسي و د.سمحة الخولي و د.عواطف عبد الكريم و الأستاذ عبد الحميد زكي توفيق و ثلاثة آخرين مش فاكر.
أرجو أن تعجبكم

**الألآتى** · #2 09/05/2009, 02h12

إممممممممم .. مش عارف أقول إيه ..

أنا طبعاً ودنى كانت مع المزيكا .. وإللى ورا المزيكا ..

يعنى الخرابه إللى إنت عاملها ورا يادكتور ..

كنت سايب كل حاجه .. ومدى ودنى للعالم إللى شغاله فى الخلفية ..

الكلام ده كان سنة 80 يادكتور ؟

سبحان الله .. ناس ليها حظ .. وناس تسافر ماليزيا ..

يعنى لو إتجهت للتوزيع والقيادة .. كان ممكن نسمع عن المايسترو هشام خلف .. الذى يقود أوركسترا القاهرة السيمفونى .. لكن إنت فضّلت الدكتره يادكتور .. نصيب ..

أحسنت وبرافو .. أنا شخصياً إستمتعت بشوية مزيكا نضيفة تروق الدم .. مش تعكره زى مزيكا اليومين دول الألكترونية بتاعة حلق حوش .

**Hisham Khala** · #3 10/05/2009, 16h55

إممممممممم .. مش عارف أقول إيه ..

أنا طبعاً ودنى كانت مع المزيكا .. وإللى ورا المزيكا ..

يعنى الخرابه إللى إنت عاملها ورا يادكتور ..

كنت سايب كل حاجه .. ومدى ودنى للعالم إللى شغاله فى الخلفية ..

يا عمنا و أستاذنا

أنا كده يمكن أصدق و أفتكر يا ما هنا و ياما هناك

الكلام ده كان سنة 80 يادكتور ؟

سبحان الله .. ناس ليها حظ .. وناس تسافر ماليزيا ..

يعنى لو إتجهت للتوزيع والقيادة .. كان ممكن نسمع عن المايسترو هشام خلف .. الذى يقود أوركسترا القاهرة السيمفونى .. لكن إنت فضّلت الدكتره يادكتور .. نصيب ..
أقود أوركسترا بحاله

دا أنا يادوب بأعرف أقود العربية و ما أعرفش أقود بسكليته

أحسنت وبرافو .. أنا شخصياً إستمتعت بشوية مزيكا نضيفة تروق الدم .. مش تعكره زى مزيكا اليومين دول الألكترونية بتاعة حلق حوش .
المزيكا الديجيتال هي مزيكة هذا العصر
منين تجيب أوركسترا دا العازف الواحد في التسجيل الواحد لن يتقاضي أقل من 1000 جنيه يعني 8 عازفين ب 8000 جنيه غير إيجار الأستوديو ، ربنا يخللي لينا برنامج فينال و أمثاله ، بس قول لي أنت بتستخدم أي برامج المكساج؟

**وسام اكرم** · #4 10/05/2009, 18h33

الاخ العزيز دهشام المحترم
الاغنية دي هايله بكل معنى الكلمة! الكلمات تتارجح بن الامل والحزن ,,,وهذا مفتاح مهم لكل ملحن أختار طريق النجاح الاكيد,, المطرب صوته جهور وقوي ولكنه (حزين) بنبرته ,,, الاختيار ممتاز,,, أما الحن فهوا جميل ومعبر بشكل أستثناي. لم اعزف الاغنية الى حد الان ليتسنى لي معرفة المقام المستعمل,,, و لكني سوف افعل قريبا بأذن الله, و قد اسجلها غلى شكل معزوفة بسيطة. أشكرك و أهنئك غلى هذه الموهبة الفريدة مع خالص حبي و تقديري
وسام....

**Hisham Khala** · #5 13/05/2009, 06h23

أشكرك يا د. وسام على كلماتك الرقي

يا ريت تسمع لحن نغمات على الرابط التالي:

http://www.sama3y.net/forum/showthre...477#post317477

و قول لي رأيك في هذا الحوار بين الألآت الشرقية و البيانو و الوتريات.

**Basil Mahran** · #6 30/05/2009, 15h21

هذه أولي مشاركات و لقيت الغنوة عنوانها """يا تري""" شدني و لما قريت الكلمات حبيت إني أسمعها و أشوف أزاي اللحن ها يعبر عن هذه الكلمات الرقيقة
أنا عندي معلومات و خلفية موسيقية لكن """ياتري""" ألاقي معلومات أكتر عن الكانون اللي موجود في الغنوة ، أنا لحظت أن اللحن مختلف عن الغناء يمكن دا في الغربي """ياتري"""" ينفع في الغنا العربي؟ أنا حسيت أن الكوبلية الأخير عاوز يدي أمل مشكوك فيه. """يا تري""" دا صحيح؟
أنا سألت كتير بس عندي استفسارات أخري
ما هو إيقاع الغنوة و ما هو مقامها؟

شكراً د.هشام على هذه الغنوة الجملية.

**Hisham Khala** · #7 02/06/2009, 17h33

اقتباس:

المشاركة الأصلية كتبت بواسطة Basil Mahran

هذه أولي مشاركات و لقيت الغنوة عنوانها """يا تري""" شدني و لما قريت الكلمات حبيت إني أسمعها و أشوف أزاي اللحن ها يعبر عن هذه الكلمات الرقيقة
أنا عندي معلومات و خلفية موسيقية لكن """ياتري""" ألاقي معلومات أكتر عن الكانون اللي موجود في الغنوة ، أنا لحظت أن اللحن مختلف عن الغناء يمكن دا في الغربي """ياتري"""" ينفع في الغنا العربي؟ أنا حسيت أن الكوبلية الأخير عاوز يدي أمل مشكوك فيه. """يا تري""" دا صحيح؟
أنا سألت كتير بس عندي استفسارات أخري
ما هو إيقاع الغنوة و ما هو مقامها؟

شكراً د.هشام على هذه الغنوة الجملية.

الأخ باسل
أشكرك على كلماتك
المعلومات عن CANON FORM ها تلاقيها في موضوع "دروس عملية في التأليف الموسيقي" في قسم الدروس - قواعد الموسيقي.
اللحن الخاص بالمغني مختلف عن الموسيقي التي تؤديه الأوركسترا (كونتربوينت + هارموني) و ينفع في الغناء العربي (مش ها يقول لأ).
الأحساس باللحن ملك لك قد نتفق أو نتخلف عليه و لكن لو أتفقنا عليه يبقي أنا نجحت في توصيل أحساسي و أحساس المؤلف للمستمع.
إيقاع الأغنية: مش متأكد من أسمه و لكن المقدمة على ميزان 3/4 بدون إيقاع و فيها بعض فيرماتا (كرونا = المدة الطويلة). ثم الغناء على ميزان 2/4 و الإيقاع (دم دم 2 كروش+ 1 نوار تك) و طبعاً فيه بريكات في السكة.
المقام صول ماجير و مي مانيير و القفلة على صول ماجير.
و تحت أمرك في أي أسئلة أخري

**Basil Mahran** · #8 03/06/2009, 08h40

شكراً د.هشام على التوضيح
بس أنا أعرف أن ميزان 3/4 فالس و انا مش حاسس ان الغنوة فيها فالس؟

**Hisham Khala** · #9 05/06/2009, 19h22

اقتباس:

المشاركة الأصلية كتبت بواسطة Basil Mahran

شكراً د.هشام على التوضيح
بس أنا أعرف أن ميزان 3/4 فالس و انا مش حاسس ان الغنوة فيها فالس؟

العفو
ليس كل 3/4 فالس و المقدمة الموسيقية ميزانها 3/4 و بدون إيقاع و فيها فيرماتا كثيرة.

**رائد عبد السلام** · #10 27/12/2009, 05h31

الكلام ده كان سنة 80 يادكتور ؟؟؟؟!!

فعلاً زي مااستغرب صديقي الجميل أ/ الآلاتي

الشغل ده -خاصة التوزيع- لسه فيه ناس
بتنفذه اليومين دول يادوب .... وكمان شبّعونا مصطلحات
وتنطيط ..وبيدّعوا الحداثة ...
أكيد أنت مكسب للطب يادكتور
بس أكيد برضه إن المزيكا الاحترافية خسرتك

برافــــــــو ياصديقي الرائع
د /هشام خلف
يا أستاذ (مابعد الحداثة )