* : ليلى مراد- 17 فبراير 1918 - 21 نوفمبر 1995 (الكاتـب : سماعي - آخر مشاركة : نور عسكر - - الوقت: 19h08 - التاريخ: 28/03/2024)           »          تترات المسلسلات التلفزيونية (الكاتـب : راضى - آخر مشاركة : حازم فودة - - الوقت: 16h16 - التاريخ: 28/03/2024)           »          غادة سالم (الكاتـب : ماهر العطار - آخر مشاركة : الكرملي - - الوقت: 15h31 - التاريخ: 28/03/2024)           »          عبد الحليم حافظ- 21 يونيه 1929 - 30 مارس 1977 (الكاتـب : سماعي - آخر مشاركة : fahedassouad - - الوقت: 12h28 - التاريخ: 28/03/2024)           »          محمد شريف (الكاتـب : loaie al-sayem - آخر مشاركة : اسامة عبد الحميد - - الوقت: 23h50 - التاريخ: 27/03/2024)           »          سعاد محاسن (الكاتـب : سماعي - آخر مشاركة : نور عسكر - - الوقت: 19h25 - التاريخ: 27/03/2024)           »          الشيخ محمد صلاح الدين كباره (الكاتـب : احمد البنهاوي - آخر مشاركة : kabh01 - - الوقت: 09h52 - التاريخ: 27/03/2024)           »          سلمى (الكاتـب : حماد مزيد - آخر مشاركة : عطية لزهر - - الوقت: 09h18 - التاريخ: 27/03/2024)           »          سمير غانم- 15 يناير 1937 - 20 مايو 2021 (الكاتـب : محمد البتيتى - آخر مشاركة : نور عسكر - - الوقت: 01h14 - التاريخ: 27/03/2024)           »          سلوى رشدي - مونولجست (الكاتـب : حازم فودة - آخر مشاركة : نور عسكر - - الوقت: 00h43 - التاريخ: 27/03/2024)


العودة   منتدى سماعي للطرب العربي الأصيل > صالون سماعي > دعوة موسيقية على أغنية

رد
 
أدوات الموضوع طرق مشاهدة الموضوع
  #1  
قديم 23/07/2007, 11h27
الصورة الرمزية الألآتى
الألآتى الألآتى غير متصل  
المايسترو
رقم العضوية:1323
 
تاريخ التسجيل: avril 2006
الجنسية: مصرية
الإقامة: مصر
العمر: 68
المشاركات: 2,483
افتراضي كل ده كان ليه محمد عبدالوهاب

لم أكن أتصور أن يستقطب الموضوع هذا الكم من الذواقة والسميعة .. وخصوصاً أن الموضوع فى أوله كان هادئاً وإقتصرت المشاركة فيه على إثنان أو ثلاثة مشاركين .. ولكن إللى يصبر ينول .. أصبح المشاركين أللهم لاحسد .. أنا سعيد وفرحان ياجماعة ..

أما بالنسبة لإختيارات الحبايب .. فأنا أرى أنها إختيارات متعمقة وجديرة بالتحليل .. كلها أغانى جامدة وفيها شغل كتير يستحق أن نسبر أغواره ونسبح فى بحور جمالياته ..

وسأبدأ بإذن الله فى تحليل أول أغنية .. وهى ( كل ده كان ليه ) وبعدها نمشى بالترتيب وحسب الإختيار .. علشان ماحدش يزعل .. وأعذرونى على التأخير ياإخوانى .. لأن التحليل ليس شيئاً بسيطاً .. ويحتاج لإعادة سماع الأغنية عدة مرات لبيان مواطن الجمال فيها .. ومعرفة التنقلات اللحنية والرتمية والتوزيع أيضاً ( إن وُجد ) ..

ولا أنسى أن أرحب بالمشاركين الجدد فى الموضوع بجانب صاحب الموضوع الأستاذ غازى والمشاركين الأوائل ..
__________________
مع تحياتى .. محمد الألآتى .. أبو حسام .


رد مع اقتباس
  #2  
قديم 23/07/2007, 12h50
الصورة الرمزية الألآتى
الألآتى الألآتى غير متصل  
المايسترو
رقم العضوية:1323
 
تاريخ التسجيل: avril 2006
الجنسية: مصرية
الإقامة: مصر
العمر: 68
المشاركات: 2,483
افتراضي رد: دعوة موسيقية على أغنية

بسم الله نبدأ فى تحليل أغنية ( كل ده كان ليه ) ..


منذ بداية الكلمات التى أبدعها ( مأمون الشناوى ) .. نجد أنفسنا أمام عاشق يحكى لنا بداية حبه للمحبوب ..

منذ أن وقعت عليه عيناه لأول مرة .. فأدى ذلك إلى خفقان فى القلب .. ثم إنشغال الفؤاد ..

ونعرف بعدها أن هذا المحبوب ناوى يلعب بصاحبنا .. فيغيب عنه ويتركه فى حيرة لا ينام الليل ويظل يفكر ويفكر .. إلى أخر الأغنية .. ويتركنا نحن أيضاً السميعة بدون حل للمشكلة .. فلا هو ريحنا ولا هو ريح العاشق ..

نيجى بقى للحن ..

عمنا عبد الوهاب .. إستعمل مقام شرقى جميل جداً .. هو مقام ( البياتى ) ولعل الكثير منا سمع بهذا البياتى ولم يعرف ماذا يكون ..

البياتى ياجماعة مقام شرقى أصيل يحتوى على ثلاثة أرباع التون .. وأكثرية عازفى العود يستخدمونه فى التقاسيم ..

وغالبية أغانى فريد الأطرش من هذا المقام .. وهناك أغانى معروفة من مقام البياتى مثل :

القلب يعشق كل جميل لأم كلثوم .. الحب كده .. ياحبايبى ياغايبين لفريد الأطرش .. لاكتب ع وراق الشجر لفريد أيضاً .. ألخ .

الإيقاع المستخدم يتراوح بين ( السنباطى ) و ( الواحدة الكبيرة ) .. والسبب أن الأغنية شرقية وتحتاج إلى سلطنة فى الغناء ..

نيجى بقى لطريقة عبد الوهاب فى التلحين ..

نجده بدأ بجملة قصيرة من القانون بدون إيقاع ( أدليب ) وترد عليه الوتريات ( الكمانجات والتشيللو ) .. ثم يدخل بالجملة الرئيسية مع دخول الإيقاع ( السنباطى ) .. ونلاحظ هنا أن عبد الوهاب لم يدخل للبياتى مباشراً .. وإنما لف ودار بنا وإستخدم جميع ( العُرب ) الموجودة فى سلم البياتى ..

والعُربة ياجماعة لمن لا يعرفها .. هى لمس حرف خارج سلم المقام والعودة سريعاً للمقام الأصلى .. يعنى عملية زخرفة .. عبد الوهاب لم يترك حرفاً فى السلم إلا وإستخدمه .. وينهى اللازمة الموسيقية بالبياتى ..

ويغنى المذهب .. والمذهب هنا قصير نوعاً ما .. مجرد بيت من الشعر مكون من شطرتين فقط .. ولكن عبد الوهاب طبعاً يعيد ويزيد فى هذا البيت وكل إعادة بإفادة طبعاً .. وسنلاحظ هنا أن عبد الوهاب يعيد الشطرة ثلاثة مرات .. ليست مرتان أو أربع مرات كمعظم المطربين .. ليه .. لأن ده عبد الوهاب .. ولابد أن يكون مختلف ..

خلص المذهب .. وتدخل نفس الموسيقى بدون تغيير .. ليبدأ بعدها عبد الوهاب فى غناء أول كوبليه الذى يقول فيه

قاللى كام كلمة ... يشبهوا النسمه ... فى ليالى الصيف

فاتنى وف قلبى ... شوق بيلعب بى ... وف خيالى طيف

نلاحظ هنا أن عمنا مأمون الشناوى إستعمل تفعيلة أخرى فى بناء هذا البيت .. تفعيلة ثلاثية .. لأن الراجل بيحكى الحكاية على مهلة .. عايز يقرب لينا الصورة .. حته حته .

بصوا بقى عبد الوهاب عمل إيه هنا ..

لحن الكلام زى ما الشاعر كتبه .. لكن طوّل فى أخر الشطرة .. لاحظوا ده فى جملة ( فى ليالى الصيف ) .. وأيضاً فى جملة ( وف خيالى طيف ) .. علشان يأكد المعنى .. الراجل بيتكلم عن ليالى وليس ليلة واحدة .. لازم يطوّل فى الجملة اللحنية .. هما دول الملحنين إللى بيشتغلوا حسب خطة موضوعة .. مش ملحنين النهاردة .. ماعلينا .. خلينا فى إللى إحنا فيه ..

فيه حاجه كمان لازم ناخد بالنا منها .. الراجل بيقول ( قاللى كام كلمة ) وبعدين مزيكا .. و ( يشبهوا النسمة ) وبعدها مزيكا

فى الشطرة الثانية لما قال ( فاتنى وف قلبى ) المزيكا إتغيرت .. الرد إتغير .. لاحظوا ذلك .. عم عبد الوهاب مش عايزنا نزهق .. مش عايزنا ننام منه .. مع إن اللحن هو نفسه .. الشطرة الأولى مثل الثانية .. لكن الرد الموسيقى يتغير ..

ثم تتغير الجملة اللحنية بعد ذلك .. بياتى برضه .. ولكن بشكل جديد .. جملة تانية خالص .. ويستعمل معها إيقاع الفوكس .. إللى إحنا عارفينه .. ويظل فى البياتى .. ويظهر إن الصنعة صعبت عليه .. فيعرج لمقام الراست عند إعادة جملة ( إحترت أشوفه فين ) ويعود للبياتى سريعاً .. وينهى الكوبليه بجملة لحنية حرة بدون إيقاع .. ليه ؟

علشان يبين قدراته فى الموال .. وعبد الوهاب طبعاً مصيبة من مصايب الزمن فى الموال .. إللى عنده تسجيل الحفلة .. حايسمع عبد الوهاب يعيد ويزيد فى الشطرة الأخيرة لكل كوبليه .. وده درس كبير ومهم جداً لمن يريد تعلم المقامات .. لأن الموال فرصة كبيرة للمطرب أن يتنقل بين المقامات بحرية وحسب قدراته ..

وإللى عمله فى الكوبليه الأول .. عمله فى التانى .. نفس اللحن ونفس الشغل .. مع سلطنة زيادة فى الموال .. وتنتهى الأغنية بنفس اللازمة الموسيقية التى بدأت بها ..

ها .. عايزين حاجه تانى ..

موعدنا فى الرد القادم لنقوم بتحليل الأغنية إللى عليها الدور ..
__________________
مع تحياتى .. محمد الألآتى .. أبو حسام .



التعديل الأخير تم بواسطة : الألآتى بتاريخ 08/05/2010 الساعة 12h35
رد مع اقتباس
  #3  
قديم 23/07/2007, 12h58
الصورة الرمزية hainz
hainz hainz غير متصل  
مواطن من سماعي
رقم العضوية:12290
 
تاريخ التسجيل: janvier 2007
الجنسية: Egyptian
الإقامة: Egypt
العمر: 44
المشاركات: 86
افتراضي رد: دعوة موسيقية على أغنية

الف شكر يا ابو حسام علي التحليل الهايل ده
والكرم الرائع كل يوم تعزمنا عزومه حلوة كده
احنا صحيح مش هنشبع خلاص ادمنا عزوماتك
كل اللي اقدر اقولهولك كان الله في عونك
وربنا يقدرك علي عزومتنا
ويقدرنا علي رد جمايلك
__________________
ان ابغض شئ الى المُناظر ان يظهر على لسان خصمه الحق

الإمام الشافعى
رد مع اقتباس
  #4  
قديم 23/07/2007, 13h32
الصورة الرمزية غازي الضبع
غازي الضبع غازي الضبع غير متصل  
عاشق عبدالوهاب
رقم العضوية:3243
 
تاريخ التسجيل: juillet 2006
الجنسية: مصري
الإقامة: أم الـدنيـــــا
المشاركات: 1,213
افتراضي

اقتباس:
المشاركة الأصلية كتبت بواسطة الألآتى مشاهدة المشاركة
بسم الله نبدأ فى تحليل أغنية ( كل ده كان ليه ) ..



.. ولكن عبد الوهاب طبعاً يعيد ويزيد فى هذا البيت وكل إعادة بإفادة طبعاً .. وسنلاحظ هنا أن عبد الوهاب يعيد الشطرة ثلاثة مرات .. ليست مرتان أو أربع مرات كمعظم المطربين .. ليه .. لأن ده عبد الوهاب .. ولابد أن يكون مختلف ..

الله
الله
الله
يا سلام عليك يا أستاذ محمد يا كبير الآلاتية
الله ينور عليك ويبارك فيك
تحليل جميل ورائع بل في منتهى الروعة
ولي تعقيب بعد إذنك وإذن الجميع بالنسبة لمقولة حضرتك التي اقتبستها ..
وهي عن الإعادة في ألحان عبد الوهاب
لاحظ معي الآتي .. ( على سبيل المثال وليس الحصر )
- ذكرياتي يا ذكرياتي .......... بعمري كله حبيتك .. وردة
- يا أغلى من أيامي ............ إنت عمري ........أم كلثوم
- حبتها .. أيوة أنا أنا حبتها ... فاتت جنبنا ........ عبد الحليم
- بتقولي بخاف نمشي ونبعد .. نبتدي منين الحكاية .. عبد الحليم
- القمر من فرحنا هاينور أكتر .. فكروني ......... أم كلثوم
وغيرهم كتير على نفس المنوال ..
تجد أن عبد الوهاب يعتمد هنا على التكرار والإعادة ولكن وكما ذكرت حضرتك كل إعادة بإفادة .. وتقريبا أغلب أعمال عبد الوهاب يوجد بها هذه الإعادة والتكرار .. والذي ممكن أن يفقد العمل جماله لو كان غير عبد الوهاب الذي صنعه ..
إن عبد الوهاب من وجهة نظري كان يتحدى الكل في موضوع الإعادة حيث أنها مع عبد الوهاب فقط تضيف جمالا للأغنية ..
فمثلا في جملة ذكرياتي يا ذكرياتي للفنانة وردة .. بالرغم من إعادتها عدة مرات إلا أنني مهما سمعتها ( هذا المقطع ) لا أمل منه أبدا ، بل بالعكس ممكن أعيد أنا المقطع من بدايته لإستمع له مرة أخرى ..
وهذا على نقيض أي إعادة لأي ملحن آخر ..
دا طبعا من وجهة نظري المتواضعة والغير دارسة ومتخصصة .
ولا أنت رأيك إيه يا كبير الآلاتية ؟؟
__________________
الحمد لله رب العالمين
رد مع اقتباس
  #5  
قديم 23/07/2007, 14h34
الصورة الرمزية سامية
سامية سامية غير متصل  
مواطن من سماعي
رقم العضوية:18940
 
تاريخ التسجيل: mars 2007
الجنسية: مصرية
الإقامة: الكويت
العمر: 52
المشاركات: 92
افتراضي رد: دعوة موسيقية على أغنية

السلام عليكم ورحمه الله وبركاته

الله عليك يا ابو حسام .. مش باقولك باحس اننا متجمعين حواليك وبنسمعك وانت بتشرح .. كل أغنية تم ذكرها انا باحب اسمعها لكن بعد تحليلك باسمعها بشكل مختلف .. باسمعها وانا حاسة بالمجهود المبذول فيها باسمعها وانا فاهمة التفاصيل اللي سيادتك شرحتها

بس عايزه اقولك حاجة والله انت صعبان عليا .. انت لازم تقف في وسط المنتدى وتصرخ وتقول ( كلكم عليا ولا ايه ) بس هاقولك ايه شرحك السلس والسهل جعلنا ماسكين فيك وماصدقنا

انا ليا سؤال بس المرة دي سؤال مختلف لاني خلاص اخترت اغنية ولسه بدري قوووووووي لما ييجي عليا الدور تاني .. بص يا ابو حسام مفيش لحن لعبد الوهاب الا وابدع فيه وسيادتك وضحت لنا عبقريته في التلحين ومدى اختلافه عن الاخرين .. ونجاحة في كل لحن عمله.. لكن من وجهة نظرك كموسيقي وفاهم في الموسيقى ايه اللحن اللي وقع من عبد الوهاب .. او السؤال بصيغة اخرى ما هو أسوأ لحن لعبد الوهاب من وجهة نظرك .. وليه ؟؟
اعتبر سؤالي ده استراحة ترتاح فيها شوية من عناء التحليل .. منتظرة ردك وشكرا لمجهودك الخرافي معانا وربنا يبارك فيك
مع خالص تحياتي
__________________
ـــــــــــــــــــــــــــــــــــــ
ليتني نــــــــوراً تلاشىَ ،،، في مآقِيكِ المُميـــــدة
عَـلَّ شِـعـري يَتـَغـَـشـَّى ،،، وقعَ أيَّام ٍ بليـــــــــدة
و حــروفـي تـتمَـشــــَّى ،،، في مداراتٍ بعيـــــدة
فافـتـحـي بــــابَ رؤاكِ ،،، وَ لِجي الدنيا الجديدة
إنَّ شِعري محض شـَدوٍ ،،، و هوايا أن أزيـــــدَه
فاصعَـدي فـوق رُبــــاهُ ،،، ليُقِيمَ الشِعرُ عيـــــدَه
ـــــــــــــــــــــــــــــــــــــ
رد مع اقتباس
  #6  
قديم 23/07/2007, 16h05
الصورة الرمزية الألآتى
الألآتى الألآتى غير متصل  
المايسترو
رقم العضوية:1323
 
تاريخ التسجيل: avril 2006
الجنسية: مصرية
الإقامة: مصر
العمر: 68
المشاركات: 2,483
افتراضي رد: دعوة موسيقية على أغنية

اللهم صلى على كامل النور ..

إيه الجمهور ده كله .. الواحد حاسس إنه عبد الحليم حافظ .. والناس دى كلها واقفة تهلل له ..

المهم .. نبدأ فى الرد عليكم ..

الأستاذ : هاينز ..

أشكرك حبيبى على كلماتك الرقيقة .. وعلى إدمانك لشخصى المتواضع .. بس إوعى تدمن حاجة تانية .. أحسن كلنا ندخل العمبوكة جماعة ..
__________________
مع تحياتى .. محمد الألآتى .. أبو حسام .


رد مع اقتباس
  #7  
قديم 23/07/2007, 16h25
الصورة الرمزية الألآتى
الألآتى الألآتى غير متصل  
المايسترو
رقم العضوية:1323
 
تاريخ التسجيل: avril 2006
الجنسية: مصرية
الإقامة: مصر
العمر: 68
المشاركات: 2,483
افتراضي رد: دعوة موسيقية على أغنية

أما عم غازى .. وكلامه عن التكرار غير الممل فى الأغانى ..

فى الحقيقة لقد كنت أتحدث عن عبد الوهاب المطرب وليس الملحن حين تحدثت عن الإعادات .. فعبد الوهاب بصفته مطرب مخضرم .. إستطاع أن يعيد كل هذه الإعادات دون أن يشعرنا بأى ملل ..

وأنظر لأم كلثوم مثلاً .. حين تعيد بعض الجمل بأى عدد من الإعادات .. لا نشعر بأى ملل .. بل نستزيدها أكثر وأكثر .. بغض النظر هنا عن الملحن .. فأم كلثوم أعادت شطرة ( الموجة تجرى ورا الموجة ) فى أغنية ( فاكر لما كنت جنبى ) إحدى عشرة مرة .. وكل مرة بشكل مختلف .. هل الملحن هو الذى أوحى لها بهذه الإعادات ؟ بالطبع لا .. ولكن لأنها أم كلثوم ..

وهناك فرق بين الإعادات التى يبدعها المطرب على المسرح .. وبين الإعادات المقصودة من الملحن .. ففى أغنية ( فاتت جنبنا ) .. تعمد عبد الوهاب أن يلحن ( حبتها أيوه أنا حبتها ) بأكثر من لحن .. أى ليس لعبد الحليم يد فى هذه الإعادات لأنها ملحنة وليست مرتجلة .. صحيح أن عبد الحليم أبدع فى الأغنية .. ولكنى فقط أحببت أن أبين الفرق بين الجملة الملحنة أكثر من لحن .. أو الجملة المرتجلة ..

وهناك أيضاً مثال واضح لتعمد الملحن أن يقوم بتلحين الجملة بأكثر من لحن ..

إسمعوا أغنية ( مداح القمر ) وبالتحديد الشطرة التى تقول ( قدك المياس ياعمرى .. أيقظ الإحساس فى صدرى ) .. إسمعوها من الكورس .. ستجدونه يؤديها بأكثر من لحن وأكثر من مقام .. الجملة الكلامية واحدة .. ولكن تم تلحينها بأكثر من شكل ..

أما الإرتجال الفورى .. فهذا شئ أخر يعتمد على المطرب فى المقام الأول .

ولمن يريد أن يعرف معنى الإرتجال .. هو الإبداع وليد اللحظة .. هو التأليف الفورى أثناء الغناء .. وقد أبدع فى هذا اللون .. المطرب الشعبى ( محمد طه ) وكذلك ( أبو دراع ) ومطربين الموالد عموماً .. هؤلاء هم ملوك الإرتجال ..
__________________
مع تحياتى .. محمد الألآتى .. أبو حسام .



التعديل الأخير تم بواسطة : الألآتى بتاريخ 08/05/2010 الساعة 12h36
رد مع اقتباس
  #8  
قديم 23/07/2007, 14h32
monday monday غير متصل  
ضيف سماعي
رقم العضوية:48371
 
تاريخ التسجيل: juillet 2007
الجنسية: جزائرية
الإقامة: السعودية
المشاركات: 1
افتراضي رد: دعوة موسيقية على أغنية

فكرة هايلة يا أستاذ غازي
أنا أشاطرك الفكرة

كمال
رد مع اقتباس
  #9  
قديم 20/03/2008, 01h48
الصورة الرمزية الألآتى
الألآتى الألآتى غير متصل  
المايسترو
رقم العضوية:1323
 
تاريخ التسجيل: avril 2006
الجنسية: مصرية
الإقامة: مصر
العمر: 68
المشاركات: 2,483
افتراضي ست الحبايب

إخوانى الأعزاء

إسمحوا لى أن أختار لكم اليوم أغنية ( ست الحبايب ) وكل عام وكل أم بخير ..


بسم الله نبدأ فى تحليل أغنية ( ست الحبايب )

الكلمات : حسين السيد

الألحان : محمد عبد الوهاب

الغناء : فايزة أحمد

إسمحوا لى أن أتجرأ وأكتب لكم كلمات الأغنية .. التى يحفظها الجميع عن ظهر قلب .. لكن مافيش مانع نكتبها .. لأنها كلمات جميلة بصراحة ..


ست الحبايب ياحبيبة .. ياأغلى من روحى ودمى

ياحنينة وكلك طيبة .. يارب يخليكى ياأمى

***

زمان سهرتى وتعبتى .. وشيلتى من عمرى ليالى

ولسه برضه دلوقتى .. بتحملى الهم بدالى

أنام وتسهرى وتباتى تفكرى ,, وتصحى من الأدان وتيجى تشأرى

***

تعيشى ليا ياحبيبتى ياأمى .. ويدوم لى رضاكى

ده أنا روحى من روحك .. إنتى وعايشة من سر دعاكى

بتحسى بفرحتى قبل الهنا بسنة .. وتحسى بشكوتى من قبل ماحس أنا

***

لو عشت طول عمرى أوفى .. جمايلك الغالية عليا

أجيب منين عمر يكفى .. وألاقى فين أغلى هدية

نور عينى ومهجتى وحياتى ودنيتى .. لو ترضى تقبليهم دول هما هديتى

***



تعتبر الأغنية من أغانى الفورم .. أى أن الكوبليهات متكررة لحنياً ..

الأغنية من مقام البياتى .. وهو مقام شرقى أصيل يحتوى على ثلاثة أرباع التون ..

قبل أن نبدأ فى التحليل .. يجب أن نسأل أنفسنا ..

هل كان يعرف عبد الوهاب أن أغنيته ستنال هذه الشهرة المدوية .. لدرجة أنها تصبح أشهر أغنية لعيد الأم ؟

برغم وجود العديد من أغانى الأم الجميلة .. مثل ( ماما ياحلوة ) لشادية .. و ( أحن قلب ) لمحمد فوزى .. وغيرهم ..

الذى يعرف عبد الوهاب جيداً .. يعرف بالتأكيد أن له حسابات خاصة .. ورؤية مستقبلية بخصوص أعماله ..

أى أنه كان يعرف أن أغنيته ستنال الشهرة المرجوة ..

الأغنية بسيطة وليس بها تحويلات مقامية تذكر ..

تبدأ الأغنية بضربات من الوتريات الغليظة .. ويرد عليها القانون ..

ثم يدخل الناى مع دخول الإيقاع .. وإيقاعنا فى هذه الأغنية .. هو إيقاع المقسوم السريع .. ولا يتغير طوال الأغنية ..

تغنى فايزة ( ست الحبايب ياحبيبة ) من البياتى .. ولا يتغير المقام إلا فى الكوبليه الأول عند ( أنام وتسهرى .. وتباتى تفكرى ) .. فنجد أنفسنا فى الحجاز .. وهو حجاز من درجة أخرى غير درجة البياتى .. وتعتبر هذه نقلة غريبة .. وفى الحقيقة أنه لم يستخدم الحجاز بكامله .. ولكنه إستعمل جزء صغير من سلم المقام .. لتحسب له نقلة مقامية ..

يعود للبياتى عند ( يارب يخليكى ياأمى ) عند نهاية الكوبليه ..

هذه هى النقلة الوحيدة فى الأغنية ..

نفس الجمل اللحنية فى الكوبليهات الأخرى .. بياتى ثم حجاز .. وعودة للبياتى .. وخلاص ..

ربما تكون هذه البساطة هى سر نجاح وشهرة الأغنية ..

فايزة نجحت تماماً فى تصوير المعانى .. وخاصة عندما أرغمها عبد الوهاب للصعود لجواب البياتى .. عند ( يارب يخليكى ياأمى ) فلقد طاوعها صوتها .. ولم يخذلها ..

حسين السيد أتحفنا بهدية جميلة .. ويقال أنه كتب هذه الأغنية خصيصاً لوالدته ..

__________________
مع تحياتى .. محمد الألآتى .. أبو حسام .


رد مع اقتباس
  #10  
قديم 20/03/2008, 06h50
الصورة الرمزية غازي الضبع
غازي الضبع غازي الضبع غير متصل  
عاشق عبدالوهاب
رقم العضوية:3243
 
تاريخ التسجيل: juillet 2006
الجنسية: مصري
الإقامة: أم الـدنيـــــا
المشاركات: 1,213
افتراضي رد: ست الحبايب

يا سلام عليك يا عم محمد يا كبير الآلاتية
روح يا شيخ .. إلهي يفتح عليك
جميل جدا هذا الاختيار ، وجميل جدا شرح النص ، وبديع جدا شرح وتحليل الأغنية موسيقيا ..
وهنا يحضرني أن أنقل إليكم حواراتي أنا وزمايلي في الشغل بالأمس ..
بدايةً .. صلوا ع النبي صلى الله عليه وسلم في يوم ميلاده
الحقيقة تعرضنا أنا زمايلي في العمل بالأمس لخبر مؤلم جدا
اثنان من زمايلنا أشقاء .. مات أبوهما الأسبوع المنصرم في حادث بشع
وتعبت أمهما جدا إثر هذا الحادث ورحيل زوجها ، ودخلت المستشفى
وبالأمس انتقلت هي الأخرى للرفيق الأعلى ..
وكان يلازمها أحدهما في المستشفى بالتناوب
ولما حدث ما حدث ، اتصل بنا لنخبر أخوه
وياله من موقف ..
اللهم لا تحكم به على أحد
تخيلوا أحبائي الكرام
أنه مطلوب مننا أن نبلغه هذا الخبر الأليم ، ولاحظوا ملابسات الخبر
من أسبوع هذا الحادث ورحيل أبوه وتأثره به ، ثم دخول أمه المستشفى ، ثم وفاتها
وفي أي أيام .. إننا في هذه الأيام نستمع إلى أغاني الأم كل شوية ..
المهم .. ربنا سبحانه وتعالى حل لنا الموقف ..
إذ أن صديقنا هذا لم يحضر للعمل بالأمس ( فهو في مبنى ، ونحن في مبنى آخر ) ، وبالصدفة قال يذهب لأخيه للمستشفى .. فعرف من هناك ..
ثم جلسنا جميعا في منتهى الحزن ، متأثرين جدا بهذا الموقف
وفي وسط الكلام ..
قال أحد زملائي .. الله يكون في عونهم .. البيت فضي عليهم فجأة ..
وقلت أنا .. شوف كمان الكام يوم اللي جايين .. هاتلاقي أغاني الأم كتير جدا .. وشوف بقى وقعها على نفوسهم .. الله يعينهم ..
فقال لي أحد زملائي .. تعرف يا غازي .. أغنية ست الحبايب دي .. طول عمري لما باسمعها قلبي بينقبض .. وقال الآخر .. عندك حق .. الأغنية دي بالذات باخاف منها ..
وقال آخر .. الأغنية بتخوف اللي أمه توفت واللي أمه موجودة ..
وقال آخر .. تعرفوا أنا بقى لما باسمعها ساعات بابكي ..
طبعا لم أرضى أن أُكمل هذا النقاش أو حتى أعلق .. لأنني كنت ولا زلت متأثرا جدا بهذه الأحداث المؤلمة لزميليّ ..
لكني من داخلي قلت الله يرحمك يا عبد الوهاب ..
أكيد كان قاصد كل ده ..
قاصد يجعل هذه الأغنية تؤثر في نفس كل من يسمعها
وعلى مر السنين ..
سيظل هذا اللحن موجع ، ومؤثر ..
اللهم ارحم موتانا جميعا ..
أنا آسف إذا كنت ألمت احدا بهذه الحكاية التي حدثت بالأمس فقط ..
وكل سنة وحضراتكم طيبين
__________________
الحمد لله رب العالمين
رد مع اقتباس
رد

Tags
تحليلات الالاتى


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
طرق مشاهدة الموضوع

تعليمات المشاركة
You may not post new threads
You may not post replies
You may not post attachments
You may not edit your posts

BB code is متاحة
كود [IMG] متاحة
كود HTML معطلة

الانتقال السريع إلى


جميع الأوقات بتوقيت GMT. الساعة الآن 19h52.


 
Powered by vBulletin - Copyright © 2000 - 2010, Jelsoft Enterprises Ltd