حكاية فتحى
------------------
قبل مانحكى نصلى .. نبى عربى سيد تهامة
صلاتنا مكسب تملى .. وشفاعة يوم القيامة
اسمع يا سيدى الحكاية .. حكايتنا ماهيش غريبة
حكايتنا ليها بداية .. لكن النهاية صعيبة
فتحى دا صحة حديد .. وكمان موظف حكومة
شغله قريب مش بعيد .. وان غاب ما حد يلومه
يتغابى عامل عبيط .. فى الشر دايما يذاكر
للقرش واعى وحويط .. وتجامله ينسى وناكر
فى الأكل يشبه لحوت .. أزرق وفارد قلوعه
ياكل ماحاجة تفوت .. ولا حاجة بتسد جوعه
طماع وكاره نصيبه .. ويبص على رزق غيره
ويجيب فى سيرة نسيبه .. ولساه بياكل فى خيره
فاضى مافى أى شغله .. ماشى يخانق الخلايق
وكل عمله وشغله .. إنه لأهله يضايق
مش عاوزك يقوم يخاصمك .. يفجر قوى فى الخصام
يمشى يشهر بإسمك .. وضميره عاش ع الحرام
فتحى عيوبه كتير .. فى بلدنا مافى حد حبه
مافى صغير أو كبير .. إلا فى يوم فتحى سبه
وأم فتحى دى ناصحة .. توعى على احمد عرابى
لو يوم يجيلها كحة .. تقول هاموت ياخرابى
ولها معاش عن راجلها .. وتملى دايما يزيد
وفلوس كتيرة تجيلها .. دا معاش ابنها الشهيد
وفتحى ياخد فى يده .. وراتبه وراتب مراته
مافى حد قادر يرده .. طمعان كمان فى حماته
واكل ميراث البنات .. إخواته بمساعدة امه
ونسى الحساب والممات .. وف ليلة قبره يضمه
فتحى مراته خبيثة .. الطير على شكله واقع
تمشى بين الناس دسيسة .. وتقول ياحظى اللى واقع
كان فاتها أصلا جواز .. وبابها لم حد دقه
وفتحى جه حظه جاز .. على جوازها مين اللى زقه
قال أيه بتروح تدرس .. تدبير وما اعرفشى أيه
ضيعتوا هيبة المدرس .. بحاجات دخيلة عليه
وعلى دا يبقى ابن فتحى .. من يومه شارب رذاله
تشوفه تقول دا ابن فتحى .. من غير تعب أو قواله
على قعدته فى الشوارع .. فى المدرسة أصله خايب
لا بيقرا ولا عنده دافع .. والنقل مفيهوشى راسب
على لما جه فى الشهادة .. ومفيشى أى اجتهاد
جات النتيجة ياسادة .. راسب فى كل المواد
وف يوم من الأيام .. خاله يحيى رايح يزورهم
ناوى وصل للأرحام .. مع إنه مش قد نارهم
على زاد قوى فى تباتته .. قام خاله قال له يا ساقط
جه فتحى غزه فى رقبته .. قام يحيى من طوله ساقط
وان ما وافتنى المنية .. ولسه فى العمر باقى
راح اجيلكو فى مرة تانية .. ونحكى ساعة التلاقى
------------------------------------------
هانئ الجمل