قراءة فى أوراق قديمة

[hany57]

أوراق قديمة بها نصوص قديمة
بعضها تم نشره فى بعض المنتديات
والبعض الآخر ربما لم ينشر
أعيد قراتها مع تاريخ كتابتها
لنعيش فى جو الكتابة وقتها
ونبدا على بركة الله

[hany57]

- 1 -
حوار مع قلمى
4 - 8 - 2010
-----------------
النهارده عايز اشارك
يمكن أفيد وأستفيد
جبت ورقى وجبت قلمى
وقلت أشوف موضوع جديد
مسكت قلمى ..قلت له : اكتب
قال لى : أكتب ؟ ..أكتب أيه ؟
قلت له : اكتب م الرصين
شعر فصحى بتاع زمان
وفق ما قال الخليل
وكل بحر وله ميزان
قال لى : أكتب ؟..أكتب ايه ؟
بس انت هات موضوع جديد
لسه انا ما شفتهوش
وانا من عينى انظمه
لو انت شفته ما تعرفوش
ساعتها هتلاقينى اكتب
اكتب ايه ؟
قلت له : اكتب
ع اللى واقفين فى الطابور
تنصلب فى الشمس
واللى مش عاجبه يغور
نكونشى عايشين فى جهنم
لما تغلى أتفور
كل دا
ودا شيئ خفيف
لاجل لقمة من رغيف
قال لى : دا موضوع قديم
شوف لى غيره
اكتب ايه ؟
قلت له : اكتب
ع الفساد وعن الحرام ويا الرشاوى
واللى بيذل العباد
واللى مش ع التوبة ناوى
واللى باع أرض البلاد
وعامل لى فيها
طبيب مداوى
قال لى : دا موضوع قديم
عمره من عمر السنين
نادر انت يوم تلاقى
حد مسئول كان أمين
اكتب ايه ؟
قلت له : اكتب ع الشباب
عن فقرنا وعن البطالة
عن العنوسة فى البنات
والمعاكسه والرذاله
وللا تنسيق جامعاتنا
شيئ كتير عايز قواله
مواضيع كتير
بس انت اكتب
قال لى : اكتب ؟
أكتب ايه ؟
كل دا قبلى انكتب
كانت النتيجة
شيئ عجب
اللى يقصدهم كلامنا
كبروا دماغهم تمام
سابونا نكتب كل حاجه
ومفيشى رد
مفيش كلام
وسابونا نكتب
أكتب ايه ؟
قلت له : فيه شيئ جديد
بس خبيته عليك
جمعية للتغيير وليها
إستمارة تبوس إيديك
تعالى وقع
صرخ فى وشى :
إنت اتهبلت يا عم هانى
عاوزنى اشيل فى كفى جمرة
وانا اطاوعك من جنانى
وابقى جوه .. وانت بره
شفت عمرك حد عاقل
قال لغولة عنيكى حمرة
قلت له : يبقى انت خايف
والكلام ده .. جديد عليك
حد غرك بالشفايف
والفلوس تجرى فى ايديك
قال لى : عيب
دى مش طبيعتى
وانت عارف من زمان
بس ليه ولاد صعار
نفسى اسيبهم فى الأمان
لو اسيبهم .. مين يعولهم
وللا يديهم حنان
قول لى مين ؟
قلت له : الحل ربى
حسمه فى كتابه المجيد
والمعنى عندى .. لك أقوله
بكلام بسيط .. يمكن يفيد
لو انت لك عيال صغار
خايف عليهم
بعد عمر يكون مديد
خاف الهك .. راقبه دايما
خلى قولك .. قول سديد
يالله رد
التفت عليه أشوفه
ما التقيتشى حد جنبى
مش ها كمل .. غصب عنى
القلم سابكم .. وسابنى
---------------
هانئ الجمل

[hany57]

- 2 -
أحلام مشروعة
3 - 10 - 2010
-----------------

باحلم بيوم لو يجيينا -- يبقى جانا العيد
باحلم بيوم لو يفوتنا -- يبقى فاته العيد
باحلم بضلة محبة -- تطرح زهور عناقيد
ونجتمع كلنا - صغيرنا ويا كبير
ونشوف ضرورى إزاى -- الكل يبقى سعيد

أيامنا كانت حلوة -- ما كانشى فيها خناق
كان خيرها والله كتير -- ونقول دى أيام عراق
كان الأمان والسعادة -- بينا وبينهم وفاق
دلوقتى شوفوا حالنا -- وشوفوا عراقنا إزاى
بإدينا نبنى عراقنا -- إيد غيرنا مش ها تفيد

وخد بالك من سوريا -- فتح عينيك الإتنين
سوريا فى شبه حصار -- ما ظهرش لسه يقين
لو يوم يتموا حصارها -- الغوث لها من فين
مفيش غير تركيا -- سند لها وإيران
طب إنتوا فين يا عرب -- فى نومكو لسه أكيد

أما السودان فى طريقه -- يبقى كام دولة
خلاص الفتن زهرت -- وخلصت الجولة
وبالسلاح يتمد -- ومحاولة ورا محاولة
يبقى السودان مجموعة -- دول بتتناحر
واحنا هدف كلنا -- بأجندة وبمواعيد

وانت فين يا مغرب -- معاك ملف القدس
مفيش مناقشة فى علن -- ولا حتى سامعين همس
وفين بقية العرب -- مافى حد ينبس نبس
إوعوا بقى تفتكروا -- إن إنتو كدا فى أمان
أصل الطوفان لو جانا -- ها يصيب قريب وبعيد

وقضيتى فى الرضاعة -- كانت هى فلسطين
وعليها برضه انفطمت -- وشب قلبى حزين
وعلى محمود طه -- شعره يزيدنى أنين
( أخى أختك هناك -- واقف لها غاصب
وحسامك لسه فى غمده -- ومفيش له تجريد )

مش قصدى ألوم على حد -- وانا واحد م الناس
وأحب كل العرب -- بالعقل والإحساس
وقلبى ياما إنكسر -- يوم ما التراب إنداس
من التتار والصهاينه -- نسكت عليهم ليه ؟
إنهض يا إبن الحضر -- وانت يا إبن البيد

--------------------------------

هانئ الجمل

[hany57]

- 3 -
غزل
27 - 10 - 2010
------------------------
يا مصر يا حته منى
يا معلمانى أغنى
إنتى شجونى ولحنى
وإنتى بقا معايا
تنورى لى الطريق
وإنتى ليا الرفيق
تحمينى ساعة الضيق
وسعدى وهنايا
إنتى الحنان والدفا
إنتى الشباب والعفا
إنتى الدوا والشفا
بمتسحى عيايا
يا حلوة يا مزوقة
يا جميلة ومروقة
طيورك هنا مشقشقة
يا شمسى وغطايا
إنتى اللى شاغله البال
والغنوة والموال
ومعيشانى فى حال
يا كل دنيايا
إنتى الزهور بتلوح
والعطر منك يفوح
أشوفك أنسى النوح
وارمى بقا ورايا
إرمى العذاب والشقا
ياحلوة يا مدقدقه
فجرك أخو الشقشقة
واحشانى يا أمايا
إنتى اللى جوه العين
معاكى أنسى البين
وأعرف طريقى فين
وتبقى ويايا
وروحى ليكى الفدا
إن بصوا ليكى العدا
أقوم ألبى الندا
والنية جوايا
يا إما أبقى شهيد
أو اصدهم لبعيد
واليد منى حديد
وأصل دى عطايا
عطايا رب العباد
ياست كل البلاد
يا أم البنات والولاد
زنتى لنا صبايا
صبايا تسبى العيون
والكحل زان الجفون
والكل ليكى ممنون
وعنيكى دى مرايا
شفت فيها الصدق
شفت الجمال والحق
والله إنتى أرق
من نسمة مشايا
ماشيه تغنى يا ليل
وتغنى بالمواويل
وحبى فيكى طويل
قصة بلا نهاية
قصة مدادها الدم
لأنك إنتى الأم
وإنتى عندى أهم
من روحى ودنيايا
إنتى الدفا والنور
وصافية كاللبلور
وأحلى كمان م الحور
والجنة دى بدايه
علشان باحبك تملى
وإنتى صديقى وخلى
ياللى عشانك بااخلى
الحزن ضحكايه
علشان تعيشى فى فرح
وبيكى اداوى الجرح
واسمع معاكى صدح
بلبل فى ضلايه
ضلاية كدا ع النيل
وشمسه تبقى أصيل
إنتى لقلبى دليل
يا عايشه جوايا
عايشه بتحيينى
وإنتى ضيا عينى
أبعد أنا تجيينى
تمشى بقا ورايا
تقولى إرجع لبلدك
إرجع لبيتك وولدك
إرجع إلى أرض مهدك
أنا مصر يا ضنايا
أرجع وأدوس ع الكل
والعيشة كانت فل
أرجع أشوف الذل
والظلم دا حكايه
أرجع ومش ندمان
لأنى بيكى ولهان
ولو يعود الزمان
أختارك يا سلوايا
أختارك إنتى الدوا
وانتى عليل الهوا
وأنا وإنتى نقعد سوا
نظرة ليكى كفايه
كفايه فى حضنك أنام
وإنتى تكونى الإلهام
واغنى أحلى كلام
إسمك بقا غنايا

---------------
هانئ الجمل

[hany57]

- 4 -
الأوله آه
( 1 )
-----------------------------

الأوله آه
والتانيه آه
والتالته آه

الأوله آه لو الندل دعاك مرة
والتانيه آه بتلقى قعدته مرة
والتالته آه دى نفسى عمرها حرة

الأوله آه لو الندل دعاك مرة وصدقته
والتانيه آه بتلقى قعدته مرة ودى حقيقته
والتالته آه دى نفسى عمرها حرة أدينى فوته

الأوله آه لو الندل دعاك مرة وصدقته ورحت معاه
والتانيه آه بتلقى قعدته مرة ودى حقيقته ويبدى أذاه
والتالته آه دى نفسى عمرها حرة أدينى فوته شايف جواه

الأوله آه لو الندل دعاك مرة وصدقته ورحت معاه لازم تندم
والتانيه آه بتلقى قعدته مرة ودى حقيقته ويبدى أذاه كمان يشتم
والتالته آه دى نفسى عمرها حرة أدينى فوته شايف جواه عقد تظلم

ومين اللى قال التمرجى يفوق ياناس دكتور
وللا فى يوم عسكرى أمر يا ناس مأمور
واهى دنيا ماشية وكل حد يلعب دور
ورجعت أقول
الأوله آه
والتانيه آه
والتالته آآآه

----------------------
هانئ الجمل

[hany57]

- 5 -
هانئ والعيان
(جزء من صورة )
---------------------
العيان : شوف لى يادكتور حباية
....... أسبوع وانا عندى إسهال
........ وأخت حباية م الخضرة
هانئ : بعدها وقف؟ ...........
العيان :.........على طول شغال
....... ولا عارف اعمل يوميه
...... واجيب لبيتى قرش حلال
.... واهو انت شايف أيه شكلى
...... النص عضم ونص هزال

هانئ : طب فيه صداع؟ .......
العيان : ...... دا بقاله شهرين
...... ليلى ونهارى وانا مصدع
هانئ : طب ونفسك غمه عليك ؟
العيان : غمه كتير وساعات أرجع
هانئ : طب والحرارة وألم المعدة ؟
العيان : أما الحرارة فرن مولع
...... وم الحموضة مبنمشى الليل
........ سكاكين فى بطنى بتقطع

هانئ : والأكل ؟ ...............
العيان : ...... مبحسش بالجوع
.......... ونفسى دايما مسدودة
هانئ : والدوخة ؟ .............
العيان:..... عايز افضل نايم
........ أعصابى فاترة ومهدودة
........ وعضمى كله أهو بينشر
...... وعنيه شايفه الناس سودة
هانئ : وفيه عرق ؟ ...........
العيان : .......... نازل صابب
........ وزورى حلقة ومشدودة

هانئ : ياسيدى دى أعراض تيفود
العيان : يلزمنى أيه ؟ .........
هانئ : ......... كشف وتحاليل
......... وقبل ماتروح هتلاقى
..... ضغطك بيوطا عايز محاليل
... أسبوع تعيشه على المسلوق
...... مع العلاج وبدون تطويل
........... هيلزمك راحة تامة
........ تنام النهار وتنام الليل

العيان : تعرف بقا أنا جايلك ليه ؟
هانئ : ................. ليه ؟
العيان : علشان ماحيلتى القشايه
هانئ : طيب ماتروح المستشفى ؟
العيان : رحت وراجع خيبتى معايا
...... فالحين يقولو تذكرة بجنيه
...... واحنا بنجرى على ولايه
...... أنا احتكم على نص جنيه
........ خده وشوف لى حباية

----------------------------

هانئ الجمل

[hany57]

- 6 -
تصريحات اوباما
--------------------

السلام عليكم ورحمة الله وبركاته
ناقش ضيوف حلقة ( ما وراء الخبر )
فى قناة الجزيرة الفضائية
بتاريخ 9 - 10 - 2010
تصريحات أوباما التى أعلن فيها
عن أمن إقليمى فى منطقة الشرق الأوسط
بالتعاون مع إسرائيل
تخيلوا
بالتعااااااااااااااااون
( دا معناه إنه مش شايف عرب ولا حاجة )
وأقول :
من يومين فى الجزيرة -- حلقة بأكملها
( ما وراء الخبر ) -- دا يبقى عنوانها
عن كلام أمريكى -- وقولها وضمانها
لأمن فى المنطقة -- وفق منظورها
أوباما عاوز الأمن -- فى عبارة مضمونها
إن العرب ولا حاجة -- كبارها وصغارها

إمتى تتجمعوا -- وأوباما أعلنها
فيه أمن إقليمى -- ليها ولجيرانها
صهيون هى المحور -- وانتو أذيالها
نزلتوا بحر الخيانة -- غرقتوا فى أوحالها
ليه الكلام فى العلن -- غير جوه جدرانها

إمتى ييجى الولد -- يقولها .. يعلنها
من أمريكا ما يخاف -- ما يهمه طيرانها
ثقته فى ربه كبيرة -- والنصر محورها
عابد يقيم الليل -- مغوار فى نهارها
يارب تتجمعوا -- دا يبقى أولها

--------------------------

هانئ الجمل

[hany57]

- 7 -
القذافى
1 - 3 - 2011
---------------------------

السلام عليكم ورحمة الله وبركاته
سمعت الآن إعادة لبرنامج الطبعة الأولى
وفى نهاية الحلقة نقل أحمد المسلمانى كاريكاتير
يقول إذا القذافى يوما أراد الحياة فلابد للشعب أن ينتحر
-------------------------------------
ومع إعتذارى لأبى القاسم الشابى فقد راق لى المعنى وأريد أن أكمل
وأعتذر للأوزان لأننى سأكمل مباشرة وأقول

إذا القذافى أراد الحياة
فلابد للشعب أن ينتحر

ولابد من أنهار الدما
لنرضى غرور العقيد القذر

وكل الشعوب تحب العقيد
كذلك قال بوجه عكر

ولن تروا غيرى لكم حاكما
فإما الرضوخ وإما الشرر

سأشعل ليبيا لهيبا دمارا
يمينا لظى وشمالا سقر

ومن أنتمو ترفضوا حكمتى
ومن أنتم جرذان الحفر

وإنى الزعيم وإنى الحكيم
وإنى الرسول وإنى القدر

هلموا فريقى فإلى الأمام
لنهزم شعبا نريه الكدر

دقت ساعات لعمل ونصر
وثورتنا فى طريق خطر

وهذا كتاب هنا أخضر
وجلد الكتاب دواما نضر

إسمع شروحا لتلقى علوما
وافهم شروحى تلقى العبر

لملذا تحيض النساء دواما
وليس المحيض لكل البشر

لأن المرأة فى الأصل أنثى
وأن الرجل أكيد ذكر

وما كان غيرى يريكم شروحى
وعندى العلوم وعندى الخبر

وأنى الزعيم ولى ملك ليبيا
وما فوقها من جميع البشر

وسوف أقاتل حتى أموت
فشعب كهذا عديم النظر

فلست رئيسا وعندى لجان
وكل اللجان لها مؤتمر

ولا لن أغادر قصرى هنا
ولو مات شعبى لآخر نفر

---------------------------

هانئ الجمل

[hany57]

- 8 -
الإسراء والمعراج
---------------------

يا قلبى صلى على اللى ربى صلى عليه
واصطفاه من البشر لحسن أخلاق فيه
صلى على الحبيب تبقا حبيب الحبيب
يارب أزور البقيع ويدفنونى فيه

الحزن لما بييجى ييجى ورا بعضه
سيدنا النبى شاف نفسه إنه بقا لوحده
ماتت الزوجة الحنون ستنا خديجة
وعمه أبو طالب اللى كان بيسانده

رب العباد حب يسرى عن الهادى
ويطمنه ويخلى السرور عليه بادى
بعت له جبريل بالبراق قال له تعالا زورنى
انت الوحيد لك شفاعة هديه لعبادى

ركب نبينا البراق والدنيا ليل وظلام
بسرعة وصل القدس والأنبيا بتمام
ينتظروا يوصل حبيبى علشان يرحبوا بيه
وبعد ما رحبوا قالوا صلى بنا يا إمام

وركب نبينا الصخرة الإذن بقا جاله
يعرج لسابع سما نبينا هنياله
وف كل سما ترحيب وملايكة بتسبح
وبعض م الأنبيا حباه ودعياله

نبينا لما وصل سابع سما قام خاف
لأن جبريل رجع م الحرق والله خاف
وقال له تقدم عشان دا آخرى يا طه
والدعو دا جاى لواحد إنت وما فى خلاف

نبينا دخل النور نور السما والأرض
وحب يخلع نعاله ليجيله لوم يشتد
ما أذنشى له ربنا وقربه منه
وأهداه خمس صلوات رحمة وحب وفرض

ما بين الصلا والصلا كفارة لكل ذنوب
للى يسيب الكبائر وعن المعاصى يتوب
يارب توب عليا واحفظنى من نفسى
النفس دى أماره رمتنى كتير فى ذنوب

يارب لاجل النبى وذكراة المعراج
تعتقنى م النار إلهى وتدينى إفراج
واكتب لى موت الشهدا وأجرة الصابرين
وكل سنة تكتب لى حجة مع الحجاج

حبيبى قولى على قدى إعذرنى يا طه
سيرتك بتسعد روحى وف قلبى محلاها
ياريتنى بقى كنت شاعر يقدر كتير يكتب
كنت بدرت الأرض وبمدحك املاها

واختم كمان بالصلا على دوا روحى
ع النبى صلاتنا شفا لجروحكو وجروحى
يارب قدرنى اصلى عليه لحد ماموت
وارزقنى ربى الشهادة ساعة طلوع روحى

قولوا آمين

---------------------

هانئ الجمل

[hany57]

- 9 -
فى ذكرى الهجرة
( ومضات من سيرة الحبيب من البعثة إلى الهجرة )
-------------------------------------------------
صلاتى تسبق سلامى .... عليك حبيب الله
ياللى الإله اصطفاك .... من كل خلق الله
فيه الخليل والكليم .. لما انت بس الحبيب
واللى يحبك يحبه ....... والجنة تستناه

واللى يصلى عليك ....... ربى يصلى عليه
عشرة قصاد كل مرة .. وملايكة تعمل أيه ؟
للعبد تستغفر ........... وتكتب الحسنات
وان صلى ليلة جمعة .... نبينا يسمع ليه

ألفين صلا وسلام ..... سيرتك يا طه نور
كتبت فى المعراج ..... أما النهارده الدور
على هجرتك ياحبيبى .... سيرتك بتحلالى
ياللى الإله أرسلك .. رحمة وبشرى ونور

لما ربى اختارك ....... للرسل تبقى ختام
ومن علينا بنعمه ........ وجيتنا بالإسلام
جعل الإيمان باللى قبلك .. من تمام الدين
ماهوه أصل الدين ..... عند الله الإسلام

الدعوة بدأت سر ........ خوف من الكافرين
وخصوصا لسه مفيش ..... عدد كتير مسلمين
ولما زادوا شويه .......... الأمر جا بالجهر
( فاصدع بما تؤمر وأعرض عن المشركين )

نادى النبى وجمعهم .... قام قالوا أيه السبب
قام قال لهم ع الرسالة ..سخروا وقلوا الأدب
واستغربوا دعوته ........... وكذبوا كلامه
أما طويل اللسان .... كان التعيس أبو لهب

راحت قريش لابو طالب .. وقالوا له لنا خليه
شيل حمايتك عنه ......... واحنا بقى نوريه
وإما نحاربك معاه ......... وتبقى لينا عدو
لحد مافريق يهلك .... وموضوعنا دا ننهيه

أبو طالب عرض الكلام ............ على النبى المختار
رد النبى مااتركه ................ إلا اما اشوف إظهار
للأمر دا من الله ...................... أو أنقتل دونه
لو وضعوا الشمس فى يمينى .. ووضعوا القمر فى يسار

قال له قول مابدالك ..... عنك أنا اكفيهم
حمايتى لك ممدودة ...... ومنى أنا ليهم
دا انت ابن أخويا يعنى .. زى إبنى تمام
والله عمرى أبدا ...... ما أسلمك ليهم

قريش عملت حيل ....... مع رسول الله
راح عتبه بن ربيعة ... قال يتفاوض وياه
قال له لو عايز حكم .... تبقى علينا ملك
تحكم على الأشراف ... والأمر دا ماحلاه

ولو انت عايز مال ...... نخليك أغنانا
وسيب كلامك اللى ....... تعبنا وخلانا
هنتساوى بالعبيد .. وعمر دا ما يحصل
ولما خلص كلام ....... قام رد مولانا

قرا فى سورة ( فصلت ) .. وعتبة يسمع ليه
وجسمه كان يرتعش ... وخوف باين فى عنيه
وسأل نبينا يكف ............. وفكره بالرحم
ورجع لقومه يقول ..... مالكوشى دعوة بيه

وفكروا بفكرة تانية ............ وفكرهم مذموم
راحوا لسيدنا النبى .. قالوا انت عزيز فى القوم
علشان مانفضل حبايب ...... وننهى موضوعنا
تعبد إلهنا يوم .............. ونعبد إلهك يوم

نزلت هنا على طول .. سورة ( الكافرون )
حاولوا بمطلب تانى ..... يفرغوا المضمون
قالوا له شيل الآيات ..... اللى عليها نقول
ومعاك هنعمل هدنه ..... ويبقى بينا سكون

حاولوا بأفعال كتير ..... ونبينا عزمه شديد
لم ينخدع بكلامهم ........ ولا يخاف تهديد
زادوا قوى فى أذاه ........ وآذوا أصحابه
والكون دا تدبير إله ... ولكل شيئ مواعيد

وقالو هنعجزه ....... بحاجة فوق طاقته
قالوا له شق القمر .. فانشق من ساعته
قام قال تعالوا اشهدوا .. قالوا أكيد ساحر
لازم يشوف العذاب ....... هوه وبطانته

كتر العذاب من قريش .... لحبيبى وأصحابه
يستقبلوه بالأذى ............. إذا فتح بابه
فاكرين بلال والحر .. والصخرة على صدره
وعمار ودرع الحديد .... وايمانه لم سابه

واشار نبينا على بعض ..... م المسلمين وياه
يهاجروا يروحوا الحبشة .. والأرض أرض الله
لأن فيها ملك ............. ما حد انظلم عنده
وممكن فى يوم يرجعوا ........ لما يريد الله

ولما أسلم عمر ......... ودا أمر شرحه يطول
رجعوا اللى كانوا فى الحبشة .. ونختصر ونقول
حصلت هجرة تانية ........... برضه للحبشة
وفد قريش راح يجيبهم ..... رجع خايب مذلول

ولما ماتت خديجة ....... ومات أبو طالب
وكانوا همه السند ..... فى الشدة وحبايب
حزن حبيبى كتير .. وقريش زادت فى أذاه
وحبيبى صابر وعارف ... أمر الإله غالب

ولما شاف النبى ......... قريش وإعراضها
وشايف ان الدعوة ..... مش هيه دى بلادها
قابل جماعة من يثرب .. جم مكة لاجل الحج
عرض عليهم الدعوة ......... بكل أبعادها

وقال لهم ساعدونى .. فى رسالتى والتبليغ
بصوا لبعض وقالوا ..... والله كلامه بليغ
دا هوه دا النبى ... اللى اليهود حكوا عنه
ما حد له يسبقنا .... ونبقالوا حصن منيع

وفى البيعة الأولى .... بايعوا النبى العدنان
لا يشركوا ولا يزنوا ... ولا ييجوا بالبهتان
ولا قتل ولاد ولا سرقة .. ونبينا بعت اتنين
من الصحابة للفقه ....... ويقروهم قرآن

وجات البيعة التانية ....... وجم وقابلوا الحبيب
بايعوه تانى من جديد .. على أى شيئ لو رهيب
حتى الجهاد والقتال ......... بايعوا نبينا عليه
ونبينا اختار منهم ......... اتناشر راجل نقيب

ولما علمت قريش ...... زادت الأذى أضعاف
قام نبينا الكريم ......... على الصحابة خاف
أذن لهم بالهجرة ......... يروحوا إلى يثرب
والهجرة كانت سر .. خوف من أذى الأجلاف

وقعدوا كفار قريش .... فى دار لإبن كلاب
وقالوا احنا نجيب ..... من كل قبيلة شاب
ولما يطلع محمد ... من داره يضربوا فيه
ضربة راجل واحد ...... وتاره يبقى غاب

واتفقوا إن الرأى .. سديد ومافى خلاف
ويبقى بين القبائل ... مع بعضها أحلاف
ودمه بقى يتفرق .. بين القبائل جميعها
ويرضى أكيد بالدية .... فرع عبد مناف

وربى أخبر نبينا .............. بمكر للكفار
قام نبينا وراح ......... لابو بكر دخل الدار
وقال له الإذن جالى ...... يابو بكر بالهجرة
أبو بكر سأله الصحبة . قال له ( نعم ) دا قرار

وأبو بكر كان مجهز ...... من الدواب اتنين
وأهله صنعوا السفرة .. فى جراب يكفى اتنين
قطعت أسماء نطاقها ...... ربطت فم الجراب
علشان كدا أطلقوا ..... عليها ذات النطاقين

واستأجروا للرحلة ...... دليل وكان كافر
عبد الله بن أريقط ...... وكان دليل ماهر
استأمنوه ع الركايب .... والسر ويا الزاد
وميعادنا بعد تلاته .. فى الغار وكون فاكر

ولما كان الليل ........ نبينا أراد يمشى
قال له تعالا يا على .. نام هنا ف فرشى
وقال له دى أمانات .. أقول لك أصحابها
إبقى لهم ردها ...... بعد أنا ما امشى

نبينا فتح الباب .. قرا ( ..فأغشيناهم ..)
وشباب الكفر واقف ..... قام ربنا عماهم
ونبينا مشى من بينهم ..... كأنهم نايمين
مكروا ومكر الله .... مافى حاجة نفعاهم

وكل شوية يبصوا .... من تقب كان فى الباب
وسيدنا على كان نايم .. فاكرينه النبى يااحباب
ولما طلع النهار .......... قمت لهم يا على
ساعتها شافوا الخزى ..... وخيبة تملا كتاب

كان الرسول الكريم ........ وصاحبه وصلوا الغار
كانوا سوا الاتنين ................ وتالتهم القهار
وابو بكر ع النبى خايف .. قال النبى ( لا تحزن )
واللى معاه ربنا .............. مايهمهوش أشرار

واللى الإله يحرسه .. مين راح يطوله مين
ماهو بره باب الغار .... كفار كتير واقفين
ما حد منهم فكر ........ يبص جوا الغار
واللى ييأس يرجع ... من بعد يوم واتنين

عبد الله بن ابو بكر .... فى الفترة دى بيروح
يشوف أبوه والحبيب ....... اللى فداه الروح
يمدهم بالشيئ ........... اللى كانوا يعوزوه
وبعد ما يمشى تيجى .. على أثره غنم بتروح

وبعد تلات أيام .......... كان الدليل واصل
وهوه مشى قدامهم ... أخدوا طريق الساحل
وبرضه ناس لمحوهم .. راحوا قالوا لقريش
وسراقه قاعد سامع .... وقال دول الشاغل

نبينا ويا ابو بكر ................ واتنين وياهم
وصلوا لخيمة ام معبد ......... ليشتروا غداهم
ملقوشى عندها حاجة .. غير شاه وضرعها جف
حلبها نبينا وشربوا ........... وأمنت بدعواهم

ولما قرب سراقة ....... من النبى وصاحبه
فرسه غاص فى الرمل .. نزل وقام صاح به
وركبه تانى التقى .... رجليه غاصت للركب
طلب الأمان م النبى .... واللى كتب صاحبه

واصل نبينا السير .......... أبو جبين وضاء
قبل المدينة بشوية ...... قعد النبى فى قباء
اسس فيها مسجد .... من أول يوم ع التقوى
وواصل بعدها سيره ...... لمدينته ربى شاء

وقابلوه الأنصار ....... يرضى عليهم الله
فرح بيملا الوجوه ... وفى القلب يا محلاه
ستات شباب شيوخ ..... أطفال خرج الكل
بيغنوا بنشيد جميل .. اللى الجميع غناه :

طلع البدر علينا ........ من ثنيات الوداع
وجب الشكر علينا ....... ما دعا لله داع
أيها المبعوث فينا ... جئت بالأمر المطاع
جئت شرفت المدينة .. مرحبا يا خير داع

----------------------------------

هانئ الجمل