سنين العمر

**محمد محمدالعقاد** · #1 08/06/2013, 20h38

أغنية

سنين العمر

سنين العمر بتولـى *** وبترحم على ضلى

وبنعى الباقى من عمرى *** وايه م العمر فاضلى

شوية كتير ماهوش فارق *** مسير الحى هيفارق

لانا عاصي ولا مارق *** وعشمى ف ربي يغفرلى

وايه م العمر فاضلى

عاهدت سنيني من بدرى *** لا تبكينى ولا ابكيها

وطال الليل وبان فجرى *** بيوصف كل ما فيها

لقيت ليلي كما نهارى *** وعمرى سراب ومش دارى

شوية كتير ماتفرقشى *** مدام الكل راح يمشي

عينيه ساعات ما بتنامشي *** وعشمى ف ربى يغفرلى

وايه م العمر فاضلى

ساعات بجرى ورا طموحى *** وببنى ف الهوا صروحى

وعايش ع الامل يمكن *** يرجعلى الامل روحى

يوصلنى على جناحه *** يعوضنى سنين راحوا

شوية كتير ماهوش فارق *** مسير الحى هيفارق

لانا عاصي ولا مارق *** وعشمى ف ربي يغفرلى

وايه م العمر فاضلى

جبال الصبر تفنيها *** سواقى الدمع ف عنيه

وروحى عاشقة باريها *** ونار الوجد حنيه

كريم بالعفو يسترنى *** عظيم بالصفح يجبرنى

وعمرى ان ضاع متفرقشى *** مدام الكل راح يمشي

عينيه ساعات ما بتنامشي *** وعشمى ف ربى يغفرلى

وايه م العمر فاضلى

شعر : محمد العقاد

**عبدالعزيز كايد** · #2 13/06/2013, 22h07

.

الله الله الله
أساذي
محمد محمدالعقاد
ابدعت يا سيدي ورسمت لنا أجمل اللوحات الشعريه
دمت مبدعاً

.

**نبيل رزوق** · #3 26/07/2013, 20h31

عمل لطيف ..من شاعر ظريف
أستاذي المحترم
أرجو أن تتقبل مني إضافة قليل من التفاؤل والمرح على كلمات أغنيتك :

ياسنين العمر..سبقني الزمان..
أنا أعمل إيه..علشان العمر يستنى شوية..
روحي وقلبي شباب..وجسمي عدا المية..!

تفضل واستمع إلى هذه الخاطرة الموسيقية بعنوان:

انتظار..

**Hisham Khala** · #4 28/04/2018, 13h23

الله يرحمك و يحسن إليك يا أستاذنا الغالي محمد محمد العقاد