جريح الروح

**shams** · #1 20/12/2006, 04h55

جريح الروح

بتسألني......
مين انت و ليه كــل البكا و النــــوح
جريح الروح انا إسمي جريح الروح
في دمي وقلبي وعروقي عذاب وجروح
لا قادر أشكي أيامي ولا حاقدر بسري أبوح
كطيرتايه في عصف الريح بيغني كما المدبوح
وتضحك دنيتي شامته وضحكتها أنين مبحوح
سجينه الروح في عذابها وتاه منها طريق الدوح
غربه طريقي وجراحي مصحباني منين ما أروح
وحتى في يوم مااعوز افرح أقول برضه غنا مجروح
وشوك الزرع بستاني وزهري ع التراب مطروح
تعب عمري بيستنى في بسمه من سنينه تلوح
ومش شايف في أيامه سوى جراحه بتنزف روح
ودي جراحي وبتقولك جريح الروح بقى إسمي جريح الروح

**shams** · #2 22/12/2006, 02h32

قاللي الحكيم

قاللي الحكيم يابني الغدر.. ده أزمان
قاللي الحكيم يابني الظلم.. ده إنسان
قاللي الحكيم يابني الورد.. ده الوان
قاللي وقاللي وقاللي وكنت انا الغفلان
-----
كلمه اتقاليتلي مسمعتهاش
حكمه اتحكتلي مفهمتهاش
شفت النصيحه معرفتهاش
غابت حقيقتي وانا نشوان
قاللي....
-----
خدتني سنين لأحلامي
فاتتني كتير ف أوهامي
وتاه عمري في أيامي
وضعت بأرخص الأتمان
قاللي....
-----
وشفت الغدر وزمانه
وعشت الليل واحزانه
وضاع وردي والوانه
وتاهت نعمة النسيان
وقاللي....

**shams** · #3 26/12/2006, 18h01

عارف

عارف .. لو ما قدرتش يوم تضحك تعمل إيه ؟
عارف .. لما يتوه منك فرحك تعمل إيه ؟
ماتبكيش ع اللي راح
ولا يهمك جراح
ده لكل ليل صباح
للفرح فارد إيديه
عارف…
وعيش يومك دقيقه
ودور ع الحقيقه
وطير ورا الأحلام
وإنسى كل ثانيه
كان جرحك فيها دنيا
ومغرباك أوهام
عارف…
ولما تعيش في بكره
وتهجر كل ذكرى
حتنتهي الآلام
وتضحك لك ليالي
وتشوف شمسك تلالي
كل الطريق قدام

وعارف..

**halem** · #4 26/12/2006, 21h51

كلمات غايه في الرووعه عزيزي ..
فيها احساس جميل جدا ..

يا ريت لو تقللنا مين الشاعر الجميل اللي كتب الكلمات الحلوه ..

**aabadry** · #5 27/12/2006, 14h27

يا سلام عليك
الله هو ده الكلام الحلو
باقي حاجة واحدة بس
غير توقيعك من
جريح الروح
الي
جميل الروح
دعواتي بالفرح الدائم و السعادة الدائمة
يا رب

**shams** · #6 27/12/2006, 20h05

اقتباس:

المشاركة الأصلية كتبت بواسطة halem

كلمات غايه في الرووعه عزيزي ..
فيها احساس جميل جدا ..

يا ريت لو تقللنا مين الشاعر الجميل اللي كتب الكلمات الحلوه ..

ربنا يخليك إحساسك هو اللي جميل.
اللي كتب الكلام هو اللي حطها في المنتدى يعني العبد الفقير الى الله أنا وشكرآ على لقب شاعر فأنا لا استحقه يعني ممكن شويعر

**shams** · #7 27/12/2006, 20h19

اقتباس:

المشاركة الأصلية كتبت بواسطة aabadry

يا سلام عليك
الله هو ده الكلام الحلو
باقي حاجة واحدة بس
غير توقيعك من
جريح الروح
الي
جميل الروح
دعواتي بالفرح الدائم و السعادة الدائمة
يا رب

ياحبيبي تفاعلك واهتمامك أخجلني والله ..الحمد لله إنها عجبتك
المشكله يا صديقي إن الواحد بيكتب حاجه وبيتصرف عكسها تمامآ يعني ما أصعب ان نقوم بما تفلفست انا بيه فوق(حلوه تفلفست دي)