الإرهابي الصاعد
الإرهابي ، الواعي ، الصاعد
رشح نفسه للولايات
قالوا: دا له مستقبل واعد
أول يوم أظهر كرامات
لما نطق بضميره الفاسد
علشان مايجَّـمَع أصوات
إيه يعني ان أبوه اتأسلم
ولا عن الإسلام اتكلم
لو هنساعده راح يتعلم
الهيلا هوبه و الحركات
هيلا هيلا هوبه يا إنتخبات
الإرهابي الصاعد واعي
من عنصرتو وكبت الذات
قال : المبدأ ، مالهوش داعي
غيـَّر دينه تلات مرات
والسياسات يلزمها الكدب
لما يهوذا باع الرب
كان بيعد الفضيات
و الإرهابي لما مدحهم
كان بيغني : التعلب فات
أيوه التعلب فات و يفوت
هَيْعوْلمنا لحدْ الموت
ولا تسرتنا ورقة توت
ولا نـُدفـَن جنب الأموات
الإرهابي الصاعد قاعد
عالكتالوج يمشي بعَدّادْ
هوَّ "البيت الأبيض" قاصد
واحنا بيوتنا سواد x سواد
كما أسلافه ، جاهل حاقد
يتحرك ، كده ، بالريموتات
ده إرهابي ، وهذا مجاهد
ودا بيصنع كيماويات
و دا طيب جداً و مهاود
يصحى ويستنى الفاكسات
يمشي عليها ولا بيعاند
هيمدوا له خمس سنوات
وف أمريكا اللي بيفوز
يابلياتشو ، يا أراجوز
واذا مش جايز، بكره يجوز
تل أبيب أعطت إشارات
يا إرهابي ، هبه لفوق
دا انت خلاص شبيت عالطوق
إضحك كركر فرفش روق
و احكم عالم م الأموات
........................................
نلتقي السبت 16نوفمبر ، بحول الله
هتوحشوني
الإرهابي الصاعد
العرض العادي
