واد بلدي....
عليّه تتمقلتي ناسيه إنيّ واد بلدي
ما بتنطهيش هدمتي وخيّاطها مش بلدي
تشهد عليّه السواقي وبطن لحف الغيط
لو م العدو إنشقـّيت ما حاخون تراب بلدى
,,,,
دا أنا الجدور اللي سرحت تحت أرض النيل
و انا النخيل اللي طرحت فى السباط قناديل
و أنا اللي باني الحضارة والتاريخ شاهد
صيّاد وفارد شبك للنور فى آخر الليل
,,,,
يا واقفه تتدلعي وبتشمتي فيّه
وناسيه إن المحن مٍزنه ومعدّيّه
يامه فيه طبول من زمان دقـّت على راسي
وعزم ناسي عمل بالروح معدّيّه
,,,,
هاتوا الهرم ينسأل مين اللي علاّك فوق
وخلوّا خٌف الجمل ع الرمل يرسم طوق
وسيبوا بٌكره اللي جاي يرفع رايات الامل
يمكن بصوت العمل يصحى الجبان ويفوق
,,,,
يسأل توحوتموس فنون صرح البٌنا مع مين
وليه تقاوى اللغم مزروعة فى العلمين
ويخلـّي رمل القنال يوم حفرها ينطق
وان قال دي ميّة شقا قولوا العرق راح فين
,,,,
يا معطـّلين الساعات وكل شئ بأوان
ومفكـّرين السكات مكتوب على الغلبان
الانتماء للبلد ندّيها أرواحنا
ومهما تغلط اقول يامصر انا الغلطان
رد: من أعضاء سماعى ـ أزجال سعد الشرقاوى ـ بصوته
رد: من أعضاء سماعى ـ أزجال سعد الشرقاوى ـ بصوته
العرض العادي
