طلبات نوتة أ / عادل صموئيل الجزء الثانى

[chadi abid]

أرجو منكم نوتة اغنية حبيبة يا حبيبة لمحمد الجموسي

[عبد الرؤوف سعيد]

أستاذ عادل ... آسف لوضعي الطلب هنا لكنني لم أتعلم استخدام الموقع جيداً بعد!
أتمنى لو تتكرم بتدوين أغنية "بكرا وانت جايي" للسيدة فيروز ...
وشكراً جزيلاً لك على عملك الرائع

[radwa ali]

المشاركة الأصلية كتبت بواسطة عادل صموئيل

الاخت العزيزة رضوى

اكرر تانى انا بهتم بكل عضو يدخل المنتدى
انا كمدرس موسيقى وكمان خبير محترف لما سألأتك انت بتعزفى ايه وازاى وده بكون عشان احدد لك طريق صح تبتدى منه وتوصلى لأحلى هدف ممكن .. ولعلمك كل اللى درستهم حتى درس خاص بينى وبينهم ماكنتش باخد منهم فلوس يعنى لوجه الله ودى تفرق ان المدرس اللى بياخد فلوس بيديكى الدرس اللى يتاخد فى حصة واحدة على عشر حصص عشان البنديرة تبقى عالية يعنى سبوبة لكن اللى بيدرس محبة فى الفن ممكن يفيدك واسمعى نصيحتى حاتكسبى كتير ( فنيا )
انتى عشان تعزفى اغنية من الحديثة ده لازم اولا تكونى بتعزفى سماعى وبتعملى كوردات بإيدك عشان تملى المكان يعنى تشتغلى بالعشر صوابع لأن اللحن اصلا مافيهوش ميلودى لو عايزة تتعلمى موسيقى بجد وانتى بتقرى شوية نوتة
ادخلى هنا على اى مشاركة للخ العزيز هيثم الصالحى هو عامل مهرس لكل النوت اللى انا كاتبها كل مطرب لوحدو وفيه ابجدية بصى فيه واختارى اى اغنية تكونى سمعاها ونزليها وحاولى تشتغلى فيها او اختارى الحتت اللى تشوفيها سهلة فيها وبجد ممكن فى فترة قصيرة حاتوصلى لدرجة حلوة لأن اغانى زمان بتعلم الموسيقى يعنى كانت الجملة واضحة المعالم يعنى زى ماترسمى وش انسان بيتكون من عينين ومناخير وشفايف وودان واضح المعام او ترسمى شكل هندسى بيبقى فيه مستقيمات وزوايا محددة عشان كده اغانى زمان بتعتبر مدرسة لتعلم الموسيقى اما الاغانى الحديثة التفعيلات بتاعة الجمل مبهمة ومش محددة والله العظينم انا ياموسيقار ياكبير يعنى بقالى خمسين سنة فى الموسيقى بسمع الاغانى دى مش بعرف ادندنها اغانى زمان عاملة زى الرسم التقليدى تشوفى الصورة توصفى لى شايفة ايه بالتحديد يعنى منظر طبيعى ولا بورتريه شجرة ولا مركب مثلا لكن الاغانى الحديثة زى الرسم التجريدى انا مش بفهم منو حاجة
وبجد انتى لو ركزتى شوية تسمعى اغانى الزمن الجميل حاتقرفى تسمعى الحديث ده
مع اطيب تحياتى

أ / عادل صموئيل
أنا متشكره جدا لاهتمام حضرتك و نصائحك القيمة انا فعلا نزلت حاجات من تدوين حضرتك زى انت عمرى و الف ليله وليله و الحلوة دى وفعلا الموسيقى طلعت حلوه قوى، انا بس كنت فاكره ان الأغانى الحديثه ممكن اعرف اعزفها لو لقيت النوتات بتعتها، وأنا إن شاء الله همشى على نصيحة حضرتك و هسمع و هنزل اغانى تانية و ألف شكر لحضرتك على المجهود الرائع ده

[نور الصباح]

حبيب قـــــــــــلبى وحبيب كل أعضـــــــــــاء منتدانا الجميل
الفنان الكبير الأســـــــــــــــتاذ :
عـــــــــــــــــــــــــــــــــــــــــــــــــ ــــــــادل باشـــــــــــــــــــا صموئــــــــــــــــــــــــــــــــــيل
سلام الله عليكم ورحمته وبركاته
وبعـــــــــــــــــــــــــــــــــــــــد :
لقد سبق وطلبنا من فخامتكــــــــــــم التكرم بتدوين كل من

الأغنيات التالية :-

1 - لو بالعين أنظر حبيبى لو بالعين للمطربة { هدى زايد }

والملف الصوتى فى المشاركة رقم 261 بتاريخ ( 2 / 2 /2014 )

2 - دخلت مرة فى جنينة للمطربة الراحلة { أســــــــــــمهان }

والملف الصوتى فى المشاركة رقم 265 بتاريخ (6 / 2 /2014 )

3 - جــــــــــــال لى الـــــــــــــــــــــوداع للمطربة الحبيبة { شـــــــــــــــــــادية }
والملف الصوتى فى المشاركة رقم 265 بتاريخ (6 / 2 /2014 )

علما بأن عيد ميلاد الفنانة { شــــــــــــــــــادية }
كان بالأمس الموافق 8 / 2 / 2014
وهـــــــــــــــــــــذا للتذكرة
ملحوظة هامة للجميع : بعد غد الثلاثاء الموافق 11 / 2 / 2014
هو يوم ميلادى الثانى بعد الستين
و الحدق يفهــــــــــــــــم

وشاكرون لكم أفضالكم
و شكررررررررررررررررررا
أخوكم
نور الصباح

كل سنة وانت طيب ياحاج
انا نفسى ابعت لك هدية بس احنا عندنا فى عين شمس
ماعندناش حاجة غير المظاهرات من اسبوعين الاخوة عايزن يعملوا اعتصام زى رابعة عندنا انا كان نفسى ابعت لك بطة محمرة بس لو تحب ممكن ابعت لك مظاهرة
مع اطيب تحياتى

[عادل صموئيل]

الاخت العزيزة رضوى
انا اسعدنى كلامك جدا يعنى انتى ماشية صح .. يعنى انت معاكى الجيتار بتعزفى ميلودى واللى يسمعك بيسمع الميلودى ده وكل ماتعزفى من اغانى زمان كل ما تلاقى مستواكى ارتفع .. لأن زمان كان فيه حاجة مهمة جدا او اهم حاجة على الاطلاق كان الملحن لما بيعمل اغنية حتى لو طولها ساعة ان مافيش اغنية تانى تبقى شبهها بحيث كانوا سميعة زمان من اول حرف يقولوا دى اغنية كذا والكام ده من ييجى مثلا 1500 اغنية دلوقتى كل الاغانى شبه بعض مافيش جديد واختفى الميلودى وبقى العملية توزيع يعنى اصوات على بعضها وخلاص اللى بيتغير الكلمات فقط يعنى مصلا شوفى شعبان بن عبد الرحيم بقالوا عشر سنين بيغنى على جملة موسيقية واحدة ... ولما تتقدمى شوية فى اجيتار تتعلمى شوية كوردات ( بس لازم حد متخصص يعلمهم لك ) يعنى الكورد بيبقى كذا نغمة مع بعض ولهم اسماء يعنى مثلا كورد الرى مانير والرى ماجير وهكذا ... كان المطربين زمان المطرب بيغنى على العود بيقول اللحن كلو من اوله لآخرة ويغنيه ( يعنى سمعتى عبد والهاب بيغنى لاتكذبى وست الحبايب مثلا ) دلوقتى لو اللى بيغنى بيعرف جيتار مثلا بيمسك الجيتار وبيقول الكوردات وهو بيغنى مايقدرش يقول اللحن الاساسى لن مفيش لحن اساسى واضح
وبعدين فيه حاجة مهمة انا مش ضد الحديث طالما لو معنى يعنى انا قلت لك شوفى الفهرس اللى عامله هيثم حتلاقى انا كاتب كذا حاجة من الجداد مثلا اغنية فيها حاجة حلوة وحاجدات كتير دول فيهم ميلودى
العملية عاملة زى ايه ؟ انتى النهاردة اشترى كيس شيبسى مكتوب عليه بطعم الفراخ او الكباب ووريه لحد من الناس الكبار زى باباكى اوجدك لو موجود حايضحك عليكى فى سره لنو لافيهكباب ولا علاقه بالكباب ده مواد كيماية لها روائح بيضحكوا بيها على الشباب والاطفال وممكن تكون ضارة بالصحة

مع اطيب تحياتى

[عادل صموئيل]

احبائى
اقدم لكم رائعة من روائع ام كلثوم من العيار التقيل جدا

كل ليلة وكل يوم

انا كنت دونتها من اكتر من سنتين ونزلتها بس من 4 ايام الاخ العزيز وليد 100 كتبلى ع الخاص ان اكتشف انى ناسى فيها حاجتين .. طبعا العادى انى بشوف ملف انكور وبسمع االملف الصوتى واشوف الكلام لو صح بصلحو وبتحصل احيانا عادى .. انا عادة كل مانسخة الويندوز تضرب وانزل جديدة بنقل ملفاتى على درايفات تانية وعادة كمان على سيديهات لأن طبعا ملفاتى كلها مهمة بس لما يكون مضى على تدوينها اكتر من سنتين ممكن مش بعرف مكانها على السيديهات بسهولة لازم اقعد اشوف واحدة واحدة ومعنديش وقت
المهم انى بحثت على الجهاز مالقتش الملف الانكور قلت انزل البى دى اف من المنتدى وراجعته على الملف الصوتى اكتشفت حاجة خطيرة ... انا حافظ طبعا كل اغانى ام كلثوم من الاف الى الياء وعزفتها مليون مرة والحمد لله بس الاغانى اللى بعد انت عمرى انا حافظها حرفيا اما الاغانى اللى قبل حفظتها من تكرار السمع فى الاذاعة يعنى ماكنتش بركز فيها حرف حرف .. لما ركزت فى الاغنية اكتشفت ان فيه تفعيلات كتير انا بقولها ممكن صح بس مش زى ما الفرقة بتقولها ( انا بقول الصراحة مش بتكسف ) والمشكلة دى جت انى كتبتها ساعتها من الذاكرة ( طيش شباب يعنى ) بس انا الحمد لله ودى مهمة لكل مدون من سنتين لازم اى حاجة اكتبها حتى لو متاكد منها ذ00% لازم اراجع الملف الصوتى .. الاخطاء الى بقول عليها بسيطة جدا بس تفرق كتير جدا جدا فى قيمة اللحن .. يعنى احنا كنا بنقعد بروفات كتير بنغير فى مازورة واحدة او علامة تحويل عشان كده انت بتلاحظوا دقتى الشديدة فى الكتابة .. يعنى مثلا عندك فى المازورة الرابعة ص اولى فيه سكتة كروش احنا حافظينها انها نوار من غير سكتة هى ممكن تحسها حاجة تافهة لكن بتدى طعم خطير للازمة كمان صولو الكمنجة الحفناوى بيقوله حاجة تانية غير اللى احنا بنقولها .. يعنى على وتر النواة بيعمل سى ناتوريل بعدها بيمول مش بيعمل سى نص بيمول .. حتى قفلى الاغنية اكتشفت ان ام كلثوم بتقولها مختلفة عن ما احنا بنقولها .. المهم لما دونتها تانى طبعا من الاول لقيت حاجات كتير صغيرة كده مش حازود عليكم بس لفت نظرى اللعب الخطير اللى عاملو بليغ فى الكوبليه الاخير فى الصبا صفحة 6 السطر اخامس آخر مازورة فيها صول مرتين احنا كنا بنعملهم صبا يعنى صول بيمول اتضح وركزت فيها عشرين مرة ان ام كلثوم بتقول الصول الأولى ناتوريل والتانية بيمول .. كمان كلمة طار بيا الهوا بجناحه بتقول جناحه بطريقة تجنن احنا كنا مش بنقولها حلو كده ... المهم انا الحمد لله كتبتها زى الكتاب ما بيقول يعنى بأقصى درجة من الدقة واشكر الاخ وليد 100 انه لفت نظرى .. لأنى بالطبع مقارنة النوتة القديمة بالجديدة الفرق رهيب يعنى نزلوا الجديدة وولعوا فى القديمة
مع اطيب تحياتى

[نور الصباح]

احبائى
اقدم لكم رائعة من روائع ام كلثوم من العيار التقيل جدا
كل ليلة وكل يوم

SSSSSSSSSSSSSSSSSSSSSSSSSSSSSSSSSS

واعتبر إن البطة وصلت بس بينى وبينك طعمها لا يقاوم
والعبد لله ما قدرتش أكلها لوحدى
و أنا شايل لك ورك البطة و الجناحين
وشاكرون لكم أفضالكم
و شكررررررررررررررررررا
أخوكم
نور الصباح

[rida baccouche]

الرجاء نوتات اغاني
- موعدنا ارضك يا بلدنا
- حسناء قرطاج
- بني وطني ( علية التونسية )

[muhamadibra]

المشاركة الأصلية كتبت بواسطة عادل صموئيل

احبائى
اقدم لكم رائعة من روائع ام كلثوم من العيار التقيل جدا

كل ليلة وكل يوم

انا كنت دونتها من اكتر من سنتين ونزلتها
المهم انى بحثت على الجهاز مالقتش الملف الانكور قلت انزل البى دى اف من المنتدى وراجعته على الملف الصوتى اكتشفت حاجة خطيرة ...
مع اطيب تحياتى

وهذه هي العبقرية والاستاذية والتمكن ومهما اقول لن استطيع التعبير عما امتن به لك يا مايستروووو
د محمد ابراهيم

[khalil mourad]

أستاذي الفاضل عادل
منذ تعرفت على هذا الموقع الجميل وأنا دائما أجد عبارات مثل "أستاذ عادل اريد نوته ... أطلب نوتة.... لو تدون لنا أغنية ..." و لكن لا أحد سألك يوما ماذا تطلب أنت
لذا قررت أن أسألك: أستاذي الكريم ماذا تريد أن يحققه لك أعضاء المنتدى؟
علنا نوفي لك ولو جزءا من الدّيْن الذي علينا تجاهك