طلبات نوتة أ / عادل صموئيل الجزء الثانى

[أنور دنهش]

شكرا على المجهود الكبير
الأساتذة الأفاضل ممكن لو تكرمتم أريد نوطة أغنية قومي تنمشي بهالدني يا حلوة الحلوين للفنان وديع الصافي
مع الشكر سلفا

[عادل صموئيل]

احبائى اليوم اقم لكم لحن يتقال فيه كلام كتير .. اغنية
الحب الحقيقى

للفنانة شادية تلحين خالد الامير .. انا مرة وانا بجهز اغنية لحن الوفاء قلت لحن ماحدش يقدر يكتبه رد عليها انسان بطريقة تدل على الجهل وقلة الذوق وقال فيه ناس موهوبين كتير والغرور مش مطلوب وطبعا كل جواب بينضح بما فيه يعنى انت لو سألت المايسترو سليم سحاب الى كتير كل ما بيشتغل بنوتاتى بيمدح فيا قدام الفرقة بتاعته وهم اتعرفوا عليا من خلال كلامه وهم اعضاء هنا فى الصفحات .. ايوه حيقول ان لحن الوفاء مش اى حد يعرف يكتبه .. وانت لو بتشتغل فى اى مجال وانا عارف ان مش كل الى هنا موسيقيين.. لو انت شاطر وعملت حاجة حلوة اكيد تحس باعتزاز بالنفس وده فيه فرق بينه وبين الغرور .. يعنى انا كنت متردد اكتر من 20 سنة اكتب لحن الوفاء لأن كله وقفات وتغيير سرعات وتغييرموازين .. وللعلم ما اتعملش ف حفلة ومش من النوع اللى يتعمل فى حفلة والى كتبه لعبد الحليم هو اللى قاد الاوركسترا .. وكان طبعاكل جزء بيتسجل لوحده والكل بيعتمدوا على اشارة المايسترو لكن انا لما دونته لكم هنا مفيش كل الكلام ده يعنى لازم ادونه بإخراج وبطريقة بحيث انك انت بمفردك تقدر تعزف الحن بدون مايسترو او حد يقف معاك يظبط لكن الدنيا .. لذلك كتبت كلمة مش اى حد يقدر يدونه بالطريقة دى ماهو ممكن حد يدونه وماتعرفش تعزفه .. ولاحظوا ان انا مش بتكلم مع كل اغنية يعنى انا قدمت اغنية ايظن .. ما اتكلمتش مع انها فيهاشغل .. لأن مش لازم اقول بعمل وبعمل لكن فيه حاجات بحب اشرحها لكم اكتر من اى اتكلم عن نفسى يعنى .. فى اغنية الحب الحقيقى درس مهم للى لسه بيتعلموا تدوين انظر الى اول مازورتين فى النوتة .. فيه دخلات بتكون سهلة بالذات فى الادليب لأن الاغانى اللى على ايقاع .. الايقاع بيحكمها .. اما اغانى اللى بتبدأ بادليب هنا المشكل لما تكون البداية حروف صغيرة يعنى فاكرين اغنية فكرونى البداية مثلا دو مى فا صول حروف بطيئة والفرقة حافظة اللحن لكن لما يكون حروف سريعة زى الاغنية هنا بتحتاج حتة عبقرية من المدون ازاى تعملها سهلة ماتخليش الفرقة تخبط فى بعض ودى بتحصل فى الاستويوهات كذا مرة ويعيدوها لحد ما تتظبط ويدخلوا صح لكن فى الحفلات اللى غير الفرقة الماسية لازم يدخلوا متفركشين إلأ إذا وال إلا إذا دى هى المدون العبقرى اللى مش بيدون عشان يقبض ويمشى ولكن بيدون عشان اولا الشغل يطلع مظبوط .. ايه العبقرية هنا ... انى لقيت الأدليب موزون يعنى مكن يمشى على ميزان 2/4 وده شىء رائع طبعا غيسر لما يكون بدون ميزان .. وهنا المايسترو بيشاور مازورة فاضية عشان الفرقة تاخد منه السرعة بس بخبرتى ( اللى مش عاجبة البعض اللى مش فاهمين وسامحهم يارب ) خبرة 40 سنة فى الاستوديوهات ماتكفيش ان البداية فيها حروف سريعة زى هنا لازم حايتلخبطوا برضه .. العبقريةانى عملت سكتتين بمعنى ان المايسترو بيدى اشارة مازورة فاضية وبعدها السكتتين الى ف الاول ويدخلوا وهنا استحالة يغلطوا حتى لو متوسطين فهمتوا حاجة ؟ لأن انا لما كنت بدون نوتة كان لازم انا الى اسجلها يعنى انا اللى اقود الفرقة فى الاستوديو ولحن زى ده لو انا خلصت الادليب ده فى عشر دقائق الياقى سهل بتعتبر الاغنية خلصت لكن لو مش مكتوب كويس وقعداو يفعصوا فيها على ما يخلص بيكون الفرقة اجهدت وباقى اللحن بياخد4 اضعاف الوقت ... هنا مهم جدا جدا اقول مرفق اللحن كامل .. ومرفق معاه ورقة زيادة هى الصفحة الاولى من اللحن .. بعد الاديب انا كتبت الموسيقى ودخول المذهب اكتشفت انه صعب جدا مش ممكن حد مبتدىء حيقراه اعمل ايه رحت لاغى اللى كاتبه وفتحت صفحة جديدة وكتبته بسرعة 130 بقا سهل زى الحلاوة بس لما اجيت اكتب الكوبليه ااول لقيت اللحن سرعته اتغيرت يعنى لازم يرجع لسرعة100 وإلا حايبقى سهل اكتر م اللازوم ويبقى ممل فى العزف قول لىمين بقا بياخد باله من الكلام ده .. عايز اعرفكم ان طول ما انا بكتب بفكر فى اللى حايقرأ اللى بكتبه مش بكتب وخلاص وحبيت ارفق الصفحة الاولى اللى لغيتها عشان تشوفوا صعبة اد ايه .. فيه حاجة مهمة .. ليه نوت كتير انتم بتلاقوها صعبة وليه مئات المرات ناس يطلبوا منى تدوين نوت مطبوعة فى كتب من زمان وبيطبوا انى ادونها بطريقتى لسبب .. ان الى دونها دونها وخلاص لكن انا عارف بدونها لمين ..يعنى كل الصفحات ال على النت هنا مثلا 50 % مبتدئين بكل الدرجات .. و40 % متوسطين و10 % محترفين والارقام دى انا متأك منها لأنى بتعامل مع النت من 20 سنة وبتظهر من الاسئلةلما حد يسألنى حاجة .. واهميتهم عندى بحس الترتيب انا يمنى المبتدئين اولا والمتوسطين ثانيا والمحترفين ثالثا .. لأن انا لو عملت نوتة المبتدىء عرف يمشى فيه المتوسط حايقراها حلو والمحترف ممكن يعزف 20 صفحة مرة واحدة فهمتوا قصدى ؟؟ يعن انا فيه كملة بحبها .. لما حد بيرد ويقول انا مبتدىء فى العزف وعمرى ما كنت اتخيل انى اعزف اغنية لأم كلثوم وبفضل نوتاتك انا بعزفهم ..انا بقرا كل الردود للعلم بس مش برد لسبب انا مش بستجدى الردود يعنى واحد بيعمل عمل يرد عليه خمسة يرود على كل واحد بطريقة تخليه يرد تانى ويقعد هم يرودوا وهو يرد ويبقى عمل لحن واحد ف الشهر . انا مش فاضى لكده انا بعمل النوتة ولازم تانى يوم اكون بدأت فى غيرها لكن بهتم بالردود لو حد شكرنى اشكره بلايك لو حد سأل عليها سؤال او قال ملحوظة هنا لازم ارد عليه .. انا متأثر اوى بقول جميل للسيد المسيح قال : ان فرحة السماء بخاطىء واحد يتوب اكتر من فرحتها ب 99 بار لا يحتاجون الى التوبة طبعا واضحة .. انا بفرج بمبتدىء واحد يعزف نوتة ليا اكتر من 99 محترف مش محتاجين النوتة اصلا يعنى ممكن يعزفوها سماعى فهمتوا قصدى ؟؟؟؟؟ عايز اقول حاجة مهمة وتضحك .. مرة زمان فى الثمانينات الملحن خالد الامير طلبنى رحت له فى بيته كان وقتها ساكن فى عمارة فى ميدان العتبة تطل على ميدان الاوبرا وناصية شارع 26 يوليول الدور السادس رحت له كان عايزنى ادون له لحن صغير مقدمة ومذهب و2 كوبليه كان بالليل ف نفس اليوم فيه فرح بتاع ناس اصحابه وحب يقدم لهم اللحن هدية وكان مكتشف مطرب صغير جديد واتفق معايا على تكوين فرقة صغيرة من حبايبنا يعنى محمد العربى عازف الايقاع وانا واذكر الزميل عازف الكمان يجيى الموجى ومش فاكر الباقيين .. المهم خلى بالك .. انا دونت اللحن طلع صفحة ونصف يعنى الصفحة الاولى المقدمة ومذهب وكوبليه والصفحة الثانية الكوبليه التانى .. كنت طبعا كالعادة وقتها بنكتب بالقلم الرصاص ..وذوقا منى بعد ما خلصت اللحن قلت له هات لى شاى وقعدت جبت قلم فلو ماستر ونسخت النوتة بخط جميل عشان يبقى سهل فى القراءة وقبضنى اجر التدوين وقال لى نتقابل باليل فى فندق ماريوت الساعة 8 وقدامى نده السفرجى بتاعه وقال له انزل صور من الورق ده 10 نسخ .. انا كده ك مدون شغلتى خلصت رحنا الفرح بالليل فوجئت ان السفرجى صور الصفحة الاولى فقط ما اخدش باله ان فيه صفحة تانية وطبعا خالد الامير عشان ما بيعرفش نوتة ما بصش اتأكد من النوت .. وطبعا كان مصيبة يعن عملنا بروفة قرينا الورقة الاولى وقعدنا نألف فى الكوبليه التانى بس الحمد لله انه فرح وهدية يعنى لو المطرب غنى وقال البليلة السخنة تعدى .. هنا انابحكى لكم ليه القصة دى .. تذكرت عبقرية احمد فؤاد حسن .. يعن ليه كان مخلى واحد مسؤول عن النوت الموسيقية ولازم يكون موسيقاروشاطر متخصص فى النوتة تفاديا ان تحصل حاجة زى كده وبعدين حفلات الفرقة الماسية كلها مذاعة وحاجة زى كده لو حصلت نوتة ناقصة ورقة يعنى يتخرب فيها بيوت ناس وانا تشرفت اكون المنصب ده لفترة طويلة وكان لازم النوتة بتاعةاللحن الجديد تجى لى الاول وكنت بطلب النساخ واحدد له ينسخها كام نسخة وبعدين لازم اراجعها ورقة ورقة وبعدين فى البروفات كان الملحن بيعمل اصلاحات وتعديلات فى اللحن كان كل عازف معاه موس بيمسح بيح ويكتب التصليح كنت لازم بعد البروفة امسك ورقة ورقة واراجع على التصليح وفى الأغانى الطويلة اللى بيتعمل فيها45 بروفة زى اغانى عبد الحليم الطويلة كان لازم كل خمس ايام من كتر التصليح والشخبطة فى الورقة امسك نوتة واصلحها تصليح رائع واستدعى النساخ ينسخها تانى وفى البروفة الفرقة تشتغل بورق جديد زى الفل والملحن يعدل تانى ويشخبطوا تانى وانا اعدل تانى ونرمى كل النوت اكتر من عشرمرات ونجددها بعد ماتشوفوا النوتة شوفوا الاورقى الاولى الملغية وشوفوا الفرق اللى مش ممكن المبتدئين والمتوسطين يقروه

[عمرو الهنداوي]

تسلم أيدك أستاذ عادل

[خليل سليم]

صباح الخير استاذنا الفاضل عادل المحترم أني اتفق مع حضرتك بما تفضلت به من إحساسك وشعورك بأعضاء المنتدى من خلال جعل نوتات حضرتك تتلاًم مع مستويات الأعضاء من مبتدي ومتوسط ومحترف وهذا ليس بالسهولة لكن الخبرة والممارسه عبر سنوات طويلة والإحساس الي عندي حضرتك جعلك متمكن من عمل هذا الشى وهذا فقط عند نوتات حضرتك وإني شخصيا حسّيت بهذا. شكرًا اوي أوي على ما قدمت وما تقدمه لنا كأعضاء في هذا المنتدى الراقي من اعمال قيمة وحفظك الرب.

[طارق سرحان]

استاذنا الموسيقار الماسى عملاق التدوين فى الوطن العربى المايسترو عادل استمتعت جدا بذكرياتك الجميلة مع الموسيقار خالد الامير او واحدة من ذكرياتك وواتمنى تكلمنا عن محمد سلطان انا بحبة جدا واتمنى اذا كان متاح او ممكن تدون اغنية سلامات سلامات نادية مصطفى مش عارف هى لحن الموسيقار محمد سلطن او حد غيرة لكنها اغنية جميلة ارجو من الله الكريم ان يمتعكم بالصحة والسعادة والعمر الطويل ويا ريت سعادتك تعمل الفرقة وتعيد امجاد الفرقة الماسية ولسيادتكم جزيل الشكر

اخى العزيز طبعا فيه ذكريات مع محمد سلطان وفايزة بس اغنية سلامات سلامات من تدوين موسيقار هاوى اسمه طه العجل هو فلسطينى الجنسية وعندهم فىالقاهرة سلسلة محلات شهيرة اسمها العجيل فىكل مكان ف مصر هىبتغعة الفننة الجميلة نادية مصطفىبس اتأكد الاول انى مادونتهاش من قبل من الفهرس ولو مش موجودةنزل لى رابط وانا ادونها لك بس انا فاكر انى دونتها

[salhi_haithem]

صباح الفل
شكرا استاذ عادل انت صانع السعاده فى قلوب كل عاشقي الموسيقى فى المنتدى نوتة جميلة ورائعة جزاك الله كل خير

[elarabi]

الف شكر استادنا القدير على هده الاغنية الراءعة و الجميلة و التدوين الراقي و المنضبط كانضباط عزفك و طبعا هدا ما يميزك.اطال الله في عمرك و امدك بالصحة و السعادة يا رب امين.

[عادل صموئيل]

احبائى .. الناهردة حقدم نوتة جديدة لسه عاملها مش عاملها من قبل زى معظم النوت ..مش حقول ماحدش يقدر يكتبها ولا الى يقول فى دى حاجة حقول انها نوتة سهلةجدا اسهل من السهولة وممكن اى مدون مبتدىء يكتبها بس زمان قالوا مثل : معظم النار من مستصغر الشرر .. اللحن النهاردة
تتر المسلسل التركى بين نارين ....

طبعا بينطلب منى كتير حاجات كده وبدون بعضها ومش بدون الغالبية ليه .. فيه موسيقى منها بتبقى موزعة وموسيقى مش موزعة .. ومع الاسف مع انى شرحت الفرق قبل كده 100 مرة برضه ناس بتطلب حاجات موزعة .. وحبيت اقدم شرح تانى لكلمة موزعة .. انت لما تسمع ام كلثوم .. تلاقى حملة موسيقية واحدة بتقولها الست وبتغنيها معاها الكمنجات يعنى خط لحنى واحد ده اسمه لحن مونو او مش موزع وده 99% من اغانينا المصرية فى الزمن الجميل .. زمان لما كانوا بيوزعوا لحن كل 100 لحن .. كانو الملحن بيحرص ان التوزيع ما يتداخلش مع اللحن الاساسى لأن كلمةلحن يعنى جملة موسيقية جميلةجدا والتوزيع لازم يكون ماكياج خفيف لكن ما يتداخلش مع الجملة يشوهها او يخلطها والمستمع العربى مش متعود يسمع توزيع ف مش حايفهم حاجة ... لكن ف ىاوروبا اىاغنية او اى ترنيمة او اى سميفونية بتبقى موزعة ليه عشان هناك اتولدوا بيسمعوا موزع واتعودوا يفهموه يعنى لما كان طفل كان بيودوه الكنيسة وهناك بيشترك فى الكورال اللى لازم يكون 4 اصوات صوتين اولاد وصوتين بنات والطفل اتعود انه لوصوته ناعم بيغنى تينور ولوصوته تخين بيغنى بيز والبنت لو صوتها رفيع بتغنى سوبرانو ولو صوتها زى فايزة احمد دافى بتغنى الطو وطبعا الاول بيعملوهم نوتة وبيبقى معاه كتاب بيغنى منه مكتوب فيه الاربع خطوط لحنية فوق بعض يعنى وهو بيغنى صوت من دول يبقى حافظ زملائه بيقولوا ايه لأن فيه علم رهيب اسمه الهارمونى ,, ده بيبقى4 الحان افقيا بيغنوا مع بعض وكل لحن بيتكن من نغمات واهم حاجة رأسيا كل نغمة بيتقال معاها 3 نغمات تانيين ( فاهمين قصدى ؟ ) يعنى الالحان مكاتوبة فوق بعض افقيا لكن احنا نقيسهم رأسيا بيبقى دايما فيه 4 اصوات فوق بعض لازم يكون بينهم هارمونى يعنى حساب عدم نشاز وتوافق ولازم يكون التوافق جميل .. وبيطلع الطفل متذوق للتوزيع ده وفاهم علميا بيحصل ازاى لأن انت لو مش فاهم حاتسمع دوشة وخلاص بعد كده بيروح الأوبرا يسمع السيمفونية اللى بتبقى متوزعة 12 صوت فوق بعض بالطبع لو معندوش الخلفية من ال 4 اصوات مش حايفهم ال 12 صوت إلا لو كان دارس كونسيرفاتوار.. فهمتوا لحد كده ؟ يبقى انت لما تسمع بتشوف هل ىدى جملة واحدة ولا جمل كتيرمختلفين ماشيين مع بعض ... زى ما قلت كان زمان الملحن الشاطر لما بيحب يعمل لحن موزع بيخلى الموزع ( لأن الملحن زمان حاجة والموزع حاجة ) ما يحيش جنب الحن الاساسى لأن الجمهور بيركز مع اللحن السسى ومن اروع الامثلة الل انا كنت بدرسها اغنية انا قلبى دليلى ل ليلى مراد تلحين العبقرى الفذ محمد القصبجى وعايزك تسمعها 10مرات شوف التوزيع جميل ورائع تحت اللحن الاساسى اد ايه لكنه ولا مرة غطى على اللحن وهنا اللى عايز اقوله .. انا كتبت انا قلبى دليلى بمنتهى السهولة عشان مميز بكتب ايه لكن معظم الالحان الموزعة معرفش اكتبها ولو اتكبت حاتطلع فيها اخطاء ليه .. انا لما بسمع لحن مونو لحن واحد بيبقى زى ما حد يميلك ويقول لك اكتب وانت سامع وبتكتب .. لكن التوزيع زى ما عشرة بيملوك كلام مختلف وانت سامع العشرة ومش عارف تلقط منهم خيط تكتب منه فاهمين قصدى ؟ وده بيتسبب فى ضياع الحان كتيرجدا ماحدش يقدر يكتبها دى غلطة وقع فيها عمار الشريعى وعمر خيرت .. ودى كانت مشكلتنا فى الفرقة الماسية كان الموزعين بعد تسحيل الحن بياخدوا نوت التوزيع معاهم وماتوا والنوت اختفت وكان عبد الحليم مثلا ما يقدرش يغنى الاغنية تانى فى حفلة لأن مافيش نوتة وعمر خيرت لو ما تركش النوت امانة عند حد او طبعهم فى كتاب يتداول , بعد وفاته بعد عمر طويل الأحان دى حتموت لأن ماحدش حايعرف يعزفها بدون النوت الاصلية حد متفزلك يقول طب اشمعنى نوت بيتهوفن بتتعزف بعد 330 سنة اقول لأن بيتهوفن كان بيألف على الورق وكانوا حريصين ان الورق ده يتنسخ ويتدوال وبعدين لما ظهرت المطابع بقا ينطبع ويروح كل دول العالم يعنى اى دولة فيها مكتبات بتبيع كتب موسيقى تدخل تطلب اى عمل من اعمال اى مؤلف يدوك بالرقم اللى انت تطلبه نسحة من البارتاتورة ( يعنى نوتة المايسترو اللى متدون فيه اصوات كل الالات ) وانت تفرغها بنفسك او تشترى اصوات كل الالات زى ما انت عايز وطبعا فى اى اوبرا فى اى دولة فى العالم موجود مكتبة فيها كل الكلام ده عشان بيشتغلوا منه الحفلات السيمفونية نرجع للموسيقى بتاعة النهاردة انا اول ماسمعتها لقيتها مش بس سهلة ولكن سهلة جدا اى مبتدىء بيفك الخط ممكن يعزفها وحلوة يعنى .. وانا بهتم اوى بالمبتدئين .. وعدى مدرسة فى تعليمهم ان اول ما يبتدى يعرف يقرا بوقف تمارين التكنيك السخيفة وابتدى اكتب له جمل من اغانى سهلة جميلة وهنا برضه فيه ناس معقدين متفزلكين بيعترضوا على الطريقة وبيقولوا ف سرهم انى مش بفهم حاجة يعنى .. وانا عايز اقول .. هنا فى اى صفحة 50 % مبتدئين و40 % متوسطين و10 % محترفين ودول ممكن يستغنوا عنى يعنى ببيعزفوا سماعى او بيحتاج لى اوى لما يكون اغنية مش حافظها وعايز النوتة عشان يحفظها صح .. لكن كل تركيزى على المبتدىء والمتوسط ( اعتقد كلامى صح ؟ ) طيب .. انت ايها المبتدىء والمتوسط عايز تتعلم ليه مش عايز تمتع نفسك بعزف جميل لموسيقى واغانى ولا عايز تعزف بيتهوفن فى الاوبرا ( معلش انا كلامى مجنون شوية بس بخبرتى ده الواقع ) لو عايز تعزف بيتهوفن فى الاوبرا طلبك مش عندى حضرتك تروح الكونسيرفاتوار وهناك حيقولوا لك تعالى لما يبقى سنك 6 سنوات عشان اللى بيعزفوا بيتهوفن ف الاوبرا لازم يبتدى من سن 6 سنوات لأن لهم تدريس معين .. لكن عايز تعزف كمنجة شوية اغانى حلوة الاول بنديك تدريب لحد ما تتعلم تعزف كمنجة وبعدين يدك تمارين من اغانى او موسيقى جميلة اولا بتخليك تحس ان مجهودك مش ضابع ده فيه انتاج طالع وثانيا اللى بيبسمعك بيتبسط ويصقف لك ودى اهم تشجيع يعنى انا كنت اعانى زمان من مشكلة وانا بتمرن تمارين تكنيك سخيفة فى البيت عندى يقولوا ايه الزفت المزعج ده اقفل على نفسك وماتطلعش صوت ( صح ؟ ) وفيه ناس بيكلمونى من دول اوربية يسألونى عن انواع كتامات صوت للكمنجة بعد ماجربوا كل انواع السوردين برضه خايفين لا الجيران يشتكوهم للشرطة انا عملت اختراع .. لما كنت بدرس تلاميذ الاقيهم حاييجى منه كنت اديه كمنجة من بتوع المدرسة فى البيت بس كنت الاول اخليه يعزف اغنيتين لعبد الحليم كان اول ما امه تسمعه فى البيت تحست انها انجبت عبقرى يعنى ييجى الولد تانى يوم ويقول لى ماما عايزة تشترى لى كمنجة قول لنا نشتريها منين فاهمين الفرق ؟ يعنى بين ان الطفل يعزف شىء واهله يقولوا ايه الفراخ اللى انت بتدبجها دى وبين ان اهله اعجبوا بيه وعيزين يشتروا له كمنجة كنت اوديهم محل ف ىشارع محمد على واختار لهم كمنجة حلوة والمحل ادانى هدية عصاية مايستور اصلية (بقا عندى اتنين فاخرتين اصليتين ) ود ىللعلم مش يتتباع دى الواحد بياخدها كتقدير زى الدكتوراه الفخرية ودى المحل جابها لى من المانيا مخصوص تقديرا انى جبت له زباين كتير شوفوا كل الكلام ده على لحن سهل بكرةحاجيب لكم لو تحبوا لحن صعب دوخنى حوالين نفسى يومين

[salhi_haithem]

صباح الفل استاذ عادل شكرا لما تقدمه لنا من نوتات جميلة و نحن في انتظار اللحن الصعب

[عادل صموئيل]

احبائى الناهردة جايب لكم نوتة صغيرة جدا لكن خلتنى الف حوالين نفسى يومين مش عارف ادونها .. كان فيها حاجة زى طلسم .. ونبدأ القصة .. صديقةعراقية مقيمة ف امريكا من زمان ومسيحية من طائفة الكلدانيين وهى احد الطوائف المسيحية الشهيرة فى العراق ولهم حتى لغتهم الخاصة زى ما الكل بيطلب منى هى طلبت ادون لها ترنيمة كلدانية .. طبعا قلت لها نزلى المف الصوتى .. عشان تفهم كلامى .. الاول افتح اى نوت من تدوينى وشوف الدليل واول مازورة والميزان .. انا كمدون محترف .. وخبير طبعا اول ما بسمع جملة واحدة من اى موسيقى بحدد مقامها ايه يعنى الدليل واتوماتيكا ايدى بتمشى مع اشارات المزان بقول دى ميزان 2/4 او 3 / 4 او 4/4 ده الطبيعى وبعدين برجع من الاول واسمع اول مازورة .. هنا فيه خطوة خطيرة جدا البيتش او التون يعنى انا بحدد المقام من رى مثلا بالخبرة .. بس لازم اتأكد .. عدى برنامج اسمه بيانو عبارة عن بيانو بفتحه واحس اول حرف هو زى ماتوقعت ولا لأ .. فى كل اغانى ام كلثوم بيبقى طبقة صغيرة يعنى بتنزل تون يعنى النوتة الل انا بكتبها من دو اصلا انت لو مشيت معاها آلة حتلاقيها من سى بيمول وعشان بيبقى صعب التدوين من سى بيمول العرف ال كان ماشى فى السوق انى بدخل الاغنيةعلى برنامج بيرفع التون الى دو عشان التدوين يبقى سهل وبنكتب فوقها طبقة صغيرة .. كل الدنيا بتعمل كده لكن امتى بنكتب النوتة من سلم سى بيمول لما يكون ده الطبيعى بتاعها مش انها تكون نازلة تون .. كمان ساعات لما الاغنية بتتنقل من حهاز تسجيل لآخر احيانا بيبقى فيه فرق سرعات وانا الاقى الاغنية ناقصة نصف تون ,, وهنا استحالة تتدون يعنى حاتطلع سلم فيه 5 دييز ماحدش حايعرف يعزفها يعنى فى السوق الطبيعى تكتب لحد 3 دييز ولحد 4 بيمول بس تحاول تتفادى ان ال 3 دييز ما يبقاش طول اللحن يعنى لو الملحن عمل جملة كده ولا حاجة .. لأن اهم حاجة ماتصعبش النوتة على العازفين .. طيب .. دلقوت فهمتوا ايه ؟ انى حددت الميزان .. وحددت المقام واتعرفت على التون اللى حدون منه نوتة سهلة وان كان التون فيه مشكلة زى ما قلنا عندى برنامج بنزل منه الاغنية اى تون او ارفعها اى تون يريحنى فى التدوين ويخلى النوتة سهلة يعنى نفس النوتة ممكن تكون واحد بيمول وممكن تبقى 6 بيمول مثلا .. بعد كده ... انا طبيعتى ايه .. طبيعة موهبتى او عيوبها ان اى شخص لما يحب ينام يقولوا له شغل موسيقى خفيفة ونام عليها انا العكس لو انا حنام وابتديت انام وسمعت اى موسيقى من اى نوع بفوق لأن الموسيقى على الفور عندى بتتحول لصولفيج فاهمين قصدى ؟ يعنى لما بقول لك افتح اى نوتة وانظر فيها انا بسمعها كده .. لذلك انا بنام فى غرفة بعيدة فيها صمت القبور لو حد مشغل تليفزيون فى اى غرفة وصوته بيوصلنى وفيه موسيقى خلاص النوم انتهى .. كل ده بحكى لك بشتغل ازاى .. يبقى اى نوتة عشان ادونها بفتح برنامج التدوين وبشغل الاغنية او الموسيقى على برنامج اسمه كول ايديت بتميز ان بقف على كل جزء صغير فى اللحن وكل جزء ادونه بقف على الجزء الل بعده يعنى بدون البرنامج ده اتوه يعنى فيه برامج مش بالدقة دى برجع من اول الجملة فيه جمل صعبة على ما اوصل للجزء ال انا عايزه اكون نسيته بالذات لأن اغانى كتيراول مرة اسمعها ... ( يهمنى اوى لو الكلام تاه منك ارجوك ارجع من اول المقال اقراه تانى عشان تفهم اللى جاى ده درس يهم الجميع ) قلنا بسمع وبتتكون الجملة وبدونها .. جيت عند الترنيمة دى واسمها
هيو عزيزا

سمعت الاول الموسيقى الميزان مش واضح .. رجعت كذا مرة الميزان مش واضح .. يعنى خلاص كده انا مش ملزم اتعب نفسى اكتر من كده وقلت للأحت دى بتتعزف سماعى ما ينفعش تتدون .. بس انا طبيعتى مش بستسلم بسهولة .. شغلتها تانى يوم ونفس الموضوع مش عارف الميزان انتم الاول اسمعوا الترنيمة قبل ماتنظروا للنوتة عشان تحتاروا مثل ما حصل لى .. وتركتها لحد يوم عشرين فيراير الساعة الواحدة مساء .. عندى شركة النت حرامية كل شهر يسرقوا يوم يعنى بيقطعوا النت قبل التاريخ بيوم يعنى كان الشهر بتاعى بيبدأ يوم 3 قعد يتراجع لحد ما بقا يبدأ يوم 20 المهم جم الساعة الواحدة مساء ويوم 20 بدأ قطعوا النت .. انا النت بيمثل بالنسبة لى حاجة مهمة جدا جدا يعنى بدخل الفيس ييجى 50 مرة ف اليوم ناس بترد على مواضيع وناس بتسألنى عشرات الاسئلة بحس ان مخى بيشتغل ومع ان عندى 100 حاجة تسلينى للصبح على ما انزل ادفع الاشتراك بس احب اتحبس بمزاجى مش حد يقفل عليا .. يمكن ربنا اراد رحت فاتح الترنيمة المشكلة دى يا انا يا انتى الناهردة ... انا راجل طبيعتى بحب اصلح كل حاجة فى بيتى بنفسى يعنى بهدوء كده مشيت شوية فيه مقدمة موسيقية وبعدين فيه غناء كورالى الترنيمة نفسها قعدت اسمعها كذا مرة .. يعنى تركت المقدمة ومسكت فى الترنيمة بعد ما سمعتها كذا مرة اكتشفت انها جملة لحنية وبتتعاد بكلام مختلف .. وهنا ابتدينا الشغل الجد موضوع انها جملة واحدة ده شجعنى يعنى لو كانت جمل كتير كنت ح اخاف منها .. ركزت فى الجملة اكتشفت انها ميزان 5/4 واولها سكتة كروش واعدتها كذا مرة تأكدت انى صح ورجعت للمقدمة . بخبرتى لازم اعرف الظروف طبعا .. واضح انها ترنيمة قديمة يعنى ممكن يرجع تاريخها لمش اقل من 1500 سنة .. عشان جملة واحدة وبتتكرر .. ( ماهو انا برضه خبير فى الترانيم ) ابتديت فى التدقيق فى المقدمة بعد ما خلاص فكيت الطلسم طبعا مش ممكن حاتخرج عن ميزان 5/4 عشان تتجانس مع الغنا اولا وثانيا لو عمل ميزان مختلف حايخلى اللى بيرنموا حايغلطوا حايشتتهم يعنى .. حلو كده ..دققت اكتر .. هو اعادة توزيع للترنيمة فى تسجيل حديث بس اللى عاملها جب يتفزلك شوية عشان دى بتتعمل على شرايط كاست بتتباع بفلوس وهو بياخد اجر على التنفذ ده ف لازم يتفزلك يحليها شوية يعنى بس فى الفزلكة دى عمل الإيقاع 2 دوم ورا بعض ده الى خلانى ما افهمش الميزان شفتم اللفة وصلت لحد فين .. بس انا طبعا حسيت بفخر يعنى ان لما تنظروا للنوتة وشوفوا سهلة اد ايه لكن واحد حط فيها عفريت عشان يخلينى اتوه .. وهنا عايز اقول لكم اكتشاف خطير جدا جدا ينفع موضوع رسالة دكتوراه كل وقت من الزمان فى التاريخ كان يبقى له الموسيقى بتاعته يعنى طريقة الغناء والمقامات اللى وصلوا لها ونوعية الالات بحيث انك لو اخدت اى اغنية من اى عصر حتلاقيها بتحكى كل شىء عن موسيقى العصر ده .. وبالطبع الل بيلحنوا الاغانى الدينية او الترانيم بيعملوها زى موسيقى العصر .. اللى مافهمش اشرج له وانا فى الفرقة الماسية طريقةالموسيقى فى السبعينات ونوعية الالات لما كان حد بيمعل اغنية دينية كان بيعمل زى الموجود وفى الخمسينات كان بيمعل زى الموجود يعنى فى الخمسينات ماكنتش حتلاقى فى الاغنية الدينية مثلا اورج لكن حتلاقيها فى اغنية السبعينات .... بس ناقص تكة صغيرة لكن فارقة ... انا من هواة التنقيب ف التاريخ ... زمان كان عجلةالتطور بطيئة جدا جدا .. يعنى لو واحد عمل حاجة كان بيفضلوا مثلا 1000 سنة لحد ما ييجى الاختراع التالى بعكس الجنون الل حصل من سنة 1950 الى دلقوتى فاهمين قصدى؟ يعنى زمان واحد اخترع العربة اللى تجرها الدواب قعدت 1000 سنة لحد ما بعد كده واحد اخترع السوستة اللى بتركب عليها العجلة عشان تبقى مريحة فى الركوب وده بينطبق طبعا على كل شىء ومن ضمنهم الموسيقى .. يعنى انا ارجح ان الترنيمة الكلدانية العراقية دى عمرها لايقل عن 1500 سنة يبقى العراق وقتها كانت الاغانى فيه كده او دى طريقة التلحين وقتها كده .. عندنا فى مصر لما تسمع بالذات القداس بتاع الكنيسة الارثوذكسية بالذات اللى بيتقال باللغة القبطية القديمة هذا القداس بيتقال بنفس الاداء ونفس الطريقة ونفس المقام البياتى مش اقل من 1800 سنة .. وبيتناقلوه يعنى لو تلاحظ فى كل كنيسة وسط الشمامسة فيه اطفال دى ظاهرة لازم طبعا كنت اخد بالى منها ده مش ابن الشماس والواد شبط ف ابوه وراح معاه .. ده موضوع اهم من كده بكتير . انهم بيحطوا الاطفال وسطهم يحفطوا القداس عشان لما يكبروا يبقوا هم الشمامسة ويكون الكبار انتقلوا .. وده بيدى استمرار للطقوس وده اللى خلا القداس بألحانة مستمرة ما اندثرتش من 2000 سنة ..لأن وقتها طبعا مافيش تسجيل ولا تدوين ولا اى طريقة غيركده نوصل لحاجة خطيرة .. زى ما قلت كان اى تطور بيفضل مش اقل من 1000 سنة ... يبقى لو المسيحية دخلت مصر من 2000 سنة وحبوا يعملوا ترانيم او تنغيم اكيد حايبقى زى السائد فى مصر وقتها ... والى برضه منقول عن الفراعنة وما اتغيرش كتير لأن كل حاجة بتؤكد ان التطور كان بطىء يعنى لو رجعت من التوقيت ده كمان 2000 سنة لورا يعنى 4000 سنة من دلوقت التطور كان بطىء جدا جدا يعنى انا اجزم بأن القداس زى مشابه للموسيقى الفرعونية فى المقامات وطريقة الغناء قول على الاقل بنسبة 80% وللعلم اللى بقوله ده مش حصة دين ده درس موسيقى ... يعنى انت لو سمعت القداس ده شبه الى كان محمد عبد الوهاب وام كلثوم بتوع الفراعنة زمان بيغنوه قد يفرق قشور لكن فى المجمل واحد .. اما كلمةمحمد عبد الوهاب بتاع الفراعنة ده مصطلح عندنا فى مصر يعنى بنقوله على النجوم يعنى زمان قابلنا ممثل ايطالى مشهور بادوار الضرب زى فريد شوقى ماكان بيعمل زمان فقلنا ده فريد شوقى بتاع ايطاليا يعنى مرة رحنا المغرب كان هناك مطرب كبيراسمه عبد الوهاب الدوكالى ده بيعتبر عبد الوهاب بتاع المغرب يعنى فهمتوا قصدى ؟ مع اطيب تحياتى

الملف الصوتى : https://www.youtube.com/watch?v=LJb6kwzKWqo