إبداعات الشاعر طارق العمرى ، بدون تعليقات

[Tarek Elemary]

نعم يا مارس الأخضر ....... نعم يا مارس المزهر
نعم يا سيد الأشهر ....... نعم أهواك بل أكثر
لأنه فيك ولد الحب ....... ولد الملهم الأكبر
نعم فى ظلك الوارف ....... أتانى الحبُ يتبختر
و يتمايل بأغصانٍ ....... كخد الورد أو أنضر
نعم يا سيد الأشهر ....... نعم أهواك بل أكثر
*******
نعم أهواك يا مارس
و أهوى كل أيامك ....... و لكن ليس كالخامس
فأيامك كحاشيةٍ ....... و خامسهم على هاماتهم جالس
كأن القمر فى ليلاتك هلالاً ....... و لا يكتملُ إلا ليلة الخامس
لأنه فيك يشجينى و يسكرنى ....... بلحنٍ حالمٍ هامس
فهو من جاء بالآمالِ ضاحكةً ....... و قبله كنت كاليائس
لذا أهواك يا مارس ....... و أهوى كل أيامك
و لكن ليس كالخامس
*******
لأنه جاء بعذب الأمانى ... و زهر الربيع و حلو الأغانى
و سحر العيونِ ليخلب لُبى ... و رجفة حبٍ تهز كيانى
لأنه جاء كثيف الظلالِ ... سَخِىُّ اليمين و قِطْفُه دانى
لأنه جاء رسول غرامِ ... أنهى البعاد أحَلَّ التدانى
مارس .. مارس .. إنى أحبك
تذهب كل شهور العامِ و تبقى أنت ... كفانى .. كفانى

كبريت البحارة : 29/11/1990

____________


عيد ميلاد زوجتى 5 مارس و لا أحد يسأل سنة كم؟
خليكو شيك______

[Tarek Elemary]

عذِّبِتنى الطِيبة فيكى

و ابتسامتك لما بتقابلى الجميع فاتحة إيديكى

و الحنان و الصبر و القلب الكبير

مابينفعوش يامَّايه أبداً صدقينى

و حياة ولادك .. اللى بين كل البلاد متبعترين

ارفعى بالسيف اديكى و هددى

ما تنددى

إوعى تفتكرى ان صبرك يوم يفيد ... لأ .. هددى

و اعزفى ألحان زمان و رددى

و إوعى يوم تترددى

هِزى عرش الظلم يالله ... إهدِميه

و ابنى صرحك من جديد و جددى

*****

ما تكتميش يامَّاية غيظِك فى الحشا

و ماتُصبريش

ما تفَجَرِيش غيظِك نبات يخضَّر عوده

ماتسكتيش

عايزين نموت من كتر جُوعْنا

ماتخافيش

عايزين نموت علشان نعيش

أنا عارف انك فاهمه قصدى

ماتنكريش

سبب الحياة مش بس ميَّة و حَشْوْ عيش

لأ .. ده إنتحار

و عذاب و نار

سبب الحياة .. كلمة قوية فى وِشْ ظالم

مِشْ حَنُون

كلمة تِجمع ألف إِيد

علشان شموعنا يوم تِقِيد

و تحرق الِّلى بألف وِشْ .. و ألف لون

يامَّاية طعم الأكل مُرْ

الجوع واحشنى

عايز أعيش جعان و حُرْ

قولى يامَّه أيه حايشنى

*****

قومى مَرَّة

دى الحياة من غير قيامك بايخة .. مُرَّة

مالها طعم و مالها لون

قومى قولى لكل جبار فوق ترابك

إِخْتِشِى

قومى صُدِّى الريح و عِيِشى بَرَّه سجنك

وانتِشى

دخَّلى فى السجن بَدَلِك كل ظالم

كل خاين مُرْتَشى

و قومى مَرَّة

دى الحياة من غير قِيَامك بايخة ... مُرَّة

*****

ارفعى عَلَمِك يِرَفْرَف فوق هامات المخلصين

و ضُمِّى فى حضنك ولادك

الغلابة المشتاقين

و اللى عِشْقُوا لاجْلْ خاطرك و ف هواكى

رمال و طين

ضُمِّى أطفالك بحب

يِخَضَّرُولِك أحلى بُكْرَة

و ارفعى جبينك بِعِزَّة

و شِيِلِى تَعْصِيبْةِ العِنين

و شِيِلِى تَعْصِيبْةِ العِنين

[Tarek Elemary]

الدكتور مابقاش بِيْطَبَّبْ
بقى فينا عَيْشُة بِيْقَلِّبْ
و احنا بقينا لِيْه سبوبة
و لا فارقة معاه مين يتعذَّبْ
***
بقى قاسى و القسوة مرار
تقولش مقاول أو جزار
و يباصى لتحاليل و أشِّعَة
و عمولته عمولة سمسار
***
يكتبلك أدوية بالزوفة
و عمولته طبعا معروفه
و انت تِكُعْ و مالك حيلة
و العملية بقت مكشوفة
***
ده بقى حال الكل وحالى
و لا هاتخلِّلى رخيص ولا غالى
لو يوم عندك حد إتألِّم
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

على أيَّامنا كان اسمه مُعَلِّم
منه بْنِفْهَمْ و بنتعَلِّم
يُشْخُطْ تِلْقَى الفصل دَه هُسْ
و لا يِقْدَر مَخلُوق يِتْكِلِّم
***
دِلوَقتى بقى أستاذ سيكا
حِصِّته ميلودى أومزِّيكا
أمَّا الشرح ... ياراجل سيبك
مُخْ ولادنا بقى أستيكة
***
التعليم بقى درس و سنتر
إشى مرجع واشى ملزمة أقصر
و الأستاذ بقى برضه مقاول
له تسعيرة إذا كنت هاتقدر
***
و الحصة محسوبة بالفيمتو
أصل الوقت ده يعرف قيمته
عداد والحسَّابة بِتِحْسِب
دَخْلَك كُلُّه لاجل سيادته
***
ده بقى حال الكل وحالى
و لا هاتخلِّلى رخيص ولا غالى
لو عندك حد بِيِتْعَلِّم
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

سوَّاق التاكسى يا جمالُه
الله يِيَسَّر حالنا و حاله
و الشرطى الواقِفْ فى الشارع
أجدع منُّه بِجَدْ خياله
***
تشاور يفتحلك تحقيق
و كأنه له سير و طريق
يختار المشوار بمزاجه
و لابد يآنسَكْ برفيق
***
وان قلت العدَّاد يا أخينا
هايقُولَّك إنزِل هَوِّينا
دانت زبون م العصر الحجرى
آخرَكْ تركَبْ حَنطور نَينَه
***
هايقَاوْلَك من قبل ما تركب
و أمَّا هاتوصل تانى ها تِتْعَب
هَايْجَّرَّس أهلك بفضيحة
أحسن تدفع و إوعَاكْ تِغْضَب
***
إستغلال و بَجَاحَة و فِرْدة
و التاكسى يا زيستافا يا قِرْدَة
اللِّى يِحِب النبى يِدِّيها
زَقَّة هانوصل واحدة بواحدة
***
ده بقى حال الكل وحالى
و لا هاتخلِّلى رخيص ولا غالى
لو عندك مَوْعِد و ضرورى
و الدولة تقولك وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

البيه البواب يا جَمَاعة
يبدأ مظبوط زَىّْ الساعة
همة نشاط إخلاص وتفانى
هادى و طيب غير الطاعة
***
بعد يومين تلاقيه بيطَنَّش
سَمَعُه تِقِيل ونضيف و مِرَوِّش
بَقَى سمسار لِشُقَقْ و مُنادى
على كل الشارع بيكَوَّش
***
تناديله يعمل مش سامع
وان راح المشوار مش راجع
و ان قلت فلوسك تداويه
تبقى صحيح بقى راجل لاسع
***
بقى بلَّاعة وعمره ما يشبع
و لا زوق و لا شدة بقت تنفع
وان كنت من النوع الحامى
يا هاتِتْشَلْ يا إمَّا هاتِبْلَع
***
ده بقى حال الكل وحالى
البوَّاب بقى حلم خيالى
يا تعيش فى مشاكل وتعانى
يا تطنش وتقول وانا مالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

الفاكهة أشكال و ألوان
و أنا مُعْجَب بيها و ولهان
تطلب ايدها من الفكهانى
تسمع منه طقم حنان
***
و يلِفَّك لَفْ الحَلَزُون
جوِّة الكيس سِر و مدفون
ترجع بيتك نافخ ريشك
جايب فى البرازيل مية جون
***
تِفْتَحْ كِيسَكْ تِلْقَى عَفَانَة
الفاكهةكُلَّهَا تَلْفَانَة
شَكْلَكْ يِبْقَى بْجَدْ يَزَعَّل
عَنْد الحُرْ دى تِبْقَى إهانة
***
و تْرُوحْلُه يِزَعَّقْ و يْبَوَّقْ
يُشْخُطْ و يْقُولَّك ما تْرَوَّق
أنا عَبَّيت قُدَّامك حاجتك
من وِشْ القَفَصْ المِتزَوَّقْ

***
ده بقى حال الكل وحالى
مش قادر أنسى اللى جرالى
الفكهانى خدعنى و فاتنى
نادم على تَغْفِيلى ليالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

هذه خاطرة بين الشعر و النثر و بينى وبين نفسى كنت لا أعرضها ولكن ما تغلاش عليكم بشرط عدم معاملتها على أنها من أىٍ من قوالب الإبداع إعتبروها فضفضة ... مش احنا أصحاب برضه؟

*****
مش بحبك لأ
أصل كلمة حب أصغر من شعورى
و انتِ ساكنة بين عروقى و انتِ قاعدة جوة قلبى مربعة
و الضحكة فى الوش المنوَّر زَىّْ بدر مزهزهة فوق الشفايف
و انتِ ساكنة الليل بدور
و انتِ مالية الفجر نور
و اللى بينى و بين عيونك مش غرام و لا حب من حب البشر
أصل انتِ مش بشر
إنتِ جايبة من الملايكة القلب و النور و الصفا
وإنتِ أسطورة ف حياتى زَىّْ عرسان البحور
حضنك دَفَا
إنتِ يا ضحكة نسيم الفجر فوق ورق الشجر
إنتِ يا موجة حنان تغسل شطوطى بحبها و تحضن رمالى
إنت يا بسمة حياتى و ضحكة فى عمر القدر
*****
اللى بينى و بين عيونك ما يساعيهش الكون كتابة لَمَّا أقول
علشان كده أنا مش بحبك
أصل كلمة حب عاجزة ... عاجزة توصف للعقول
و البشر ... كل البشر ما ألِّفوش كلمة تعبَّر عن شعورى
معذورين ... علشان بشر .. عشقوا بشر
و إنتِ أبداً مش بشر
لو شافوكى زَىِّ ما شايفاكى عينى
كات عيونهم تشكر المولى اللى خالقك
و اللى نَزِّل واحدة من حور الجنان أرض البشر
كانوا قالوا زَىِّ ما باقول من زمان
ان شمس الدنيا بِترَوَّح و تبكى كل ليلة
كل ليلة من بعد الغروب غيرانة منك .. من جمالك
و البُكى يفضل مع نور الصباح حبات ندى فوق الغصون فوق الورق
كانوا قالوا إن زّيِّك ماإتخلَقْش اثنين
وإن ضِحكِك كان مطر فوق الصحارى خَضَّرِت و بَقِتْ واحات
و إن هَمسِك لحن أجمل من غناوى الطير على شجر الربيع
*****
حب البشر فيه هجر و أسيَّة و عذاب
و فيه غرض و فيه حلاوة
حب البشر فيه قلب بيْدُق و أيادى بِتِرْتِعِش و فيه قساوة
بس إحنا مش زَىِّ البشر و لا حبنا زَىِّ البشر
لَمَّا نتقابل نحس ان إحنا من ألفين سنة متفرقين
وأما نتفارق نحِس ان احنا مش متفرقين
كل واحد فينا ساكن جوة قلب التانى ومضلل عليه
فى العينين صورة و فى الودنين كلام
و حلم أجمل م الخيال فى عقلنا
لافى حِقد و لا خَطِيئة و لا نِفاق
لافى غيرة و لا دلال فيه إشتياق
علشان كدة أنا نفسى أألف ألف كلمة فى كلمة واحدة
كلمة توصف حبى و شعورى و أحاسيسى الجميلة
اللى مش زَىِّ البشر
أصل كلمة حب أصغر من شعورى اللى غلغل و إنتشر
*****
أنا شايفك من بعيد فدادين ورود مِتلَوِنة فَرْح ونعيم
وانا حاسس بيكى نسمة صيف طرية فوق عيونى و طيف كريم
و أنا فارشك ع الربيع خضرة و زهور و أحلى نشوة فى دنيتى
و أنا سامعك ضحك طفل و لحن أنعم من جناحات الفراش
بس و حياة اللى خالقك آية لعباده البشر
كل شعر الدنيا مش قادر يعبر عن شعورى وعن هوايا
و اللى بينى وبين عيونك حاجة تتحس بقلوب العاشقين
حاجة تفضل جوة مابين الضلوع شوق وإشتياق و هوى وحنين
مهما مَرْ العمر بينا و مهما راح الليل و جَه بَدَلُه النهار
مليون نهار ...برضه حاسس بالحنين
مهما كنتى بين ضلوعى ... و مهما داب عودك حنان بين الإيدين
أنا مش بحبك ... لأ دا كلمة حب دى لاجل البشر
كلمة أصغر من شعورى اللى غلغل و إنتشر

[Tarek Elemary]

بَاشَا ما يِعرف عُمره بشاشة
كل الخَلْق أذاه تِتْحَاشَى
يمشى تقولش طاووس يتعاجب
مع انه ابن الأسطى عماشة
***
كل الناس فى عيونه لِمَامة
و لا عادشى مَرُوءَة و لا شَهَامة
يِعْمِل ع المساكين فَرعون
و المَسْنود يِبْقالُه نَعَامة
***
ظَالِم حَالِم يِوْصَل فوق
على رَقَبِة أَيُّها مَخلُوق
نِدْعِى المَوْلى يُلطًفْ بِينَا
فى ظِلِّ قانونَّا المخروق
***
لَوْ شُفنَا بِعْنِينَا الواقْعَة
حادثَة خناقة حَرِيقَة ووالْعَة
بِنْبَلَّغ بالإسم الوهمى
خَايفِين مِن مِرْوَاح بِلا رَجعة
***
ده بقى حال الكل وحالى
الكُل يقولَّك وانا مالى
خايفين من بشوات الشرطة
أصحاب سطوة يا بوى و معالى
***
آدى صاحب مهنة يا اخوانَّا
إحنا إتهانَّا وهوه إتهنَّى
يبقى كلامنا صحيح وحقيقى؟
ولاَّ الكل عليه إتجِنَّى؟!!

[Tarek Elemary]

تُهْتْ فيكى رَغْم إنى إبن ضَرْعِكْ
و انكَوَيت و بَكيت ليالى
وانظَلَمْتْ بْحُكْم شَرْعِكْ
فيكى غُربَة .. رغم إنِّك حُضْن دافى
مَيِّتِكْ عَكْرانة ليه؟
و انتِ نَبْعِك حِلوْ صَافى
رغم دينِك ... رغم عَدلِك
الغِيوم مَالْيَة عِينِيكى .. و الحَرام بِيْشُقْ سَمْعِكْ
لابسَة توب مِشْ قَدْ قَدِّك .. رغم إن العَقل طَبْعِكْ
الضَيَاع سَاكِن دُرُوبِكْ .. و التِرَعْ مَليانة دَمْعِِكْ

و رَغْمْ عِشْقِى تُهْتْ فيكى .. رَغْم إنى إبن ضَرْعِكْ
و انكَوَيت و بَكيت ليالى .. وانظَلَمْتْ بْحُكْم شَرْعِكْ

***
العيون الحلوة هاجرِتْ من رِمُوشهَا الإبتِسامَة
و الجِفُون مَرْسُومة فيها سِكَة سَكْنَاها النَدامةْ
و الخُدُود الوردى رَوَّتهَا الدُموع المُرَّة يَامَه
لَيه بِعِدْتِى .. لَيهْ هَجَرْتى سِكِّة النور و السلامة
كُنْتِ زَهْرِةْ كُلْ وادى و كنتِ بَدرْ اللَّيل و نُورُه
وكُنْتِ كِلمِة حَقْ سيفِك يُطرُد الظُلم لجُحُوره
كُنْتِ عربية أبِيَّة كُنْتِ رَمْزْ للشَهَامة
النِهاردة فْ عِزْ شَمسِك ... ساكنة فى سماكى الغَيَامة
تِحْجِب النور عن عِنيكى تْكَدَّرِك
يِبْقى جَهْلِك رَغْم عِلْمِك فوق جِبِينِك لَيْه علامة؟
لَيْهْ يِبْقَى ليلك فى النَهَار عَ الوِشْ شَامَة؟
***
الضياع خَلَّانى ألفلِفْ كل دارِك دَرْب دَرْبْ
كل وادى .. كل مينا .. كل حارة شرق غرب
و العَرَقْ وَيَّا الدُموع فوق الخَطَاوى نازلة صَبْ
إنجَرَحْ قِلبى الحِنَيِّن اللِّى غير حُضنِك ما حَبْ
حَسْ بالخوف بين رُبُوعِك
إنطَفَتْ فى إيديه شَموعِك
إتْمَلَى كاس الهَوَان وِالقَلب عَبْ
الأنين و الخوف و ضَعْفِك رِيحُه هَبْ
و الحَريقِ اللى إنطَفَا زَمَنْ الوَفا من تانى شَبْ
فوق دروبك رغم تَوْحِيدِك يا عَابْدَة
ألف مشتاق يبقى رَبْ ... ألف فاهِم إنُّه رَبْ!!!
***
أرضِك الخِصْبَة الحنونة تَصَدَقى .... مزروعة حنضلْ!!
و الزَتُون و القَمْح عَطْشان فى الفَيَافى ... مَرْمِى مُهْمَلْ
كلُّه بِيْقُول نفسى نفسى كله مش فارِقْ معاه كل اللى يِحْصَلْ
فيكى غابة و اللى باقى فيها دايماً بَاعُه أطْوَلْ
كل وِدْيانك دِيَابة ليل نَهَار عَمَّالة تِعْوِى
و الضمير الحَىّْ فيكى إتْرَمَى فى الجُبْ يِهْوِى
بَسْ أنا مُشْ قَادْر أفُوتِكْ رَغْم إنِ البُعْدْ أسْهَلْ
رغم إنى تُهْتْ فيكى ... مهما ليل تَوَهَانِى طال
حاسِسْ إنْ الصَبْرْ أطْوَلْ ... عَارِفْ إنْ الصَبْر أجْمَلْ
وحالف إنى مِشْ هَافُوتِك ... رَغْم إنْ البُعْدْ أسْهَلْ!!