إبداعات الشاعر طارق العمرى ، بدون تعليقات

[Tarek Elemary]

أنا كنت داخل هنا و هدفى كان غنوة

لقيتكوا صحبة زهور متنسقة و حلوة

ياسمين و فل و ورود و كلهم حلوين

فاتحين قلوبكم سكن دخلت على سهوة

====

أبوزهدة فرد الجناح رائد فتح بابه

سمعجى فاتنا وراح د أنس جابه

ناهد يا بلسم و طيف بلقيس بتنادى

يرد سعد بنشيد و كوراله أصحابه

====

لما الآلاتى عزف أبودينا قام غنى

سرحت عيون المها رسمت عفاف جنة

إسلام مع الماردة شاوروا على غازى

كشك الجميل م الشوق ماقدرش يستنى

====

من أرض طه النبى جه المصطفى فارس

علاء يس بالحراب واقف عليه حارس

أبوقدرى شايل كتب موهوب و متربى

مندور ونعم الرجال ماهو للعلوم دارس

====

ثروت و من غير لقب هوه اللقب زينه

هوه اللى زان اللقب شايلينه فى عنينا

محمود كمان دكتور قنديل و مشعل نور

قالوا نسيت الزمنطر قلت الختام لينا

====

يوسف يا مسك وعود واحشانى أعمالك

روح هات ف إيدك منال و لفها بشالك

و فوت على الملغوم وإسأل عليه ماله

دا كان طريقه نغم على القلوب سالك

====

عصفور و طاير و حاير و فى القلوب عشه

أبو طل بدر وطل ما أحلى إبتسام وشه

عم السويفى ياناس بلبل جميل صداح

و من السودان حمدى لاح سلامونى بيناغشه

====

يحى و آل عامر و المعجونين بالشوق

عادل و منعم و رايا أصل الأدب و الذوق

هامو و فؤش أبوزهرة و الأسدى عم الجميع

و كل أهل السماعى من غير ما اسيب مخلوق

[Tarek Elemary]

أنا العاشق ها هنا

[Tarek Elemary]

مصر بتعيش أحلى حالة،
مصر بيئة لسة صالحة للقوالة
برغم خناقات الأحبة
مصر للنور مُشْرَأِبة
و اللى مش عاوز يغور
يبتعِد أو يستخَبَّى
برغم أفكار الجهالة
و الميول و الإستمالة
مصر بتعيش أحلى حالة

... بنختلف علشان عيونها
نفسنا ف واحد يصونها
يبقى قد المرحلة
دى الآمال مترحلة
مش هانرضى بأى واحد
مش هانقبل مين يخونها

اللى إحنا فيه ده، إندفع فى سبيله دم
ياما ناس إتحملت إزلال و هَمْ
و إنتفض شعبى الأبى .. شعبى الأشَمْ
إتنفست كل الشوارع و الحارات
إتزينت كل البنات
إتحررت كلمة بحبك يا بلدنا
من السكات
إترحمت أم الشهيد على نور عنيها
و هان عليها، و قالت إن الناس أهَمْ

مصر بتعيش أحلى حالة
مصر طلعت للوسع
من بعد حبستها الطويلة
ف أوضة مالهاش حتى صالة
جاية تسكر بالبراح و لا تختشى
و هاتنتشى حتى الثمالة
مصر بتعيش أحلى حالة

[Tarek Elemary]

إفتحى الشباك و بصى ع الشجر و الطير و غنى للحياة،
إروى شجر الشوق و خلى العشق يوصل منتهاه،
عمرنا أيام قليلة، و مالنا حيلة ف قلبنا،
لما بيدق بهوى، يبقى الدوا نمشى وراه
إفتحى الشباك و شوفى الشمس بتغنى لنا
حتى موج البحر بيدندن و يحضن رمل شطه
و يغسله من حزن ليله اللى سهر يملاه دموع
و المراكب كلها لنسيم هوانا إتحركت فردت قلوع
ياللا بينا نعيش معاها عمرنا على جزيرة لوحدنا
رحلة العشق إبتدت و ما فيش رجوع
... إفتحى الشباك و شوفى قلبى واقف يبتسم
على ناصية البيت اللى جنبك منتظر
كف إيدك يرمى وردة ف ليلة قايدة بالشموع
إرمى حزنك و إهربى من سجن غيرك
إنشرى ع الكون عبيرك
قلبى قلبك روحى روحك
حتى طيرى هوه طيرك
دانتى لو تتنهدى باسمع صدى جوه الضلوع

[Tarek Elemary]

قُربِى مِنك،
ده النعيم اللى حِلِم بيه قلبى من يوم التلاقى،
و الكلام عاجز يعبَّر عن حنينى و إشتياقى،
أعمل أيه ؟
أعمل أيه و أنا عينى شايفاكى
و قلبى بينحرق،
و إنتى جاية تقولى لازم نفترق
هوه أنا قربت منك؟!
هوه ده صح اللى باقى!!
فكرى قبل القرار، قلبى مَلْ الإنتظار
و البعاد مش راح يحل المشكلة،
ده إن كان صحيح فيه مشكلة؟
يا حبيبتى ...
هاتى هِمِّك و يَّا هَمِّى، نقسم الأحزان سوا،
... مين هايشعر بيكى غيرى،
عندى أنا بس الدوا
النيران ما يحس بيها زى جلد اللى إكتوى
و الفرح هانقسِّمه و إن خلص راح نرسمه
بابتسامة فوق وشوشنا، بنظرة مليانة هوى
إمسحى الأحزان بكفى
عشقى ليكى راح يكفى
نعاند العمر المعاند
نهزمه و ننسى التَشَفى

[Tarek Elemary]

لما شوفتِك ... الكلام عندى إختلفْ
و الحروف بدأت تعانى
إتلخبطت فيها المعانى
و الدقايق و الثوانى، وِقفوا صَفْ
و الحروف على كُترها
فقدت جمالها و سِحرها
مابقيتش راضى بأى حَرفْ
طب أيه وظيفة الكلام
بعد التحية و السلام
غير إنه يبقى رسول
...بيحمل ليكى وصف
و لو هايعجز؟
يبقى يهرب من كسوفه
يختفى مش عايز أشوفه
هاخترع بدال حروفه
ألف حرف

لما لاح المُنتهى
و حورية طلَّت و إنتهى
كل اللى فيها يُشتَهى
خطفتنى من بين البشر
لو كان بإيدى خطفتها
غلِّفتها، بَروزتَها،
ما بين رموش العين
يا عين سكَّنتها

بس أنا بَختى قليل
و الكلام عاجز بخيل
القمر سكن الأصيل
و الضحى بقى عِز ليل
حرفى مش لاقى المعانى
و الهوى عايز دليل

بيكى هاتهَجى الحروف
بيكى هانسى أى خوف
و المعانى بالألووف
راح تتولد من فوق لسانى
لمَّا تتخطى الكسوف
بكرة تتأكد عيونك
بكرة قلبك راح يشوف

[Tarek Elemary]

لسة صوتك
لما ودنى بتسمعه بتتهز ليه،
أيوة لسة باعشقة و باحِن ليه،
مِش بخاطرى أعمل أيه،
رغم إنى عارف إن طريقى أصعب،
حتى يمكن مستحيل،
بس صوتك لسة ودنى بتشتهيه
خطوتك، صوت مشيتك،
كعب رجلك ع البُساط،
حاجة بتخلينى آخر إنبساط
بابقى بينى و بينى حالف إنى أتوب،
مستحيل يفضل هوايا من الذنوب،
و ألقى روحى إتلهفت لعبير مرورك،
و أبقى نفسى أبعت عيونى
يادوب تزورك،
تستحمى من جمالك،
تغتسل من نهر نورك،
أعمل أيه؟
الهوى اللى عشت عُمرى أعرفه
يطلع خيال
و الهوى اللى سكن ف روحى
صحَّى آهاتى و جروحى
يبقى ليه صعب المنال؟
يعنى هافضل عمرى كله
بدون إجابة على السؤال!
و إن هزمت المستحيل، يطلع محال
قلبى بيدق بخطاكى بيعشقك
بقى حالى حال

[Tarek Elemary]

لسة صوتك

لما ودنى بتسمعه بتتهز ليه،

أيوة لسة باعشقة و باحِن ليه،

مِش بخاطرى أعمل أيه،

رغم إنى عارف إن طريقى صعب،

وحتى يمكن مستحيل،

بس صوتك لسة ودنى بتشتهيه

خطوتك، صوت مشيتك،

كعب رجلك ع البُساط،

حاجة بتخلينى آخر إنبساط

بابقى بينى و بينى حالف إنى أتوب،

مستحيل يفضل هوايا

كأنه ذنب من الذنوب،

و ألقى روحى إتلهفت لعبير مرورك،

و أبقى نفسى أبعت عيونى

يادوب تزورك،

تستحمى من جمالك،

تغتسل من نهر نورك،

أعمل أيه؟

الهوى اللى عشت عُمرى أعرفه

يطلع خيال

و الهوى اللى سكن ف روحى

صحَّى آهاتى و جروحى

ألتقيه صعب المنال؟

يعنى هافضل عمرى كله

بدون إجابة على السؤال!

و إن فرضنا ف يوم هزمت المستحيل،

يطلع محال

قلبى بيدق بخطاكى بيعشقك

بقى حالى حال

ياما قررت إنى أطوى صفحتك

و أمشى ف طريقى

و أقول لنفسى

ياما قالوا إن الزمن أكبر مداوى

و ألقى قلبى طرح سؤال

قد أيه حبك يساوى؟

و أسهر ليالى أكلم الليل و الشجر

و ألقانى غاوى

أرجع أصبر نفسى مرات بالأمل

أو بالنعيم المحتمل

أولمسة الإيد اللى للأحزان تداوى

و القى صوتك شدنى

و كأنه حاوى

[Tarek Elemary]

أنا باشعر بلذة فى الكلام ليكى،

و باحكى بدون حساب و حدود

و لا بيشغلنى ترتيب الكلام أبدأً

و لا الألفاظ

و لا مستنى حتى ردود،

و لا طمعان فى شئ ملموس

و لا محسوس و لا فِى وعود،

أنا بالقانى وياكى

و باعرفنى إذا طل الأمان منى

و غلِّف بالحنان روحى

و سالت منى كلماتى بدون حسبان

و ألفاظى بلا بروتوكول

و فن القول

تعبر عن صريح مكنونى و جنونى

و أحلامى و أوهامى

و أنا فعلاً معاكى باكون،

و بانسى حتى كل الكون ... أنا مجنون.

صحيح أصل الكلام .... تعبير،

و له تأثير

و تزويقه و تنميقه و تشويقه

يأثَّر فى الحقيقة كتير،

لكن عندى الكلام حالة،

و مكنة عرض شغالة،

و فيلم بيحكى من جوة

لكن أبداً ما هوش آلة

و لا فيها زرار يبدأ، و لا يطفى

دى نبتة فى قلبى مزروعة ولها أوراق،

بتفرح لو مزاجى راق

و أزهارها تفتح فى اللُقا دايما

و تدبل لما أقول يا فراق

و لما بالنسيم بتميل

بتبعت فى الهوى أشواق

كلامى معاكى خلانى

ألاقى نفسى من تانى

و ريحنى و مرجحنى

و قربنى و جابنى لمَّا وَدَّانى،

و يمكن يبقى ده إستعجال

أو إستهبال

بإنى أصنَّفه بكلمة

و صوت العقل بيقوللى

و أيه هايغيَّر التصنيف؟

أنا مبسوط و ده كافى

و إنتى أمانة ما تخافى

أنا إنسان

ما ابيعش ف مرة أخلاقى

فى قربى زى فى فراقى

أمين و العهد أنا صاينه

يموت الحب ده ممكن

و يفضل عهدنا باقى

[Tarek Elemary]

سيدتى ...

رِسْلُكِ سيدتى

فأنا ... ما كنتُ لأختارك

قدرك أو قدرى لا أدرى

لكن سؤالى ما الفارق؟

إن جاز الوصف أنا صدفة

أنا إحدى عجائب أقدارك

أنا لا أستاء من الصدفة

أو حتى ألوم على قدرى

دعكِ من سئِ أفكارك

أنا أسعَدُ كائن فى الدنيا

أن أحظى يوماً بلقائك

فأنا فى أعمق أعماقى

أنتظر لقاءك من فترة

كى أعزف لحنى بأوتارك

و أكرر أكثر من مرة

قدرى أو قدرك؟

ما الفارق؟

غموض الحالة يغمرنى

توقيت الصدفة يبهرنى

خوفى من نفسى ينهانى

و يهز كيانى ينهرنى

و أنا لا آبه بكلامى

و كأنى لا أملك أمرى

عجباً ...

وا عجبى .. ما هذا؟

أسطورة مثل الإلياذة

إيزيس تجئ مع القاربِ

بمفاتنِ سحرٍ أخَّاذة

و تمدُ يديها لأشلائى

بحروفِ الحاءِ مع الباءِ

طوقُ الإنقاذِ كما يبدو

يجتثُ الباقى من لائى

فأرانى بهما أتعلق

و أسير بلا أن أتحقق

فأنا أسلمت مقاليدى

و إلى أحضانِك أتَحَرَّق