رد: مصطفى سيد احمد
عمنا الحاج ود عجبنا
كلمات:أحمد الفرجوني
ألحان وغناء:مصطفى سيد أحمد
عمنا الحاج ود عجبنا
في الفريق ياهو الركيزة
هو البشيل حمل الرباعة
وعندو كلمة على الجماعة
في الفريق باقيلنا تايه
وكل طيب ليهو غاية
للضعيف تلقاه ساند
ويقهر الكعب المعاند
وللضيوف ديوانو فاتح
ديل يقوموا .. وديل ينزلو
يا ولد ... جيبو الرتاين
وجيّهُوا الديوان فراشو
وافرشوا الفرشة الكبيرة
والأباريق والتباريق
وأضبحو الحمل المدوعل
عمنا الحاج ود عجبنا
من سنين أيام جهلتو
ديمه في دعوات صلاتو
بسأل المولى السلامة
وسترة الحال والكرامة
عمنا الحاج ود عجبنا
في ليلة من ذات الليالي
في زمن حظر التجول
جاهو ضيف فوق راس حداشر
رحَّب الحاج بيهو جداً
فرشو لوا ونزلوهو
وكاسوا للعشا ما اتلقالو
ما الرغيف ممحوق مِقَصِر
والبلد في حال مِعَسِر
عمنا الحاج في مبادؤو
واجبة الضيف زي فريضة
وهسه ضاقت بي العريضة
ضيفو كيف يترك عشاهو
ومن دي زايد إختشاهو
وجاتو فكرة!!
يمشي للفرن المجاور
ولي لجان العيش يشاور
بس عشا الضيف يا جماعة
ضيفي نازل ليهو ساعة
شاكلوهو ونهّروهو
ودفّروهو
وجاتو دورية الطواري
وأمسا بايت في الحراسة
وناسو جنوا
للصباح ما عرفو حاجة
وين ده روَحْ
وجاهن الخبر المؤكد
ود عجبنا في الحراسة
وماشي محكمة الطواري
ناسو ... أولادو .... وبناتو
عرفوا حالو وبدري فاتو
راحو محكمة الطواري
فيها في نص الخلائق
شافو حالاً ما هو لايق
عمنا الحاج بي جلالو
فوقو حس الصوت مِوَلْوِلْ
فوق قفاهو وفوق زنودو
وفوق رجولو
ومرة فوق فِججا حشايم
أصلو ما قايل بهونن
حتى كان نزلن هجايم
إلا لكن الليالي
يوم بترخص كل غالي
حاكمو الولد المنصّبْ
كتفو بالدبور مقصّب
إنت يا حاج يا مخالف
زول مِخّرِفْ وعقلوا تالف
إنت يا زول ما ك داري
زلة الناس في الطواري
غرِمُوهُو وأجلدوهو
ونفّذوا الحكم البهينو
شان يفتح تاني عينو
تسمع السوط ليهو خاوية
وفوق قفا الحاج صيحتو داوية
كل جلدة جبل مذلة
في ضمير الحاج وقلبو
كل كرباج ألف علة
وفجأة رفع الحاج عيونو
شاف بنات ولدو وبناتو
كلهن واقفات يعاينن
دمعتن في العين ترقرق
وجعتن في الجوف تحرق
والحزن ليهن مفرق
ده النجوم الفي سماهن
ده الزمان الكان حِماهن
كل سوط نازل عليه
من شعاع الضو عماهن
عمك الحاج دمعو زرَّف
وسيلو فوق أشنابو سرف
وتم حكمو وراح بيوتو
نفسو مكسورة وذليلة
وكيف ملاقاة الحليلة
وصحوة الروح العليلة
وفي البيوت الجوه غادي
عمك الحاج ما عتيادي
فوقو متلمين جماعتو
والسكيلي ضرب حزايني
قالو ناداهو المنادي
وفاق الدنيا المهينة
يقطع الذلة وسنينا
فوق فراش حاج ود عجبنا
يسمع الزول البوصي
أقفلو الحوش يا جماعة
واطفو أنوار الرتاين
داك حرس حظر التجول
من بعيد ليكم بعاين
يا زمن حظر التجول
|
العرض العادي
