رد: طلبات نوتة أ / عادل صموئيل الجزء الثانى
استاذنا الجميل/ عادل بك
والله كنت لسه على بالى ...كنت فى الأوبرا وعديت على مكان ما ....كان بيبقى فيه نوت موسيقية ...وكان كله عذاب وملل عشان تحصل على نوتة من الموظفين الحكوميين هناك...وأفتكرت لما الأستاذ "عزت شحاتة" قال أن الأستاذ / عادل صمويل ...رحمنا من وشوشوهم العكرة ولا الحوجة ليهم....
أستاذنا...طبعا الفنانة شادية ...كلنا بندعو لها بالرحمة على قد ماأسعدتنا ....هنا بقى فيه سؤالين:
رغم انها من مطربين الصف الأول ...ألا أنها نادرا ماشوفنا ليها حفلة مع الفرقة الماسية ...دايما صلاح عرام أو غيره...هل هى كانت بتفتح لهم باب رزق مثلا...متعاطفة معاهم...؟
السؤال التانى : عن صديقك الراحل / منير مراد...
برغم مواهبة المتعددة وموهبته فى التلحين وعنده شوية جمل لحنية حلوة ....ماكانشى شغال كتير فى ايام عبد الناصر
- كام اغنية لعبد الحليم على استحياء كده ...هل التغييرات السياسية الأقصائية فى الستينات بسبب ديانته هى دى السبب وهى دى اللى ظلمته...؟ ودى حاجة .. هو مالوش ذنب فيها ...بدليل انه اشتغل شوية حلوين ايام السادات مع هانى شاكر وشريفة فاضل ومها صبرى وغيرهم...
لو ليك مزاج او عجبت حضرتك الأغنية دى لشادية ومنير مراد وفتحى قورة ...ياريت تنوتها وعلى مهلك ...
هى من أغانيها الخفيفة العاطفية أستايل منير مراد
اخى العزيز
الاول كلامك الجميل اسعدنى جدا جدا ... طبعا اى حد خبير بيشنغل فى مجال وبالذات لما يكون بيقدمه لوجه الله مش مقابل مال .. بيشغل مخه اوى فى كل اوجه المميزات والسلبيات ... طبعا انا عارف كويس جدا صعوبة الحصول على النوت من اى مكان او مشكلة كل مكان ايه .. بالنسبة للأوبرا .. اولا عشان تدخل تقابل حد وتتكلم معاه فى الموضوع انك عايز نوتة ده مش اى حد يعنى لازم يكون حد معروف لهم زى مجدى الحسينى يعنى مثلا ... يقدر يقابل الموظف المختص المسؤول عن مكتبة النوت الموسيقية العربية .. ويخليه يصور له نوتة ... او حد يكون واصل اوى جوا الاوبرا وياخد تأشيرة من الاستاذة الدكتورة ايناس ( اللى انا عايز اقابلها ومش عارف مواعيدها ) .. وبعدين ان حتى حصلت المعجزة وقالوا لك شبيك لبيك المكتبة ملك ايديك حتلاقى عندنا هنا فى سماعى انا منزل لكن نوت اكتر م اللى هناك 100 مرة لأن هم بيجيبوا النوتة بالطلب حسب ما يحتاجوها ف حفلة ... يعنى مثلا اغنية وتعالا شوف بتاعة غايزة احمد ( على سبيل المثال ) لو مفيش مطربة طلبتها وكتبواهالها او اخوها من نوتاتى هنا عمرك ماحتلاقى النوتة دى .. وان لقت النوتة حاتبقى مكتوبة بالطريقة الاحترافية اوى اوى بتاعة زمان وبالقلم طبعا واى مبتدى حيلاقيها طلاسم مايعرفش يقراها ... بس عايز اسألك على حاجة هل كل مجموع النوت اللى انا كتبها دى تعتبر صدقة جارية يعنى ممكن ربنا يدخلتى الجنة ؟؟ اتكل عليكوا يدعوا لى يعنى ؟
اما للفننانة شادية انا عمرى ما شفتها ف حياتى إلا مرة واحدة فقط كنا معزومين على عشا وجت قعدت جنبى على الترابيزة واتكلمنا واد ايه كانت لذيذة ومتواضعة الكلام ده كان سنة 1977 ... هة كانت بتشتغل دايما مع فرقة عبد العظيم حليم ... وبعدين اخدها فرقة حمادة النادى .. واعتقد كانت الفرقة الماسية مش بتحب تشتغل معاها هى وصباح .. لأن صباح كانت بتيجى من لبنان قبل الحفلة بيوم وبتعمل بروفة واحدة على يجى عشر اغانى وبتجيب معاها نوت مكتوبة بخط لا يقرأ ومتصورة من نوتة متصورة قبل كده 90 مرة وبيحصل ارتباك ف الفرقة لأن مش شايفين النوت كويس ويخافوا طبعا لايغلطوا وشادية اعتقد كانت كده .. اما منير مراد كان فيه حرج مش ع اليهود السابقين بس فى الكام سنة بتوع عبد الناصر ولكن كان على كل الاجانب اللى طفشوا او طفشوهم وقتها من مصر وخسرنا كتير اوى يعنى اجنا كنا من سنة 1950 لحد سنة 1955 فى حى الفجالة وانت داخل من شارع رمسيس .. كان تحت بيتنا بقال يونانى ... وما ادراك بالبقالة اليونانية ... يعنى هم ملوك الزيتون الاسود وزيت الزيتون وانواع الجبنة والبسطرمة فى العالم ... وكان عددهم كبير كانوا عاملين مستعمرة فى القاهرة والاسكندرية وعشان كده كانوا بيستوردوا البقالة من اليونان ... ومش عايز اقول لك احنا مستحملين الزيتون الاسود اللى معمول فى مية نار ازاى بعد ماطفشوا الناس دول ... ايام عبد الناصرؤ كان فيه تعصب شوية .. اتفك ايام السادات على اساس انهم بقوا مسلمين من زمان وبمزاجهم يعنى ماحدش ارغمهم ... بس بينى وبينى اسوأ حاجة فى الدنيا ربط الفن بأى تفرقة عنصرية من اى نوع .. يعنى لو الاخوان كانوا استمروا فى حكم مصر كان زمانى دلوقتى ممنوع من التدوين ان مكانوش حرقوا كل النوت اللى انا مدونها وحذفوها من كل المنتديات مع اطيب تحياتى
التعديل الأخير تم بواسطة : tarak766 بتاريخ 04/02/2019 الساعة 18h37
|