رد: درة الابداع الجنوبى "محمد الامين"
قصة ثورة اكتوبر 1964 فى السودان التى اطاحت بالحكم العسكري
قصة ثورة أو (الملحمة)
كلمات الشاعر هاشم صديق
أداء الفنان محمد الأمين ومشاركة الفنانين عثمان مصطفى وخليل اسماعيل وأم بلينة للسنوسي وبهاء الدين أبوشلة وآخرين
لما الليل الظالم طول
وفجر النور من عينا اتحول
قلنا نعيد الماضي الاول
ماضي جدودنا الهزموا الباغي
وهدو قلاع الظلم الطاغي
وفي ليلة وكنا حشود بتصارع
عهد الظلم الشب حواجز
شب موانع
جانا هتاف من عند الشارع
قسما قسما لن ننهار
طريق الثورة هدى الاحرار
والشارع ثار
والكل يا وطني حشود ثوار
وغضب الأمة اتمدد نار
وهزمنا الليل
والعزة اخضرت للاحرار
وطني أنحنا سيوف امجادك
نحن مواكب تفدي ترابك
ولسه الشارع بشهد لينا
في يوم الغضبة حصاد ماضينا
مشينا نعطر حقل الثورة
بدم نفديه بلادنا الحرة
وكان اكتوبر فجر الغضبة
كسرنا قيود الماضي الصعبة
لما مشينا مواكب صامدة
تهدر وتغلي وتهتف راعدة
الرصاص لن يفنينا
الرصاص لن يفنينا
وسال الدم في أرض الوادي
فدينا النور بالروح يا بلادي
وكانت صفحة حكاها العالم
وفجر اكتوبر طل وسالم
وهزمنا الليل هزمنا الليل
والنور في الآخر طل الدار
وهزمنا الليل هزمنا الليل
والعزة اخضرت للاحرار
وكان في الجامعة موكب هادر
صمم يجلو الليل السادر
وكان الليل السادر غادر
فجر غضبه سموم دخان
الشعب الثائر صمم هادر
يصرع ليلنا الداجي الطول
وكان القرشي شهيدنا الاول
وما اتراجعنا
حلفنا نقاوم ليلنا وسرنا
وما اتراجعنا
للشمس النايرة قطعنا بحور
حلفنا نموت أو نلقى النور
وكان في الخطوه بنلقي شهيد
بدمو بيرسم فجر العيد
يا اكتوبر انحنا العشنا ثواني زمان
في قيود ومظالم وويل وهوان
كان في صدورنا غضب بركان
وكنا بنحلف بالاوطان
نسطر اسمك يا السودان
بدمانا السالت راوية الساحة
حلفنا نسير ما نضوق الراحة
شهرنا سيوف عصيانا المدني
وكانت وحدة صف يا وطني
وايد في ايد حلفنا نقاوم
وما بنتراجع وما بنساوم
خطانا تسير في درب النصر
هتافنا يدوي يهز القصر
كسرنا حواجز
ازلنا موانع
صفنا واحد
عامل وطالب وزارع وصانع
يا ساحة النصر يا حقل النار
يا واحة بتحضن روح اصرار
روينا ورودك دم ثوار
وشتلنا فضاكي هتاف احرار
خطينا ترابك احرف نايرة
بتحكي سطور ايامنا الثايرة
وشلنا الشهدا مشينا ونهتف
الرصاص لن يفنينا
وجرح النار في قلوبنا بينزف
الرصاص لن يفنينا
سجينا الشهدا وجينا نقاوم
الرصاص لن يفنينا
ما بنتراجع وما بنساوم
بينا وبينك تار يا ظالم
وفجأه ونحن صفوف بتصمم
زغرد فجر الغضبة الحالم
وهزمنا الليل هزمنا الليل
والنور في الاخر طل الدار
وهزمنا الليل هزمنا الليل
والعزه اخضرت للاحرار
قسما قسما يا اكتوبر
نحمي شعارك نجني ثمارك
ونرفع راية الثورة الغالية
عاليه ترفرف فوق السارية
عليها شعار الثورة الاكبر
ورسمو النادر زاهي واخضر
ولسه بنقسم يا اكتوبر
لما يطل في فجرنا ظالم
نحمي شعار االثورة نقاوم
ونبقى صفوف تمتد وتهتف
لما يعود الفجر الحالم
يااكتوبر
|