طلبات نوتة أ / عادل صموئيل الجزء الثانى - الصفحة 300

**نور الصباح** · #**2991** 18/07/2014, 21h09

احبائى
اقدم للأخت العزيزة بسمة
نشيد عُمان
طبعا انا بقدر انها عايزاه بسرعة ومن حسن الحظ انو الحمد لله سهل يعنى ما اخدش منى عشر دقائق
عندنا فى مصر بيقولوا ع الحاجة لما تكون سكتها سالكة ومافيهاش مشاكل نقول : قرفتها حلوة
طبعا انا كتبتو من الدرجة اللى هو مكتوب منها وتحت امرك لو فى اى ملاحظات
مع اطيب تحياتى لشعب عمان الناس الحلوين ولن ننسى انهم وقفوا جنبنا فى ازمتنا
مع اطيب تحياتى
SSSSSSSSSSSSSSSSSSSSSSSSSSSSSSSSS
شكرا أســــــــــــــتاذنا المبجل
على هذه الروائع والنوادر
وهذه الجواهر الغالية
وشكرررررررررررررررررررررا
أخوكم
نور الصباح

**mahmoud feteih** · #**2992** 19/07/2014, 03h29

حلوه أوى اشترونى كانت تايهه منى وجل من لا يسهو وعقبال ولاد الحلال ونشيد عمان انا اعرف ان اللى عمله موسيقار الاجيل عبد الوهاب وشكرا للاستاذ الكبير

**basma2265** · #**2993** 19/07/2014, 09h08

السلام عليكم استاذ عادل

الف شكر علي هذه النوته وانا كنت محتاجه النوته ضروري مش عارفه اشكر حضرتك ازاي

الاخت العزيزة
اولا يعنى اشكرينى شوية ماتشكرينيش اوى لأنى ماتعبتش فيه اوى يعنى ما اخدش زمن شرب كوب شاى وياريت كل الاغانى سهلة كده كان زمانى كتبت مليون نوتة وتحت امرك
مع اطيب تحياتى

**عادل صموئيل** · #**2994** 19/07/2014, 11h53

الاخ العزيز غواص النغم
معلش آسف تأخرت فى الرد
انت كمذيع عارف ان فى مكتبة الاذاعة شرائءط الاغانى بتتقسم حسب الزمن يعنى فيه اغانى خمس دقائق وانت طالع لحد ساعة وده شىء مهم جدا لإعداد خرائط الإذاعة .. يعنى اللى بيعمل الخريطة اولا بيبقى عنده البرامج الثايتة فى اليوم المحدد ونشرات الاخبار ومواعيد الصلاة وموزجز الانباء والحجات الثابتة دى بعدين بيحط بينهم الاغانى الاغانى ال خمس دقائق بتتحط بسهولة لكن الاغانى الاطول ليه اعداد خاص يعنى لازم يكون مثلا يوم الخميس ساعة فاضية من 11 ونصف الى 12 ونصف عشان احط اغنية كاملة لأم كلثوم مثلا ... من هنا الاغانى احنا بنعملها ( كصناع اغانى يعنى )
اتفقنا من قبل ان الملحنين بتوع الزمن الجميل اهم شىء انو لو عمل 500 اغنية مش ممكن تكون اى اغنية شبه التانية .. وده بيظهر من حاجتين الاولى انك من اول حرف تقول دى اغنية كذا وثانيا ده اللى بيخلى الاغنية لها شخصية وتعيش الى الابد ...زمان كان اهم مطربة ام كلثوم يعنى اغنية ام كلثوم هى الموضة بتاعة السنة كان عبد الوهاب بيعمل اللحن من قبلها بسنة ع الاقل وكان بيتعمل خمسين بروفة فى البروفات دى تلاقيه يقعد يغير ويبدل بحيث ان على آخر يوم يكون اللحن ابداع مفبش احسن من كده .. بس فيه حاجة الجمهور كان الحفلة الاولى بيتعرف على اللحن ويفضل يسمعه كل يوم واحلى سمع كان فى الحفلة الثانية لأنه بيبقى حفظ كل حرف ف اللحن .. كان عبد الوهاب ( والسنباطى وبليغ طبعا ) قبل ما يبتدى البروفات بيكون عرف المستجدات فى فرقة ام كلثوم يعنى مثلا بليغ دخل الاطوريدون فى سيرة الحب لما عد والهال عمل انت الحب كان لسه الاكورديون مع ام كلثوم مادخلش فى دماغه او كانت انت الحب اثناء ما بيلحنها مش فى مخه موضوع الاكورديون وماحبش يزرعة ف اللحن وهو اصلا ماكان بيفكر فيه اثناء التلحين لكن لما عمل امل حياتى كان الاكورديون موجود فعلا وحط لو صولو .. الاول كان الجيتار فى انت عمرى محدود لكن لما ظهر عمر خورشيد صار الصولو اللى بيعمله عبد الوهاب مختلف .. ليه لأن امكانيات عمر خورشيد والتى لم تكن مسبوقة ولم تتكرر عبد الوهاب كان لازم يستغله لأقصى درجة شوف مثلا اغدا القاك .. وهكذا .. اما الساكس عبد الوهاب ما اقتنعش بيه مسألة اذواق ... ده بالنسبة للأغانى الطويلة واللى بتاخد اعداد طويل اوى وبعد وفاة ام كلثوم اتجهت الانظار فى الاغانى الطويلة الى عبد الحليم ثم وردة ثم فايزة ( مش كل مطرب يقدر يغنى اغنية ساعة او اطول ) يعنى عندك نجاة مثلا من 15 الى عشرين دقيقة .. زمان لو تفتكروا ايام اضواء المدينة قبل النجومية المطلقة كان الحفلة فيها 12 فقرة كان حليم ونجاة وفايزة وشادية وقنديل وغيرهم كانت الاغانى قصيرة لأن كل مطرب بيقعد ربع ساعة يغنى 3 اغانى .. هنا حاجة خطيرة جدا جدا ما اعرفش تاخدوا بالكم منها ولا لأ .. اقول لكم السر .. عد عدد المطربين وعدد الاغانى حتلاقى ييجى مثلا 30 اغنية .. لو انا ملحن المشكلة الخطيرة ازاى اعمل اغنية طولها خمس دقائق وتعمل علامة وسط ال 30 اغنية يعنى ماتمرش مرور الكرام وطبها كل ملحن كان بياخد باله من النقطة الخطيرة دى .. ده اللى عمل الاعجاز الفنى زمان انك النهاردة لو جبت شريط للحفلة كلها حتلاقى 33 اغنية تهبل .. وده اللى عمل التراث بتاعنا .. لما نيجى هنا نتكلم عن صباح عندها نفس نظام اغانى اضواء المدينة يعنى بتقف ساعة وربع على المسرح بتغنى 12 اغنية صغيرة .. منهم اغانى الناس حافظاه ومنهم اغانى من لبنان ممكن فى مصر مش سامعينها .. خطورة المطلوب من عبد الوهاب هنا لو عمل لها لحن جديد انو لازم يعمل علامة يعنى اغنية خمس دقائق تاكل كل دول وإلا ايه الفرق بينه وبين اى ملحن صغير ... اما عن اختيار الآلات ... عندك البزق مثلا ده لبنانى .. ماعندناش فى مصر عازف بزق مقيم .. كان فى نطاق اللى بقول عليه ان كل اغنية لازن يكون فيها حاجة جديدة كان ممكن الجديد ده صولو بزق ايام كامل الاوصاف كانوا بيجيبوا العازف من لبنان التذكرة كانت ب 26 جنيه واقامة كاملة فى فندق خمس نجوم ايامها كان الاسبوع ب 75 جنيه .. بييجى العازف قبل الحفلة بخمس ايام ويقول الصولو .. اما لو اللحن زى ده فى لبنان البزق موجود يعنى تطلبه بالتليفون ان لم يكن احد اعضاء الفرقة الموجودة قدامك .. فيه كمان فى احترافية العمل يعنى ازاى تعمل فى لبنان حاجة تجنن الجمهور فى الكوبليه الاول او التانى تعمل الايقاع دبكة .. الجمهور يقوم يتجنن .. نفس الحركة لو جمهور خليجى ييجى فى كوبليه يعمل لو ايقاع من الايقاعات الخليجية ... يعنى انا حضرت طبعا فى اواخر السبعينات ولحد نصف الثمانينات كنت اشوف الجمهور فى الحفلة معظمة خليجى تحس انك مش فى مصر .. لاحظت ان معظم الاغانى بتخاطبهم يعنى لا تخلو اغنية من كوبليه فى ايقاع خليجى .. ودى بينى وبينك حركة جذب لأن كان ساعتها مطربين كتير خليجيين بييجوا مصر غير طلال ومحمد عبده يعنى الدرجة التانية ساعتها زى عبادى الجوهر كان بيبقى فقرة فى حفلة لوردة مثلا .. طبعا كان الخليجيين بيتجننوا من الاغانى الخليجية اصلا .. تيجى وردة تعمل كوبليه فيه ايقاع زى الخليجى ... العملية اولا تشغيل مخ وثانيا تطوير مع المحافظة على الطابع
مع اطيب تحياتى

**saloom daoud** · #**2995** 19/07/2014, 16h06

أهديكم في ثالث مشاركاتي التدوينية
رائعة المطربة سلوى القطريب وألحان روميو لحود
خدني معك على درب بعيدة
أتمنى أن تنال اعجابكم وأرجو في حال ملاحظة أي خطأ تنبيهي
و شكرا
سلامة داود

**muhamadibra** · #**2996** 20/07/2014, 12h16

ازاي ما نشكرش يا مايسترو - فالشكر واجب واقل تعبير عن امتناننا لما تقدمه لنا لن نجده في اي مكان اخر - نثمن ذلك جدا ونحفظ لك قدرك العالي - ولاكمال المود بتاع رمضان لو سمح وقتك لطقطوقة خفيفة وهي - وحوي يا وحوي - ليكتمل بها اعمال رمضان - ولك كل الشكر مقدما
د محمد ابراهيم

**عادل صموئيل** · #**2997** 21/07/2014, 06h45

احبائى

اقدم لكم من روائع تراث الفنانة وردة

ولاد الحلال

احنا زى ما قلنا من قبل ان كل اغنية لازم تكون فيها حاجة جديدة مش مسبوقة عشان تميز اغانى الزم الجميل ان مفيش اغنيتين شبه بعض لذلك كل اغنية بيبقى فيها حكاية
الحكاية هنا ان بليغ حب يعمل كونتراست مفاجىء او تضاد بين الفن والفن الشعبى .. يعنى كان زمان فيه كوبرى عندنا ف القاهرة شهير جدا اسمو كوبرى ابو العلا والكوبرى ده تشوفه فى الافلام الابيض والاسود بالذات فيلم فاتن حمامة القلب لو احكام .. والكوبرى ده من اهم مميزاته انو اللى صممه ونفذه هو الفنان اللى صمم ونفذ برج ايفل فى باريس بس مع الاسف الحكومة شالته وعملت بدل منو كوبرى علوى .. المهم الكوبرى ده كان على نهر النيل بيربط بين حى بولاق الشعبى وحى الزمالك الراقى يعنى تعدى الكوبرى تنتقل من حاجة لحاجة تانية خالص .. فى اللحن ده نفس الحكاية البداية موسيقى مقدمة ارستقراطية تفاجأ ان الاكورديون يدخل يقول جملة بلدى ( واللون ده اسمو اكورديون بلدى عندنا او شعبى ) ثم جملة صغيرة ثم يدخل الناى يقول جملة من النوع الشعبى المتداول فى الموالد بالذات .. ثم تنهال عليك المقدمة بكل ما فيها من عبقرية والوان ياخدك من الزمالك لبولاق لأسبانيا ...
التميز الشديد فى اللحن ده انو مش موضوع نوتة ... موضوع قيادة اوركستر او انك تكون حافظه صم لأن السرعات بتختلف فيه بشكل مفاجىء لدرجة انا معرفتش اكتب عدد السرعات بدقة يعنى جيت فى السطر الرابع وكتبت اسرع
يعنى محتاج انك الاول تكون حافظ اللحن جدا عشان تتماشى مع السرعات ... هو فيه شوية صعوبة الى حد ما لكن عموما سهل وهو طبعا يتعبر من العيار التقيل جدا جدا .. يعنى شوف المدخل بتاع المذهب والفواصل اللى فيه مستحيل حد النهاردة يقدر يقوله وده اسمو الطرب الاصيل اللى بجد
مع اطيب تحياتى

**نور الصباح** · #**2998** 21/07/2014, 10h04

احبائى
اقدم لكم من روائع تراث الفنانة وردة
ولاد الحلال
مع اطيب تحياتى

SSSSSSSSSSSSSSSSSSSSSSSSSSSSSSSSS
شكرا أســــــــــــــتاذنا المبجل
على هذه الروائع والنوادر
وهذه الجواهر الغالية
من روائع زمن الفن الجميل
وشكرررررررررررررررررررررا
أخوكم
نور الصباح

**muhamadibra** · #**2999** 21/07/2014, 10h39

اقتباس:

المشاركة الأصلية كتبت بواسطة نور الصباح

احبائى
اقدم لكم من روائع تراث الفنانة وردة
ولاد الحلال
مع اطيب تحياتى

SSSSSSSSSSSSSSSSSSSSSSSSSSSSSSSSS
شكرا أســــــــــــــتاذنا المبجل
على هذه الروائع والنوادر
وهذه الجواهر الغالية
من روائع زمن الفن الجميل
وشكرررررررررررررررررررررا
أخوكم
نور الصباح

بعد اذن اخي نور الصباح وكل عام وانتم بخير
د محمد ابراهيم

**علي ثلاثة** · #**3000** 21/07/2014, 15h03

د. محمد إبراهيم
منذ زمن سحيق في القدم
وأنا أتساءل ما معنى وحوي يا وحوي

خصوصا عندما قرأت في عدد من أعداد مجلة
--العربي--
استطلاعا وردت فيه تغطية للاحتفال بشهررمضان
المبارك محلى بصورة لبعض الاطفال

وبما أنك أثرت الموضوع
أحببت أن أهتبل الفرصة وأسألك عن معنى
وحوي يا وحوي
إن كان لديك علم بهذا
مع شكري الجزيل
------