رد: طلبات نوتة أ / عادل صموئيل الجزء الثانى
تحية طيبة أستاذ عادل و شكراً على التدوين الجميل لرائعة أم كلثوم أغار من نسمة الجنوب ، و أعتقد أن من يسمع هذه الأغنية يجزم بأنها غير قابلة للتدوين ، كما هي حال التقاسيم والموال .
استفسار :
- موسيقى الكوبليه الثاني : هل المقام هو بيات الصول وإن كان كذلك لماذا وضعت دليل المقام ( مي نصف بيمول - لا نصف بيمول - سي بيمول )
- موسيقى الكوبليه الثالث : أيضاً دليل المقام يشير إلى بيات ري ، ولكن القفلة كان على درجة دو ، وغناء الكوبليه مقام آخر مختلف ؟
هل من تحليل مقامي بسيط للأغنية .
شكراً لك
اخى العزيز
لو عايز تحليل مفامى حلو للأغنية انا حدعو الاخ العزيز المايسترو محمد الآلاتى هو استاذ التحليل واكيد يحب يعمل تحليل للحن ده وبالذات
مشكلة اللحن ده الخبث فى المقامات يعنى يديك ايحاء بشىءوهو بيمعل شىء تانى خالص بعكس اغنية زى حيرت قلبى معاك مثلا المقام صريح واى تحويل بيكون صريح من اول لآخر اللحن
اما مشكلة الدليل وانو ممكن يكون مختلف عن الانماط الاكاديمية دى ليها سببين السبب الاول انا لما بدون بركز على المقام الاساسى للكوبليه وبعمل الدليل ولو الملحن خرج لمقام تانى وسط الكوبليه بشوف لى الخروج ده استغرق وقت قصير بفضل نفس الدليل واعمل علامات تحويل عارضة فى الطريق .. اما لو خرج مثلا 6 اسطر بضطر اغير الدليل لأنه العلامات العارضة بتلخمنى فى التدوين لما تكون كتير اما لما يكون فى لحن زى ده يعنى بيغير المقامات كتير بضطر التزم بالدليل اللى انا بدأت منو الكوبليه لسبب مهم جدا النوتة اما بيقراها محترفين او هواة ... مع الحمترفين لو انا غيرت الدليل تغيير كلى كل سطر عادى لأنهم متعودين على كده لكن الهواة لو الدليل اتغير ممكن ما ياخدش بالو ويعمل لخبطة لذلك لما بخلى الدليل اللى هو اخد بالو منو من اول الكوبليه واعمل العلامات العارضة فى الطريق هنا بياخد بالو ان نغمة كذا بقت كذا وبياخد بالو لما تعود كما كانت واعتقد ان طريقتى صح لأن ماحدش اشتكى من الموضوع ده والهواة والمبتدئين بالذات بيقولوا ان النوت بتاعتى بتريحهم جداً .... انا وانا بدون بدون بطريقة خاصة بفكر فى المقام الاساسى فقط بتاع الكوبليه ... بعدين طول الوقت انا بدون اللى انا سامعو مش بشغل نفسى بالمقامات الفرعية بمعنى بشتغل بطريقة التتراكورد يعنى اربع نغمات
يعنى مثلا كل مفام بيتكون من 2 تتراكورد وبعد فاصل او بعد مكمل عندك فى البياتى مثلا التتراكورد الاول رى مى فا صول ابعادهم 3 3 4 .. التتراكورد ده اسمو جنس بياتى باقى المقام بيتكون من تتراكورد تانى زائد بعد .. لما انا بركز فى اللى انا بسمعو يعنى مثلا عمل صول بيمول ... مش بركز اوى انو عمل صبا ولكن بركز اكتر انو عمل صول بيمول وهكذا وصلت المعلومة ؟ وانا مش بحب اشغل مخى بالمقامات الفرعية يعنى اخطر شىء طبعا الماقمات الاصلية والا مش حدون صح اطلاقا .. مشكلة الحوار فى المقامات الفرعية بتعمل مناقشات بين اتنين وكل واحد ممكن يقول حاجة شكل ( وحصلت حوارات هنا كتير ناس بتختلف على جزء وانا كنت بتركهم للأخ محمد الآلاتى .. لأنى الوقت اللى اضيعو فى المناقشة دى اكون دونت لحن ولا لحنين صغيرين .. لكن اقول لك تحليل علمى الخلاف بييجى منين : لو عندك اللحن من صول لا نصف بيمول سى بيمول دو هنا واحد يقول لك بياتى على الصول او النواه
لكن تسمع المطرب تلاقيه بيروح كتير لنغمة فا هنا ممكن حد يقول لك لأ ده راست على الجهاركاه .. ويختلفوا وانا مش فاضى للمناقشات دى .. المهم الخلاصة اغنية اغار من نسمة الجنوب فيها حاجة غلط ؟؟ ده اهم شىء عندى
فيه حاجة كمان سر يعنى بيكرهنى فى موضوع المقامات الفرعية .. وانا طالب فى الكلية هو المقامات الاساسية قول عشرة والفرعية توصل ل 47 مقاما .. كان فيه منافسة فى الكلية بينى وبين كام طالبة على المراكز والتقديرات المتقدمة هم حافظين ال 47 مقام صم لكن مش بيعروفا يعزفوا اى لحن منهم او اى لحن اصلا غير المقطوعات المقررة فى المنهج ... يعنى مفيش واحدة منهم تمسك عود وتقول لك جملة موسيقية فى اى حاجة من الحاجات دى .. وكانوا بيجيبوا تقدير امتياز لن الكلية محتاجة واحد حافظ صم ومش فاهم حاجة اكتر من واحد يعزف لك اغار ولا سلوا قلبى ( عقدة نفسية يعنى )
مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 07/05/2014 الساعة 23h32
|