طلبات نوتة أ / عادل صموئيل الجزء الثانى - الصفحة 608

**عادل صموئيل** · #**6071** 16/02/2018, 10h35

احبائى

نشيد ينفع للمدارس

امنيتى للطفل والطفولة

مع اطيب تحياتى

**سليم العباس** · #**6072** 16/02/2018, 12h15

كل الشكر أستاذنا الرائع على تدوين أغنية لما ع الباب، بالطبع تدوين رائع متوافق مع جمال الأغنية .
و كما ذكرت استاذنا ان فيلمون وهبي رغم أن شخصيتة تميل للأبتسام و الكوميديا ، لكن ألحانه لفيروز كانت شجية و عاطفية ... و اتسمت جميعها على ما أعتقد بالطابع الشرقي.

شكراً لك... دمت مصدراً للبهجة و السرور لكل أعضاء المنتدى و لكل شخص عزف نوتاتك الجميلة التي تشبه رسائل الحب البسيطة و العميقة في الآن ذاته .

**عمرو الهنداوي** · #**6073** 16/02/2018, 14h40

أستاذنا عادل صموئيل

في أغنية جميلة للسيدة فيروز أسمها "هيلا يا واسع" لها نوتتين في المنتدى بس مش من تدوين حضرتك .. مدون كاتبها كرد ومدون أخر كاتبها بياتي الدو .. الحقيقة فين ومين فيهم اللي صح؟ أنا عزفت الاثنين بس ناقصين جمل من الأغنية والمقام مختلف في الاثنين..الصح مين؟

اخى العزيز
اللحن ده انا سامعه من زمان .. بس التسجيل ده متاخدش بيه نهائيا لأن فيروز كان ممكن اللحن الواحد يتعمل له كذا تسجيل مختلف اختلاف كلى ...يعنى انا ليا خبرة كبيرة مع موضوع فيروز بحاله ..يعنى عزفت معاها حفلات ولما كان فيه حرب فى بيروت سجلنا معاها هنا ف مصر شوية شغل .. بس الخبر الكبيرة فى انى بحب استكشف كل حاجة قدامى يعنى احنا كنا بنتقابل معاهم فى المهرجانات واهمها مهرجان بعلبك ومهرجان دمشق الدولى كنا بننزل فى نفس الاوتيل وانا كنت بلزق لهم افهم ايه حكاية الكائنات الغريبة الى جايين من كوكب تانى دول .. يعنى مؤسسة ماتعرفش مين الملحن ومين المؤلف ... وتلاقى عاصى ومنصور على طول فى ايدهم ورق نوتة وبيكتبوا طول الوقت ... انا مش فاهم كانوا بيعيشوا حياتهم امتى .. يعنى احنا كنا بنعيش حياتنا شوية فى اوقات فراغنا دول كانوا مش بيعملوا لنفسهم اوقات فراغ .. الحاجة الخطيرة اللى انا اكتشفتها .. احنا فى الفرقة الماسية لما انت بتسمع لحن ما احفظه كويس ولو سافرنا عشرين دولة بنقوله زى ما بنقوله بالضبط ... يعنى بتاخد بالك مثلا من الكورديون الكهربائى اللى اهداه عبد الحليم للزميل مختار السيد ده كان اكورديون بحجم الاكورديون العادى لما تشغله بالمنفاخ يبقى اكورديون ولما تقفل المنفاخ يبقى زى الاورج ومتوصل بامبليفاير ضخم اد التلاجة ال 8 قدم شوف تقله اد ايه .. كنا فى اى حفلة خارج مصر ويكون قال فيها صولو بالاكورديون ده لازم ناخد الامبليفاير معانا عشان المستمع ما يسمعش حاجة مختلفة .. واما كلثوم كانت كده برضه ... يعنى صولو ساكل لما نسافر لازم ناخد ماعانا الساكس وهكذا ... اما فيروز كانت نظام تانى ... يعنى فيه السفر للخارج بتبقى الامكانيات محدودة يعنى احنا كنا بناخد 8 كمنجات فقط .. ولما كان عدد الفرقة محدود وهى عندها اوركستار كامل يعنى مش اقل من 70 عازف شرقة وغربى ... كان لما تسافر مش معقول متعهد حفلات يتحمل تكاليف اجر واقامة وسفر كل دول فكانت بتاخد 25 واحد فقط ... بتفرق طبعا ازاى الاداء مع الآلات الناقصة .. اكتشفت العفاريت كانوا بيعملوا ايه .. عندك مثلا ع هدير البوسطة تسمع تسجيل اوركسترا سيمفونى كامل .. تسجيل تانى سافروا دوله بربع الفرقة راحوا عملوا فيه تعديل خلوه شرقة بحت بتخت شرقة ورقصوا عليه البنات شرقى ... وهكذا .. التسجيل بتاع هيلا ياواسع لو تلاحظ تسجيل فيه توزيع اوركسترالى عالى مضيع الاحساس بالشرقى .. بس المذهب كردمش ممكن يكون بياتى .. اما الحرف الشرقة فى الكوبليه وبرضه مش الرى نص بيمول ولكن لا نص بيمول ... دور لى على تسجيل اوضح وحتلاقى وانا ادونها .. انا بحبها الاغنية دى على فكرة وكانت فى مخى ... مع اطيب تحياتى
انا بعد ما كتبت حاولت ادور على تسجيل تانى بس مش لاقى فيه المقدمة هى بتقفل المذهب بياتى .. لكن مش بتبتدى بياتى زى ماهو مكتوب .. والتسجيل الموجود التوزيع مغلوش ع اللحن الاساسى ما اقدر اكتب منه لا يطلع غلط

**عادل صموئيل** · #**6074** 16/02/2018, 18h23

احبائى

اقدم لكم رائعة فيروز

هيلا ياواسع

انا استكمالا للكلام السابق بحثت عن تسجيل وجدت المرفق وده من حفلة فى لندن وزى ما قلت مش بتاخد كل الفرقة وبيعدلوا شكل الحن بدل ما بيكون موزع زى اللى فوق بيعملوه شرقى حتى الجملة الموسيقية هنا اللى فى المقدمة ظاهرة جدا جدا فى الموزع مطموسة ... انا عاملها كرد لأن ما اقدرش اعتبرها بياتى اوى لأن حرف المى نصف بيمول بييجى ضيف يعنى انا عشان لا ادع مجال للشك برفعها تون لأنها طبقة صغيرة عشان البياتى يبقى على رى عشان يبقى واضح وبعد كده سهل انقل التدوين لأى دلرجة هنا انا عاملها مرة من رى ومرة من دو .. لكن علامات التحويل زى ما فى التسجيل بالضبط يعنى مفيش فيها الهوا
مع اطيب تحياتى

**عمرو الهنداوي** · #**6075** 16/02/2018, 19h41

ربنا يكرمك يا أستاذ عادل صموئيل وحضرتك قطعت الشك باليقين بالتدوين المعتمد والصحيح

**تامرتامر** · #**6076** 16/02/2018, 19h58

مساء الخير أستاذنا العزيز عادل صموئيل الف شكر على هذا الابداع من
النوتات الموسقية اتمنى تدوين اغنية صباح (قالوا عني مجنونة) رابط الاغنيةhttps://m.youtube.com/watch?v=kssb6hAbxuU الله يعطيك الصحة والعافية يارب

**عادل صموئيل** · #**6077** 18/02/2018, 20h42

احبائى
اقدم لكم اغنية وردة

يادلالى عليه يادلالى

الاغنية سهلة جدا وسلسلة بس اللى تاخد بالك منه السينيوهات والطودات عشان عايزة تركيز
مع اطيب تحياتى

**خالدموسى** · #**6078** 20/02/2018, 00h37

مساء الخير يا استادنا الجميل عادل صمؤيل
من الاغانى الوطنية فى السبعينات اغنية راءعة للمطرب ماهر العطار اسمها من هنا ورايح
ارجوا من سعادتكم تدوين النوتة الخاصة بها حتى اتعلم عزفها ولك جزيل الحب والامتنان
وهى فى المرفق الاتى
https://www.youtube.com/watch?v=4A5tTvSPnKY

**عادل صموئيل** · #**6079** 20/02/2018, 10h37

احبائى
اقدم لكم اغنية وطنية جميلة للمطرب ماهر العطار

من هنا ورايح

عايز اقول انت لو حسبت المطربين بتوع الزمن الجميل ام كلثوم وعبد الوهاب كانوا فى الدرجة الاولى وماهر العطار كان بيعتبر من الدرجة الرابعة .. تخيلوا المطرب المحسوب من الدرجة الرابعة ده الناهردة لو حبيت تقيمه بالنسبة للنجوم بتوع دلوقتى يعنى محمد منير ما يجيش جنبه 10% ومحمد فؤاد ولا خمسة % وعد على كده
كمان الاغنية دى معمولة زمان بس وقتها دلوقتى
مع اطيب تحياتى

**عادل صموئيل** · #**6080** 20/02/2018, 10h48

احبائى
اقدم لكم اغنية الفنانة وردة

بتونس بيك

طبعا ف الاول فيها شوية فزلكة مالهمش لازمة وانا بدأت من اول الايقاع

الاغنية دى تعتبر فى بدايات التسجيل بنظام التراكات واللزم العفاريتى اللى سادت بعد كده وبدأ الانهيار بتاع الفن واللى اخترع الطريقة بتاعة اللزم السريعة جدا والمعقدة عمار الشريعى ... واللى بعده مشيوا على الطريقة دى ... انا بحسب قيمة العمل بإيه ... لو عندنا فى مصر حالي 94 مليون نسمة .. كان منهم موسيقيين وكام عامة الشعب ... اللحن اللى بيتعمل لازم يخاطب عامة الشعب مش يخاطب الموسيقيين ... لأن لو عامة الشعب مافهموش اللحن ... هنا لا الموسيقى اساسا ليها قيمة ولا الموسيقيين ايضا ليهم لازمة يعنى ايه الموسيقسيين حايسمعوا ويطربوا بعض .... قول لى حسبتها ازاى ... من اهم صميم عملى واللى اتعملته من العمالقة ... فى حياتى العامة اثناء النهار بسمع ناس بتدندن فى الشارع فى القهوة فى اى مكان ... اتعلمت اتسمع اشوف بيقولوا ايه ... ايام الفن لما كان فن وكانت اللزم اللى بترد ع الغناء لزم سهلة وجميلة وبسيطة ومفهومة ... كان اى حد من عامة الشعب لما يدندن كان بيقول الغنا وبيقول اللزمة ... لكن مثلا هات لى موسيقى زى بتوع عمار الشريعى اذا كان بعض الموسيقيين مش فاهمينها ومايعرفوش يدندنوها ازاى الشعب العادى حايغنيها او ينددنها لنه اصلا مش حايفهمها ... لذلك اصحااب الفن المدمر .. قلبوا طريقة السمع من انك تسمع ام كلثوم ومتجاوب مع كل حرف وبين دلوقتى تسمع اى حد وانت مش فاهم اى حاجة والناس بتصقف وتتراقص وتصرخ ... كان زمان الجمهور اللى بيفهم لازم تقدم له احلا حاجة ولازم الجديد واوعا تقدم لهم جملة فيه نكهة جملة تانية .. لكن دلوقتى عملوا للناس غيبوبة يعنى لاحد فاهم حاجة واللحن يبقى مسروق 900 مرة ولا حد حاسس ... وكله موزع عشان زى ماتعمل حاجة تغلوش على حاجة
مع اطيب تحياتى