مساء الخير استاذ عادل
شريفة فاضل غنت من الحان العبقرى بليغ حمدى اغنية اه يا المكتوب
وانا من محبين بليغ والحانه كلها سواء الحانه لام كلثوم او عبدالحليم او نجاة او العزبى و رشدى وغيرهم كثيرون
وحتى الان لم يتفوق عليه ملحن فى جمال الحانه
ارجوا من حضرتك تدوين النوتة الموسيقية لها
جه على بالى الاستاذ /احمد عبد الله الشهير ب "نور الصباح"... رحمة الله عليه...
كان انسان طيب ونقى وجميل وكان بيحب حضرتك جدا... وكان عليه أسلوب أدبى رفيع فى الكتابه مكناش عارفين نجاريه الحقيقة...
...كان من ضمن طلباته أغنية شادية ومحمود الشريف...أغنية " حبة حبة ياحبيبي"..
لأنه كان عاجبه قوى صولو الكمنجة اللى فى المقدمة...وكان نفسه برضو يسمعه من حضرتك...ف لو حضرتك حابب
تكتب لنا النوتة بتاعتها ...يبقى كتر الف خيرك..
بالمناسبة كلمة "حبة حبة " دى هيروغليفى بمعنى "أكتم السر"...ولذلك ..بتقول"خللى بالك المحبة عمرها مابتستخبى"...يعنى زى ماقالت ام كلثوم فى اللغة العربية "الصب تفضحه عيونه"...يعنى اللى بيحب مابيعرفش يخبى ويداري...
وأنا هنا عندى سؤال الحقيقة...تحس ان الكمنجة واقفة بتعزف جنب شادية بل وربما تكون واقفة تشاركها المكرفون...
ف أنا مش فاهم الحقيقة ..هل دى رغبة المرحوم محمود الشريف الملحن ؟..ولا ده غلطة مهندس الصوت..لأنه بتلاحظ ساعات الكمنجة بتغطى على صوت شادية...
احبائى
اغنية شادية
حبة حبة ياحبيبى
اقدمها لخىالعزيز عام المنشاوى .. اولا نفتكر الاخ العزيز المرحوم نور الصباح الله يرحمه ويسكنه فسيح جناته ... ام عن السؤال بتاع عازف الكمان كان لازق فىالميكروفون وصوته واضح جدا الكلام ده كان بعد الصولو فى موسيقىالكوبليه الاول وفى لازمة الانتظار وتلاحظ ان صوت اكمان ما ظهرش بعد كده فى غناء الكوبليه .. اقول لك .. زمان كنا بنسجل الاغنية كلنا الفرقة مع المطرب .. واللى بيقود الفرقة عادة الى بيدون النوتة مش رئيس الفرقة يعنى رئيس الفرقةكان بيشاور فى الحفلة لكن داخل الاستوديو الادارة كلها والقيادة للى دون النوتة والملحن بيبقىموجود فىالكيوبك ( غرفةالتسجيل اللى بيبقى فيها المهندس واجهزة التسجيل )وبينه وبين الاستوديو شباك كبير زجاجى وبيسمع العزف عن طريق سملعة اد التلاجة ال 10 قدم وبيعلى الصوت جدا بحيث يسمع دبة النملة .. واى شىء متسجل بيبقى الملحن موافق عليه .. طبعا كنا بنسجل الاول المقدمة الموسيقية ولو حصل غلطة ولا اى حاجة بيقوفا التسجيل ونعيد تانى لحد ما تطلع 100 % وبعدين نعيد لازمة الانتظار الى هى قبل دخول المطرب .. واملطرب بيسجل الكوبليه مرتين تلاتة عشان هو يتسلطن ويقول احلى وبياخدوا احلى كوبليه منهم .. بعدين بنسجل الموسيسقى بتاعةالكوبليه الاول .. هنا فيه صولو كمنجة .. عازف الكمان الصوليست بيكون قاعد مع الكمنجات لكن عند الصولو بيقف وبيقرب من الميكروفون والمهندس طبعا بيخليه يعزف ويظبط مكانه يقف فين بالظبط .. ونبتدى نسجل الموسيقى .. بعد ما عازف الصولو عازف الصولو والفرقة كملت الجملة الىبعد كده ( اكلام ده فى اللحن ده فقط طبعا ) عارف الصولو عزف مع الفرقة الجملة الى بعد كده وهو واقف مكانه بالطبع صوت اكمان حايبقى ظاهر اكتر من كل الكمنجات لأنه ما يقدرش يرجع ويقعد مكانه مع الكمنجات لأن الميكروفونات الحساسة اوى حاتطلع انفجارات .. وبعد ما الملحن بيتأكد ان الموسيقى بتاعة الكوبليه اتعزفت 100% الفرقةبتدخل علىاول الغناء .. هنا بيقوف التسجيل والمطربة تقف على ميكروفونها والفرقة بتعيد لازمةالانتظار تانى والمطربة تغنى وهلم جرى .. بالطبع هنا كان عازف الصولو قعد مكانه لذلك تلاقة صوت اكلمنجات كلهم مع بعض .. امتى ممكن يحصل الموضوع ده ك غلطة .. فى الحفلات .. لأن بيتحط الميكروفونات على المسرحوحسب خبرة المهندس اللى لازم يكون هو اللى متعود يسجل للفرقة دى يالذات عشان بيحط الميكروفونات بعد ما الفرقة تقعد ورا الستارة وهو عارف طبعا الاورج مثلا صوته عالى بيخفض صوت الامبليفاير بتاع الاورج والجيتار الى رقم ( 1 ) عشان يبقى اد الكمنجات والميكروفونات بيبقى عليها ارقام وهو لما ينزل على الميكسر تحت بيخلى المساعد بتاعة يتكلم فى كل ميكروفون وهو يظبط له الصوت وزى ما قلت لازم بيبقىالمهندس هوهو اللى بيتعامل مع الفرقة دى .. يعنى حافظ يحط لهم الميكرفونات فين وازاى ويفتح كل ميكروفون اد ايه ولازم يبقى لماح جدا جدا اول ما الفرقة تبتد تشتغل يعنى لو فيه ميكروفون عايز تعليه شعرة او تخفضه شعرة فى ثوانى بيعدل .. ولما المطرب يغنى بياخد باله ان الفرقة ماتبقاش عالية عليه وهكذا .. اما نصيب الاسد من جودة تسجيل الحفلات كان الست ام كلثوم طبعا لأن كان لازم الفرقة تروح يوم الحفلة الصبح وتتعمل بروفة سريعة فى سينما قصر النيل اللى كان فه ميزة خطيرة وهى بنوار مخصوص للأذاعة يعن غرفة مغلقة المهندس بعد ما يحط الميكروفونات ويظبطها بيدخل ويسمع البروفة من الغرفة دى وكأنها استوديو ف الاذاعة يعنى لو اى حاجة عايزة تتظبط وبالذات فى الحفلات الاخيرة لما دخل الجيتار والاورج والساكس والأكورديون طبعا كل دول كانوا عايزن حرفيةاوى اوى ازاى تسمعهم حلو وبالذات عشان الست ماكانتش تحب ميكروفنات كتير ع المسرح .. وعبد الحليم بقا يعمل زيها بعد كده كنا بنزوح نادىالترسانة ونعمل بروفة اما يوم الحفلة الصبح او الليلة الى قبل الحفلة والميكروفونات تتحط ويتعلم مكانها والمهندس يسمع البروفة ومعاه ورقة بيكتب فيها كل ميكروفون مكانه فين وفى الميكسر يفتح له على كام بحيث ان ماتحصلش فضايح فى الحفلة .. اللى بيتظلم المطربين الصغيرين يعنى بيبقى التركيز على المطربين الكبار وفى الحفلة مع مطرب صغير ممكن صولو كمنجة ماتلاقيش حاجة او المهندس على ما ياخد باله يكون نص الصولو طار او تلاقى الايقاعات واكلة الكمنجات مع اطيب تحياتى
مساء الخير استاذ عادل
شريفة فاضل غنت من الحان العبقرى بليغ حمدى اغنية اه يا المكتوب
وانا من محبين بليغ والحانه كلها سواء الحانه لام كلثوم او عبدالحليم او نجاة او العزبى و رشدى وغيرهم كثيرون
وحتى الان لم يتفوق عليه ملحن فى جمال الحانه
ارجوا من حضرتك تدوين النوتة الموسيقية لها
احبائى ..
افتخر بأنى قد دونت اغنية عبد الوهاب ..
الكرنك ..
طبعا الاغنية دى مش اى حد يقدر يدونها ولا يعزفها او يغنيها او حتى يسمعها .. انا بدون فيها من اكتر من شهر يعنى بكتب شوية واركنها لأنها بتحتاج مود عالى جدا جدا مش زى اى اغنية .. يعنى صعوبتها الشديدة ان 80 % منها ادليب وده عشان يطلع بدقة لازم السطر الواحد بياد وقت طويل .. كان احساسى ان مش اى ح حايقدر يتعامل معاها بيعطلنى لأن دى متنفذة قبل استعمال التدوين .. يعنى اى اغنية اعزفت واتسجلت بالنوتة بتبقى اسهل من الى بدون نوتة لأن الى بنوت بتبقى مقننة يعنى فيه زمان حد قبلى ظبتها .. لكن الى بدون نوتة وده عبد الوهاب يعنى بيبقى صعب جدا جدا تقنينها للكتابة لأن مستواها بيبقى اعلى بكتير احيانا من حروف النوتة ... كمان ان من الصعب اى مطرب يقول انا مطرب انه يؤدى هذه القصيدة .. وبالذات الاعجاز اللى فى الجزء بتاع انا هيمان .. يعنى لازم الى يغنيها يكون حافظ اللى عمله عبد الوهاب صم .. واذا حب يجود مايقدرش يقول من عنده اكتر من 10% لأن اللىعمله عبد الوهاب اسمه عندنا اداء اعجازى .. ومش ارتجال ده مدروس بدقة متناهية يعنى كأنها عمارة مبنية ما ينفعش تعدل فيها او معادلة كيماوية ما ينفعش تكتب اى حرف فيها غير الصح لذلك انت لو عدلت اى تعديل حايشوه اللى عامله عبد الوهاب .. انا تعبت نفسى ودنتها وانا عارف ان يمكن 5% من الرواد فى اى مكان بيستعملوا النوت بتاعتى ممكن يقدر يشتغل فيها واناطبعا لو افدت واحد بيها او واحد فقط احتاجها ولقاها اكيد ده يكفينى .. وعلى الاقل انا مدونها للذكرى والتاريخ .. مع اطيب تحياتى
الف الف شكر لك
على تدوين رائعه عبد الوهاب التاريخيه والاجتماعيه وعلى مجهوداتك كمحب ومدون لعبد الواب
واتمنى منك ان تكمل رائعته الجندول ،وانت كتبت منها 3 صفحات وليست كامله
امل ان تكملها من اجل الجميع والتاريخ
مجهودات وعلم وتاريخ يسجل باسمك د عادل صموئيل
وفقك الله وعائلتك ومجتمعك الموسيقي
وكل عام وانت بخير