طلبات نوتة أ / عادل صموئيل الجزء الثانى

[عادل صموئيل]

احبائى
اقدم لكم اغنية من العيار التقيل واهديها لأخى العزيز المنير
اغنية عبد الحليم حافظ وبليغ حمدى

ياليالى العيد

الاغنية دى ممكن ماحدش يعرفها غير اهل المغرب فقط لأنها معمولة خصيصا للمغرب ولجلالة الملك المرحوم الملك الحسن الثانى رحمه الله .. طبعا فيها شغل متميز بيبدأ من الايقاع فى المقدمة
فيه ملحوظة ان فيه اغانى كتيرلكل العمالقة لكن مش معروفة وده سببه انها كانت بتتعمل لدولة معينة او لإذاعة دولة معينة وتعتبر محلية .. لكن مع وجود النت والدنيا كلها اتفتحت على بعض ابتدت الروائع دى تنتشر
انا منزل لكم ملف صوتى للأغنية طبعا عشان اللى ما سمعهاش يعرفها
مع اطيب تحياتى

[منذر44]

الله الله يا استاذ عادل اغنية رائعة وتدوين رائع
عندما سمعت هذا اللحن الرائع احسست بروح بليغ حمدي تنساب بين النغمات كما ان اداء عبد الحليم محلق في الفضاء

شكرا لكل من ساهم في اخراج هذه التحفة الفنية للنور للخلود

[عادل صموئيل]

احبائى
انا دايما لما بسمع حاجة حلوة بحب انزلها لكم

اليكم

تتر مسلسل حب للإيجار التركى

مع الملف الصوتى للى مايعرفوش الجملة جميلة اوى
مع اطيب تحياتى

[عادل صموئيل]

احبائى
اليكم اغنية من العيار التقيل جدا ونادرة جدا انا شخصيا اول مرة اسمعها
اغنية لمحمد عبد الوهاب

اقبل السعد

دى اغنية وطنية بالطبع ماحدش يقدر يحدد اتعملت امتى ... بس انا لما دققت فى الكلمات لقيت ان بيمدح فى الحاكم اوى وانه من سلالة كبيرة ... وده كان من الصفات اللى بيمدحوا بيها الملك فاروق .. يعنى لازم تقول انه ابن الاكرمين ... ومن نقاء التسجيل انا اقول انه بعد سنة 1947 او 1948 ... لأن فى مطلع الاربعينيات كان التسجيل بيبقى ردىء ومشوشر من الاسطوانات الحجارى القديمة وحتى كمان بيبقى فيه قفلة وش للوجه الاول من الاسطوانة لازم يقطع عندها او يكرر حاجة مالهاش لازمة ويعمل قفلة ...لكن واضح من النقاء انه مسجل على شريط ... انا قبل التدوين اهم حاجة لازم اتأكد من البيتش ... يعنى النغمة اللى بكتب منها الاغنية او الدرجة ... ولازم اتأكد منها كويس وعندى برنامج صغير اسمه بيانو بيطلع لك ع الشاشة كى بورد بسمع جزء من اللحن واتأكد من نغمة البداية وعند بداية الجملة اللى على الايقاع بادى من نغمة صول ... والمقام كرد على النواه ... بعد ماخلص الاغنية لقيته قافل على نغمة دو وكرر الجملة بتاعة المقدمة واللى هى نفسها موسيقى الكوبليهات وكل مرة كنت بعمل سينيو ... بالطبع اى حرف فى الاغنية لازم اتأكد منه لقيت بادى الجملة من درجة دو ... بالطبع اسقط فى يدى .. لأن حسيت انى ماشى غلط وبسرعة جبت الاغنية من الاول وتأكدت انها من صول ... طيب ازاى يبدأها من دو ... وبعدين هو عمل مقام حجاز كاردورد وعزف الجملة وبعدين قفلها يعنى مش قاصد يوصل لحاجة ده بالعكس عمل شىء مخالف للقواعد ... يعنى هو كان ماشى كرد النواه الطبيعى انه يقفل كرد النواه ... ولكن طبيعة معرفتى بعبد الوهاب انه لازم يعمل فى كل اغنية اختراع او شىء بيحرص عليه عشان الفرقة تقول بصوت عالى ما يساوى كلمة wooooooooooooooow بالعربى فيه شى مهم لما تشوف النوتة فيها ادليب وبعدين على الايقاع ... الجملة بتبدأ واسعة وعريضة كتبتها على سرعة 90 وكانت ماشية .. لما دخلنا على نهاية الجملة فيه حلية .. بس مش حلية زخرفة يعنى ممكن اتجاهلها والعازف وهو بيعزف بيعملها .. ولكن حلية من صلب الجملة وبتتكرر زى ماهى ... ملحوظة حليات الزخرفة لما بتتكرر العازف ممكن بيعمل حاجات تانى .. لكن لما تتكرر زى ماهى بيبقى اللحن كده وبالطبع ما اقدرش اتجاهلها ... استمريت فى المذهب اكتب وفى سرعة 90 لحد ما جيت عند المازورة لقيتها حاتبقى صعب اوى اوى والهواة مش حايعرفوا يقروها علما بأن المحترفين عادى جدا ... توقفت وعملت نسخة جديدة من الملف وعملت طريقتى فى التبسيط ( مدرسة عادل صموئيل ) وكتبت من اول الايقاع بسرعة 130 ... نظرا لن اللحن كله صعب بعد كده وفيه تفعيلات دقيقة فى سرعة 90 حاتبقى علامات معقدة ولكن فى سرعة 130 حاتبقى سهلة جدا وانا طبعا يهمنى الللحن من اوله لآخره يتعزف .... فيه حاجة تانية كمان ... انا مش بكتب اللحن وخلاص ولكن هو رايح لمين او مين يستفيد منه ... اللحن ده بالنسبة للمحترفين .... مالوش قيمة ولا يساوى شىء ... لأن المحترف بياخد حاجة يشاغل بيها او يعمله ف حفلة وده اغنية وطنية قديمة وللملك فارق وعمر ماحد يطلبها او يعزفها ف حفلة ده ناهيك على ان ماحدش يعرفها اصلا .... لكن اللحن ده من وجهة نظرى حرام طبعا ماحدش يعرفه يعنى اى جملة واحدة لعبد الوهاب كنز فكيف يكون الحال لما تكون اغنية معمولة للملك ( شغل ملوك يعنى ) وكل ما جلالة الملك يتبسط كل ماتكون النفحة تقيلة ... واصرارى على ان ادونه بالدقة المتناهية لأن فيه تكويلات خطيرة ... يعنى لو الفرقة الماسية كانت حاتعزفه مع عبد الوهاب كان مش مهم الدقة المتناهية اوى اوى لأن المطرب شغلته الغناء ويعمل زى ماهو عايز لكن الدقة المتناهية لازم تكون فى اللزمات اللى الفرقة بترد عليه ... لكن هنا انا التزمت بالدقة المتناهية من اول اللحن لآخره عشان توثيق اللحن اتمنى يعجبكم وبالطبع لازم تسمعوا الملف الصوتى عدة مرات قبل االشروع فى العزف وهو موجود فى الطلب للنوتة وانا دونت منه
مرفق مع النوتة الاصلية نوتة تجربة عشان تعرفوا الفرق
مع اطيب تحياتى

[منذر44]

استاذ عادل اقبل السعد علي وعلى عشاق الفن الاصيل بهذا الانجاز الرائع
لا بد ان فنان الاجيال عبد الوهاب لو كان بيننا الان لشد على يديك وبارك جهدك
شكرا لك من القلب لتخليدك الفن الاصيل وتلبية طلبات عشاقه
مع اجمل تحياتي
وهذا رابط اغنية اقبل السعد لمن يحب
http://www.sama3y.net/forum/attachment.php?attachmentid=390003&d=1509767133

[المنير]

السلام عليكم
أخي و أستاذي الغالي عادل صموئيل: و الله لو جئت إلى المغرب لاستقبلناك استقبال الرؤساء. و الله لن انسى لك هذا الجميل ما حييت.
اخى العزيز اشكرك لذوقك وخيرك سابق

مرسل ملف مضغوط فيه الملف الانكور ميدى ولكن خلى بالك الانكور مش بيغنى النغمات الشرقية ومش بنرجع السنيو
مع اطيب تحياتى عادل صموئيل
ملحوظة مرفق ملف للثلاث اسطر الاولى بسرعتهم الطبيعية لأهم بسرعة 130 وباقى الاغنية بسرعة 90 ولو عملت السرعة 130لأختلفت سرعة كل الاغنية لذلك حبيت انزل الثلاث اسطر الاولى لوحدهم


أرجو منك الفايل midi.

[كمال العرباوي]

صباح الخير استاذ عادل

وجدت رابط يوتوب لأغنية أقبل السعد

يزعم صاحبه انها عام 1945 بمناسبة زيارة الملك السعودي سعود بن عبد العزيز


https://www.youtube.com/watch?v=ObgFstDBCoY

[عادل صموئيل]

المشاركة الأصلية كتبت بواسطة كمال العرباوي

صباح الخير استاذ عادل

وجدت رابط يوتوب لأغنية أقبل السعد

يزعم صاحبه انها عام 1945 بمناسبة زيارة الملك السعودي سعود بن عبد العزيز


https://www.youtube.com/watch?v=ObgFstDBCoY

اخى العزيز
هو اول حاجة طلع تخمينى صح ان الاغنية اتعملت فى النصف الثانى من الاربعينات ... بس حكاية زيارة الملك السعودى دى مش عارف لكن هو فى الكوبليه التانى ذكر كلمة الرياض ... انا طبعا ماكنتش موجود وقتها لكن الملك سعود ملك السعودية زار مصر فى وقت كنت انا موجود فيه ايام الرئيس جمال عبد الناصر
مع اطيب تحياتى

[أحمد البستاوي]

الأستاذ عادل صموئيل ودانه تاقل بالذهب و الذهب شوية عليها و الله .. الأغنية ذكرها فيكتور سحاب في كتاب السبعة الكبار في الموسيقى العربية ص 214 , في قائمة الأغاني الوطنية اللي غناها محمد عبد الوهاب في العهد الناصري .. و أنه غناها سنة 1954 , عند زيارة الملك سعود رحمة الله عليه لمصر , و الأغنية من كلمات مصطفى عبد الرحمن ..
هنا بأه يبان الفرق بين الودان المحترفة ووداننا إحنا .. شوف مثلا الأستاذ عادل ممكن ما يكونش عنده خلفية بملابسات الأغنية و تاريخها .. الأغنية نادرة و غالبا ما أتغنتش بعد المناسبة دي .. لكن الأستاذ عادل صموئيل قدر يحدد تاريخ الأغنية 1947 أو 1948 , لأنه عارف أن محمد عبد الوهاب ما غنّاش حاجة للملك فاروق بعد حرب فلسطين .. طبعا التحديد الزمني بتاع الأغاني دا شغلة مؤرخين الموسيقى , و دا ممكن يكون بعيد شوية عن مجال اهتمامه الأساسي اللي هو الممارسة العملية العلمية , و خاصة أنها حاجة هو ما حضرهاش .. لكن ما شاء الله عليه ودانه لقطت طبيعة التسجيل و جودته و قدر يحدد منها مدى زمني قريب جدا للأغنية .. اللي محدش أصلا ح يعرف مكانها التاريخي الدقيق إلا لو قعد يمقق عينيه في الكتب ..
أستاذ كبير و سمّيع خبير أنت الله يا أستاذ عادل .. أرفع لك القبعة ..

الاخ العزيز
اشكرك لذوقك وتفهمك
هى اولا المشكلة ان الاغنية نادرة جدا جدا يعنى انا سخصيا بكل ماتعرفه عنى من خبرة وتاريخ ... الخ ... اول مرة اسمع الاغنية .. ده معناه ان قليل جدا اللى سمعوها او ان الاغنية اتكنت فى مكان خفى ماحدش وصل له بسهولة ... وعشان كده انا ما اقدرش اجزم ولكن كلامى كان من وجهة نظرة ... انا بفهم فى حاجات تانية غير الموسيقى يعنى فى التسجيل والتصوير والتحميض وكل ما يتعلق بالميديا او ما يتعلق بالصوت والصورة .. وتقريبا صرفت تحويشة عمرى على الاجهزة وكان عندى شغف كبير بتطور الاجهزة يعنى ابتدت ازاى ووصلت لإيه... اللى خلانى احصر الاغنية ( برضو من وجهة نظرى) قبل 1952 وقبل الرئيس عبد الناصر حاجة حقولها وبرضه من وجهة نظرى ... ان وقتها مع انى ماكنتش موجود فى الوسط الفنى انا مواليد 1950 ... بس كنت بسهر مع زملاء اشتغلوا مع عبد الوهاب واسمهان وام كلثوم والفترة دى كانوا فى عز شبابهم وطبعا بيتباكوا على الزمن ده زى ما احنا دلوقتى بنتباكى على الزمن اللى بعده .. وكان يكفى انك تنكش اى واحد فيهم ف الكلام ( زى ما بتعملوا معايا دلويقتى ) والواحد يتفتح يطلع الاسرار .. كان بعض الضباط الاحرار حواين جمال عبد الناصر مش بيحبوا ام كلثوم وعبد اولاهب كانوا بيحسبوهم بتوع الملك فاروق ... اللى كان فيه حرب ضروس عليه ولى سيرته وايامه فى الوقت ده ... لذلك كانام كلثوم وعبد الوهاب بيحرصوا على وضع اسم جمال او عبد الناصر فى اى اغنية وطنية يعنى زى ماتقول زيادة اعلان ولاء ... مع ان فيه حاجة خطيرة انا اعرفها وده فى كل دول العالم ان اى مطرب كبير اوى اوى لازم يغنى للحاكم ولو اتغير النظام لازم يغنى للحاكم الجديد ده عادى ... ومالوش علاقة بالوطنية ... لأن النظام بيحس انه شرعى اكتر واكتر لما اكبر مطربين بيحبهم الشعب يغنوا له .. بعدين انا اشتغلت مع عبد الوهاب ييجى عشرين سنة كان عشان يعمل اغنية بيلحنها مش اقل من 6 شهور لما يكون مستعجل او 4 شهور لما يكون الكوبليهات زى بعض ,,, هو ماقالش اسم الملك سعود صراحة بس فى الكلمات حاجة حلوة من الرياض ... يعنى ممكن يكون مجهز اللحن من فترة يعنى عنده علم بالزيارة من قبلها بكتير بدليل ان اللحن كان وقتى وما اتذاعش بعد كده بس خسارة طبعا يعنى اى حاجة لعبد الوهاب خسارة ان الناس ما تسمعهاش .. من ضمن القصص اللى انا شخصيا حضرتها كان ايام اتفاقية السلام كان عبد الواهب عمل نشيد لفايدة كامل اسمه ياسادات ياحبيبنا .. وهو عمله على حسابه الشخصى ... يعنى كتبناه وسجلناه على الفرقة الماسية وعمل الشيك بتاع اجر الفرقة الماسية بإسمى واعطاه ليا وانا فاكر انى صرفته من بنك مصر فى شارع عدلى ... الذكاء بتاعه .. ان يعمل النشيد ويتسجل ويتحط داخل استديوهات الاذاعة ع الهواء لو الاتفاقية اتمضت بمجرد الاعلان عنها يتم اذاعة النشيد فى كل الاذاعات طول النهار ويبقى عبد الواهب اخد سبق خطير لأن باقى الفنانين لو عملوا حاجة لسه حلنى ماتاخد اسبوعين ع ما تتعمل ولو الاتفاقية ماتمتش يخلوا النشيد لأى مناسبة ... وفعلا تمت الاتفاقية والنشيد اتذاع بعد اذاعة الخبر بدقيقة كان طبعا انجاز مع اطيب تحياتى

[كمال العرباوي]

الله عليك با استاذ عادل بحر كنوز واسرار

ياريت مرة على مرة تدلوا لنا بدلوك من بحر ذكريابك واسرارك

الف شكر