مدام تحب بتنكر ليه

**حسن كشك** · #1 01/08/2007, 13h37

ياجماعه الظاهر
اغنية رق الحبيب
مالكوش نفس ليها
طيب ممكن استبدل العزومه على اغنية
مدام تحب بتنكر ليه
يمكن نفسكم تنفتح وتشرفونى

**الألآتى** · #2 01/08/2007, 14h58

والله ياعم حسن .. أنا ماليش ذنب ..

أولاً : الأغنية لسه ماجاش عليها الدور .. فيه أغانى قبلها ..

ثانياً : أنا ماشفتش حد دخل وعلق على الأغنية .. وإحنا إتفقنا إنى أحلل اللحن فقط ..

**سامية** · #3 01/08/2007, 15h57

لا كده عداك العيب يا ابوحسام
وبعدين هو حسن كده دايما معترض ومش عاجبه حاجة :blink:
يا ساااااااااتر عليك يا حسن
فين يا عم كلمات الاغنية سواء هنا ولا هناك ؟؟
انت عايز تعزم وغيرك يدفع فاتورة الكلام واللحن كمان
يا بني اتعب شوية وهات الكلمات وقول الذكريات
وعرفنا ليه الاغنية دي وليه اللي هناك ؟؟
سيبك منه يا ابو حسام علشان يشوف شغله صح :blink:
مع خالص تحياتي

**حسن كشك** · #4 01/08/2007, 17h55

حاضررررررررررررررررررررررررررررر
فعلا عداك العيب ياعم محمد
والظاهر ساميه بيعجبها ويشجيها تحليلى ودموعى
لكن الاغنية دى اغنية عتاب جميل وعزة نفس عاليه
هاجيب الكلمات واحللها واسيبها لعمنا محمد لما يجى عليها الدور
يرضيك يا عم محمد الدكتور راضى يحبسنى فى الكراكون وكله من السوسه اللى اسمها ساميه

**حسن كشك** · #5 01/08/2007, 19h48

انا اعتبر هذه الاغنية من اجمل اغنيات ام كلثوم
وباعتبر ايضا انه لم تكتب كلمات ارق من تلك الكلمات فى تاريخ الاغان العاطفيه
وايضا كم المشاعر والجمال والشقاوه والشياكه فى هذه الاغنيه لم تتجمع فى اى كلمات اخرى فى تاريخ الاغنية العربية
واتحدى اى حد يجيب كلمات اتقالت بهذه الجمال والمعانى ويمكن الاغنية اللى بعديها فى الجمال بمراحل اغنية مضناك جفاه مرقده
كلمات الاغنية
مدام تحب بتنكر ليه
دا اللى يحب يبان فى عينيه
***
تصد عنى وتهجرنى واكلمك تهرب منى
وان غبت يوم تسأل عنى
واعرف هواك ساعة لقاك من طول جفاك
واللى يحب يبان فى عينيه
مدام تحب بتنكر ليه
***
لو كنت عاوز تراضينى
وتصالح النوم على عينى
كنت اشتكيلك تواسينى
وتشوف عنيا راضيه الاسيه
تعطف عليا
واللى يحب يبان فى عنيه
مدام تحب بتنكر ليه
***
لكن فؤادك يهوانى
واعرف هواك من وجدانى
هو انت تقدر تسلانى
وانا بين يديك اشكى اليك
واشوف عينيك
واللى يحب يبان فى عينيه
مدام تحب بتنكر ليه

تعالوا بقى
بس تحذير لكل السمعيه وحبايبى
اسمع الاغنية دى فى حاله لما يكون بينك وبين اللى بتحبه خصام خفيف اوى وهو معاك او فى بداية حب وهو معاك برضوا
لكن احذركم لو سمعت الاغنية دى بعد فراق او مش حبيبك معاك حتموت حتموت حتموت
وقد اعذر من انذر
الحاجه الجميله فى الاغنية دى انك ممكن تقولها لحبيبك
او تتخيل حبيبك بيقولهالك
والاتنين حلوين
المهم
مدام تحب بتنكر ليه
يا سلام سؤال جميل جميل تخيل انت قدام حبيبك الخجول او الغضبان اوالتقيل
وبتساله السؤال ده سؤال صريح وجميل اوى اوى هو فيه اجمل من كلمة باحبك لما تقولها وانت خارج عن الزمان والمكان والدنيا وبتبص فى عنين حبيبك او وغرقان فيهم وحبيبك غرقان فى عينيك
ولما الحبيب مايرودش
تقوله بكل رقه
دا اللى يحب يبان فى عينيه
طيب بالذمه هايعمل ايه ما خلاص عنيه فتنت عليه
ويبدا سيل العذوبه واللوم والعتاب الشيك
تصد عنى وتهجرنى واكلمك تهرب منى
قاعد وانت سرحان فى عنين حبيبتك وتلومها وهى طبعا بصه فى عينيك وعامله تقيله وبتلومها وتقولها
كل ما اقرب منك تصدينى وتبعدى عنى ولما اجى اكلمك واقولك اللى فى قلبى تهربى منى
حلو اللوم الشيك الرقيق ده
وتسكت هيا وتفرح انك حاسس بكده وانها تقيله اوى وانت بتجرى وراها
تروح انت مديها المفاجأة
وتقول طيب ليه وانتى كده لما باغيب عنك بتسالى عليا حيرتينى
ولعلمك باه يا حبى كل ما بنتقابل بتتعمدى تعاملينى بقسوه وبجفاء بعرف انك بتحبينى اوى قد فسوتك
طبعا بعد كده الحبيبه سلمت وقالت بحبك طبعا يا ابوعلى
تقول حسب كلام الاغنية
لوانا عزيز على قلبك وعاوزه تراضينى على اللى بتعمليه فيا وتخلينى اعرف انام
لما اشتكيلك قساوتك وحبى تسمعينى وتعطف عليا من الشوق اللى باين فى عينيه ومخلينى مستحمل قساوتك
ولما خلاص حن الحبيب تديله المصارحه الاخيره عشان يعرف انك كنت فاقسه خالص وانه دايب فيك لكن انت سايبه يتدلع
لكن انا عارف انك قلبك بيحبنى
وانا متاكد من حبك ليا من كل كيانى
هو انت تقدر تسلانى
يالهوى على الكلمه دى هو انت تقدر تسلانى يعنى بطل بقى ما انا لو بعدت عنك حتموتى
يا سلام على الشطره الاخيره دى ماينفعش معاها اى شرح
هو انت تقدر تسلانى
وانا بين يديك اشكى اليك واشوف عنيك
قالوا فيها اللى مش ها نعرف نقوله ولو بعد مليون سنه
عمركم سمعتم الاغنية دى وانت قاعد مع حبيبك او حبيبتك
واستمعتم الى رقة ام كلثوم فيها
طيب عمرك اتغنتلك الاغنية دى وانت زعلان من حبيبتك ومخاصمها
وهى بتغنيهالك عشان تصالح
وفى الشطر الاخير تقوللك
هو انت تقدر تسلانى
وانا بين ايديك
اشكى اليك واشوف عينيك
شعور جارف بالحنان والرقه والحب
اظن ان الاغنية دى هاتعيش لمليون سنه قدام
هديه وعزومه شيك لكل حبايبى الاعضاء
وخاصة استاذنا الحنون
مختار حيدر
اما د راضى المفترى بتاع العمبوكه وشريكته ساميه يالا يمكن يتعلموا الرقه ويتعدولوا معانا
واهديها الى عمنا محمد الالاتى اللى هايزيدها جمال وهى من الحان القصبجى لكن مش عارف كلمات مين
واهديها الى فريق المشاغبين رفاقى فى العمبوكه

**الألآتى** · #6 01/08/2007, 20h09

اقتباس:

المشاركة الأصلية كتبت بواسطة sinaiki

طيب عمرك اتغنتلك الاغنية دى وانت زعلان من حبيبتك

لا والله .. حبيبتى كانت بتغنيلى أغنية تانية .. بتقول :

أول ماشفتك حبيتك أه ياواد ياسمارة

لو مش عاجبك روح فى ستين خرارة

عجبى ..

**سامية** · #7 01/08/2007, 20h47

اقتباس:

المشاركة الأصلية كتبت بواسطة الألآتى

لا والله .. حبيبتى كانت بتغنيلى أغنية تانية .. بتقول :

أول ماشفتك حبيتك أه ياواد ياسمارة

لو مش عاجبك روح فى ستين خرارة

عجبى ..

يا خبر يا ابو حسام ... هي كانت بتحبك قوي كده ؟؟؟؟
تصدق لو قالتك روح في عشرين خرارة ولا حتى تلاتين خرارة .. كنت قولت انها مش بتحبك وبتكدب عليك
لكن ستين خرارة دي كده كانت بتموت فيك قووووووووووووي

**الألآتى** · #8 01/08/2007, 21h12

**mokhtar haider** · #9 02/08/2007, 00h55

الظاهر استاذ حسن حظرتك و كأنك ملاحقني في كل أغنية أحبها... لو سألوني ما هي ال5 أجمل أو أقرب أغاني كلثومية بالنسبة لي لكانت إجابتي بدون تفكير أغنية رق الحبيب
و اختيارك لأغنية ما دام تحب فكرني في السماع و ظروفه.... صح السماع ظروف... عرفت هذه الأغنية لأول مرة و طيلة سنوات طوال بصوت المطربة التونسية صافية الشامية و عرفها الجمهور الجزائري مثلي بصوت صافية طيلة سنوات لأنها كانت تذاع بصوتها.... لغاية سنة 1980 سمعتها بصوت أم كلثوم فكانت دهشتي كبيرة.
الظروف هي تاريخية.... الجمهور الجزائري لم يعرف أم كثلثوم الا في أغاني قليلة في الخمسينات في أواخر الفترة الاستعمارية... ما عدا في المناطق الشرقية القريبة إلى تونس يمكنها الاستماع إلى سهرات أم كلثوم
و بظروف مماثلة عرفنا أغنية الحب كدا بصوت الفنانة ملك قبل ما نسمعها بصوت أم كلثوم

فعلى العموم.... لم نعرف في الجزائر صوت و حفلات أم كلثوم ألا في سنة 64 حينما أذيعت لأول مرة أغنية أنت عمري في تسجيل حفل.... فكان يوم انفجار لا زلنا نحس بردوده إلى يومنا هذا... أما أنا فكانت بداية مشوhري مع صوت الست و رحت لوراء... الخمسينات و الأربعينات .... و ما إلى تلك المصايب
هذه على سبيل المثال إحذى القصص و الذكرايات مع إغنية أو مع فنان
مع أخلص التحيات

**حسن كشك** · #10 02/08/2007, 07h19

استاذى العزيز الغالى
مختار
والله انا ليا الشرف ان يكون مذاجى السمعى فيه شبه ولو بسيط من مذاجك
وكل مشاركه بتعملها معايا بتزودنى شرف
شكرا لمعلومة غناء ام كلثوم بالجزائر
وشكرا لاعطائى هذا الشرف