طلبات نوتة أ / عادل صموئيل الجزء الثانى - الصفحة 399

**hisham88** · #**3981** 15/04/2015, 15h20

مساء الخير يا أستاذ عادل ، وكل عام و حضرتك طيب
ياريت لو تكرمت تدوين أعنية شادية "يانور عينيا" الحان الموسيقار الكبير محمود الشريف

**سامى امين** · #**3982** 15/04/2015, 21h17

العيد السنة دى احسن من اللى فاتت كتير يارب العيد اللى جاى يكون خلص الارهاب من مصر خالص

مستر عادل عاوز اعلى الصوت فى انكور عشان الصوت فية بس واطى جدا

فى ذكرى صديقك حليم عاوزين تعلمنا نعزف عقبالك يوم ميلادك على فكرة انا بحب منير مراد جدا الراجل دة مش واخد حقة اتمنى تكون لحقتة او شفتة وتكلمنا عنة
اخى العزيز
من قائمة set up افتح القائمة دى لازم تكون النافتين اللى فوق فيهم زى ما انا عامل يعنى ده اسم كارت الصوت اللى عندى يعنى احيانا بعد تسطيب الويندوز مش بتلاقى الانكور بيطلع صوت اصلا بتفتح النافذة دى وتلاقى السطرين اللى فوق مكتوب فيهم none زى لاتنين اللى تحت وبتفتحهم من الدنب وتختار اسم كارت الصوت زى ما فى الصورة الرفقة وبعدين ماتنساش لما تقفلها تضغط على save preferences عشان التعديل يفضل معاك على طول اما لو غيرت حاجة فى السطرين دول والصوت ماعليش يبقى العيب عندك فى الويندوز مش الانكور لن الانكور صوته ثابت يعنى شوف اعدادات الصوت تكون حاجة فيها مش مفتوحة على الآخر اما عن منير مراد كان طبعا صاحبى وهو كان ابن نكتة ودمه اخف ملحن .. فى شارع عدلى الفرقة الماسية كانت فى عمارة المقاولون العرب فى الدور السابع جنبها محطة بنزين والعمارة اللى بعد البنزينة ساكن فيها منير مراد كنت بروح لو طبعا كتير بس للعلم هو اخد حظه يعنى 80 % من اغانى شادية عملها منير مراد ويكفيه انه لحن كذا اغنية من احلا اغانى عبد الحلم ولحن تقريبا لجميع المطربين بس هو كان بيميل الى الاغانى الخفيفة
مع اطيب تحياتى عادل صموئيل

**احمد نور احمد** · #**3983** 16/04/2015, 00h47

تحيه من القلب لجميع القائمين علي منتدي سماعي الرائع مشرفين واعضاء
وشكر خاص للاستاذ عادل صموئيل علي النوت البسيطه والجميله ومش عايز اقول الدقيقه لحسن تفتكروني قارئ فذ للنوته وانا علي قدي يدوبك يعني المهم اتمني لك يااستاذ التوفيق ومزيد من الابداع وكل سنه وانت طيب ويخليك لينا .
مع الشكر
احمد نور احمد

**توفيق مراد** · #**3984** 16/04/2015, 11h43

السلام عليكم
هل تفضلتم بكتابة نوتة الموشحين التاليينفي مقام الجهركاه :
- آه كللّي يا سحب تيجان الربى بالحلي
- باسم عن لآلئ
مشكورين على المجهوات المقدّرة
تحيّاتي للجميع

**سامى امين** · #**3985** 16/04/2015, 13h48

لو عندى فلوس لعملت لك قناة فضائية تراثية مستر عادل نشكر ربنا انك عندنا يارب تعيش 500 سنة

اغنية دبلة الخطوبة منير مراد وحياة قلبة وافراحة منير مراد اغانى قطقوطة فيروز معانا ريال منير مراد انت دونت الاغانى دى عدا معانا ريال قول رئيك يا مستر الاغنية دى هايفة وهابط ولا جامدة جدا لية الات النحاس زمان كانت مهمة انقرض النحاس حاليا

اخى العزيز اولا عملت ايه ف موضوع تعلية صوت الانكور ؟
زمان كان فيه انواع من الاغانى منها الاغانى الكوميدية اللى زى معانا ريال ودى لو دققت فيها تلاقى فيها كمية طرب وشغل مش موجودة فى اكبر لحن دلوقتى .. مع ان دى بتعترر الاغانى التهريج زمان .. لن المناخ كان زمان مش بيقبل اقل من جودة عالية جدا حتى لو الموسيقى سطر واحد .. اما موضوع النحاس .. اسأل والدك او والدتك فاكرين زمان طعم شوبربة الفراخ البلدى البيتى .. وايه الفرق بينها وبين مكعبات مرقة الدجاج ماجى .. زمان كان كلو طبيعى .. دلوقتى بنستغنى عن الطبيعى بأشياء صناعية يعنى فيه اورج بيطلع لك مئات الآلات الموسيقية ومنها كل الالات النحاسية بس طبعا الخبراء اللى زيى لما يسمعوها بيشمئزوا لأنه مش الصوت الطبيعى بتاع الآلة .. والتسجيل الناهردة بقا واحد بيلعب اور بيسجل عدة تراكات ويحط على كل تراك صوت ومنهم اصوات نحاس .. وهنا المنتج بيوفر الفلوس يعنى بيدفع لواحد فقط بدل ما يدفع ل 100 عازف ومش مهم ان شاالله الفن يتحرق ويولع ... يعنى زمان كان فيه صولو بزق .. معندناش فى مصر بزق كنا بنجيب عازف من لبنان وشوف تكابف الطيارة واقامته كاملة فى فندق خمس نجوم ولازم طبعا كمان نعزمه ونفسه وندلعه آخر دلع كل ده عشان يقول صولو طولة عدد من الثوانى يعنى شوف بيتصرف كام عشان تطلع الاغنية زى خيال الملحن دلوقتى قبضنى وخلصنى وزى ما يكلع المهم انو بيجيب فلوس
مع اطيب تحياتى عادل صموئيل

**مهدي01** · #**3986** 16/04/2015, 22h14

انشودة دينية رائعة ممكن تضع لمستك عليها يا استاذ

**سامى امين** · #**3987** 17/04/2015, 00h56

مستر عادل كلامك نفس مستوى العزف بتاعك بيمس القلب بسرعة جدا ومثقف جدا هى الثقافة الشخصية بتعلى عازف عن التانى

انكور ذى ماهو الصوت ماعليش هاغير نسخة الويندوز

من شوية كنت بشوفك وانت قاعد جنب عمر خورشيد فى اغنية جميلة مع فايزة احمد كانت بتقول ومعايا طيفك ليل ونهار معلش مش عارف اسم الاغنية ومش عارف لو دونتها او لاء مستر عادل هانى مهنى كان بيعزف كوردات مع عمر خورشيد لما بتكون الدنيا هايصة لكن لما الكمنجات بتهدى والايقاع مافيش كوردات من هانى ولا عمر هل يا مستر كان الكوردات بتتكتب لهم ولا من دماغهم
اخى العزيز
الكوردات من دماغهم يعنى هم بالخبرة بيبقوا عارفين ايه اللى يتقال ... لكن امتى الكوردات بتتكتب .. لما يكون اللحن موزع .. ويكون اللى بيوزع خبير فى الجيتار عشان يعرف يحط لو احلا كوردات ودى صعبة اوى يعنى الكلام ده فى اوربا لأن هناك خبراء فى الجيتار مع اطيب تحياتى عادل صموئيل

**وليد100** · #**3988** 17/04/2015, 01h23

السلام عليكم ورحمه الله
ياريت يااستاذ عادل تدون لنا اغنيه نسيتي حبي بعد اللي كان وهي من روائع الفنان القدير عبد الغني سيد
وهل يمكن ان تتكرر هذه الالحان ويقبل عليها الناس الان ام ان هذا يحتاج فتره طويله بعد عاصفه الحزم ضد كل ماهو اصيل واللي اجتاحت مصر من ايام مبارك الله يسامحه بقي
مع الشكر والتقدير لشخصكم الكريم
وليد

**وليد100** · #**3989** 17/04/2015, 01h26

الملف الصوتي

**احمد نور احمد** · #**3990** 17/04/2015, 12h54

الاسناذ عادل صموئيل
مارايك في تدوين اغنيه الحدود للفنان عمار الشريعي
وهل تروق لك هذه الالحان برغم انها ليست من اغاني الزمن الجميل
اخيك احمد نور