موسيقى القافلة

[غازي الضبع]

إيه يا عم سمعجي الجمال ده .. والإبداع ده
آه لو سمعك الصغير ولا بعرور
هايعمل معاك عقد لكل شرايطه ..
بس على فكرة الأغنية سهلة لإنها سيات
طيب أنا دلوقتي معايا 128
وريني بقى هاتغنيها إزاي

[سمعجى]

سهلة يا أستاذ غازى

الفيات الفيات الفيات
الفيات

أصلها على نفس الوزن

[حسن كشك]

ايه الروعه ياكيمو
والله انك فنان بجد
طيب لو كانت لادا
هاتقوله الادا ياواد انت الادا
بحبك والحب عباده
ياغازى فيه عربيه ماركتها
لامبورجينى
اشتريها وحيره

[غازي الضبع]

يعني عشان أحيّره ..
أروح أبيع اللي ورايا واللي قدامي واللي جنبي كمان
لامبورجيني مين يا عم حسن ..
إيه رأيك في الـ سبرانزا
ورينا بقى يا عم سمعجي هاتغني دي ولا اللامبورجيني إزاي ..

[سمعجى]

يا سلام يا أستاذ حسن ..
ما تلاقيش إلا اللامبورجينى ؟!
دى عربية بتاعة الناس اللى بالى بالك ..
و الحديثة منها بتبدأ من مليون دولار و طالع
عموما انت تأمر .. خـُد عندك يا عم .....

لامبورجينى ......لامبورجينى
وحسن ناوى يطلع عينى
سبنى احلم بيها و لو مرة
و من الحلم اوعى تصحينى
لامبورجينى لامبورجينى

لامبورجينى .....و لامبورجينـَّا
نِنـَّا و نامي يا شعوب نِنـَّا
يركبها عصابة و شافطينـَّا
و اذا قلت لهم كـَيفَ و ماذا
يقولوا لك : أ ُصبر .. تتهنـّىَ
ما تبحلقشى و سيبك مِنـَّا
و كفاية عليك تدخل جنة
و تمزمز فى الحور العينى
لامبورجينى ..لامبورجينى

لامبورجينى ......لامبورجينى
قولها يا غلبان اوعى تخاف
ناس تتعشى سمك بربونى
و ناس تتصبر برغيف حاف
خبيت همى جوة عيونى
وحمارتى العارجة تغنينى
لامبورجينى ..لامبورجينى

لامبورجينى .......ولامبورجيينـَك
و على الأسعار .. الله يعينك
مستورة يا رب .. و شاكرينك
و اكتبهـا لى ..أحج لبيتك
من ميـِّة زمزم تروينى
لامبورجينى ..لامبورجينى

لامبورجينى عند صاحبنا
إللى بيتعشى كاميلووني
و يمزمز بكاسين مارتيني
و احنا آخرنا خيارة وجبنة
يا مثبت لى عقلي و ديني
لامبورجينى ..لامبورجينى

هو غداه الباربيكيووو
و احنا نغنـِّي نقول ( ظلمووو
هو يقول ميرسى مسيووو
و احنا البيئة نقول ( أيّووو )
و اذا قلنا مش لاقيين عيش
حايوصـِّينا ناكلوا جاتووو
لا مبور جينـُه
على لامبور أهل اللي جابووو
جايز تلعب يوم البـِلية
و يحن زمانى اللى ناسينى
لامبورجينى ..لامبورجينى

لامبورجينى .....و لامبورجينهم
اضحك يللا و سيبك منهم
حَكمونا بالرأس مالية ..
و احنا على اللامبور حاسدينهم
ربك يستر و يعَـدّلها
و يدوم الإنتاج الصينى
لامبورجينى ..لامبورجينى

( كـُمالة زى بتاعة الكشرى اللى عاوز يعزمنا عليه الأستاذ غازى ) :

نقلاً عنى شخصيا ً :

لامبورجينى .. طب وايه يعنى
مش شرط زمانى يدلعنى
و كفاية سماعى يمتعنى
بأغانى و فنون تروينى
لامبورجينى لامبورجينى

نقلا عن الآنسة المكافحة
زيزى طوب الأرض :

لامبورجينى ركبها لى
يا مسمسم يا حليوة يا غالى
و على الديسكو نروح طوَّالى
و حاشيلك فى رموشى وعينى
لامبورجينى لامبورجينى

[حسن كشك]

والله مليون تحيه يا كمال ياعظيم
شفت يا غازى الواد العفريت
كموله انت بتكتب للسياره حسب قيمتها
دا انت مكتبتش ربع الكلام ده فى السيات
مش هانعرف نحيرك د انت اللى حيرتنا
وحتى الكلام ناقش قضايا ده ايه الابداع ده
ربنا يسهل لك كل حياتك زى ما مسهل ليك الكلام
تحياتى ياعظيم
يالله همتك يامايسترو ابو حسام
عاوزين نسمعها ملحنه

[محمود]

المشاركة الأصلية كتبت بواسطة سمعجى

بمناسبة ( السيات )
إهداء الى الأستاذ غازى
و متلحنة جاهزة على إيقاع ( العنب العنب العنب )

السيات السيات السيات
السيات

فراملها بتفـَوّت السيات
حوادثها بتمَوِّت السيات

لو ناوى تركبها السيات
روح ودّع احبابك السيات
و لو اتقفل بابها السيات
حسرة على شبابك السيات

السيات السيات السيات
السيات

يا محلا فـُسحتها السيات
للآخرة سِكـّتها السيات
خَرّت كمان زيتها السيات

السيات السيات السيات
السيات

يا مجمّعة الأحباب السيات
زقــّة ينوبكو ثواب السيات
شـُكمانها كله هباب السيات
آخرتها إيه يا عذاب السيات

أول كلامي سلام ..

لا مؤاخذة يا عم كمال بس دي عدت منك. هناك ما يسمى بالجو النفسي للنص. والعنب غير مناسب للجو النفسي الذي أحاط بمغامرة السيد غازي أكرمك الله وإياه. خاصة أن افتتاحية العنب من مقام الهبو وتحتاج لقعدة ونفس طوييييل. لذلك أقترح نسجها على متن قصيدة أخرى من بحر الحافر ومطلعها حاركب السيات .. آه .. واتسيِِت. (للأسف لا تسعفني القريحة من القصيدة الأصلية إلا بالشطر اليتيم الذي نسجت على منواله هاهنا.

كمل انت بقى

مع تحياتي

محمود

[سمعجى]

و مليون تحية ليك يا أستاذ حسن ، لردك على مداخلة
الأستاذ محمد تميمى بخصوص المقهى ، فقد تحدثت بالنيابة
عنـَّا ( ولا بلاش عنـَّا دى ) بالنيابة عنى ، و قلتَ ما كنت أود أن
أقوله ، أحلى سلام و تحية من دمنهور للإسماعيلية
و النقطة دى من سمعجى ( ورقة بمِيَّة ) لأبو على قلب الأسد و سمعنى سلام آمنت بالله

( لمن يهمه الأمر : سلام آمنت بالله المأخوذ عن الأخت لور داكاش
هو أشهر سلام فى الأفراح و الليالى الملاح المصرية )

[سمعجى]

الدكتور محمود رزق ..

أولا : حمدا لله على السلامة من السفر ، و أرجو ألا تكون قد عدتَ
فى سيارة سيات !
ثانيا : إنت بتنور جامد بعد إطلالك ( الشحيح ) علينا ، عشان
كدا ( الليلة عيد )
ثالثا : باعتبارى باسمع الأغانى الهابطة مجبرا ً ، لتواجدى فى الشارع المصرى على مدار الساعة ، فأنت تقصد رائعة بعرور
( حاركب الحنطور و اتحنطر ) ، وأنت تريد تـَسييت الحنطور
أو حنطرة السيات ، و من هذا المنطلق ، فصاحب السيات يقول

لزوجته قبل أن يغادر البيت :

أنا حاركب السيات
و اتسَييتْ
يا إمّا حارجع متعوَّر
يا إمّا حارجع لِك مَيِّت
و مش بعيد ربنا يستر
تلاقينى فى القِسم مبيِّت
حاتـْسَيِّت
حاتـْسَيِّت

[الألآتى]

بسم الله نبدأ فى تحليل موسيقى ( القافلة )

من أعمال عبد الوهاب الموسيقية ..

لقد أفاض الأخوة الزملاء فى الحديث عن موسيقى القافلة وعن تصور كل واحد منهم لمعنى المقطوعة ومايقصده المؤلف ..

والقافلة من أعمال عبد الوهاب الموزعة وهى قليلة بالنسبة لأعماله الموسيقية العديدة ..

وموسيقى القافلة تذكرنا بموسيقى أخرى لعبد الوهاب إستعمل فيها نفس الأسلوب فى المزج بين الموسيقى الغربية والشرقية ..

وهى موسيقى ( هدية العيد ) .. مع بعض الإختلافات ..

تبدأ القافلة بعزف منفرد لآلتى الكمان والأوبوا ( صولو ) .. وترد عليهما الوتريات بعرض الأوركسترا ليمهد بهم المؤلف للمستمع ليعرف نوع الموسيقى التى سيستمع إليها ..

وبعدها يدخل الإيقاع وهو إيقاع رباعى الميزان من نوع السوينج الغربى .. يصلح لهذا النوع من الأعمال ..

يدخل الإيقاع مصحوباً بالجيتار .. ثم تعزف الأوبوا جملة موسيقية هادئة .. وتعيد الأوبوا نفس الجملة مرة أخرى مع مصاحبة من الوتريات ( كاونتربوينت ) .. أى موسيقى خلفية هارمونية متعارضة ..

نسيت أن أذكر لكم أن المقام المستعمل هو خليط بين مقامى النهاوند والنكريز .. وأيضاً النواأثر ..

وجدير بالذكر أن إختيار عبد الوهاب لهذه المقامات جاء تمشياً مع موضوع المقطوعة .. الذى يتحدث عن قافلة تسير فى الصحراء ..

وسنلاحظ العجب فى هذا الجزء ومايليه من أجزاء .. فلقد إستخدم عبد الوهاب المقام الواحد من عدة درجات ..

فنجده يستعمل النهاوند من الدو .. ثم يستعمله مرة أخرى من الصول .. وهكذا مع باقى المقامات ..

ينتهى الجزء الأول بتصاعد درامى موسيقى من الوتريات بمصاحبة النحاس والخشبيات .

وهنا تحدث الإنتقالة بين المقامات التى تحدثنا عنها .. فنجده إستعمل نفس مقام النهاوند ولكن من درجة أخرى غير التى بدأ بها ..

فيعزف الناى صولو قصير تمهيداً للجزء التالى .. والذى يتحول فيه للموسيقى الشرقية .. مع إيقاع المقسوم أو البلدى أو المصمودى الصغير .. وكلها مسميات لإيقاع واحد رباعى الميزان ..

نسمع فى هذا الجزء .. القانون والناى يعزفا جملة موسيقية راقصة للتعبير عن الموقف الجديد ..

تشترك الوتريات أيضاً فى هذا الجزء بدور كبير .. حيث نسمع ردود من درجة الجواب ( الصوت الحاد ) .. مع ضربات من الألآت النحاسية .. ولا ينسى عبد الوهاب أيضاً الألآت الخشبية ( الفلوت والبيكالو والأوبوا ) ..

ثم تصاعد درامى أخر للعودة للجملة الرئيسة للعمل .. وأيضاً من درجة نغمية مختلفة عن الدرجة الأصلية ..

وبعدها ننتقل لإيقاع الفوكس .. وهو إيقاع بسيط وسريع .. حيث نسمع جملة جديدة .. ونسمع هنا حواراً بين الخشبيات والوتريات ..

ونعود مرة أخرى للجملة الرئيسية بنفس الطريقة ( التصاعد الدرامى الموسيقى ) .. تمهيداً للنهاية .. التى تتزعمها النحاسيات مع ضربات قوية من الوتريات والخشبيات .. تتصاعد الضربات حتى ينتهى العمل بنغمة من عرض الوتريات ..

فى الحقيقة .. هذه ليست أول ولا أخر مرة يستعمل عبد الوهاب أسلوبه هذا فى موسيقاه .. مع ملاحظة أن طريقة عبد الوهاب لم تتغير فى إستخدامه لتنقلات مقامية جديدة وغريبة وخارجة عن المألوف ..

والملاحظ أيضاً أن عبد الوهاب لم يستخدم أى مقامات شرقية فى هذا العمل .. برغم إستخدامه لها فى موسيقاه ( هدية العيد ) .. وهى موسيقى كبيرة وضخمة وتعتبر علامة من علاماته الموسيقية .. وربما يكون هذا سبباً فى عدم شهرة ( القافلة ) ..

على العموم .. لقد إستمعنا وإستمتعنا بعمل من أعمال عبد الوهاب المتميزة ..

أدعوكم لسماعها مرة أخرى .. وأرجو أن أكون وُفقت فى هذا التحليل المتواضع ..