المقامات الموسيقية - الصفحة 6

**الألآتى** · #51 03/08/2009, 07h49

اقتباس:

المشاركة الأصلية كتبت بواسطة إســـلام

الله ينور يا أستاذ محمد

ونحن بانتظار سماع باقي نماذج المقامات -بعد ما سمعنا نماذج من البياتي- للمقارنة بين المقامات وتلك المقارنة من شأنها تثبيت كل مقام في الأذن وفصله عن غيره من المقامات للقياس عليه فيما هو قادم عند سماع أغنيات لأول مرة.

ماتستعجلش ياإسلام .. إنت عارف إن هنا فيه عالم مخها تخين حبتين .. ياواش ياواش .

**الألآتى** · #52 03/08/2009, 07h55

اقتباس:

المشاركة الأصلية كتبت بواسطة غازي الضبع

سيب حكاية التفاعل دي عليا أنا

**
طيب .. احنا كده فهمنا إن التتراكورد أو جنس المقام هو نصف أوكتاف أو أربع نغمات
بس إنت ما جاوبتنيش
هل هم أول أربع نغمات في المقام
ولا أي أربع نغمات
ولا الأربعة اللي على اليمين ، ولا إللي على الشمال
يعني .. أعرف منين جنس المقام ؟؟

نقول كمان .. عشان الحبايب ..

بما إننا بنتكلم عن المقامات الشرقية .. خلينا فى الأجناس .. وسيبك من التتراكورد ده .. لأن ده مصطلح غربى ..

ماشى ..

المقام بيتكون من جنسين .. الجنس الأول يسمى الجنس الأصلى أو جنس الجذع .. خلاص .. طيب

وده يبدأ من درجة المقام الأولى .. وتسمى درجة الركوز .. يعنى نعد من بداية سلم المقام .. 1 ، 2 ، 3 ، 4 ..

ده جنس الأصل ..

بعد كده .. نعد من الدرجة الخامسة للمقام .. 1 ، 2 ، 3 ، 4 .. ده جنس الفرع

وصلت ولا لسه ..

**عثمان دلباني** · #53 03/08/2009, 08h51

وهذه نماذج صوتية للكلام اللي سبق الحديث فيه

السلم الموسيقي و نشوف ما المقصود بـ :

الديوان الاول (غليظ ) و الثاني( متوسط) و الثالث (حاد )

**عثمان دلباني** · #54 03/08/2009, 08h56

و هنا نسمع الى :

الجنس الاول : فا ، مي ، ري ، دو

الجنس الثاني : دو ، سي ، لا صول

السلم الموسيقي دو، سي، لا، صول فا، مي، ري، دو

**عثمان دلباني** · #55 03/08/2009, 08h58

نتعرف على الجنس الاول و الجنس الثاني من مقام البياتي ثم نموذج بسيط من أغنية من مقام البياتي

**unicorn** · #56 03/08/2009, 14h07

اقتباس:

المشاركة الأصلية كتبت بواسطة الألآتى

[/CENTER]

ماشى ياعم محمود .. نخش على الفايدة ..

الملف الموجود فى المرفقات .. فيه الطريقة إللى تخليك تعرف المقام من غير نوتة أو آلة موسيقية ..

........يا للهول
طيب شوف حتة التفاعل دى يا استاذ محمد أنا فهمت البياتى كدة ( طبعا ما فهمتوش لانه لسة ما اتقالش أكاديميا ) بس أقصد فى ودانى صح كدة ؟؟
النهر الخالد ( مسافر زاده الخيال......... ) بياتى
فكرونى ( كلمونى تانى عنك............. ) بياتى
جرَّبت زينة و عزيزة ما جوش معايا بياتى
دول مؤقتا لو ماشى كدة صح أقدر أعرف تانى
لو ماشى غلط بقى يبقى هابطل آكل فول أنا كمان

**عادل فؤاد رفاعى** · #57 03/08/2009, 15h58

مع انى مجال دراستى الهندسة الميكانيكية لكن بالصراحة الميكانيكا اسهل من علم الموسيقى.. الموضوع طلع صعب قوى

**غواص النغم** · #58 03/08/2009, 16h55

زمان سهرتي وتعيبتي وشيلتي
دي اغنية ست الحبايب اعتقد كلها بياتي
مش عارف ليه كل ما اسمع مقام البياتي يجي في بالي اللون البني والحجاز لون الرمال والنهاوند احمر على بمبي
وفيه كمان استفسار في اغنية فوق غصنك يا لمونة يوجد موال قبل الكوبليه الثالث سمعت مرة في اذاعة المنستير بتونس زمان ان هذا الموال اللي بيقوله فريد وسط غنوة فوق غصنك يالمونة بيدرس او بيتعلموا منه طلبة المعهد الموسيقي المقام
لأن فريد بيقول المقام وبيحافظ عليه ولا يخرج عنه .
انا نسيت مقام ايه لكن ممكن يكون مقام البياتي صح؟

سؤال تاني:
حضرتك قلت انه فيه مقامات فرعية
ماهي المقامات الأصلية وماهي المقامات الفرعية او ماهي الأجناس الأصلية والأخرى الفرعية _لو السؤال سابق لأوانه ممكن تؤجل اجابته _
وكم عدد المقامات اللي يقدر نميزها عن بعض؟يعني هل توجد مقامات نادرة او طريقها صعب تمييزه؟
وهل توجد مقامات غنائية مهجورة؟

وشكرا للفنان محمود سعد اللي بسببه سمعنا الدرس صوتيا
اما اسمع بقى ملفات الاستاذ عثمان
ابو حسام
فكرتني بفوازير الخاطبة لما نيللي تقول نقول تاني
ربنا يعطيك الصبر على اسئلتنا
تحياتي

**غازي الضبع** · #59 03/08/2009, 17h53

اقتباس:

المشاركة الأصلية كتبت بواسطة غواص النغم

مش عارف ليه كل ما اسمع مقام البياتي يجي في بالي اللون البني والحجاز لون الرمال والنهاوند احمر على بمبي

يا سلام عليك يا منعم
تصدق أنا كمان لما أسمع اسماء المقامات بييجي في ذهني بعض الألوان
بس مختلفة شوية عن ألوان مخيلتك
ولو إني ماليش في الألوان
يعني ماعرفش جل أسماء الألوان
لكن مقام نهاوند بيفكرني باللون اللي مقتبسه فوق ده

أما الحجاز ( وهو من أحب المقامات إلى قلبي ) بيفكرني باللون اللي باكتب بيه السطر ده
( ويا ريت حد يقوللي ده لونه إيه ؟ )

***

الله ينور يا شباب
زي ما توقعــت

**غواص النغم** · #60 03/08/2009, 18h11

اقتباس:

المشاركة الأصلية كتبت بواسطة غازي الضبع

يا سلام عليك يا منعم
تصدق أنا كمان لما أسمع اسماء المقامات بييجي في ذهني بعض الألوان
بس مختلفة شوية عن ألوان مخيلتك
ولو إني ماليش في الألوان
يعني ماعرفش جل أسماء الألوان
لكن مقام نهاوند بيفكرني باللون اللي مقتبسه فوق ده
أما الحجاز ( وهو من أحب المقامات إلى قلبي ) بيفكرني باللون اللي باكتب بيه السطر ده
( ويا ريت حد يقوللي ده لونه إيه ؟ )

***

الله ينور يا شباب
زي ما توقعــت

اللي فوق لون النهاوند اعتقد انه نهاوندي هذا لون البنفسج الخافت
اعتقد انه لونه فستقي
وهذا باذنجاني