طلبات نوتة أ / عادل صموئيل الجزء الثانى - الصفحة 268

**عادل صموئيل** · #**2671** 18/04/2014, 21h51

الاح العزيز المنير

اقدم لكم اللحن اللى انت طلبته

نجحنا فرحنا

فى الملف المضغوط نسخة من النوتة ونسخة ميدى انا عملتها يتغنى عليها يعنى بالتكرار لأنهم 3 كوبليهات بس انا امكانياتى هى الميدى اللى بيعملو برنامج انكور يعنى بيانو فقط

وطمنى مشى الحال

مع اطيب تحياتى

**المنير** · #**2672** 18/04/2014, 22h26

السلام عليكم
أخي العزيز الأستاذ عادل صموئيل:
- شكرا جزيلا عل الرد السريع .تدوين رائع كالعادة.
-اصبج الجميع يتسائل عن هوية "عادل صموئيل " بحيث اصبحت النوتات التي تكتبها مرجعا أساسيا في أغلب المعاهد بالمغرب.
في الحقيقة لم أكن أفهم معنى التبسيط الذي كنت تتحدث عنه لكن و بالتحديد في "الف ليلة و ليلة" و "مداح القمر" و "حديث الروح" و "للصبر حدود" اتضح لي الأمر بحيث كنت اتراجع بمجرد محاولة قراءة النوتة في كتاب أم كلثوم.
أحييك من كل قلبي و أتمنى لك دوام الصحة و العافية.
مع الأسف الشديد لا زال المدونون المغاربة يتحفظون على النوتات الأصيلة كأنها أسرار حربية: و النتيجة تدني المستوى الفني.
تحياتي.
هذا الفايل mp3 قمت بتصديره من

harmony assistant
اخى العزيز
اشكرك لكلامك الجميل وبالطبع اكرر شكرى مائة مرة لك للبرامج المفيدة جدا التى ارسلتها لى وافدتنى جدا فى تدوينى .. اما موضوع تبسيط التديون فهو كان رسالتى فى حياتى .. يعنى زمان كان فيه مدونين عظام واحسن منى واكبر قدراولكن كانت المشكلة انهم بيدونوا لعازفين كبار يعنى مهما كانت صعوبة النوتة بيقروها .. لكن انا كان حظى ان باللليل كنت بعزف مع العظام وفى الصباح مدرس موسيقى للمبتدئين .. هى جت القصة ان عادة مدرسى الموسيقى 90% منهم بيبقوا مدرسين فقط يعنى مستواهم محدود فى العزف وبيشتغلوا من البسيط المتاحوتلاقى خمسة % منهم ممكن يعزف لك حاجات محدودة متدرب عليها مائة مة من قبل .. لكن انا بعزف اى حاجة طيب ليه ما اخليش تلاميذى يعزفوا اكتر واكتر ومن هنا جاءت فكرة تبسيط التدوين لكن اهم شىء مع الحفاظ على كل حرف يعنى انا اتعودت فى الفرقة الماسية ان الغنية ال 17 صفحة مفيهاش حرف مهم محرف مش مهم كلو بنفس القيمة والحمد لله جاءت النتيجة اللى انت قلت عليها وهى انك تشوف النوتة شكلها سهل تبتدى تشتغل فيها وتمشى معاك وللعلمانا جربت تدويناتى المبسطة على فرق كبيرة والفرق كان رهيب يعنى نفس الاغنية لو صفحتين مثلا كانوا بيسجلوها فى الاستوديو فى ساعتين اما نوتتة المبسطة كانوا بيسجلوها فىربع ساعة والفرق طبعا كبير اولا العازفبيتمتع بشكل النوتة السهلة ومع الاعادة بيتسلطن ويبدع اكثر وبياخد نفس الفلوس اللى بياخدها فى ساعتين محهود مضنى فى ربع ساعة بدون مهجود او شغل ممتع .. اما الاغنية المرفقة فى الملف المضغوط انا منزل النوتة ممكن حد من الخوة الاحباء اللى بيععزفوا اورج يسجها باصوات احلى وايقاع ويرفقها
مع اطيب تحياتى واكرر شكرى عادل صموئيل

**علي حسين دراوشة** · #**2673** 19/04/2014, 00h40

السلام عليكم ورحمة الله وبركاته،

الاستاذ العزيز القدير عادل صموئيل شكرًا جزيلًا لك بدايةً،

لقد ساعدت وساهمت وأثريت هذا المنتدى الراقي وزدتَه رقيًّا،

بحثت عن هذه النوتة لهذه المعزوفة للعازف نصير شمّة على العود في كلّ مكان وللأسف لم يحالفني الحظّ في إيجادها،

المعزوفة هي "رقصة الفرس" ويقوم بعزفها في هذا الفيديو naseer shamma ----- ط±ظ‚طµط© ط§ظ„ظپط±ط³ - YouTube

شكرًا جزيلا لك وآسف على الإطالة
مع أطيب التحيّات
الاخ العزيز
اولا اهلا بك فى المنتدى
مش حتلاقى النوتة دى ابدا لنها من المستحيل تتكتب لأنو نصير شمة بيعزف بطريقة بيستعرض مهارته فى العزف يعنى انات تحس انو بيعزف مش ب 4 اصابع ولكن عشر اصابع وعشان حد يعزف نفس المقطوعة لازم يكون اولا بمستوى نصير شمة ويحفظها ويعزفها سماع وبرضو مش ممكن تطلع هى نفسها حتى نصير شمة نفسو لو عزفها عشر مرات بطريقته دى كل مرة حاتطلع مختلفة
زمان المتخصصين فى التأليف ده واهمهم فريد الاطرش وانا اشتغلت معه كان بيعمل حاجتين اما تقسيمة بالطريقة دى او استعراض مهارة ودى هو عارف انو هو الوحيد اللى يقدر يعزفها ويقول انا فريدالاطرش الوحيد .. او لو حب يعمل مقطوعة موسيقية تتكتب وحد تانى ممكن يعزفها انا كتبت لو كذا حاجة كان بيملينى ميلودى ولازم يكون مبسط جدا بحيث ان المدون يستوعب الجملة ويكتبها بعدين العازفين يعزفوها حسب شطارتهم .. كمان لما انت تسمع مثلا رقصة من موسيقى فريد لما بتسمعها بتحس بالجملة الموسيقية يعنى لما تمسمعها كذا مرة تحفظها لكن النوعية دى تسمعها ماتلقطش حاجة لأن هو بالإستعراض المهارى اللى بيعملوا بيشوش على الميلودى
مع اطيب تحياتى عادل صموئيل

**شاهين** · #**2674** 19/04/2014, 13h24

السلام عليكم
اضم صوتتي الى صوتك يا ريت لو استاذ عادل يدون لنا هذه المعزوفة و اعمال اخرى لهذا الفنان الكبير

**عاصم المنشاوى** · #**2675** 19/04/2014, 18h55

الأستاذ الكبير /عادل بك صموئيل

كل سنة وحضرتك وكل أقباط مصر وكل مسيحيى الشرق بألف خير وسلام وصحة وسعادة ...بمناسبة عيد القيامة المجيد ...وأعياد الربيع وشم النسيم...وذكريات زمان وحفلات الربيع وتنافس فريد وحليم ...وسعادحسنى والدنيا ربيع ....يارب بعودة الأيام....

اخى العزيز
كل سنة وانت طيب وكل المصريين والعرب بخير
اللحظة دى وانا بكتب بتذكر زمان كانت بتبقى ليلة البروفة النهائية بتاعة حفلة بكره بتاعة عبد الحليم .. كانت بالنسبة لنا اهم حفلة فى السنة بنبقى خارجين من الشتا وداخلين على فصل الصيف .. وكنت بجهز بدلة سموكن جديدة وقمصان من اللى قلبك يحبها وجزمة فرنيه جديدة ( مش عارف الفرنيه بطلوه ليه ) وكل ملحقاتها حتى الشرابات السوداء
كنات برجع من حفلة عبد الحليم تقريبا والشمس طالعة .. انا مش بخرج فى شم النسيم لكن بحتفل فى البيت اول ما ارجع تبتدى الطقوس الافطار كمية بيض اللى ملون واللى مسلوق .. وكانت ام الله يرحمها بتعمل لنا بيض محشى كان فوق مستوى الهبل .. انا بعملو دلوقتى .. طبعا الاخوة اللى متودين يتعلموا منى حاجات اكيد حيتساءلوا ايه مستوى الهبل
بنسلق عشرين بيضة بس يستحسن يكون حجمهم كبير .. بعدين لما يبردوا بنقطع البيضة بالطول نصفين .. بيكون عندنا عصاج يعنى لحمة مفرومة عليهاملعقة بصل وشوية بقدونس مفروم ويتحمروا .. بعدين بنسكر بيضتين ونضربهم مع بعض بنضع ملقعة من العصاج داخل نصف البيضة ومن البيض المخفوق بنحطو على حافة البيضة وبنلصق بيه النصفين مع بعض ويستحسن لما تقطع البيض نصفين تخلى كل وحدة مع نصفها التانى .. بنتركها شوية عشان تلزق
بعدين بنقلبها فى سائل البيض ونقلبها فى طبق بقسماط ونحمرها وبعدين ادعيلى
الكلام ده فى بياض البيض اما الصفار بعدين بنحمره فى السمن لوحده ... وماتقولش لحد ..
اما الظهر اكتر شىء اموت فيه الفسيخ والملوحة والبصل الاخضر والخس وكل مايخطر على بالك من الخضروات ..
بس طبعا لازم يتوفر مهضمات لأننا بناكل كتير اوى
اما هذه اللحظة وانا بكتب قدام بيتى مباشرة كنيسة مارجرجس بعين شمس اللى اتهاجمت فى العيد الماضى وحصل عندها حرب ... قدام الكنيسة كان زمان بتشوف الناس فرحانة بالعيد والناس لابسيناحلى حاجة .. واجمل شىء الاطفال بلبس العيد وعاملين شعرهم عند الكوافير وتوسع شوية زغاريد على صيحات ابتهاج على ضحكات على عبارات تهنئة وكلو منتظر اان القداس يخلص ويروحوا يفطروا لأن صايمين بقالهم 55 يوم وتسمع اصوات بمب هنا وهناك اما الآن فى هذه اللحظة مع الاسف انظر على الكنيسة كل دول جوا مرعوبين .. وامام الكنيسة 4 مدرعات جيش وكذا عربية شرطة تأهبا للى ممكن يحصل واللى حصل العيد الماضى .. وفى اى لحظة ممكن القداس يتلغى حتى قبل مايبدأ زى العيد الماضى والقس الاكبر يخلى الناس يروحوا ينفذوا بعمرهم وربنا يستر الساعة لسه العاشرة
مع اطيب تحياتى واعذرونى للفضفضة لنى مخنوق حبتين عادل صموئيل

**armendo** · #**2676** 19/04/2014, 19h56

اخى العزيز عادل صمؤيل

كل عام وانت واقباط مصر بالف خير بمناسبة حلول عيد القيامه المجيد وإن شاء الله عيد سعيد عليكم وعلينا وعلى مصر كلها.....اوعى تاكل فسيخ السنه دى كله مضروب !

اجمل التهانى لك بالعيد السعيد

احمد ( ارمندو )
اخى العزيز الف شكر
انا خبير فى الملوحة والفسيخ يمكن اكتر من الموسيقى شوية
والمعلومة دى مهمة جدا اقولها لكم الفسيخ المضروب ده بيبقى مع الباعة اللى بيمشوا فى الشوارع لكن المحلات المحترمة بتجيب الحاجات دى من مصادر موثوق بها وعادة اى محل فسيخ بيكون مفتوح من 200سنة يعنى بيبقوا ابا عن جدا فى المهنة .. اما الدخلاء على المهنة دى هم اللى بتيجى منهم المصايب .. اما المصايب نفسها بتحصل ازاى ؟ اقول لكم حصة ع الماشى الملوحة بتصنع فى الصعيد الجوانى من سمكة محددة الانثى اسمها راية واسمها كده لن فى ذيلها خط احمر زى العلم والذكر بتاع نفس النوع اسمو كلب وامسو كده لن لو اسنان شكلها متوحش حبتين .. وخبراء الملوحة المتخصصين اولا لازم تكون السمكة طازجة جدا بتتخلل بطريقة معينة وفى براميل خشب خاصة وبيتقفل فوقها كمية ملح سمكها عشرة سم وتتقفل تتبرشم يعنى وتحفظ سنة مثلا التميز الخاص فى سمكة الراية دى شخصيا انها خلاصة تجارب قدماء المصريين فى 7000 سنة يعنى السمكة الوحيدة اللى ممكن تتخلل وتفضل كذا سنة ماتتلفش بس بشرط تبتدى وتكون طازه جدا وتتخلل بالطرق الصح .. الخطورة بتيجة من الدخلاء يعنى ممكن عشان يكسبوا يجيبوا سمك مش طازة عشان يبقى ارخص كتير اوى اوى واقصد يعنى تجار السمك بيرموه اصلا والخطورة الاخطر انهم ممكن يستعملوا سمك تانى والناس مش فاهمة واى نوع سمك تانى ماينفعش يتخلل كده لنو بيتلف ماعدا السردين طبعا
اما الفسيخ بيتخلل فى نبروه بالذات من السمك البورى بس برضو الخبراء يعنى لازم يشتروا سمك طازة جدا يعنى احلى سمك من السوق ... العداة دى توارثناها عن جودنا القدماء لأن كان النيل زمان بيبقى فترة فيها سمك كتير وفترات بيبقى المية ناقصة لذلك كانوا بيخزنوا احتياجاتهم طول السنة من السمك المحفوظ
مع اطيب تحياتى ولو تحب ابعت لك اكلة حلوة
عادل صموئيل