رد: طلبات نوتة أ / عادل صموئيل الجزء الثانى
شكراً أستاذ عادل صموئيل على رد حضرتك .. بس طبعاً خسارة كبيرة أنه السنباطي والعندليب لم يتعاونوا في عمل
مشترك .. هو يبدو انه كان الأمر محتاج طرف ثالث يتدخل لإقناعهم بالعمل مع بعض لمصلحة الفن زي ما عمل الرئيس جمال عبد الناصر مع أم كلثوم وعبد الوهاب .. أنا اتفق مع حضرتك انه أسمهان وأم كلثوم خطين مختلفين .. أنا اعتقد انه الفن خسر كتير بسبب الحسابات الشخصية بين الفنانين والصراع على " الأنا"..
طيب أستاذ عادل صوت زي سوزان عطية ظهرت في وقت ما بعد رحيل عبد الحليم وأم كلثوم وكانت الساحة فاضية نوعاً ما من الاصوات الشابة الجديدة وكان بليغ ما شاء الله نجم قوي وكان في خالد الأمير والموجي والطويل ومحمد عبد الوهاب والسنباطي .. ليه ما حد عمل لها لحن قوي أو تبناها موسيقياً زي ما عمل بليغ مع ميادة وعفاف راضي .. هي تقريباً مالهاش غير أغنية واحدة مشهورة اسمها "تتاقل بالمال" وأغنية وطنية هي على لحن موسيقى هدية العيد (الجزء الشرقي -البياتي) لمحمد عبد الوهاب.. يعني أزي صوت زي كدة وسط هؤلاء العمالقة وتطلع بأغنية واحدة من كل الموال ده ..
كان أيه الخلل من وجهه نظر حضرتك؟
من وجهة نظرى السوق هو اللى بيتحكم فى الاعمال الفنية يعنى عبد الوهاب نفسه كان عرضة للموضع ده بمعنى ... مرة واحد سأله احنا استمتعنا جدا بمجنون ليلى وحضرتك قلت ان القصيدة او العمل الشعرى له بقية وممكن تتلحن حضرتك مالحنتهاش ليه ... قال انا مش بلحن من نفسى يعنى لازم حد يطلب منى الحن وانا الحن .. بمعنى حد بيدفع فلوس ... والمنتج هو اللى بيتحكم مين يغنى ومين ما يغنيش ... يعنى هو اللى بيتعاقد مع المطرب ... كان زمان فيه الاذاعة بتنتج اغانى بس كان معظمها اغنى فاشلة كان بيهرب منها كل من الملحنين والمطربين والمؤلفين وحتى العازفين ... ليه .. لأن كان فيه ميزانية سنوية وانت عارف ان دى حكومة وفيها روتين وتخلف طبعا ... الميزانية دى كانت تنتج اغنية واحدة فقط زى نبتدى منين الحكاية مثلا ... بالطبع ما ينفعش فكان لازم الميزانية تتقسم على خمسين اغنية والكل بيقبض ف كل اغنية ملاليم ... فكانت نصيب المطربين المعتمدين فى الاذاعة بس مالهمشحظ من الشهرة زى احمد سامى مثلا واسماء كتيركان الملحن لما بياخد ملاليم بيعمل لحن سريع كده ويخلص طبعا كان بيبقى لحن مالوش طعم وكلهم ملحنين صغيرين اوى طبعا .. وكانت الاغانى دى بتتذاع فى الفترة الصباحية اللى مفيش عليها اقبال كبير من المستمعين يعنى عمرها ماكانت بتتذاع فى السهرات مثلا وسوزان عطية من المؤكد انها عملت اغانى من دول بس بالطبع الشرائط متلقكة فى مكتبة الاذاعة ونادرا ما بتدخل فى قوائم الاذاعة .. بس بالطبع سوزان عطية كانت صوت له مميزاته يعنى مثلا اد اصالة خمسين مرة ... واقوى من كل الاصوات الموجودة حاليا ... بس حظها وحش ... وانت لما تتكلم عن الحظ الوحش تعالى اقول لك عن الكورال او الكورس اللى كان مع محمد عبد المطلب مثلا ... يعنى 3 رجال و3 سيدات ... لما تسمعهم فى حفلات عبد المطلب .. كان اى حد فيهم مطرب مطرب يعنى بمصطلح زمان ... ( لأن المصطلح ده دلوقتى بقا مضروب يعنى ) بس حظهم وحش ما لقوش حد يعمل لهم اغانى او يشغلهم ... واقول لك على سر ... لو حد بيغنى ومعاه فلوس او عنده حد مكمن يصرف عليه كان بيوصل ... يعنى عندك المطربة التونسية لطيفة اول اغنية عملتها كان اسمها ارجوك اوعا تغير ... هى صوتها حاد جهير او شرشوح يعنى ... مش الصوت اللى زى نوعية سوزان عطية ... بس رشت رشة جامدة على اللى بيعملوا خريطة الاغانى فى الاذاعات ... يعنى وقتها كنت تمشى فى الشارع اى قهوة مشغلة راديو تمسع الاغنية دى طول النهار واشتهرت بالطريقة دى
مع اطيب تحياتى
كل التحية والتقدير
التعديل الأخير تم بواسطة : عادل صموئيل بتاريخ 05/11/2017 الساعة 14h23
|