طلبات نوتة أ / عادل صموئيل الجزء الثانى

[عادل صموئيل]

احبائى
اقدم لكم

نشيد الجزائر

مع اطيب تحياتى

[مهدي01]

اذا ضاقت بي نوتة موسيقية فسبيلي استاذي الغالي عادل
اذا ارتجفت يدي و عسرت التي و وصعب سماعي فسبيلي استاذي الغالي عادل
اذا طلب تلاميذي انشودة وعجزت يدي عن عزفها فسبيلي اليها استاذي الفاضل عادل
ماذا اقول سوى : ادام الله عمرك وسفاك من كل سقم

اخى العزيز
يعنى كلامك الجميل لاتساويه كنوز الدنيا
المهم انا تحت امرك وامر كل واحد بيحتاج النوعية دى من الاناشيد .. طالما انها تكون سهلة فى التدوين ومفهومة .. يعنى النشيد ده مثلا من اول ما سمعته استوعبته وابتديت اكتب ما اخدش وقت .. الالحان الموزعة اوى يعنى التوزيع بيتداخل فى اللحن الاساسى مش بقدر استوعب اللحن الاساسى كمان الاغانى الحديثة احيانا بتبقى الموسيقى هلامية برضو مش بنفهمها يعنى اهم شىء : لحن واضح وميزان واضح انا احسه من اول وهلة
مع اطيب تحياتى وتحيا الجزائر العزيزة

[عاصم المنشاوى]

أستاذنا العزيز /عادل بك صمويل

سؤال يشغل بالى ...مالوش علاقة بالموسبقى ...ولكن بجانب مهم جدا يتماس معاها..وهو الجانب المادى .....كلنا كمتلقين للفن أو مستمعين ...لانرى الشق المالى فى المربع الظاهر لنا ...وهم الفرقة الموسيقية - الملحن - المؤلف- المطرب ...والسؤال دلوقتى ...مين اللى بيصرف على الأغنية ...بمعنى آخر من الذى يدفع نفقات مراحل الأغنية ....

مثلا ..أم كلثوم عجبتها كلمات الحب كله ...فأشترت كلماتها من احمد شفيق كامل ...- دفعت من جيبها الخاص أيضا لبليغ حمدى ؟؟؟؟....ثم قامت بتسجيلها للأذاعة ...هل هى باعتها للأذاعة؟؟؟...ثم تم طبعها على أسطوانات صوت القاهرة ...هل اشترت صوت القاهرة الأغنية من أم كلثوم وبالتالى هى ام كلثوم اللى بتدفع للعازفين بروفات الأغنية...وفى حالة لحن لعبد الوهاب - زى ماحضرتك قلت يصل العدد لخمسين بروفة - مين اللى بيدفع التكاليف دى ...من يمول ...وبعدين ...نيجى للحفلة ...يدفع الحاج صديق متعهد الحفلات لأم كلثوم تمن الحفلة ثم هى - أو مدير أعمالها- بطبيعة الحال من يحاسب الفرقة ....
طب بالنسبة لعبد الحليم يشترى موعود من محمد حمزة وبليغ وبعدين تبقى الأغنية ملكه هو ...يبيعها بعد كده ل "صوت الفن"...والحفلات يبيعها لمتعهد الحفلات ...وبالتالى هو اللى بيصرف على البروفات فى بيته ...وهل الحساب مع الراحل احمد فؤاد حسن بالبروفة ولاّ عالأغنية؟

من المعروف ان أم كلثوم وعبد الحليم كانوا بيصرفوا من جيوبهم على فنهم ...

لكن تعال للصف الأول زى وردة وشادية وفايزة ونجاة ...مين اللى بيصرف على الأغنية وبروفاتها هل هى شركة الأسطوانات أو شرائط الكاسيت فيما بعد ...ثم تبيع شركة الأسطوانات الأغنية للأذاعة المصرية ؟؟؟.وفى حالة الحفلة
كيف يتم تقسيم الأيرادات ؟.....

طب للصف التانى زى رشدى وعفاف راضى وقنديل وكارم محمود وعبد المطلب والعزبى مثلا ...هل دول برضو بيدفعوا من جيبهم لخمس ست بروفات مصروفات ايجار قاعة او استديو ...متهيألى لأ...ما اعتقدتش ..ولّا الحساب بيبقى أزاى ؟أم أن أعضاء الفرقة الماسية لهم مرتبات شهرية بغض النظر من عدد البروفات أو الحفلات ؟...هل يتحمل الراحل صلاح عرام أو أحمد فؤاد حسن تكاليف البروفات ...ثم يحاسب حضراتكم ؟؟...معلشى السؤال سخيف لكن بيميط اللثام عن نقطة قد تكون غامضة بالنسبة لنا ....

الشكر مقدما لحضرتك وتحياتى لكل الأصدقاء وعلى راسهم نجم النجوم نور الصباح سابقا عمنا الأستاذ /احمد عبد الله والصديق عمرو الهنداوى والفنان المختفى هيثم الصالحى .والدكتور محمد ابراهيم..

[salhi_haithem]

السلام عليكم و رحمة الله
الأخ العزيز عاصم المنشاوي شكرا على كلمتك حبيت أنوه أنه دخولي للمنتدى قل بحكم إني تقلدت مهمام كقيادي في صلب المكتب التنفيذي الوطني للمنظمة التونسية للشغل أشغل منصب أمين عام مساعد مكلف بالإعلام لمنظمة نقابية لذلك قل دخولي للمنتدى.
وطلبت من الأستاذ عادل نسخة لأغنية حيرت قلبي معاك على الدو لأن النسخة الموجودة فيها أخطأ في علامات التحويل حيث أنه الأستاذ عادل لما عمل نسخة من الري إلى الدو لم يغير بعض العلامات و شكرا جزيلا
أخوكم هيثم

[عادل صموئيل]

احبائى
اولا الاخ العزيز الحبيب هيثم الصالحى الف مبروك على المنصب وربنا يوفقك
بالنسبة لحيرت قلبى معاك انا مش لاقى ملف الانكور لأنها انا كاتبها من زمان اوى والبرامج اللى بتقلب ال pdf الى انكور عشان اشتغل فيها بصراحة لما نزلتها لخبطت لى الدنيا عشان كده دلوقتى انا منزل نسخ ويندوز جديدة ومش عايز انزلهم تانى يبقى الحل انى ادتبها تانى من اول وجديد على رى ثم اخد منها نسخة على دو وحتاخد وقت طبعا وان شاء الله مش مشكلة يعنى انت حاول تصلح العلامات اللى شايفها غلط بالقلم لأن المف بتاع الدو مش بيعتبر الملف الاصلى
مع اطيب تحياتى

[عادل صموئيل]

اخى العزيز عاصم المنشاوى
انت سألت فى موضوع صعب جدا ومتشابك لكن من حسن الحظ انك سألت الانسان الوحيد فى الدنيا اللى عاصر الموضوع ده .. وهو متشابك وملخبط عامل زى المكرونة الاسباجيتى لكن احساسى انه ممكن يثير اهتمام الكثير منكم .. ممكن اقول اللى يفتح بيه عليا ربنا
اول حاجة انتاج الاغانى اول حاجة محتاجين فلوس ... ومين اللى بيدفع الفلوس ... فيه حاجة اسمها صاحب الاغنية او صاحب المشروع .. وكمان فيه فرق بين التعامل من المطرب الكبير اوى والكبير والمتوسط والصغير ... ارخص حاجة لما الاذاعة المصرية بتطلب من مطرب اغنية يعنى مثلا من ام كلثوم اغنية ما ... يعنى مثلا مثلا زى اغنية عن الحج مثلا .. اولا بتكلم ام كلثوم وهى بتحدد المؤلف والملحن واجرها ... لو التلاتة وافقوا على الاجر اللى حددته الاذاعة وطبعا بيبقى مبحبح شوية .. بيبتدى الشغل على الفور بس طبعا بتبقى اغنية محدودة البروفات يعنى 4 او 5 ودى العازف مش بيقبض حاجة ع البروفات يعنى بيقبض حق التسجيل فقط .. وبيبقى اللحن ده ملك الاذاعة يعنى هى بعد كده ممكن تبيعه لشركة صوت القاهرة او لأى اذاعة دولة عربية ... اما الانتاج التانى بتاع الاذاعة .. بيبقى متحدد لها كل سنة ميزانية مبلغ ما لشراء اغانى ... طبعا هنا لو المبلغ ممكن يعمل 100 اغنية مع مطربين زى فايزة او وردة ممكن هم يعملوا شوية منهم كده وشوية مع المطربين الاصغر يعنى زى محمد قنديل وعبد اللطيف التلبانى .. الخ , لأن دول تكاليفهم اقل يعنى ممكن المبلغ الميزانية يعملوا بيهم 200 اغنية .. طبعا معظمهم بيبقوا يعنى حاجات اى كلام كده وبيتذاعوا فى الصبح ... اما الشغل التقيل يعنى مثلا اغنية زى انت عمرى ... المنتج الاصلى صوت القاهرة اللى هو بيتعامل مع ام كلثوم منفرداً . كل سنة هى بتعمل اغنية .. بيتكلموا معاها هى بتختار المؤلف والملحن واجرها فى الموضوع كله لحد ما يسجلوا الاغنية .. واجر الفرقة ككل .. طبعا بتراعى ان تاخد م الشركة مبلغ ما للعازفين فى البروفات الكتير وممكن تكمل ممن اجرها هى ( على اسا انها عملتهم من قبل كده ولو عملت بروفات اكتر طبعا الشغل حايبقى احلى والناس دى مايهمهاش الفلوس يعنى يهمها الذكرى والتاريخ ) وبالذات من اول انت عمرى نوعية الشغل اختلفت يعنى اللحن قبل كده كان يتعمل فى عشر بروفات بقى محتاج اكتر من 40 بروفة .. وييجى يوم التسجيل .. بعد تسجيل الاسطوانة العازف بيقبض اجره عن التسجيل واجره المتواضع عن البروفات ... وبيكون المؤلف والملحن والمطربة قبضوا اجرهم عن التسجيل ... بعدين بتيجى الحفلة ... المتعهد بيبع التذاكر بعدين قبل الحفلة بيكون دفع لأم كلثوم اجرها اللى بتاخده ف الوقت ده واجر الفرقة الموسيقية عن الحفلة .. ولو الحفلة مذاعة الاذاعة بتدفع مبلغ نظير الاذاعة على الهواء ونظير تسجيل الاغنية وشركة الاطوانات بتدفع حاجة للإذاعة نظير انها بتاخد نسخة من تسجيل الحفلة تعمله شرائط .. لكن فيه طبعا شروط ان شركة صوت القاهرة هى صاحبة الاغنية .. يعنى هى اللى بتبيعها للإذاعات العربية وهى صاحبة تسويق الشرائط فى العالم ... طبعا فيه حاجة اسمها جمعية الملحنين والمؤلفين كل حاجة فى الموضوع بتتسجل فيها عشان الحقوق ... بعدين ام كلثوم بيبقى ليها نسبة فى مبيعات الشرائط .. كمان فيه حاجة اسمها حق الاداء العلنى .. يعنى كل اذاعة فيها موظفين شغلتهم بيكتبوا كل يوم من الصبح لليل الاغانى اللى اتذاعت وبيطلع مبلغ للمطرب والملحن والمؤلف .. زمان طبعا لو كان ربع جنيه شوف كام محطة كان بيطلع لهم مبلغ حلو .. ومازال الورثة بياخدوه لحد دلوقتى ... لو الحفلة كانت مذاعة على التليفزيون ام كلثوم بتاخد اجر تانى غير اجر الاذاعة ...
نفس الكلام بالنسبة لحليم مثلا بس حليم عشان كان طول الوقت بيشتغل ع الفرقة الماسية وطبعا كل شغلها نوتة كانت البروفات قليلة اوى .. لكن من اول السبعينات .. لما الاغانى ابتدت تتطور بقت محتاجة بروفات اكتر طبعا اجره محدد ( يعنى زى ما قلنا من قبل ) هنا كان بيدفع اجر البروفات من جيبه الخاص .. بس فيه حاجة خطيرة اكتشفها بذكاءه اللى مش عادى .. ايه السلطنة الخطيرة بتاعة الفرقة بتاعة ام كلثوم .. مع انهم نفس العازفين بتوع الماسية .. اكتشف ان ام كلثوم بتشتغل من غير نوتة يعنى المحلن بيحفظ الفرقة بالعود .. بحيث ان العازف خلال ال 20 بروفة الاولى بيكون حفظ اللحن صم كأنه حافظة من عشر سنين .. وبعدين كل يوم فى البروفات الباقية بيعيد تانى ويحس اكتر ويجود اكتر وهى تتسلطن ... لما توفت ام كلثوم ومابقاش ع القمة غيره ابتدى يطبق النظرية دى يعمل 40 بروفة . منها العازف يحفظ للحن ع الآخر والاخطر ان الملحن الكبير كان كل ماتطول البروفات عمال بيكتف حاجات ويحذف حاجات ويزود حاجات لحد ما اللحن ممكن يتغير نصه
اما المطربين اللى زى فايزة ووردة نفس الكلام بس اجرهم اقل من حليم .. اما المطربين الاصغر ... كان بينتظر لحد ما الاذاعة تطلب منه اغنية او شركة تحب تعمل شريط .. وبيبقى عنده حصيلة يشتغل بيهم الحفلات ... بس طبعا شركة الاسطوانات بتجرى دايما ورا اللى بيجيب لها فلوس اكتر ... من اخطر المشاكل فى الفرق الموسيقية وبالذات الصغيرة السرقة .. يعنى مثلا رئيس فرقة كذا اجره من المتعهد كذا .. ممكن مشبيقسمالمبلغ ع العازفين بالعدل يعنى ممكن يحط فى جيبه نص المبلغ ويوزع الباقى .. ودى كانت خطورتها ان العازف لما يحس انه بيتسرق بيروح فرقة تانية تديه اجر اكتر ... الفرق الصغيرة كانوا بيقبضوا بعد الحفلة .. اما الفرقة الماسية .. كان ليها نظام تانى .. يعنى احنا كان لينا التسجيلات للمصريين والتسجيلات للعرب .. والحفلات والبروفات لما تكون طويلة يعنى لو لحن لفايزة بنعمل 7 بروفات كنا مش بنتحاسب عليهم يعنى بنتحاسب ع التسجيل والحفلة فقط على اساس ان الاغنية دى حانشتغلها حفلات كتير بعد كده .. كنا مش بنقبض كل يوم .. يعنى فيه موظف بيجمع مجموع شغلك طول الشهر ... واول الشهر بيديك 70% منه بيحوش لك الباقى .. بحيث ان فيه اشهر بيبقى الشغل قليل زى يناير وفبراير ( كان الموسيقيين بيسموهم ينايم وفقراير ) بيبقى الدنيا برد ومفيش حفلات هنا بيقبضك من اللى متوحوش لك من قبل على اسا انك بتاخد مبلغ قريب من الثابت كل شهر .. بس كان احلى حاجة طبعا حفلات الخارج يعنى اسبوع فى افخم فنادق وبنقبض بالدولار طبعا اجر الحفلة اكتر من مصر كتير
بس الشعور اللى مش حلو يعنى الاجور زمان بالنسبة للكل كانت ملاليم لما تقارنها بواحد معفن بياخد مليون جنيه فى الحفلة عشان يطلع يتنطط زى القرد .. يعنى ام كلثوم فى مصر عمر ماوصل اجرها 5000 جنيه .. وحليم كان بياخد بعدها اعلى اجر 7000 جنيه ووردة 5000 ... وانا تحت امركم فى اى سؤال بس رجاء تكتب سؤالك اوردك على طول ماحدش يعمل اقتباس لأن زى ما انتم شايفين الموضوع طويل اوى مع اطيب تحياتى

[عاصم المنشاوى]

الاستاذ الكبير / عادل بك صمويل

شكرا للأجابة على السؤال....وماكانش ينفع حد غيرك يجاوب ....فأنت كنز من المعلومات ...ربنا يخليك لنا

والفنان /هيثم الصالحى ...كلنا فخورين بك ياصديقى ...

ونحن فى انتظار عودة الدكتور محمد ابراهيم .... وتحياتى لباقى الأصدقاء

[muhamadibra]

تحياتي للجميع وشكرا جزيلا لكل من سأل عني . واخص الاخ العزيز عاصم المنشاوي ونجم النجوم وطبعا المايسترو وكل عام وانتم بخير
د محمد إبراهيم

اهلا يادكتور واحشنا اوى لعل يكون المانع خير وكل سنة وانت طيب مع اطيب تحياتى عادل صموئيل

[عادل صموئيل]

احبائى

اقدم لكم من روائع الفنانة وردة

على عينى ياحبة عينى

مع اطيب تحياتى

[بكر محمد دحدولي]

استاذ عادل صموئيل الكريم هل تستطيع تدوين هذه الاغنية على مقام العجم (حديث عينين) لاسمهان و الحان الموسيقار رياض السنباطي ,فهي اغنية جميلة جدا و لم يدونها احد من قبل ,وانا اعرف ان لن يستطيع احد بكتابة الاغنية سواك وهذا طلبي الاول و ربما الاخير انا فقط اريد هذه الاغنية و هذا الفيديو يظهر المغنية ليلى حجيج تغنيها بعشر دقائق فقط , ارجوك استاذ عادل انا اريد الاغنية جدا لاني اريد عزفها في المعهد العالي للموسيقة في لبنان و ارجو ان ترد على ان تستطيع تدوينها قريبا او في المستقبل و هذا هو الرابط على اليوتيوب الفيديو عشر دقائق فقط و شكرا جزيلا بكر دحدولي


https://www.youtube.com/watch?v=xl8H9AVPoRo

اخى العزيز
انا ححاول ادونها لأنى ما سمعتهاش من قبل محتاج اتعرف عليها لأنها صعبة جدا زى ما انت شايف
لكن اهم حاجة فيه تقسيمة عود فى المقدمة .. وكما تعلم احنا مانقدرش ندون التقاسيم
مع اطيب تحياتى عادل صموئيل