تحية أستاذ عادل و كل الشكر على التدوين الدقيق و المميز لأغنية اسهر للسيدة فيروز . و كما أشرت حضرتك من يسمع اللحن يعتقد أنه لحن رحباني ربما بسبب التوزيع الموسيقي الذي يميز أغاني الرحابنة .
على سيرة الأستاذ الكبير محمد عبد الوهاب أود أن نسمع تعليقك حول كتاب الشاعر فاروق جويدة و الذي صدر حديثا بعنوان ( كتاب رحلتي ...الأوراق الخاصة جداً ) والذي يتحدث فيه عن أمور لم نعلمها مسبقا عن الاستاذ عبد الوهاب ، و حسب الشاعر فأن محتوى الكتاب مأخوذ من مذكرات الأستاذ عبد الوهاب و أوراقه التي سلمته إياها زوجة الموسيقار و عددها حوالي 600 ورقة .
ما يلفت الانتباه هو مواقفه السياسية اتجاه الرئيس جمال عبد الناصر ذماً و الرئيس أنور السادات مديحاً .
أما من الناحية الفنية و حسب الكتاب :
فيروز
قال عنها تحت عنوان " فيروز سُلطة الأغنية القصيرة " بأنها "أقدر" المطربات في تأدية تلك الأغاني, نظرا لقدرتها على إطراب السامع في أقصر وقت وكأنه استمع إليها لساعات "
بليغ حمدي
موهوب وملحن شارع أكثر مما هو ملحن صالون, لكنه " ومضات من ألماس مركبة على تركيبات من الصفيح" عنده صمم لغير ألحانه, فهو لا يحس بجمال غيره ولا يريد أن يحس بهذا الجمال , وإذا مدحته في حضوره انتفخ كالديك الرومي .
سيد مكاوي
مريح وهادئ حيث يشعر عبد الوهاب حين يسمع له يغني بأنه "يسب المغنين والملحنين ويسب اليوم الذي وجد فيه في وقت واحد مع هؤلاء وهؤلاء، وأشعر وكأنه يقول لهم بغنائه هكذا يكون الغناء وهكذا يكون التلحين يا أولاد ال..... "
.
كمال الطويل
"موهوب وعاقل وربما يكون أجمل خاطر عند كمال لا يبلغ أكثر من ثمانية من عشرة, ولكنه يضعه في إطار لا يقل عن سبعة أو ستة من عشرة, ليس تاجرا في فنه رغم أنه تاجر جدا في حياته "
كمال الطويل ملحن نخبوي أي "ملحن صالون", أكثر مما هو ملحن شارع لكنه بلا ومضات باهرة
و يقول عبد الوهاب في الفن عموماً :
يرى عبد الوهاب بأن الاشتراكية أفسدت الفن ، مشددا على أن " الأغلبية والجماهيرية لا تدفع فناً إلى الرقي . أما الملوك والأمراء والصفوة فكانوا يتسمون بحسن الاستماع إلى الفن الرفيع "
أرجو إبداء رأيك في الموضوع و خاصة ما قاله بأن الملوك و صفوة المجتمع هم من يرتقون بالفن و ليس الجماهير .
شكرا لك .
اخى العزيز
هو موضوع عبد الوهاب مركب ومعقد .. ولازم يتفهم كويس جدا جدا .. اولا رأى عبد الوهاب ان لم يوافق عليه عدد كبير من الجمهور يبقى مالوش قيمة .. يعنى مدحه لفيروز طبعا فى محله جدا جدا يعنى فيروز مطربة مش مغنية .. وتقدر فى اغنية طولها 3 دقائق تخليك تطرب وتحلق فى السماء وده عشان يحصل مع ام كلثوم مثلا لازم تغنى كوبليه واحد وتعيد فيه لمدة عشر دقائق .. لكن الموضوع مش موضوع فيروز فقط يعنى المطرب العملاق بدون لحن عملاق وفرقة عملاقة يفقد 60 من قوته .. يعنى لحن زى ستى ياستى ... مكالمة تليفونية يعنى مش موضوع يتغنى اصلا .. لكن شوف انت حسيت بإيه لما سمعته .. واختلاف فيروز عن غيرها ان 90% من اغانيها قصيرة لكن فيها كمية طربية تفوق ساعات بيغنيها غيرها .. اما عن رأيه فى بليغ حمدى نابع من اختلاف الطريقة .. يعنى لمدة عشرين عاما عبد الوهاب مكانش بيشتغل مع حد غيرنا ( اقصد يعنى مش بيعمل الحان مع حد غيرنا انا معرفش عنها حاجة ) كان بيعمل لحن واحد فى السنة بيبذل فيه كل جهده وبالطبع بيبقى لحن شهير او هو اقوى لحن فى السنة فى مصر وايام ام كلثوم كان بيعمل اللحن الكبير ده وممكن يعمل لحن صغير لعبد الحليم مثلا لكن مش اكتر .. ما بليغكان بيلحن كتير ولأى حد .. يعنى لو فى سنة عمل اغنية لأم كلثوم كان ممكن يعمل عشرات الاغانى لغيرها وبالطبع كتر الشغل بيخلى الالحان تبقى مش بنفس الجودة يعنى بيركز اوى مع المطرب الكبير والمطرب الصغير بيبقى اقل .. اما كمال الطويل كان ملحن هاوى .. يعنى انا كنت بشوفه كل كذا سنة ( وكلمة اشوفه يعنى ييجى يعمل معانا لحن ) .. هو كان رجل اعمال ناحج جدا .. لكن كان بيلحن بمزاجه لما يحب يلحن يعنى او كان ممكن ياخد كلمات ويقعد ينقنق ( يعنى كل شهر يعمل جملة )فيها 3 سنين .. لذلك كانت الحان كمال الطويل كلها : خلاصة على قلة عددها وكان بيحب نجاة الصغيرة وسعاد حسنى بالذات لكن نجاة كان بيعمل لها اغانى من العيار التقيل اما سعاد خرجت منه نوعية جديدة من التلحين وهى الاغانى المرحة الشقية ( وللعلم هو كان شخصيته جد جدا ماعندوش مرح خالص ) يعنى كلنا كنا مستغربين على الحانه لسعاد حسنى .. اما موضوع الملوك والصفوة .. فيه ملوك بيحبوا الفن اوى اوى زى مثلا الملك الحسن الثانى رحمه الله يعنى اقدر اقول يابخت اى فنان متميز فى المغرب فى عهده لأنه كان بيشجع وسائل الاعلام ترفعه فوق وان بيحب عبد الحليم بصفة خاصة يعنى لما كنا بتروح المغرب ما اقدرش اوصف لك الحفاوة البالغة اللى كنا بنتقابل بيها من الملك شخصيا وبالطبع من كل من فى المغرب الشقيق اما باقى الملوك فا الدرجة بتختلف .. يعنى مثلا السلطان قابوس فى سلطنة عمان بيحب الفن بدرجة عالية جدا وعمل على انشاء كذا فرقة موسيقية رائعة منهم فرقة سيمفونية للفتيات فقط .. لكن الصفوة اهم لن عددهم اكتر من الملوك .. هو مشكلة الفن او اخطر مشكلة فى الفن القوة الشرائية فى السوق .. يعنى لما منتج بيعمل شريط لفنان ما .. لو المنتج كسب اوى بيكرر التجربة ولو خسر طبعا بيمتنع .. ايام الزمن الجميل الاولى يعنى فى الفترة من 1950 الى 1970 كان الحس الفنى والرقى الثقافى عالى اوى اوى عند الشعوب لذلك كانت شرائط ام كلثوم وحليم ونجوم القمة بتتباع فورا ويعملوا منها نسخ تانية كذا مرة لأن المثقفين كان عندهم فلوس .. بعدين حصلت طفرة او صدمة ان المثقفين ابتدوا يفتقروا وظهرت طبقات غنية من العمال والصناع الحرفيين والتجار اللى اغتنوا فجأة وثقافتهم محدودة او معدومة مع ظهرو احمد عدوية كانت الطبقة دى ماتفهمش الاطلا لكن عجبتها السح الدح امبو .. وهنا حدثت الكارثة بقت تعمل فن عالى تخسر فلوسك يعملوا فن هابط بيكسبوا ملايين ومستمرة حتى الآن
اما عن موقف عبد الوهاب وعبد الناصر ( مع العلم ان احلا اناشيد لعبد الناصر كانت من تلحين عبد الوهاب ) .. كان فيه حساسية بين نظام عبد الناصر ونظام الملك فاروق .. يعنى تم تشويعه عهد الملك فاروق بكل الوسائل مع انه مكانش وحش بالشكل ده يعنى ابويا بيحكى لى او حتى فى الافلام القديمة كانت مصر ايام الملك فاروق ارقى عصر .. ابسط حاجة كانت موضة الملابس الحريمى بتظهر فى مصر قبل باريس .. وكان بيسيطر على كل حاجة فى البلد الباشوات واولادهم ودول كان عندهم مربيات اجانب بتربيهم على قمة الذوق والاتيكيت بعكس اغنياء السبعينيات اللى جم من قاع المجتمع .. لذلك كان عبد الناصر ومن معه بينظروا الى عبد الوهاب وام كلثوم على انهم بتوع الملك فاروق وكانوا بيحبوا عبد الحليم اكتر لأنه ظهر مع الثورة يعنى بتاع الثورة .. مش فاهمين ان المطرب الكبير بالذات لازم يمدح النظام المودود لأن الاغانى دى هى اللى بتخلى الشعب يلتف حوالين النظام ... يعنى المطرب لازم يكون لو دور سياسى اما مدحا او ذما ...يعنى سيد درويش كان ايام الاحتلال الانجليزى كان بيكره الانجليز فكانت معظم اغانية ذم فى الانجليز عشان الناس تكرههم اكتر واكتر .. وسيد درويش نفسه لو كان جه فى عصر حاكم زى السيسى عندنا دلوقتى لكان عمل لو اغانى تخلى الناس تحبه اكتر واكتر .. ولا تنسى ايه الفرق بين الاغنية من مطرب محبوب والخطاب .. ان خطاب الرئيس بيتذاع مرتين تلاتة لكن الاغنية بتتذاع كتير لذلك الرئيس لو عايز يوجه شىء للشعب من المفضل ان يخلى المطرب الحبوب يغنيه
مع اطيب تحياتى عادل صموئيل