حكاية سالم

**hany57** · #1 15/08/2018, 23h43

حكاية سالم
--------------
بعد الصلا ع التهامى .. نبى صاحب المعجزات
يارب احسن ختامى .. واغفر لى ماضى وات

الليلة يا اهل المروءة .. نحكى حكاية جديدة
خيالية زى الحقيقة .. والعبرة منها مفيدة

لما ( فتوح ) أمه ماتت .. أبوه ماقعدشى عازب
يدوب تانى جمعة فاتت .. كان عنده زوجة تناسب

و ( فتوح ) كان لسه طالب .. فى الأزهر أياميها
ولمرات أبوه مطالب .. أبوه ما يقدر عليها

وتعامله معاملة قاسية .. يسافر بدون مصاريف
عيشه الجراية القاسية .. وملح بكمون خفيف

و ( فتوح ) أخد ثانوية .. يقعد ومين اللى يصرف
جات له وظيفة كتابية .. على نفسه منها بيصرف

وفر بقا كام جنيه .. قاموا بهم جوزوه
من واحدة متقولشى ليه .. تبقا اخت لمرات أبوه

وشاف له حتة بناها .. أوضتين وليهم منافع
كام سنة على ما اشتراها .. القسط ما كانشى شايع

وأبوه عدم الوظيفة .. وملوشى أى معاش
شيلة ( فتوح ) مش خفيفة .. شالها وما بدهاش

لولاده واخواته شايل .. ما فى مرة كل بحموله
ما حد شال له جمايل .. واللى بيخرج بطوله

وولده الكبير اسمه ( سالم ) .. ودلعه ع الكل زايد
ومين فى مشواره سالم .. ربك بعين فى الشدايد

طبعا حصل له خساير .. اضطر باع الدار
يعمل أيه فكره حاير .. واهو كمل المشوار

( سالم ) خلص علامه .. وجوازته خلص له فيها
ادى وظيفة قيامة .. وإعارة قدم عليها

كات قعدته جنب أبوه .. فى شقة برضه إيجار
نادر يبر أبوه .. ولا راعى حق الجار

وادى الإعارة أتت له .. سافر معاه العيال
لوحده ما يمشى حالته .. خاتم فى صابع ( نهال )

وأبوه مرة بعت له .. عايز سلف مش عطية
ما فى يوم قرش بعت له .. والرد كله أذية

سيبنى ما هاعملشى زيك .. واصرف على اخواتى بس
عمرى يوم ما هابقا زيك .. راح اعيش لولادى بس

و (فتوح ) أخدها فى جنبه .. وياما عمل خيرات
ع السرير يدوب حط جنبه .. بينادوا عليه كان مات

لما نزل بقا ( سالم ) .. كان شارى قيراطين بعيد
بنا دورين بالسلالم .. ع القرش إيده حديد

أمه عليها ما يسأل .. وان شافها بيبص عادى
من ربنا أمه تسأل .. ما تنعاد عليه السنادى

يسيبها ويروح البيت .. وكان لسه بشطب فيه
وتدعى أمه رب البيت .. إنه ما يسكن فيه

الكبد مسكه ما سابه .. شهر وكان جثة هامدة
والناس تقول راح شبابه .. دعوة أمه والخلق شاهدة

وان ما وافتنى المنية .. ولسه فى العنر باقى
راح يبقا فيه مرة تانية .. ونحكى ساعة التلاقى

--------------------------------

هانئ الجمل

**سعدالشرقاوى** · #2 01/09/2018, 09h17

وتظل هذه الاقلام الهادفة
رمزا للعطاء وتجديد الفكر الثقافي
فى عالم القصيدة
دمتم بكل خير اخى الدكتور هانئ