طلبات نوتة أ / عادل صموئيل الجزء الثانى

[عمرو الهنداوي]

أستاذ عادل هل عندنا في الموسيقي العربية، أنه ممكن نلقي أغنية فيها نغمتين متتالين الاثنين نصف بيمول مثلا أو واحدة نصف بيمول والتالية نصف دييز .. هو ده وارد في التدوين الشرقي والموسيقي العربية ؟؟ للتوضيع أكثر مثلا القي في نوتة نغمة السي نصف بيمول والدو نصف دييز أو مثلا اللا نصف بيمول والسي نصف بيمول .. هو مش كده يبقي نشاز و لا ممكن يحصل في حالات نادرة؟؟
كل الشكر

اخى العزيز
هى النغمات الشرقية عادة بتبقى مش قريبة من بعضها او مش متتالية .. يعنى حتى احنا بناخد من الاساتذة اللى اخترعوا المقامات ... يعنى تلاقى مقام الراست السى والمى نصف بيمول ... لما تبتدى من الدو تقابلك المى .. بعديها بتفوت على فا وصول ولا ثم السى نصف بيمول .. يعنى بينهم وبين بعض كذا نغمة ... اذا حصل حاجة نادرة زى اللى بتقول عليها بتبقى حاجة شاذة ومش قاعدة عاملة زى العجل ابوراسين ... وهى ممكن اللحن مايكونش كده ولكن حصلت بلبلة عن المدوناذا كان نص نص يعنى ... لأن فيه حاجات فى الموسيقى الشرقية غريبة شوية زى مثلا انت لما تقول صول لا سى دو
واعزفها تانى وخلى السى مثلا نصف بيمول واعزفها تانى كذا مرة .... او فى اللحن بيتحرك فى المساحة دى فيه عفريت بيطلع ماتعرفش منين تحس ان الصول بتاعة الراست الى حصل ده مش هى الصول بتاعة لما كان عجم ... الجنس الشرقى بيعمل نكهة مش ع النغمة نفسها ولكن الجسم كله ( يعنى الاربع نغمات ) بيحصل لهم صبغة كده ماتعرفش ازاى ... اقول لك على غفريت تانى ... ممكن يحصل راست زى اللى بقوله ... اكرر : صول لا سى نصف بيمول .... دو ... بعدين الملحن ينزل على صول فامى رى ويعمل المى بيمول ويقعد شوية يعنى يغنى شوية فى المنطقة دى هو كده خرجك من الراست وداك الكرد ... ممكن بيعمل حركة خباثة انو ينزل تانى صول .... لا نصف بيمول سى بيمول دو ... هنا عمل بياتى على النواة .. ممكن يحصل بلبلة لأول وهلة عند المدون ... لأن كنت فى راست بعدين نزل بيك بياتى شوية ضيع منك الراست بعدين ينزل بياتى انت ممكن تحسه راست فى الاول وبعدين تكتشف انه قلب بياتى .. وللعلم انا مش إله .. حصلت معايا كتير وبعدين حسيت وعدلتها ... والسبب نغمة الصول ... يعنى لا ليها لا فى التور ولا فى الطحين لكن نكهتها فى الراست غير البياتى ... فيه كان سر ... فيه ساعات الملحن يعمل فزلكة زيادة عن اللازم يعنى عايز يستعرض عضلاته قدام خبراء المقامات والتحويلات المقامية المرعبة ... ممكن يعمل حركة زى اللى بتقول عليها بس المستحسن مش فى مازورة واحدة يعنى يعمل واحدة فى مازورة والتاية فى المازورة اللى بعدها ويكرر التلاعب بالمستمع ده مرتين تلاتة يخليه ينسى اسمه ... بس برضه وارد اى حاجة ... يعنى عندنا فى الموسيقى الشرقية مافيش حاجة ممنوع ... يعنى فى الموسيقى الغربية مافيش موال وتقاسيم او موازين عرجاء لكن عندنا كل حاجة مباحة بس للى يقدر يستعملها ... والخطورة انك تستعملها بذكاء ... يعنى فى قصيدة ربع ساعة كان عبد الوهاب يعمل جملة واحدة فيها عفريت زى كده زى الكرنك .. ما ينفععش طبعا تعمل القصيدة كلها كده .. وبعدين حاجات تانية ( آسف للإطالة بس انت فتحت موضوع شائك ) فيه عقبات يعنى مثلا فى الفرقة بيبقى من 12 الى 15 كمنجة كلهم مستواهم مش زى بعض ... اللى مستواهم اقل فيه نغمات بتبق عندهم ضعيفة زى الدو دييز والدو نصف دييز .. الملحن الشاطر لو اتزنق فى جملة فى المنطقة زى مثلا الكوبليه بتاع الصبا بتاع اغدا القاك او انده عليك بتاعة ودة كان عامل صبا على السى ناتوريل وفيها المصيبة دى .. كان لازم مايطولش فى الجملة ويخرج على طول بسرعة على اد مايقدر ... عموما اذا كان شرحى مش وافى او عندك نوتة فيها حركة زى اللى انت بتقول عليها ( بس اكيد مش من نوتى لأن دى ممكن تكون غلط اكاديميا ) صورى لى الصفحة وابعتها لى اشوفها .. اصل برضو فيه حاجت اكتديمية كمان العملية مش سايبة ... يعنى عندك برنامج موسيقى من اى نوع تعالى دون دليل بيمولات ... حتلاقيه مش ممكن يحط معاهم دييزات ... لأن اكاديميا ماتنفعش ... ومش موجودة فى الموسيقى الغربية ... احنا عندنا مقام الحجاز بنحط سى ومى بيمول وبنفضل نحط الفا دييز طول السكة وتحياتى

[منذر44]

الاستاذ الكبير عادل صموئيل
لا اعرف ماذا اقول... اولا انا اعتذر شديد الاعتذار
انني اتعبتك في تدوين هذه الاغنية الصعبة
وبصراحة منذ مدة طويلة وانا متردد في طلب تدوين الاغنية
لانني اعرف مدى صعوبتها ورغم سعادتي الكبيرة بهذه النوتة
المعجزة الا انني حزين لما سببته من ارهاق وتعب لحبيب قلبي
استاذ الفن الجميل
لا املك الا كلمة شكرا والدعاء لحضرتك بطول العمر
اخى العزيز
حقول لك كلمة ...
امتى التعب يبقى مكسب وامتى يكون مجهود ضاع على الفاضى
التعب يبقى مكسب لو خمسة منكم قالوا احنا عزفنا الاغنية وشكرا على التدوين هنا احس انى عملت شىء ... وبرضو حقول لك سر ... الاغنية دى انا اختبرت بيها قوتى فى التدين وانا مبسوط من نفسى حسيت انى جامد اوى اوى ... وبالطبع مفيش حد يقدر يدونها وده بيبدنى ثقة فى نفسى .... واقول لك كمان سر ... انا مش عارف مين الملحن بس 99% من اغانى العرب بيبقى فيه ملحن وفيه مدون ... يعنى حتى الملحن اللى بيعرب يكتب بيكتب الاعامل السهلة ولما يكون اغنية صعبة لازم يستعين بمدون شاطر عشان يضمن اللحن يتكتب 100% لن اللحن للعلم مسؤولية المدون اولا اكتر من الملحن والمطرب ... انت لاحظت انى قلت ان فيه مشاكل فى اللح اولا صعوبة الجملة وثانيا ان وديع بيصدر وبيعمل عُرب .. انت لو تقدرتوصل لنوتة اللى هم سجلوا منها الاغنية قد تكون اسهل كتيرجدا ليه ... انا طبعا دونت لكل العمالقة ... كان بيمسك العود ويملينى ... كان بيتعمد عدم التصعيب والتعقيد والحليات ... يعنى بيملينى الجملة فى اسهل ماتكون .. وده لمصلحة الملحن نفسه .. ان النوتة تبقى مكتوبة سهلة للعازف .. بعد كده الحليات بتضاف اثنائ البروفات يعنىبعد من يعزفوا الجملة ويفهموهاالملحن يمسك العود ويقول انا عايزها كده ... وكل العمالقة كانوا بيعملوا كده وعلى رأسهم عبد الوهاب والسنباطى وبليغ والموجى .. اما العُرب والتصدير دى بيعملها المطرب اثناء الغناء مالهاش علاقة بالنوتة ... فهمت الخلاصة لو خمسة منكم عزفوها احس انى عملت شىء مع اطيب تحياتى

[منصور سعيد بخش]

ممكن تدوين اصالة لو تعرفو

https://youtu.be/qxMGWC1wbX0

[منذر44]

استاذ عادل شكرا للتوضيح
الحقيقة وبفضل تدوينك السهل الواضح انا عزفت النوتة واستمتعت اشد الاستمتاع
لان حضرتك صورت الجمل الموسيقية باحترافية جعلتها تكاد تنطق
واظن ان تعبك لن يذهب ادراج الرياح وسيخلد التاريخ تدويناتك

[عمرو الهنداوي]

أستاذ عادل صموئيل مساء الخير

في رأي حضرتك "عادل مأمون" رغم أنه صوت جيد جداً، ومطرب أصيل، ليه ما بقاش زي عبد الحليم حافظ أو حتى عبد الوهاب رغم إمكانياته الكبيرة .. يعني رغم انه غني أكثر من 100 أغنية، إلا انه لم يترك شيء يذكر أوي إلا ثلاث أو اربع أغنيات مازال الناس يتذكروها فقط أما باقي الألحان فلم تنجح خالص .. رغم انه بعض الأغاني واضح فيها أنه بذل جهد في اختيار الكلمات والألحان .. في ناس بتقول السبب في فشل معظم أغانيه انه أخطاً عندما احتكر تلحين أغانيه، ولم يستعين باخرين مثل محمد عبد الوهاب والموجي والسنباطي، وناس تانية شايفة انه كان عايز يكون نسخة من محمد عبد الوهاب رغم صوته الجيد وقلة موهبة التلحين عنده .. مطرب زي كده كويس أوي ومطرب أصيل وغني كتير ولم يترك علامة بارزة غير أغنية أو أثنين .. حضرتك كنت في المطبخ قولنا حضرتك شايف الموضوع أزي؟؟

كل الشكر

مساء الفل
انت قلت نصف الاجابة ونرجع برضه لمشكلة الذكاء والغباء
عادل مأون صوت خطير ولن يتكرر ...كان عدنه مشكلة ان صوته شبه صوت عبد الوهاب لذلك الناس ما اتجننتش عليه يعنى لأنه حسه انه تقليد لحاجة اصلية ... بس هو ما شغلش الذكاء .. يعنى هو طلع فى وقت عبد الواهب كان بيبطل يغنى ولم يستغل الفرصة كما ينبغى ... يعنى من اروع ما غنى ياالى سامعنى ... الغباء ان لم يلجا لملحنين تانى وتانى .. ولحن لنفسه مع انه مش ملحن موهوب .. كمان حاجة انا شفتها .. كان بيروح يقعد فى الخليج فى استضافة الامراء يغنى لهم غنا خصوصى ويقعد بالسنة ما يجيش مصر طبعا ده خلا الناس نسيته يعنى احنا مرة رحنا البحرين مع وردة سنة 75 لقيناه مقيم هناك فى ضيافة امير البحرين من سنة مثلا .. يعنى فضل الفلوس على الشهرة

[ابوكارم]

استاذ عادل
احترامى وتقديرى
اغنيه هان الود لعبد الوهاب
المقدمه تقسيمه او موال
ادليبadiliby
كان نفسي تكتبها يا استاذ عادل
او تقربها بقدر الامكان
يعنى اكتب لنا النوت الحروف
واحنا حنستنبطها حنستنتجها
المقدمه فقط التى بدون ايقاع
لانها جميله جدا ربنا يباركلك
ولكم جزيل الشكر

[dorame]

اتابع حديثكم بصمت واشتياق ما احلى الحديث عن الزمن الجميل وصراحة اول مره اسمع عادل مامون ووصف الموسيقار عادل صموئيل في محلة وسمعت بعض الاغاني الجميلة لعادل مامون خاصة ( أنت واحشنى ) من الحان فريد ولكن الاستاذ عادل زعلان ومتفاجا بان فريد سجلها بصوتةوهذا منعه من تسجلها ولكن عامة صوتة سحر وحنية
الاستاذ الموسيقار عادل صموئيل اعلم باننا نقرا لك كل كلمة بل كل حرف تكتبة فهو كنز من المعلومات

اخى العزيز
فيه اغنية رهيبة لعادل مأمون وهى احلا اغانية اسمها ياللى سامعنى قول يانور عينى تلحين كمان الطويل ... ابحث عنها على النت واكيد موجودة هنا فى المنتدى ... حاتعجبك اوى اوى
مع اطيب تحياتى

[أبو الصابر]

مرحبًا عزيزي الأستاذ القدير ، عادل صموئيل المحترم ،
أطلبُ من حضرتكم نوتة "بيقولوا صغيّر وطني" للمطربو فيروز
ولكم جزيل الشكر والامتنان .

[عمرو الهنداوي]

أستاذ عادل أزي حضرتك،

كنت عايز أسال حضرتك عن الارتجالات اللي كانت أم كلثوم بتعملها وعبد الحليم حافظ أثناء الغناء في الحفلات العامة .. وبالتحديد أداء الفرقة سواء الماسية أو فرقة أم كلثوم أثناء الارتجالات دي .. أيه دور الفرقة هنا؟ ومن اللي يوجها: المطرب ولا قائد الفرقة ولا الجمهور يعني يستحسن الموضوع أو يرفضه ..

يعني مثلا انتو في أغنية الحب كله في مقطع " يا حبيبي يا عبير الشوق" في حفلة من الحفلات، أم كلثوم غنته بالارتجال حوالي 7 دقائق .. السؤال هنا هو الفرقة بتصرف أزي لما فجأة أم كلثوم توقف غناء وتترتجل .. هل كان في تعليمات خاصة محددة لو هي ارتجلت انتو حتعملوا أيه؟ كان أيه اللي بيحصل في المواقف اللي زي دي؟ هل كان فيه تعليمات، مجموعة معينة تعزف وراها فقط والباقي ساكت بيسمع بس ولا كان الفرقة كلها تشتغل وراها وماسكة معها المقام وتعزف مثلا زمن "روند" أو زمن مفتوح للنغمة اللي هي واقفة عليها حاليا .. طيب أيه اللي كان بيحصل لو هي خرجت بره المقام عن عمد أو عملت حليات .. انتم كنتم بتعملوا أيه في الحالات دي .. طيب كان قائد الفرقة بيتدخل بتعلمات سريعة ولا الموضوع كان راجع للعازف واللي ميعرفشي يمشي معها أو يفهم هي عايزة تروح فين يسكت وخلاص لحد ما ترجع للأغنية تأني ..

هو دور الفرقة أيه لما المطرب يرتجل زي عبد الحليم وأم كلثوم وهل مسموع لحد من الفرقة انه يقترح على المطرب أثناء الارتجال أي فكرة أو حركة سوء مثلا عزف كام نغمة في السكة اللي العازف عايز المطرب يروح فيها ..

يعني في "الف ليلة وليلة" في أخر مقطع بتاع " يارب" أثناء الارتجال الاكورديون مسيطر أوي وهو اللي بيقود، والساكسفون ساكت تماماً ده حتى الناي ساكت وبعض الكمنجات بس هي اللي مع الاكورديون .. هي كانت تعليمات ولا مادام عجبها وعاجب الجمهور باقي الفرقة تنظر حتى العودة للغناء ومالوهمشي دعوة .. كانت المنظومة بتمشي أزي أثناء الارتجالات، لأننا إحنا بنسمع من التسجيلات انه كل شيء ماشي تمام لكن بحس انه كل عازف ماشي على راحته ومع ذلك مفيش نشاز أو تشويش .. أكيد كان هناك إدارة ما للموضوع..

كل الشكر

[سليم العباس]

المشاركة الأصلية كتبت بواسطة أبو الصابر

مرحبًا عزيزي الأستاذ القدير ، عادل صموئيل المحترم ،
أطلبُ من حضرتكم نوتة "بيقولوا صغيّر وطني" للمطربو فيروز
ولكم جزيل الشكر والامتنان .

تحية طيبة أستاذ عادل
أرجو تدوين أغنية فيروز ( ما قدرت نسيت ) . أتمنى أن لا يكون التوزيع الموسيقي عائقاُ أمام تدوينها .
و كل الشكر لحضرتك

الأستاذ أبو الصابر :
تحية طيبة. عادة عندما يتم طلب النوتات من الأستاذ عادل ترفق برابط كي يستمع إلى الأغنية .
على كل حال قمت برفع الأغنية التي طلبتها .
تقبل تحياتي

اخوتى الاعزاء
انا عايز كل واحد منكم يعمل مقارنة بين الاغنيتين عشان بعد كده يعرف يختار اغنية تعجبنى وادونها او اغنية ماتعجبنيش او ماتنفعش تتدون
اغنية بيقولوا صغير وطنى انا من اول ما ابتديت اسمع سامع لحن على ايقاع شىء مفهوم يعنى ... اما بيقولوا نسيت اول ما سمعت سمعت توزيع متداخل انت لو بتعزف عود حاتعزف انهو صوت منهم وفى اى الاحوال حاتعزف شىء ناقص يعنى لما اللى يسمعك مش حايعرف انت بتقول ايه ناهيك عن الغناء بتاعها اللحن معمول عايم ما فيهوش ملامح يعنى ممكن حلو يتسمع لكن انا عادل صموئيل عشان اعزفه ما يتقراش من نوتة لازم احفظه سماعى وبعدين برضه مالوش قيمة إلا لما يتسمع من فيروز زى ماهو معمول كده .. يعنى انا لما اعزف لازم اعزف شىء انت اول ما تسمعه تقول اغنية كذت حافظينها ويتمعوا بيها ولكن لما تعزف لهم شىء ناقص يعنى خط لحتى من خمس او ست خطوط حاتعزف حايناموا منك لأن مش حايفهموا حاجة ... وللعلم فيه توزيع انا بحسه عبقرى وتوزيع انا بحسه فاشل ... ايه الفرق بينهم ... اسمع اغنية انا قلبى دليلى معولة فى قبل دخل الخمسينات ... فيها توزيه اوكسترالى راذع ومليان يعنى مش اقل من 7 او 8 خطوط .. وانا بعتر اللحن ده سابق لعصرة بالنسبة لتطور الموسيقى المصرية من اغانى الشرينات ودخولا على ما بعد الخمسينات .. بس احلا حاجة عبقرية ايه فى اللحن .. ان اللحن كامل بتسمعه من جزء من الفرقة وليلى مراد والكورال ... والتوزيع تحته جميل مش بيغطى ع اللحن الاساسى ... وهنا انا لما ادون اللحن وانت عزفته حاتعزفه بجودة 100% والناس تصقف لك مش ناقص ولا حرف ... وكده اللحن ممكن يتسمع الى الابد لكن الموزع الفاشل ... ييجى مثلا ما يلاقيش حاجة يعملها يروح ماسك اغنية رائعة قديمة ويعك فيها وتسمع تلاقى اللحن الاساسى اختفى طبعا فاشل ... او ملحن شهير كل اعماله موزعة ما ينفعش تتسمع من آلة واحدة .. ده لما بيموت كل اعماله بتذهب معه لأن ماحدش يعرف يعزفها مع اطيب تحياتى