طلبات نوتة أ / عادل صموئيل الجزء الثانى

[عادل صموئيل]

اخى العزيز عمرو الهنداوى
مش قلت لك انت او انتم بتفتحوا مواضيع تنفع يتعمل منها عدد كبير من رسائل الدكتوراه ومن حسن حظكم انى لسه عايش عشان اجواب واقول كلام مش بيدرسوه فى الكيات لأن مناهج الكيات شوية نظرى مالهمش دعوة بالحياة العملية .. فيه فرق بين العازف المحترف والعازف الهاوى ... اما الازف المحترف ده بيبقى درجات ... ولما نتكلم على اعلى درجة زى العازف بتاع الفرقة الماسية وفرقة ام كلثوم ... ده لازم يتميز بميزتين غير حلاوة العزف .. اولا اجادة قراءة النوتة البريما فستا اجادة 150% يعنى تحط قدامه عشرصفحات والقائد بتاع الفرقة بيشاور او بيدى مازورة فاضية دى بتقول السرعة يعنى 100 ولا 120 وكده .. مثلا .. بس احنا مكناش بنتعامل بالارقام ... كان المحان بيدينا احساسه وقائد الفرقة بيحسبها فى مخه وبيشاور على هذا الاساس ومن البروفات بيكون اخطر واحد وهو عازف الرق او ضابط الايقاع الموهوب زى اللى كانوا معانا بيحفظوا السرعات وللعلم احيانا السرعات كانت بتختلف كل جملة ... وده هو الطرب .. يعنى انت عندك رتم بوكس فى الاروج جرب تعزف عليه اى اغنية لم كلثوم حاتحس ان كل جملة عايزة تقعد او تمشى تسرع يعنى شعرة ... ليه الناس بيحبوا عزفى ... عشان انا شارب الكلام ده وبعزف كده اى حد تانى مش عارف الكلام ده بيعزف كله بسرعة واحدة ... يبقى العازف ده مطلوب النوتة والسماعى مجتمعين ... يعنى هات لى مطرب عمرى ما شفته ومعرفش حايغنى اغنية عمرى ما سمعتها لما بيغنى هو بيغنى وانا بمشى معاه طبعا انا متأخر عنه بكوما انت كمستمع عشان انا شاطر اوى مش حاتحسها .. يعنى بيدلع وينزل ويدخل مقامات وانا وراه ... حتى ف مرة وحصلت كتير مطرب سجل اللى انا بعمله ده واتجنن انى ازاى مش عارف بيقول ايه وماشى وراه بالدقة دى ... اصل ليه خطورة الدقة العالية دى ... عشان هو يغنى براحته وانا اخدم عليه لو انا اقل من كده حاكعبله وألخبطه .. يعنى هو ماشى مى بيمول طقت ف دماغه يخليها نص بيمول ... لو انا مش اد المستوى او المسؤولية حديه مى بيمول برضه اضيعه ... او اطير الخيال اللى هو حسه ... فهمت دى ؟ التقاسيم او الموال دى 90 % ممكن مش متفقين عليها فى البروفات ... هى بتبقى مزاج عالى اوى ... او جمهور جميل ... بيفتح نفس المطرب وبيطلع اللى جواه ... يعنى بلاش ام كلثوم .. مرة كنا فى تونس .... احنا ف مصر الجمهور عندنا لما تقول الحفلة جابت كومبليه يعنى بيبقى اقصى حاجة 5000 متفرج ... فى الول العربية بيعملوا الحفلة فى استاد الكورة وتخيل الجمهور على الكراسى .. يعنى المتوسط بيبقى من 80 الف متفرج وانت طالع احنا بصراحة بنتخض منهم لأن مش شايفينهم سامعين التصفيق واضواء التليفزيون فى عينينا والجمهور بيبقى ضلمة .. يعنى سامع زئير بتاع عدد نت مش متخيله ومش متعودين عليه .. يعنىه نا لما 5000 يهيصوا عارفين الحجم لكن تخيل لو 100 الف تحس انهم حياكلونا ... المهم نجاة دى كانت عندنا الذ مطربة ليه كبيرها ع المسرح ربع ساعة وبناخد اعلى اجر اما فايزة احمد بتقعد ساعة ونص بأقل اجر ... البمهم الجمهور سلطن نجاة .. وفوجءنا انها بتعمل تقاسيم ييجى نص ساعة وانا مكانتش اتخيل نجاة بتعمل ارتحالات كده يعنى احنا العازفين انبهرنا ... ونرجع لأم كلثوم بالذات ... ام كلثوم حياتها الفنية تنقسم الى قسمين .. ايام محمد عبده صالح رحمه الله ... وما بعد محمد عبده صالح ... قلنا التقاسيم دى بتبقى جو معين ومزاج ... وللعلم ام كلثوم كانت مش شاطرة اوى فى التقاسيم واللى بيخليها بالفظاعة دى محمد عبده صالح يعنى لو تلاحظ بالقانون بيديها سكك .. يعنى هى ماسكة بياتى بيغذيها فى البياتى لحد ما تقول كام جملة وبعدين يفتح لها كرد او حجاز او زى ما يطلع فى مخه ... فكان كل التركيز مع محمد عبده صالح وباقى الفرقة اسمها تشغى وراه .. كلمة تشغى دى ماخوذة من عارف صوت الصراصير فى الغيط .. حاجة زى كدخ يعنى بنقول وراها زى ما بتقول بس الريادة لمحمد عبده صالح ... ليه مش الحفناوى مثلا كمان ... عشان مايبقاش فيه سكتين فى نفس الوقت هى تتوه ... يعنى صالح عارف امكانياتها وهى تحب تروح فين او لو راحت على فين بتلعلع ... لو حد تانى دخل يبقى زى كورتين فى الملعب ... اما بعد صالح رحمه الله كان ممكن الحفناوى .. او اى حد بس برضه ينفرد ماحدش يفرض سكك معاه وباقى الفرقة زى قلت تششغى او تزن وراها زى ماهى بتقول بنتبعها ... الحان بليغ كانت لون الشعبى شوية غير الحان عبد الوهاب بتمثل الزمالك والحان السنباطى بتمثل الموسيقى الرقية الاصيلة مجمع القرون الماضية .. فكل منهم له طريقة لما تعمل تقاسيم او ارتجالات ... فى الاغنية اللى الاكورديون بقا هو اللى يسحبها للسكك ... كان اللحن لبليغ .. وكان بليغ بيعزم سمير سرور وفاروق سلامه عنده فى البيت ويخليهم يعزفوا كل امكانياتهم الشعبية وبيسجل وبيخرج منها بإفكار ازاى يستغل اللى بيقوله فى الالحان .. كان فاروق سلامة اقدر انه يسحب ام كلثوم فى اللون ده ... لكن سمير سرور ما ينفعش لسبب ... ان الساكس آلة غربية وبتقول الربع تون تخليقيا ... ومش كل النغمات ( انت ع الاورج ممكن تقول كل النغمات ربع تون ) هو محدود مش اكتر من سى ومى ولا تقريبا ... بإختصار انا قيمتى ان لو المطرب حايرتجل حاجة انا معرفهاش لازم اكون متابعه وبينى وبينه مسافة فنتو ثانية بحيث المستمع ما ياخدش باله والدليل سؤال ده انا ازاى بنتابع واحنا مش حافظين والشغل بيطلع زى الفل .. والعازف الصولو كمان لازم تكون عنده موهبة الارتجال يعنى فيه اغنية سعاد حسنى بانو بانو انا حانزلها حالا فيها موسيقى الكوبليه التالت هانى مهنى عمال ارتجال طوبل جدا يعنى الاغنية سعاد حسنى بترققص وبتغنى والمخرج قال له رقصها شوية .. وهانى مهنا كان الاول عازف اكورديون وعازف الاكورديون ان ما عزفش مع رقاصة يبقى مش معاه شهادة تخرج ... والرقاصة بيلزمها الشوية دول ان الازف فى جزء من اللحن يرقصها يعنى يرتجل او بالبلد بيسموه التت .

[عادل صموئيل]

احبائى

اقدم لكم اغنية انا بحبها اوى

بانو بانو

لسعاد حسنى ... الاغنية دى فيها كمية طرب ماحصلتش واى حد يقول ان سعاد حسنى متوسطة فى الغناء اقول له حضرتك ماتفهمش حاجة يعنى سعاد حسنى كانت قديرة جدا فى الغناء وهات لى مطربة من بتوع دلقوتى تقدر تقول الاغنية دى بإقتدار سعاد حسنى
من العبقيات فى اللحن ده المقدمة وانت ماشى تحس ان الصبا زمزمة يعنى مى بيمول ... واللى شككنى فى كده لازمة الانتظار ( اللى هى بتتكرر قبل دخول المذهب او الكوبيليه )اتكررت كذا مرة وبتاكد على امى بيمول .. ولما بيكون عندنا تحفظ لما مطربة كبيرة تغنى بيبقى غناها متأكد النغمة كذا لأنها طبعا عارفة الحرب اللى بتقوله .. لكن لما ممثلة بيبقى مسموح انه تعك شوية ... لدرجة انى سألت اخى العزيزمحمد الآلاتى اللى اكد لى ان الصبا طبيعى والمى بصف بيمول طول المذهب ... وهنا بقرة من كمال الطويل وسعاد حسنى انه يديك مقام ويفضل يكرر المى بيمول ويأكدها ويدخل يغنى من مقام تانى ... كمان فى الصفحة 3 آخر مازورة فى السطر السابع عند كلمة ماخلاص ... بتعمل سى عراق عبقرية مش اى حد يعنى يعنى تولع فى اليسا وكلهم يعنى .. كمان انا دونت الصولو الارتجال اللى عامله هانى مهنى فى الكوبليه الاخير مع انه بيرقص يعنى ارتجال مش مهم بس هو اعترف انه عمل جمل حلوة وممكن تتدون المهم انا احمد ربنا وافتخر انى قدرت ادون العمل الجميل ده مع اطيب تحياتى

[سامى امين]

مش معقول يا مستر عادل انا مش مصدق نقسى فعلا انت اسرع و احسن من يدون نوتة فى الشرق الاوسط كلة ويبسطها ويوصلها لكل مستويات العازفين هواة ومحترفين الف شكر يا مستر عادل

[عمرو الهنداوي]

شكراً أستاذ عادل على رد حضرتك بخصوص سؤال الارتجالات .. وإحنا بنستفيد من الاجابات جداً .. فكل الشكر لحضرتك

[سليم العباس]

أطيب التحيات أستاذ عادل و شكراُ على كل المعلومات الفنية القيمة التي سلطت الضوء على جوانب كثيرة من الزمن الفني الجميل .
أود أن أطرح سؤالاً لا يتعلق بالمعرفة الفنية بصورة مباشرة:

من خلال خبرة و تجربة حضرتك ، ما رأيك بالأخلاق الإنسانية للفنانين و العازفين ، و هل هي أرقى من مثيلتها لدى بقية شرائح المجتمع؟ ذلك بسبب تأثير الموسيقا على النفس البشرية أم أنها غير مترابطة بشكل وثيق؟ هل هناك عازفين أو مطربين سيئي الطباع و المعشر رغم أبداعاتهم الموسيقية؟

شكراُ لحضرتك

اخى العزيز
هم كان فيهم وفيهم .. وزى اى مجموعة من البشر فيها الكويس وفيها الوحش ... بس الفنانين بالذات اى فضيحة بتتنشر لأنهم تحت الاضواء بعكس اى طائفة تانية يعنى فى كل المهن فيه بعض الفاسدين بس هو بتوع اليومين دول سلوكياتهم سيئة اكتر كتير عن بتوع الزمن الجميل

[ابوكارم]

مقدمه هان الود

حضرتك النوتة موجودة من زمان شفتها فى الفهرس ؟

[عادل صموئيل]

احبائى
اقدم لكم بكل فخر اغنية من العيار التقيل جدا جدا واللى مش ممكن حد يعرف يدونها وانا كنت من زمان هى مطلوبة ومتردد خايف منها يعنى لكن قلت المفروض انى ادونها رائعة عبد الوهاب
ياجارة الوادى
الاغنية دى اولا ليها معايا قصة قد تكون مضحكة ... انا بعشق الموسيقى من اول ما اتولدت ... وفى سن عشر سنوات يعنى سنة 1960 كنت تقريبا حافظ كل اغانى الزمن الجميل بتاعة كل المطربين , ودى فى حد ذاتها تعتبر اعجاز .. لأن وقتها مكانش عدننا سوى الراديو ... وبالطبع تخيل انت اغنية زى غلبت اصالح مثلا عشان تنتظر لما تيجى فى الراديو كل فترة اد ايه واسمعها كام مرة فى السنة ... لم تكن اجهزة الاستماع متوفرة ... كان وقتها مفيش غير الفونوغراف القديم بتاع الاسطوانات الحجارى ... وانا مرة كنت ماشى مريت على محل بيبع موبليا قديمة لقيت عنده فونوغراف من ابو زمبلك وبوق بكام ياعم ب 3 جنيه اشتريته وورحت بيه البيت جرى .. كان معاه اسطوانة واحدة فقط هى ياجارة الوادة بتاعة عبد الوهاب القديمة .. (ومازالت عندى لحد دلوقتى ) وبالطبع كنت حموت ان يكون عندى جهاز بيشغل موسيقى قعدت اشغل الاسطوانة دى 24 ساعة وعملت ازعاج للبيت لسبب ان البوق كان صوته جهورى وما ينفعش تخفض صوته هو صوت واحد فقط ... وقتها كان موجود جهاز التسجيل الريل بس عند علية القوم فقط او اللى بيسافر المانيا بالذات .. يعنى بقت عادة كل واحد يسلفر المانيا يجيب معاه ريكورد جرونديج ومعاه 3 شرائطيقعد يسجل عليهم ويمسحهم لحد ما يستهلكوا لأن مكانش بيتباع فى الوقت ده شرائط جديدة ... وكانت المعجزة بداية ظهور اجهزة الكاسيت والراديو كاسيت كانت طبعا انجاز وكان تمن الجهاز من 80 جنيه وانت طالع ...
نرجع للأغنية .. انا احترت ادونها من عبد الوهاب ولا فيروز ... كانت المشكلة بتاعة عبد الواهب فى فترة الثلاثينيات وبالذات النوع ده من التلحين انه مش منتظم يعنى بيدخل يغنى من اماكن مختلفة كل مرة .. وبيطول ويقصر ... واللزم اللى بترد عليه وقتها كانت معظمها تونيس يعنى مش لزم متلحنة ... مزعجة جدا جدا فى التدوين ... اخترت ادونها من فيروز لأنهم حددوا الغناء او ملوا الفراغات بموسيقى ع الاقل تخلى الواحد ما يتوهش .. بس برضه استعرضوا عضلاتهم فى بعض الردود الصعبة جدا ... بس زى ماقلت المدون بيشوفحاجات مش بيشوفها العازف ولا المستمع ... اللى هى وضع الاجزاء الصعبة تحت الميكروسكوب تركيز عالى جدا ممكن اقعد نص ساعة فى مازورة او تفعيلة ... المشكلة ان عبد الواهب كان عامل كلاكيع او حاجات عبقرية جدا ( ومش مسبوقة فى الثلاثينيات يعنى عبقرية كبيرة جدا جدا ابتدا بيها مع ان اى ملحن بيبتدى متوسط بعدين بيبقى مستواه اعلى ) وجم الرحبانية فوق الكلاكيع الموجودة حطوا كمان عليها كلاكيع ... الشىء اللى لفت انتباهى عبقرية فيروز الفذة ... يعنى فيروز المطربة الوحيدة الكبيرة اللى دارسة غناء اوبرالى على اعلى مستوى ودارسة شرقى على اعلى اعلى مستوى ... ودى عمرى ما شفتها فى اى مطرب او مطربة ... اوبرالى يعنى بتغنى لحن وتحتها خطوط لحنية كتير وهى بتغنى الخط بتاعها ( ده بيرجع انها بتغنى من نوتة عشان اللى تحتها ما يلخبطوهاش ) طبعا بخلاف المساحة الصوتية الغريبة الشكل من الغليظ الى الحاد ... وكلمة دارسة شرقى يعنى جميع المقامات وجميع الايقاعات وتعمل موال من اى مقام ومن اى درجة وتغنى على اى ايقاع مهما كان ماتفعش فى الوحدة ... غير طبعا بتغنى على رثصات دبكة ومش عارف ايه ودى حاجات لو الغنا صعب المطرب ممكن يقع عشان الدوم بتتوه وسط خبطات الاقدام على الارض لكن فيروز صاروخ ماشى بيشيل كل اللى ف وشه .. الاعجاز بقا اللى ابهرنى وانا بدون ... انك لما تغنى اوبرالى او على توزيع بيراعوا ان الغنا يكون بسيط والتوزيع تكون الخطوط اللحنية عريضة يعنى بلنشات او حاجة زى كده عشان المطرب يقدر يركز ف غناه ما تجيش حاجة تسحبه تخليه يعمل نشاز او يقع فى الوحدة ... هنا تعمدوا يعملوا العكس ...يعنى اللحن ى ما قلت قمة الصعوبة والكلكعة وغنا بيسموه بتاع مشايخ بتاع عصر الثلاثينات يعنى كله تصدير ... يعنى المطرب بيغنى كأنه ماشى على حبل معلق فى الهوا ... والتوزيع تحتها عامل اكروبات ... يانهار ابيض ... يعنى التوزيع دوبل كروشات فى منتهى الصعوبة او حاجة زى ماتكون معمولة عشان تخلى المطرب يقع وهى ماشية بتغنى بمنتهى المزاج العالى ... بصراحة اعجاز يعنى .. طبعا انا حاولت ابسط الصعب بس ما يتبسطش اكتر من كده واتمنى ان اكبر عدد منكم يعزفه مع اطيب تحياتى

[علي ثلاثة]

أيها الأستاذ الفاضل
الشكر الجزيل الجزيل الجزيل
على مدونة يا جارة الوادي

وكذلك على هذا التوضيح الرائع لمكانة
السيدة فيروز وقدراتها الأدائية
وعلى الرحابنة وماأحاطوا به
هذه التحفة الوهابية

وأعتقد أن محمدا عبد الوهاب
كان راضيا على عملهم ومسرورا من إنجازهم

ولئن كانت هذه الأغنية قد اجتمع فيها
كل الفطاحل من عبد الوهاب
إلى فيروز و الرحابنة وأحمد شوقي

فإنك كنت فذا في تدوينك وهذا ليس غريبا منك

[dorame]

الاستاذ الموسيقار عادل صموئيل اشكرك على اختيار سماعي لاغنية ياللي سامعني بالفعل رائعة جدا والغريب انها مسجلة بصوت عبدالوهاب نفسة كمان مش عارف هل صحيح او لا والا عاميلين صورة عبدالوهاب والصوت صوت عادل مامون

اخى العزيز
وجب على توضيح خطير ...
انا صوت عادل مأمون اقرب صوت شبيه بصوت عبد الوهاب ... وكانت مأساة عادل مامون التشابه العجيب بين صوتهما لذلك الجمهور رفضه لأن كان عبد الوهاب موجود وكيف يرضون بالتقليد والاصل موجودة
اما التسجيل اللى سمعته ده واحد غبى مش فاهم ان اللحن تلحين كمال الطويل ومش معقول طبعا عبد الوهاب يغنى لحن لكمال الطويل .. وان الى مغنى عادل مأمون .. بس هو فيه طبعا فرق بين صوت عادل مامون وبين صوت عبد الوهاب حاتكتشفه لو سمعت عادل مأمون بتمعن .. لأن الله خلق عبد الوهاب واحد فى كل الخلقة لم ولن يتكرر
بنقول فيه مشكلة خطيرة ان بعض المذيعين الجهلاء بيقدموا اغنى ويقولوا اسم الملحن او المؤلف خطأ وبتحصل كتير ولازم ناخد بالنا لأن كل اغنية تعتبر جزء من التاريخ وحرام لحن لموسيقار عبقرى ينسب بالخطأ لموسيقار آخر مع اطيب تحياتى

[dorame]

احبائى
اقدم لكم بكل فخر اغنية من العيار التقيل جدا جدا واللى مش ممكن حد يعرف يدونها وانا كنت من زمان هى مطلوبة ومتردد خايف منها يعنى لكن قلت المفروض انى ادونها رائعة عبد الوهاب
ياجارة الوادى

واو وهذه تضاف الى النوتات النادرة والفريدة الرائعة الاعجازية الى سجلك الرائع والنادر