* : تترات المسلسلات التلفزيونية (الكاتـب : راضى - آخر مشاركة : حازم فودة - - الوقت: 13h37 - التاريخ: 28/03/2024)           »          محمد شريف (الكاتـب : loaie al-sayem - آخر مشاركة : اسامة عبد الحميد - - الوقت: 23h50 - التاريخ: 27/03/2024)           »          سعاد محاسن (الكاتـب : سماعي - آخر مشاركة : نور عسكر - - الوقت: 19h25 - التاريخ: 27/03/2024)           »          الشيخ محمد صلاح الدين كباره (الكاتـب : احمد البنهاوي - آخر مشاركة : kabh01 - - الوقت: 09h52 - التاريخ: 27/03/2024)           »          سلمى (الكاتـب : حماد مزيد - آخر مشاركة : عطية لزهر - - الوقت: 09h18 - التاريخ: 27/03/2024)           »          سمير غانم- 15 يناير 1937 - 20 مايو 2021 (الكاتـب : محمد البتيتى - آخر مشاركة : نور عسكر - - الوقت: 01h14 - التاريخ: 27/03/2024)           »          سلوى رشدي - مونولجست (الكاتـب : حازم فودة - آخر مشاركة : نور عسكر - - الوقت: 00h43 - التاريخ: 27/03/2024)           »          الثنائي سعد و اكرام (الكاتـب : abuaseem - آخر مشاركة : نور عسكر - - الوقت: 00h09 - التاريخ: 27/03/2024)           »          سعاد وجدي (الكاتـب : نور عسكر - - الوقت: 23h25 - التاريخ: 26/03/2024)           »          خالد عبدالله (الكاتـب : abuaseem - آخر مشاركة : محمود نديم فتحي - - الوقت: 23h11 - التاريخ: 26/03/2024)


العودة   منتدى سماعي للطرب العربي الأصيل > صالون سماعي > ملتقى الشعر و الأدب > نتاج الأعضاء.. شعر العامية والشعر النبطى

رد
 
أدوات الموضوع طرق مشاهدة الموضوع
  #1  
قديم 28/06/2019, 14h34
hany57 hany57 غير متصل  
مواطن من سماعي
رقم العضوية:577594
 
تاريخ التسجيل: mai 2011
الجنسية: مصرية
الإقامة: مصر
المشاركات: 179
افتراضي حكاية مرزوق

حكاية مرزوق
-----------
بعد الصلا ع النبى كتر الصلا أنوار
نبى جى رحمة لنا بعته إله غفار
يارب صل عليه فى كل ليل ونهار
صلاه بها تسعدنا وتنجينا من النار
-----
الليلة نحكى يا سادة يا أهل الأدب والذوق
حكاية فيها العبر وبطلها كان مرزوق
علشان بقا نتعظ واللى مافاقشى يفوق
ونشوف حياتنا ازاى وأمورنا كيف تندار
-----
مرزوق معاه اخواته ورثوا عشر فدادين
غيره تلات صبيان معاهم كمان بنتين
حيزوا مرزوق لوحده كان ورثه فدانين
وطلع له ويا الأرض أوضتين كمان فى الدار
-----
خاله قال جوزوه خلوه يتأهل
شافوا واحدة بنت حلال وربنا سهل
من تحت من بلقاس وبسرعة قام شهل
فى شهر كان متجوز وزفوه وبالمزمار
-----
ومراته كات طيبة وغريبة عايزه تعيش
تكفيها هدمة نضيفة وأى لقمة عبش
وتصون حقوق الجيرة والملح ويا العيش
وكمان مع سلايفها ميه تطفى النار
-----
على جوزها بدأت تلم ويعملوا حاجة
علشان بقا يوفروا يبقا معاهم حاجة
وكمان ما يجيشى يوم وتكون محتاجة
فى فترة اربع سنين كانوا اشترولهم دار
-----
وكانت جابت بنوتة قاموا سموها بسمة
وبعد سنتين كمان جالهم عليها همسة
والبنت التالتة جات وسموها قسمة
قالوا خلاص نكتفى خدوا عهد مع إصرار
-----
وتمر بقا ليام ومرزوق فى غيطه وحيد
مفيش معاه غير مراته وتقول له إيد على إيد
ومفيش معاه صبيان تسند وأيه هيفيد
يكتم كلامه جواه ومفيشى أى حوار
-----
مشيوا البنات فى المدارس ومصاريفه كات تكبر
وهو يصرف عليهم مافى يوم بيستخسر
وأى طلبات ليهم يلبى ما يتأخر
وكانوا دوام ناجحين وتملى م الشطار
-----
ولما وصلت بسمة لسن التمانتاشر
طلبوها ناس للجواز جماعة من عيلة عامر
لواحد معاه دبلوم وكا أبوه تاجر
والبنت غاوية العلام بس مفيش أعذار
-----
علشان دا سلو البلد والبنت ليها الجواز
ومفيش قولة تعليم لو حتى ولعت بجاز
ولأن دى أخرتها يبقا وجب إنجاز
ويبقا العريس للعروسة بعد كتابة وإشهار
-----
وطلعت م المدرسة طلعة نهائية
والبنت غاوية العلام والحلم كلية
وبعد أربع سنين شهادة جامعية
بس مفيشى سمع ومفيش كمان إبصار
-----
واتفقوا بقا ع الجهاز وأهل عريسها شداد
قالوا علينا أوضتين وشهرين دا أقصى ميعاد
وانتم عليكم أوضة والمضبخ كمان سجاد
غير النجف والستاير وأوضة كمان للصغار
-----
والشبكة دى بالنص وحفلتها تبقا عليكم
سهرة الدخلة علينا وتخففوا مداعيكم
ونعملها فى قاعة النادى دى أحسن لينا وليكم
ونجيب كمان حاجة ساقعة و دى جى وسير أنوار
-----
وأما حاجة المضبخ ودى بدون تفاصيل
هتجيبوا تلاجتين وديب كمان م التقيل
وكمان بوتاجازين وغسالتين بالقليل
والماركة تكون كريازى أو حتى الكتروستار
-----
وللحما زيهم علشان تكون راضية
وتجيبوا تلات مكانس حماتها مش فاضية
وفوق حاجة المضبخ تجيبوا ماهى رايدة
تجيبوا لها كمان توكتوك وكام عباية بكنار
-----
وعشان دا سلو البلد ما اعترض مرزوق
وعايش ليله فى فكر ونهاره ما بيفوق
وأهل العريس وحشين بس العريس واد زوق
ومرزوق حابس نفسه اسبوع تمام فى الدار
-----
وقال مابدهاش عنها وباع فدان
جهز حاجات العروسة وبر نفسه كمان
جاب له تلات جلاليب بلدى كمان بقيطان
وعوج طاقيته على ناحية وكأنه م النظار
-----
فاتت جوازة بسمة وبعدها بسنتين
جات جوازة لهمسة يجهزها بس منين
ومفيش غير الفدان لو باعه ياكلوا منين
قام قال هشوف حل تانى وأشغل الأفكار
-----
رهن الفدان للبنك وجاب سلفة تيجى حقه
وقعد يفنجر هنا وهناك ماهو حقه
على الجهاز الكبير كان بس مين زنقه
ويبقا الجهاز بالعقل والناس ياما أعذار
-----
سدد خمس أقساط وبعدها ملقاش
يكمل سداد ازاى حتى داره مفيهاش
حاجة يبيعها بمبلغ يدور بقا ملقاش
والبنك ماستناش وبعت له كام إنذار
-----
وبعد تانى انذار عقله بقا بيتوه
دا كل شيئ بيضيع ورثه خده عن ابوه
وصحى فى يوم مرزوق وراح وقاصد أخوه
قام عنفه بالكلام وقال له دا استهتار
-----
على قدك كنت جهز بدل ما تتمطع
وتجيب م الحاجة تلاتة لعريس بيستنطع
على كل حاجة نام دلوقتى يتمتع
وانت مصيرك السجن ليله سواد ونهار
-----
مرزوق خدهم فى جنبه على بيته قام روح
رجليه مهيش شايلاه ماشى بيتطوح
يدوب دخل م الباب ومراته بتنوح
م الفكر ضغطه على طب فى وسط الدار
-----
خدوه وراحوا المستشفى على ما وصل كان مات
وبعدها باسبوع البنك عمل حجوزات
الأرض باعها لصالحه والدار كمان بالذات
والبنك أخد فلوسه وفاض ألف جنيه يا حضار
-----
ادوها بقا لمراته أخدت معاها قسمة
رجعت لبيت أهلها مكسورة ودى القسمة
هيصرفوا عليها بقا وللا على قسمة
واتشردت الأسرة بعد الزمان ما دار
-----
وان كان يا اخوانا لسه فى العمر تانى بواقى
وماوافتنيش المنية سبحان الحى الباقى
هيبقا فيه مرة تانية ونحكى ساعة التلاقى
حكاية ليكم جديدة بأمر م الغفار
-----
هانئ الجمل
رد مع اقتباس
رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
طرق مشاهدة الموضوع

تعليمات المشاركة
You may not post new threads
You may not post replies
You may not post attachments
You may not edit your posts

BB code is متاحة
كود [IMG] متاحة
كود HTML معطلة

الانتقال السريع إلى


جميع الأوقات بتوقيت GMT. الساعة الآن 14h13.


 
Powered by vBulletin - Copyright © 2000 - 2010, Jelsoft Enterprises Ltd