رد: سؤالي بخصوص الكمان الصيني
استاذ عادل صموئيل ... انا معجب بحضرتك جدا و بقالى فترة بحاول اتعلم العب كمنجة بس جبت واحدة صينى و بصراحة صوتها وحش و مش مخلينى اتدرب عليها او اتقدم فى التعليم ف قلت اجيب واحدة المانى بس مش عارف ازاى اعرف انها المانى او قديمة و انها تستاهل ثمنها خصوصا انى مقدرش افرق بين الكمنجة الحلوة والاحلى يا ريت يا استاذ عادل تقولى اعمل ايه و تساعدنى
الأخ العزيز
اهلا بك فى المنتدى
بالنسبة لسؤالك اولا لازم تتوافر عدة شروط يعنى الكمان مش ممكن وما ينفعش تتعلمه بدون مدرس خصوصى يعلمك الكمان , اما بالنسبة للكمنجة اللى اشتريتها انا عندى نظرية انك الاول لازم تتعلم على كمنجة تعبانة بعدين لما توصل مستوى حلو ممكن ساعتها تشوف كمنجة احلى , بمعنى انك االنهارده لو مسكت كمنجة بمليون جنيه مش حاتحس بقيمتها وانا بشبه العملية دى بقيادة السيارات , يعنى الاول الواحد لازم يتعلم القيادة بعدين يجيب عربية قديمة يخبط فيها وتخبط فيه لحد ما يتفهم العربيات كويس ساعتها لو جاب عربية على الزيرو حايحس بنكهتها وقيمتها لكن لو ركب العربية اللى على الزيرو على طول حا يكسرها ومش حايحس بيها , كمان الخبير فى العربيات لما ييجى يختار عربية من 3 عربيات بيختار اللى تعجبه بناء على مواصفات هو عايزها لكن الجديد مش حايفرق بين ال 3 عربيات , انا انصحك اتعلم كمنجة الاول على كمنجتك الغللبانة بعدين نتكلم , واخطر ما فى الموضوع ان الكمنجات القيمة مش متوفرة فى السوق , يعنى انا مثلا لو عايز اشترى واحدة حلوة مش حانزل المحل كذا واشتريها ولكن تحتاج ابحاث واتصالات وده بيخلى الكمنجة الحلوة مالهاش سعر محدد يعنى تخضع للعرض والطلب , يعنى لو لقيتها اللى بيبعها بيطلب سعر وانت يا تعجبك يا ماتعجبكش , وده طبعا بيتحدد من ايه ؟ انكم تكون بتعرف تعزف كويس عشان تحس بالكمنجة ولو عجبتك مش مهم الفلوس مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 09/07/2010 الساعة 09h51
|