طلبات نوتة أ / عادل صموئيل الجزء الثانى - الصفحة 904

**عاصم المنشاوى** · #**9031** 23/05/2023, 07h38

استاذ عادل....

صباح الخير على حضرتك...لو أمكن..أو ليك مزاج..

من أغانى فايزة وعبد الوهاب وحسين السيد"تراهنى"...فى بداية 1964..وكعادة حسين السيد..أعظم من يكتب عن مشاعر المرأة بجد...جايز عشان كان وحيد أخواته البنات...؟ اسمع كلمات أغنية ساكن قصادى...الشوق والحب..حبك الجبار..ألخ

أو أغنية نجاة وبليغ حمدى و مأمون الشناوى.. "راجع بتسأل"...انتاج سنة 1963 ..بعد توقف عن الغناء لمدة 4 سنوات...لما الأذاعة رفضت التعاون مع نجاة ..وأول أغنية رجعت بها كانت الأغنية دى..ياسلام عالأذاعة لما تغضب على حد..ياأستاذ عادل..مش زى دلوقتى...اليوتيوب موجود والفلاشة موجودة ..وأى حد يعبى أى حاجة ..فى أى حاجة...

**عادل صموئيل** · #**9032** 26/05/2023, 02h33

احبائى .. ردا على اخى العزيز عمرو هنداوى السؤال : هل الكمنجة الكهربائية اضافت شىء للموسيقى كما اضاف الجيتار الكهربائى .. والاجابة اولا الجيتار الكهربائى عمل فرق الاول مع فرق الموسيقى الغربية .. بعد ماكان الصوت العام هادىء كان الجيتار الاسبانيش الكلاسيكى اللى حواليه بيحاولوا انهم يظهروه لكن لما ظهر الجيتار الكهربائى بقت مباراة فى الدوشة يعنى لما تشوف المدافع اللى بيعملها الدرامز ايام الجيتار الاسبانيش كان بيعزف برقة عشان ما ياكلش الفرقة .. اما فى الموسيقى الشرقية الجيتار الكهربائى فرق مع وجود عمر خورشيد يعنى قبل عمر خورشيد كانت الصولوهات بسيطة جدا لكن مع ظهور عمر الصولوهات ابتدت تبقى اكبر واصعب واجمل وبالذات لما دخل عليه الربع تون من وجهة نظرى الجيتار اضاف شىء وكان له بصمة .. لما نيجى للكمنجة .. اول مرة شفناها كانت فى رسالة من تحت الماء الصولو بتاع محمد مصطفى .. هى كانت تقليعة او حاجة جديدة ولو تلاحظ ان عبد الحليم ماكررهاش تانى .. العزف كان على طريقة اسمها زيجان وده موسيقى الغجر فى اوربا وهى لون طبعا بيعتمد على الشقاوة دى فى العزف .. بس فى نفس الاغنية جه صولو الحفناوى فى الكوبليه الاخير الكمنجة الكلاسيك طبعا بان الفرق بين الاصل وبين التقليعة طبعا ده كان الصولو رقم ( عدد كبير اوى اوى ) للحفناوى فى مختلف الاغانى وبالذات السيدة ام كلثوم يعنى الحفناوى قال انا مازلت ادعى ملك الطرب .. وقتها كانت فيه كبسولة عبارة عن ميكروفون مبطط طالع منه سلك طويل .. وكان العازف بيستسمح عازف الجيتار يحط له الجاك فى عين فى الامبليفاير بتاعه ... وانا عزفت مع سمير صبرى شوية واستعملتها .. اول عيب فيها انها بتخلى ال 4 اوتار مش متجانسين .. يعنى اى عازف كمنجة خطير لازم انت ماتحسش انه انتقل من وتر لوتر تانى .. وده بييجى من ضبط العمود وده اصعب حاجة فى صيانة الكمان لأن له مكان فى الكمنجات المحترمة لو اتحرك ربع شعرة ما يخليش الاوتار متجانسين مع بعض ودى كارثة .. الكبسولة دى كنا بنثبتها على الكمان بأستك او مطاط وكانت مشكلتها ان السلك بينك وبين عازف الجيتار ممكن حد يدوس عليه اويتخلع وتقعد تشاور لعازف الجيتار يثبته كويس كانت مشكلة مقرفة .. طبعا كان مش متوفر ان عازف الكمان يجيب معاه امبليفاير خاص لأن وقتها كان الامبليفاير وزنه 50 كيلو جرام.. بعدين تطورت الكبسولات بقت ميكروفون صغير اد حبة العدس بيوضع داخل الفرسة يعنى بيعملوا ثقب ف الفرسة ويلزقوه فيه .. وطبعا كان باقى كل المشاكل موجود .. بعدين ظهرت الكمنجة الكهربائية ( يعنى خلى بالك بتاعة احمد مصطفى سموها كمان كهربائى كده وخلاص عشان عبد الحليم يحس انه بيقدم اختراع للجمهوريعنى جيتار كهربائى واورج كهربائى واكورديون كهربائى وكمان كهربائى ) هى كانت كمان عادية ومحطوط فيها كبسولة .. بعد كده ظهرت الكمنجة الكهربائية .. وانا طبعا متابعها بس عمرى ما مسكتها والشهادة لله يعنى انا غلبان على اد حالى عازف متواضع بس ليا معجبين .. احد المعجبين فى دولة عربية حب يجيب لى هدية وقال لى ابعت لك واحدة عندنا محلات فيها احدث اختراعات الكمنجة الاكويستك او الكهربائية .. انا قلت له شكرا ما ينفعش لأن الكمنجة بالذات ومع انا بالذات ان ما كنتش انا بنفسى اعزف عليها وقت طويل واعزف على غيرها واختار اللى تعجبنى .. ولازم مش بس تعجبنى يعنى لازم تجننى ما ينفعش اقتنيها .. ودى مش حاتتوفر لو ارسلها لى يعنى ممكن ووارد جدا ماتعجبنيش حركنها يبقى ضاعت قيمة الهدية ..... المهم .. علميا بقا .. الكمنجة الاكويستك استمدوا فكرتها من فكرة الجيتار الكهربائى وهى وصع يونيت او وحدة اليكترونية فيها6 ميكروفونات دقيقة جدا جدا عند فرسة الجيتار كل ميكروفون بتاع وتر ... واكيد طبعا فى التنقيح والتعديل ممكن يكون الميكروفونات دى مختلفين يعنى الوتر الغليظ له ميكروفن غير بتاع الوتر الحاد ... بعدين الجيتار بيخرج منه كابل رايح للمكبر او الامبليفاير اللى فيه مفاتيح تحسن الصوت زى البيز والتريبل وخلافه .. كانت الكمنجة الاكويستك الاولى من الالمنيوم الخفيف اوى وزنها اد الكمنجة الخشب .. وفيها الوحدة اللى قلنا عليها فى الجيتار تحت الفرسة وفيها 4 ميكروفونات .. وبعدين تطورت ( عشان المشكلة الخطيرة بتاعة السلك انه بيفصل وحد يدوس عليه ) عملوها لاسلكى ودى حلوة طبعا تبقى واقف مش متوتر انحد يقطع عليك الصوت وانت بتعزف بالذات لو صولو .. بس من ووجهة نظرى ك قيمة الكمنجة الاكويستك ما اضافتش شىء للموسيقى ممكن اضافت للموسيقى الجاز الغربية لكن عندنا طلعت نزلت تقليعة ومافيش زى الكمان التقليدى .. انا طبعا اى كلام بتكلمه هو خلاصة عمر قضيته مع عبد الوهاب والسنباطى والعمالقة .. وتشربت بدماغهم .. هم ربنا اداهم ادراك بين الحاجة الاصيلة الى مش ممكن تندثر وبين التقليعة ..لأن التقليعة بتفرقع ف وقتها لكن بعدين بتبقى موضة مقرفة .. بالذات مع الافراط فيها ..يعنى لو عبد الوهاب حضر الكمنجة الاكوستيك كان ممكن استعملها فى لحن واحد فقط وما يجيش جنبها إلا بعدعشر الحان .. يعنى فيه ظاهرة مقرفة نتيجة عدم التذوق ..ونتيحة رحيل الملحنين الاساتذة العظام اللى يقول للعازف ماتعزفش كده ... واحد عمل حاجةعندنا فى الكمنجة اسمها فلاوتاتو يعنى مش بيضغط بصوابعه على النغمات لكن بيلمسها بس .. ده بيخلى صوت الكمنجة انين غيرلما تضغط على الوتر بيطلع صوت الكمنجة الجميل .. شفت الشيف الشربينى ؟ امتى بيحط ملح ازيد وامتى بيحط توابل كذا مش ف اى حاجة وخلاص .. يعنى الحفناوى فى صولو اغنية حب ايه لأم كلثوم الصولو بياتى حزين عمل فيه حرفين الفلاوتاتو الحزين ده ما باب ايه ؟؟؟؟؟ التجميل طبعا طلع شىء يهبل زى ملعتين سكر على كوب شاى ... المصيبة عازف عملها وطول شوية فوجئت لمدة سنة ان كل العازفين بقوا يعزفوا بنفس الطريقة .. ما بقاش جمال .. بقا قرف... بقا خمسين ملعقة سكر على كوب الشاى ..طيب ايه فوائد الكمنجة الاكوستك .. مع المبتدئين لما تيجى تشترى كمنجة صينى الكمنجات بقت زبالة فى منتهى الرداءة وممكن تدفع 1000 جنيه زيادة وتجيب واحدة اكويستك اهى مهما كانت صوتها طالع من الامبليفاير يعنى ممكن تحسنه .. كمان ميزة الكمنجة المحترمة لازم يكون العمود بتاعها مظبوط 100% والناهردة مش اى فنى يقدر يظبطه قليلين اوى اوى الخبراء كمان لازم فرسة لاتقل عن 50 دولار وتتوضب عن فنى برضه .. الاكوستيك الميزة الوحيدة اللى فيها مافهاش عمود وممكن تركب لها اى فرسة صينى حاتشتغل لأن الشغل كله فى الامبليفاير طبعا ممكن حد بيستعملهم يضيف حاجة انا ما قلتهاش او يقول معلومة زيادة مع اطيب تحياتى

**عادل صموئيل** · #**9033** 28/05/2023, 12h41

احبائى
من روائع فايزة احمد

تراهننى
اللحن ده صعب وفيه شغل حلو اتمنى يعجبكم وشكرا اخى عاصم المنشاوى
مع اطيب تحياتى

**عاصم المنشاوى** · #**9034** 28/05/2023, 16h44

أستاذنا ومولانا...

يافندم العفو...احنا اللى متشكرين......

تسلم روعاتك وأبداعاتك ...و مجهوداتك .....معلش بنتعبك معانا.....

**خالد على البشرى** · #**9035** 28/05/2023, 20h06

مساء الخير استاذ عادل
شكرا على الكم الجميل من النوت الموسيقية التى اغرقتنا بها
واخرها لفايزة احمد
استأذنك فى اعادة تنزيل نوتة اغنية محمد العزبى - بهية
حيث انى احاول تشغيل النوتة الموجودة فى الموقع على برنامج pdf To Music ولكنها لا تعمل عندى
ارجو اعادة تفريغ النوتة القديمة و تنزيلها من جديد على البرنامج pdf حتى تعمل على البرنامج
ولك جزيل الشكر

الاغانى التانية بتفتح ؟شوف دى طيب

**mahmoud feteih** · #**9036** 29/05/2023, 17h12

الاستاذ الكبير شكرا علي المعلومات القيمه كما عودتنا ...
اغنية ومالو أدى الهوا وادى حاله للراحله ورده الجزائريه ملقتهاش في فهرس نوتاتك واستغربت انها مش موجوده وانت عودتنا علي تدوين الالحان الجميله ..الاغنيه دى بتفكرنى بايام الجامعه وحترجعنى اربعين سنه ولك منى جزيل الشكر

**خالد على البشرى** · #**9037** 30/05/2023, 18h26

اقتباس:

المشاركة الأصلية كتبت بواسطة خالد على البشرى

مساء الخير استاذ عادل
شكرا على الكم الجميل من النوت الموسيقية التى اغرقتنا بها
واخرها لفايزة احمد
استأذنك فى اعادة تنزيل نوتة اغنية محمد العزبى - بهية
حيث انى احاول تشغيل النوتة الموجودة فى الموقع على برنامج pdf To Music ولكنها لا تعمل عندى
ارجو اعادة تفريغ النوتة القديمة و تنزيلها من جديد على البرنامج pdf حتى تعمل على البرنامج
ولك جزيل الشكر

الاغانى التانية بتفتح ؟شوف دى طيب

شكرا لك استاذى العزيز الملف الجديد فتح واشتغل كويس
ربنا يخليك ويعطيك الصحة والعافية

**سامريونس** · #**9038** 31/05/2023, 17h23

السلام عليكم ورحمة الله وبركاته
الاستاذ القدير عادل شو اخبارك طمني عنك يا غالي مشان اغنيه علي الحجار شو القصه مو حابب نوطه يا استاذنا منا غيرك
رابط الاغنيه https://youtu.be/dlIINtARgkY

**خليل سليم** · #**9039** 03/06/2023, 23h44

صباح الخير استاذنا الفاضل عادل المحترم وشكرا على ما تقدمة لنا من روائع التدوين وعلى ذكر رائعة تدوين اغنية تراهنني لفائزة احمد هناك اغنية اخرى لفائزة احمد انساني ياحبيبي وهي اغنية حلوة من كلمات ولحن وصوت سجي فارجو من حضرتك اذا سمح الوقت لتدوينها وشكرا لحضرتك وحفظك الرب

**عادل صموئيل** · #**9040** 04/06/2023, 19h21

احبائى
اغنية الفنانة شادية

يابهية وخبرينى

مع اطيب تحياتى