الحلقه الخامسة (وفاة ادهم حياه لـ رشدى)
مشوار الفنان محمد رشدى
#رشدى_المغنواتى
________________
* مايو 1959 رشدى عريس جديد ( يادوب 5 شهور) وعنده حفله فى مدينة فايد ،
بيروح الحفله وبيغنى وبتخلص الليله ، لكن وهما راجعين الأتوبيس بيعمل حادثه
وزمايله بيموتو (المطربة نادية فهمي والراقصة سلوي المسيري وغيرهم)
ورشدى بيتصاب اصابه جامده جداً لدرجة انهم كانوا هيقطعوا رجله ، وكمان وشه اتشوه (بعد كده بسنتين عمل عملية تجميل) وسبحان اللى طلعه سليم من الحادثه .
بيتجبس ويفضل فى السرير مده طويله .
* فى الوقت ده بيكون الرئيس عبد الناصر بينادى بالإشتراكيه وكده ،
فيقرروا نشر الحس الوطنى عن طريق الإذاعه وعمل ملحمه وطنية ،
وبيختاروا قصة (ادهم الشرقاوى)
* ادهم من إيتاى البارود محافظة البحيره ومات عام 1921 وعمره 23 عام
وكان بطل شعبى وحارب ضد الإنجليز ولكن المستعمر البريطانى شوه صورته فى الصحافه ونشر انه لص وقاطع طريق
لكن الفن انصفه واتعملت حكايته مسلسل فى الراديو وفى فيلم سينمائى
ومسلسلين فى التليفزيون ( كلام كتير بس بنحاول نلم الحدوته 😂 )
* نرجع لعمنا رشدى ، المؤلف محمود إسماعيل جاد والمخرج يوسف الحطاب بيروحوا الإذاعه بالصورة الغنائيه او المسلسل الإذاعى (ادهم الشرقاوى) وبيقابلوا
الاستاذ (الشجاعى) مراقب عام الموسيقى فى الإذاعة ،
وبيطلبوا منه مطرب يغنى المواويل ( 85 موال) وبيقدموا إختيارات ( محمد عبد المطلب / عبد الغنى السيد / عبد العزيز محمود )
لكن (الشجاعى) يقولهم اللى هيغنى (ادهم) هو المطرب ( محمد رشدى) بتاع اغنية (مأذون البلد)
* هاتولنا بقى سى محمد رشدى ، دا مكسر ومتجبس فى البيت ،
ماليش دعوه المهم ان صوته شغال يبقى يحضر فوراً 😂
* وقد كان ، يجى رشدى ويستلم الورق ، ويقرر انه يلحن الموضوع بنفسه ،
ويبداء يجمع ويسمع كل الناس اللى غنت المواويل القديمه ،
ويستحضر كل المنشدين اللى سمعهم فى طفولته فى الموالد ، ويلحن الشغل
* وربك لما يريد ويكون كاتب النجاح لحد ماحدش يقدر يمنعه ☝️
1961الموضوع ينزل ويكسر الدنيا
نجاح ساااحق ورشدى اسمه يكبر ونجمه يلمع
* محمد رشدى اتجوز ام اولاده فى 1959 وخلف ولدين وبنت :
(طارق) محاسب و(سناء) خريجة خدمة اجتماعية و(أدهم) محامي
لكن كان له جوازه قبل كده بكام سنه من راقصه ايام ما كان بيغنى فى شارع محمد على ، اتجوزها وخلف منها ولد سماه (رشدى) وكان بيدلعه (عادل)
لكن الجوازه ما استمرتش وانفصلوا بعد مشاكل ،
لكن بعد كده زوجته التانيه ( ام طارق) طلبت منه يجيب (عادل_ وهو عنده 4 سنين) يتربى وسط اخواته
(عادل حالياً فى لندن شغال مهندس)
(واضح ان صلاح عطية شغال مخابرات 😂
* قبل مانقفل الحلقه دى خلينا نقول ان رشدى شارك بالغناء فى افلام السينما الفتره دى (56 -59) فى ست افلام كل فيلم فيه غنوه او اتنين ،
بس برضه مفيش حاجه فيهم علمت قوى ،
لكن التقيل جاى والنجاح كله جاى
مع مين بقى ؟ مع حد جاى من بعيد وجايب الخير معاه
ده اللى هنعرفه مع بعض فى اللى جاى وعليكم خير
رد: محمد رشدي
العرض العادي
