حكاية عبد الحكيم
---------------
بعد الصلا ع النبى سيد ولد عدنان
نبينا بعته الإله رحمة لبنى الإنسان
يارب شفعه فينا وارحمنا يا رحمن
واقبل صلاتنا عليه دايما فى كل أوان
-----
عبد الحكيم طول عمره ملوش عمل معروف
والعيشة عيشة الكفاف لأى حد يشوف
فى أواخر ايامه ظهر اللعب ع المكشوف
طلع تاجر كيوف والمستخبى بان
-----
كان الأول نشاطه بره بلدنا بعيد
ولما اتعرف الكلام عليه وبالتأكيد
ظهر بوشه الحقيقى لو حتى راح فى حديد
وبقا يبيع فى العلن ووشه بات عريان
-----
والخلفة خلفة بنات وعليها واد ووحيد
علشان كدا سماه بقا زى حالته وحيد
نشأ بقا مدلع فى الحجر هو وحيد
واخواته بتدلعه ينادوه زين الجدعان
-----
وزين الجدعان بتاعهم وسط العيال خيخة
بيدحرجوه وسطهم تقولشى بطيخة
عملوه بقا لعبتهم ينادوه يا ميخة
كانوا كمان يركبوه مايقدر يقول تعبان
-----
ليام أهى بتعدى عكرة ومسيرها تروق
والعيشة أهى تنقضى بالعافية أو بالذوق
وحيد أخد ثانوية وراح التحق بحقوق
وعشان مالوشى عمل انضم للإخوان
-----
وعمل له مكتب صغير وزباينه كانوا منهم
كانوا يشوفوله أى حاجة علشان واحد منهم
وينفعوا بعضهم شايفيتا مش منهم
ولو فى يوم احتاجوك يقابلوك كما الخلان
-----
كبر وحيد وسطهم وشويه قاموا جوزوه
بنت الأمير فى البلد واللى معاه حسدوه
خلاص ضمن يتصعد يسبق لناس ضموه
وكان الفرح مقتصر على عائلات لخوان
-----
شوية مات عبد الحكيم قول سبحان الدايم
وحيد افتكر الزمن جاى ع التاريخ رادم
مفيش حاجة بتتنسى بس وحيد واهم
كتير تعيش الذكرى أكتر من الإنسان
-----
وحيد فى أول سنة جالو بنت سموها ريم
تانى سنة جالو ولد قالوا دا عبد الحكيم
عمل وحيد حفلة جامدة فى سبوعه ياما معازيم
والأكل معمول صوانى أشكال على ألوان
-----
بيمشى بينا الزمن ووحيد بيتصعد
وكل مايترقى كان يمشى يتبغدد
واذا جاله أمر بيصدع ينفذ مايتردد
وكل مايلغى عقله يتصعد كمان وكمان
-----
وأصل الحكاية سبوبة منها عمل قرشين
وابنه وياه بيكبر قرب على العشرين
شوية قامت ثورة يناير خمسة وعشرين
والثورة حالا اتخطفت وركبوها الإخوان
-----
طاحوا بقا فى البلد وكل شيئ أخدوه
الحكم ومجلس شعب إعلام كمان ركبوه
أداروا البلد زى عزبة وقالوا زمانا ياهوه
وقامت الناس عليهم بثورة تانية كمان
-----
والجيش مسك الخيط ونفذ المطلوب
مفروض يحرر شعب على أمره بات مغلوب
يحرره من عصابة أصدق مافيها كذوب
والشعب ويا الجيش مسكوا البلد بأمان
-----
وربنا حما مصر بفضل منه عظيم
أكرمنا ربى بكرمه مفيشى غيره كريم
كانت البلد هتضيع سبحانه ربى رحيم
يارب احفظ مصر على طول مدى الأزمان
-----
نرجع بقا لوحيد فى الفترة دى عمل ايه
وصل له قرش كبير ما نعرف منين ولا ليه
نقل إقامته لمصر وعاش كأنه بيه
وكان اشترى أيامهم ع الدايرى كام فدان
-----
كمان فتح له مكتب تصدير مع استيراد
والشغل ماشى كويس ويوماتى جاى له إيراد
ومكسبه بيتضاعف يوم بعد يوم يزداد
وبرضه يسلك أموره وكله بالدخان
-----
وجات له جوازة لبنته جنب كدا دمنهور
لإبن واحد صاحبه ماشاه سنين وشهور
كان من جماعته وطبعه مايميلشى قوى لظهور
وإبنه كان زيه برضه يعنى الجميع إخوان
-----
ووحيد فرحان بإبنه وفرحان بقرش معاه
فى يوم أخد عربيته ومراته وابنه معاه
رايحين يزوروا العروسة واخد هدايا معاه
فى السكة يعملوا حادثة ووحيد يموت ياخوان
-----
ومراته وابنه سلام واتغيرت لحوال
وابنه غير لونه بقا فى الكيوف شغال
برشام وبودرة ماخلا وصرف كتير م المال
وورثه كله صرفه فى كام شهر ع الإدمان
-----
لما بقا ع الحديدة قال أنا اتصرف
حب يتاجر فى الصنف قالوا له بقا تعرف ؟
تقدر تشيل قد أيه وقد أيه تصرف ؟
قام قال لهم أنا اشيل لو حتى كان أطنان
-----
شال له شيلة صغيرة وقدر يصرفها
وشيلة فى مرة تانية وبرضه صرفها
ويدوب مشى فى الشغلة لسه بيعرفها
أخده البوليس متلبس وقضية قبل لومان
-----
وان كان ياخوانا لسه فى العمر تانى بواقى
وماوافتنيش المنية سبحان الحى الباقى
هيبقا فيه مرة تانية ونحكى ساعة التلاقى
حكاية ليكم جديدة بمشيئة الديان
-----
هانئ الجمل
حكاية عبد الحكيم
العرض العادي
